Ndomo Vosi Vekongelo va Kuatisa Ondonge Yembimbiliya Oku Amamako Toke Kepapatiso

1-2. Helie o pondola oku kuatisa ondonge yimue Yembimbiliya oku kula toke kepapatiso?

AMY o kasi ko Fiji wa popia hati, “Nda solaile ovina nda enda oku lilongisa kelilongiso liange Liembimbiliya. Nda kũlĩhĩle okuti eci ocili. Pole, eci nda fetika oku kala pamosi la vamanji, ca ñuatisa oku linga apongoloko loku papatisiwa.” Ulandu wa Amy u tu longisa ocina cimue ci kuete esilivilo liokuti: Oco ondonge yimue Yembimbiliya yamameko oku kula toke kepapatiso, ci sukila okuti vamanji vekongelo va ecavo ekuatiso liavo.

² Ukundi lukundi o pondola oku kuatisa koku kula kuekongelo. (Va Efe. 4:16) Ukundi umue wotembo yosi o tukuiwa Leilani o kasi ko Vanuatu, wa popia hati: “Ca popiwile ale okuti, vosi va kasi vimbo limue va pondola oku kuatisa oku kula kuomõla umue. Ame ndi sima ocina cimuamue catiamẽla koku longisa omanu oco va linge olondonge; eci ci sukila okuti ku kala ekongelo limue oco omunu umue eye vocili.” Olonjali, akamba kuenda alongisi vokosikola va kuatisa omõla koku kula kuaye. Ovo va ci linga poku vetiya omõla loku u longisa ovina vi kuete esilivilo. Cimuamue haico okuti, akundi vekongelo va pondola oku eca elungulo, evetiyo kuenda oku eca ongangu yiwa kolondonge Viembimbiliya, oco va kuatisiwe oku amamako toke kepapatiso.—Olosap. 15:22.

3. Nye wa lilongisa kolondaka via lomboluiwa la vamanji Ana, Dorin, kuenda Leilani?

³ Momo lie akundi va songola elilongiso Liembimbiliya va sanjukila eci akundi vakuavo vekongelo va kuatisa ondonge yimue? Ana ukundi umue o likasi wo ko Moldova wa popia hati: “Ci tĩla calua omunu umue lika waye oku tẽlisa ovina viosi ondonge Yembimbiliya yi sukila, eci eye a fetika oku kula konepa yespiritu.” Dorin ukundi umue o likasi okuti o kasivo ko Moldova wa popia hati: “Akundi vakuavo va popia ovina vi vetiya utima wondonge, okuti ame nda sia tẽlele oku ci linga.” Leilani wa tukuiwa ale, wa popiavo hati: “Ocisola kuenda esakalalo tu lekisa kondonge cu kuatisa oku limbuka afendeli va Yehova.”—Yoa. 13:35.

4. Nye tu ka lilongisa vocipama cilo?

⁴ Pamue o lipula ndoco, ‘Ndi kuatisa ndati ondonge yimue Yembimbiliya oku kula, nda okuti si kasi oku songola elilongiso lalimue?’ Tu konomuisi eci tu sukila oku linga eci tu lalekiwa oku enda kelilongiso limue Liembimbiliya kuenda eci tu sukila oku linga eci ondonge yi fetika oku enda kolohongele. Tu konomuisavo ndomo akulu vekongelo va pondola oku kuatisa ondonge Yembimbiliya oku amamako oku kula toke kepapatiso.

CECI O LALEKIWA KELILONGISO LIMUE LIEMBIMBILIYA

5. Ocikele cipi o kuete nda va ku laleka oku enda kelilongiso limue Liembimbiliya?

⁵ Kelilongiso limue Liembimbiliya, ukundi o lisongola eye o kuete ocikele ca velapo coku kuatisa ondonge oku kuata elomboloko Liondaka ya Suku. Nda ukundi waco wa ku laleka oco wendeli kumosi kelilongiso liaco, kũlĩha okuti vu kasi oku endela kumosi oco u kuatise. (Uku. 4:9, 10) Pole, nye o sukila oku linga oco ece ekuatiso liove vokuenda kuelilongiso?

6. Eci o ka songola elilongiso Liembimbiliya, o kapako ndati onumbi yi sangiwa kelivulu Liolosapo 20:18?

⁶ Pongiya ocipama ci ka lilongisiwa. Tete, pinga kukundi wa siata oku endisa elilongiso liaco, oco a ku lomboluileko ovina vimue viatiamẽla kondonge yaco. (Tanga Olosapo 20:18.) Lipula ndoco: “Kovina vipi ondonge yaco yi tava? Ocipama cipi o ka lilongisa laye? Nye o yongola okuti oco ondonge yi sukila oku kapako kelilongiso liaco? Kuli hẽ cimue ndi sukila oku linga, ale oku popia vokuenda kuelilongiso kuenda evi si sukila? Ndi vetiya ndati ondonge oku amamako oku kula?” Ocili okuti, ukundi wa siata oku songola elilongiso liaco, ka ci sukila oku ku sapuila ovina vio pokolika viatiamẽla kondonge, pole, yi ku sapuila ovina vi pondola oku ku kuatisa kelilongiso. Manji Joy omisionalia yimue, wa siata oku popia ovina viaco la vana vo kuama oku ka songola elilongiso Liembimbiliya. Eye hati: “Ombangulo yaco yi kuatisa vana ndi tunda lavo oco va lekise onjongole kondonge loku kũlĩha ndomo va ka ecavo ekuatiso liavo.”

7. Momo lie o sukilila oku pongiya nda wa lalekiwa oku enda kelilongiso limue Liembimbiliya?

⁷ Nda wa lalekiwa oku enda kelilongiso limue, ciwa oku pongiya ocipama ci ka kuamiwa. (Esera 7:10) Dorin manji wa tukuiwa ale, wa popia hati: “Ndi sole calua eci vana ndi tunda lavo koku kunda va pongiya ocipama ci ka kuamiwa. Eye o pondola oku eca ekuatiso li sukiliwa.” Kuenje eci ci ka kuatisa ondonge oku limbuka okuti kavali kene wa lipongiyi ciwa noke o ka kuamavo ongangu yaco. Ndaño okuti pamue kua tẽlele oku pongiya ciwa ocipama caco, sanda atosi a velapo.

8. Ohutililo o linga kelilongiso limue Liembimbiliya yi kuete esilivilo lie?

⁸ Ohutililo onepa yimue ya velapo kelilongiso Liembimbiliya, kuenje eci va kupinga oco o likutilile o sukila oku sokolola kovina o popia. Nda wa ci linga ohutililo yi ka lingiwa lonjila yimue ya sunguluka. (Osa. 141:2) Hanae, o kasi ko Japau ivaluka ohutililo yimue ya lingiwa la manji umue a laleka oku ka songola elilongiso Liembimbiliya. Eye hati: “Nda limbuka okuti eye wa kuata ukamba umue wa pama la Yehova kuenje nda yonguilevo oku kala ndoco. Nda limbukavo ocisola caye eci eye a kongela onduko yange vohutililo.”

9. Ndomo ca tangiwa kukanda wa Tiago 1:19, nye o sukila oku linga oco o kale oñuatisi yiwa kupange woku kunda?

⁹ Kuatisa una wa tunda laye kupange woku kunda vokuenda kuelilongiso. Manji Omamuyovbi ukundi o likasi ko Nigeria wa popia hati, “Una o tunda laye kupange woku kunda o sukila oku yevelela ciwa vokuenda kuelilongiso. Poku ci linga eye ecavo ekuatiso liaye, pole ka vangula calua, momo wa kũlĩha okuti ocikele coku longisa ci kasi kukundi wa siata oku songola elilongiso liaco.” O kũlĩha ndati epuluvi o sukila oku vangula leci ku sukila oku vangula? (Olosap. 25:11) Yevelela lutate osimbu ukundi kuenda ndonge va sapela. (Tanga Tiago 1:19.) Nda wa ci linga oco lika o ka tẽla oku limbuka ekuatiso lisukiliwa. Pole, osimbu kua vanguile o sukila oku sokolola. Ndeci ove ku sukila oku vangula calua, oku tetelamo ovisimĩlo viukundi, ale oku vangula cina okuti ka ci likuata locipama. Pole, o pondola lika oku kuatisa lolondaka vimue vi teta onimbu, locindekaise cimue, ale oku linga epulilo li kuatisa ketosi li kasi oku lomboluiwa. Pamue o liyeva okuti ku kuete calua coku popia velilongiso. Pole, nda wa pandiya ondonge kuenda oku lekisa okuti wo kapako o ka kuatisa koku kula kuaye konepa yespiritu.

10. Ulandu wove u pondola oku kuatisa ndati ondonge yimue Yembimbiliya?

¹⁰ Lombolola ulandu wove. Nda okuti ci kuatisa ondonge, lombolola ndomo wa lilongisa ocili, ndomo wa linga apongoloko, ale ndomo wa mola eka lia Yehova oku ku kuatisa. (Osa. 78:4, 7) Eci oco lika ndonge a ka sukila oku yevelela. Pamue ci ka pamisa ekolelo liaye, ale cu kovetiya oku amamako oku kula toke kepapatiso. Ci pondolavo oku u kuatisa ndomo a yula ovitangi a siata oku liyaka lavio. (1 Pet. 5:9) Manji Gabriel o kasi ko Brazil haeye ukundi wotembo yosi, ivaluka ekuatiso a tambula eci a kala ondonge Yembimbiliya. Eye hati: “Eci nda yevaile ovolandu a vamanji, nda limbuka okuti Yehova o lete ovitangi tu liyaka lavio. Nda okuti ovo va vi yula, lamevo ndi viyula.”

CECI ONDONGE YEMBIMBILIYA YI FETIKA OKU ENDAENDA KOLOHONGELE

11-12. Momo lie tu sukilila oku yolela ondonge Yembimbiliya eci iya kohongele?

¹¹ Oco ondonge Yembimbiliya yamameko oku kula toke kepapatiso, yi sukila oku endaenda kolohongele loku kapako ovina a yeva kolohongele. (Va Hev. 10:24, 25) Citava okuti ukundi o kasi oku u longisa eye u laleka onjanja yatete oku enda kohongele. Nda eye wa enda kohongele, vosi yetu tu u vetiya oku amamako oku iya Konjango Yusoma. Tu ci linga ndati?

¹² Yolela ondonge Yembimbiliya. (Va Rom. 15:7) Nda tua yolela ondonge kolohongele lonjila yimue yu vetiya, eye o ka vetiyiwa oku amamako oku iya Konjango Yusoma. Tu sukila oku u yolela ciwa loku u lekisa ku vamanji vakuavo. Ku ka sime okuti eye o kasi oku tatiwa ale ciwa, nda manji u longisa Embimbiliya handi ka pitĩlile, ale o kasi oku tẽlisa ovikele vikuavo Vonjango Yusoma. Yevelela lutate kovina ndonge a vangula loku lekisa okuti wo kapako. Onima yipi yi ililako nda wo yolela ciwa? Kũlĩhĩsa ulandu wa Dmitrii wa papatisiwa ndopo okuti cilo oñuatisi yekongelo. Eci eye a ivaluka onjanja yatete a endele kohongele, eye hati: “Manji umue wa ndi sanga posamua Yonjango Yusoma okuti nda kala losõi yalua kuenje locisola calua wa iñila lame Vonjango Yusoma. Vamanji valua veya oku ndi lama. Nda komoha calua. Nda ci sola calua kuenje nda yonguile okuti oloneke viosi viosemana tu kuata olohongele. Sia la mola ekalo ndeli komuenyo wange.”

13. Ovituwa viove viwa vi pondola oku kuatisa ndati ondonge Yembimbiliya?

¹³ Lekisa ongangu yiwa. Ovituwa viove viwa, vi pondola oku kuatisa ondonge oku limbuka okuti etu Tuakristão vocili. (Mat. 5:16) Manji Vitalii, okuti cilo ukundi wotembo yosi ko Moldova, wa popia hati: “Nda siata oku mola ndomo omanu vekongelo va kasi, ndomo va sima kuenda ovituwa va lekisa. Eci ci nyiha ekolelo liokuti Olombangi Via Yehova Akristão vocili.”

14. Ongangu yove yi kuatisa ndati omunu umue oku amamako kespiritu?

¹⁴ Oco ondonge yimue yi papatisiwe, yi sukila oku kapako ovina yi kasi oku lilongisa. Oku ci linga ka ca lelukile. Pole, eci ondonge yi limbuka ndomo wa siata oku kuatisiwa omo lioku kapako olonumbi Viembimbiliya, eye o vetiyiwa oku kuama ongangu yove. (1 Va Kor. 11:1) Konomuisa ulandu wa manji Hanae wa tukuiwa ale. Eye hati: “Vamanji olonjanja viosi va linga ovina vi ñuatisa oku vi setukula. Nda limbuka ndomo nda ponduile oku vetiya, oku ecela kuenda oku lekisa ocisola. Ovo olonjanja viosi va vangula ovina viwa viatiamẽla ku vakuavo. Nda yonguile oku setukula ovituwa viavo.”

15. Olosapo 27:17, yi tu kuatisa ndati oku limbuka esunga lieci tu sukilila oku linga ukamba lolondonge Viembimbiliya osimbu ovo vamamako oku endaenda kolohongele?

¹⁵ Linga ukamba lolondonge. Osimbu ondonge yamamako oku endaenda kolohongele, lekisa okuti wo kapako. (Va Fil. 2:4) Likolisilako oku u kũlĩha ciwa. U pandiya omo liapongoloko awa a kasi oku linga kuenda u pulisa eci catiamẽla kelilongiso liaye Liembimbiliya, kepata liaye kuenda upange waye, pole, ku ka linge apulilo o kutisa osõi. Ombangulo yaco yi pondola oku pamisa vali ukamba wene. Eci o linga ukamba lomunu una o longisa Embimbiliya o ko kuatisa oku amamako oku kula toke kepapatiso. (Tanga Olosapo 27:17.) Manji Hanae, cilo o kasi oku talavaya ndukundi wotembo yosi. Eye ivaluka eci a fetika oku endaenda kolohongele, eye hati: “Nda linga akamba vekongelo, ndamamako oku enda kolohongele ndaño okuti olonjanja vimue nda kavaile calua, pole, siala laña. Esanju nda kuata poku kala lakamba vange vokaliye ca ñuatisa oku liwekapo oku livala ukamba la vana ka va fendela Yehova. Nda nõlapo oku pamisa ukamba wange la Yehova kuenda la vamanji. Kuenje eci ca mbetiya oku papatisiwa.”

16. Nye vali o sukila oku linga oco o kuatise ondonge Yembimbiliya oku lianja vekongelo?

¹⁶ Osimbu ondonge yamamako oku kula konepa yespiritu kuenda oku linga apongoloko, u kuatisa oku liyeva okuti eye o tiamẽla vekongelo. O ci linga, poku kala ukuakuyekisa. (Va Hev. 13:2) Manji Denis, ukundi umue wo ko Moldova oku sokolola eci a kala ondonge Yembimbiliya wa popia hati: “Olonjanja vialua ame lukãi wange tua enda oku lalekiwa la vamanji. Ovo va enda oku tu lomboluila ndomo Yehova a va kuatisa. Eci ca tu pamisa calua. Vepuluvi liaco ca tu kuatisa oku limbuka okuti tu yongola oku vumba Yehova loku kuata ekalo liwa.” Eci ondonge yimue Yembimbiliya yi fetika oku kunda, o pondolavo oku u laleka oco vu tundili kumosi kupange woku kunda. Manji Diego ukundi umue wo kofeka yo ko Brazil wa lombolola hati: “Vamanji valua va enda oku ndi laleka oku enda kupange woku kunda. Eyi, ya kala onjila yiwa yoku va kũlĩha ciwa. Poku ci linga nda lilongisa calua kuenda nda liyeva ndu okuti ñasi ocipepi la Yehova kuenda la Yesu.”

NDAMUPI AKULU VEKONGELO VA PONDOLA OKU KUATISA?

17. Akulu vekongelo va kuatisa ndati olondonge vimue Viembimbiliya?

¹⁷ Sanda otembo yoku kala londonge Yembimbiliya. Ene akulu vekongelo, eci vu lekisa ocisola kuenda ocikembe kondonge yimue Yembimbiliya, vu pondola oku u kuatisa oku amamako toke kepapatiso. O sapela ndati lavo kolohongele? Ovo va ka limbuka okuti wa va kapako nda wa patekela olonduko viavo, ca piãla enene eci va fetika oku eca atambululo. O pondola hẽ oku linga esokiyo lioku enda lukundi umue eci eye a ka songola elilongiso limue Liembimbiliya? Limbuka okuti, nda wa ci linga o ka kuatisa olondonge vialua. Manji umue ukundi wotembo yosi o tukuiwa Jackie o kasi ko Nigeria, wa lombolola hati: “Olondonge vialua Viembimbiliya via komoha oku limbuka okuti manji wa ndi kuama oku songola elilongiso Liembimbiliya, ukulu wekongelo. Ondonge yimue ya popia hati: ‘Alongisi vetavo nda kala lalimue eteke va ci lingile. Ovo va pasuisa lika olohuasi kuenda va ci linga nda va va feta!’” Ondonge yaco cilo, yendaenda kolohongele.

18. Akulu vekongelo va tẽlisa ndati ocikele va va kundika ndomo ca sonehiwa kelivulu Liovilinga 20:28?

¹⁸ Pindisa kuenda pamisa ondonge yimue Yembimbiliya. Ene akulu vekongelo, vu kuete ocikele cimue ca velapo coku kuatisa akundi, oku lekisa ombili kupange woku kunda kuenda woku songola alilongiso Embimbiliya. (Tanga Ovilinga 20:28.) Nda ukundi umue o kuete osõi yoku songola elilongiso Liembimbiliya kovaso ove, lieca olumue oco o songole elilongiso liaco. Manji Jackie wa tukuiwa ale, wa lombolola hati: “Akulu vekongelo olonjanja viosi va ndi pula ndomo vana nda siata oku longisa Embimbiliya va kasi. Eci ndi kuata ocitangi koku songola alilongiso Embimbiliya ovo va nyiha onumbi yi sukiliwa.” Akulu vekongelo va kuete ovina vialua vioku linga oco va pamise kuenda oku vetiya akundi. (1 Va Tes. 5:11) Jackie wamisako hati: “Ame ndi sanjuka eci akulu vekongelo va ndi vetiya kuenda va ndi sapuila okuti va sanjukila elikolisilo nda siata oku linga. Olondaka viaco vi ndi talalisa ndeci oku nyua ovava a talala veteke liowuya. Olondaka viavo viocisola vi ñuatisa oku limbuka okuti ndi kasi oku linga upange uwa kokusongola alilongiso Embimbiliya kuenda oku vokiya esanju liange.”—Olosap. 25:25.

19. Esanju lipi vosi yetu tu sukila oku kuata?

¹⁹ Ndaño okuti pamue ka tu songola handi elilongiso Liembimbiliya tu pondola oku kuatisa ondonge yimue oku amamako toke kepapatiso. Ndaño okuti ka tu vangula calua, nda tua lipongiya ciwa kelilongiso liaco tu ka kuatisa ukundi o songola elilongiso liaco. Tu sukila oku linga ukamba lolondonge eci viya Vonjango Yusoma kuenje nda tua ci linga tu kala ongangu yiwa kokuavo. Akulu vekongelo va pondola oku vetiya olondonge poku pita otembo lavo kuenda oku pandiya akundi vana va endisa elilongiso liaco omo lioku va pindisa. Ka ci nena hẽ esanju lialua oku kũlĩha okuti tua panga onepa yimue koku kuatisa omunu umue oku sola loku vumba Isietu Yehova?