Ocina Cimue Ciwa ca Pita Omo Lioku Memenako!

Helen wa memenako osimbu a kala ocipepi lokakãlu kalivulu. Akãi vavili va pita ponele yaco.

AFEKO vavali, va kala oku endela kumosi oku pita Kocitumãlo cimue colomilu, Volupale luo Baguio ko Filipina. Ovo va mola okakãlu kalivulu, pole, ka endele pokakãlu kaco. Helen, manji ukãi wa talama pokakãlu kalivulu, wa memena lavo. Afeko vamamako lungende wavo, pole, va sola calua ndomo Helen a va vanja loku memenako.

Noke afeko vaco, poku tiukila konjo lokalela, vonjila va mola Onjango yimue Yusoma londimbukiso yo jw.org. Ovo va ivaluka okuti ondimbukiso yaco yimuamue leyi va mola kokakãlu kalivulu. Ovo va pinga oco okalela ka talame loku tala alivala olohongele vulala wa kapiwa vepito Lionjango Yusoma.

Akãi vaco vavili va memenako eci ovo va mola Helen Vonjango Yusoma.

Afeko vavali noke veya kohongele. Helie ovo va mola oku iñila Vonjango Yusoma? Va mola Helen! Ovo lonjanga yalua, va limbuka okuti una wa mamena eci ovo va kala oku pita onjila. Helen wa popia hati: “Eci ovo va kala oku iya kovaso yange, nda kala lusumba. Ame nda simile okuti nda linga cimue cĩvi.” Afeko vaco, va sapuila Helen okuti vo muile ale lokakãlu kalivulu.

Afeko vaco va sola ohongele kuenda va solavo oku kala lavamanji. Eci va molavo okuti vamanji vamue va kala oku yelisa Onjango Yusoma, va pulisa nda ci tava oku kuatisa. Umue pokati kafeko vaco wa ilukila kofeka yikuavo, pole ukuavo wamamako oku endaenda kolohongele kuenda wa fetika oku lilongisa Embimbiliya, cosi ca pita omo lioku memenako!