1 | Ohutililo “Yeki Kokuaye Asakalalo Ene Osi”

EMBIMBILIYA LI POPIA HATI: “Yeki … [ku Suku] asakalalo ene osi, momo eye o vu tati.”—1 PETULU 5:7.

Ceci ci Lomboloka

Yehova Suku o tu laleka oku sapela laye catiamẽla kocina cosi ci tu sakalaisa. (Osamo 55:22) Ove o pondola oku likutilila catiamẽla kovitangi viosi cikaile vitito calua ale vinene calua. Nda ocitangi caco ci kuete esilivilo kokuetu, ku Yehova ci kuetevo esilivilo. Oku likutilila kokuaye enanga limue li kuete esilivilo oco tu kuate ombembua yi lava ovisimĩlo vietu. —Va Filipoi 4:6, 7.

Ndomo Oku ci Linga ci tu Kuatisa

Eci tu liyaka luvei wovisimĩlo, tu pondola oku liyeva okuti tu kasi ulika. Omanu vakuavo halonjanja viosiko va ka kuata elomboloko liasuapo liovina tu kasi oku liyaka lavio. (Olosapo 14:10) Pole, eci tu sapuilako Suku lutima wosi pocakati cohutililo ndomo tu liyevite, eye olonjanja viosi o ka tu yevelela loku kuata elomboloko lieci tu yevite vutima. Yehova o tu lete, eye wa kũlĩha evalo lietu lovitangi vietu kuenda o yongola okuti tu likutilila kokuaye catiamẽla kocina cosi ci tu sakalaisa. —2 Asapulo 6:29, 30.

Oku sapela la Yehova pocakati cohutililo, ci pamisa ekolelo lietu liokuti, eye o tu tata. Tu pondola oku kuata ovisimĩlo vimuamue ndevi viukualosamo wa likutilila hati: “Ove wa siata oku mola ohali yange; ove wa kũlĩha esumuo liange lialua.” (Osamo 31:7) Oku kũlĩha okuti Yehova o lete ovina tu kasi oku liyaka lavio, ci pondola oku tu kuatisa calua oku amamako oku liyaka lekalo ka lia lelukile. Pole, eye ka lete lika ohali yetu. Eye o kuete elomboloko lieci tu kasi oku liyaka laco kuenda o tu kuatisa oku sanga elembeleko kuenda evetiyo Vembimbiliya.

Ndomo Embimbiliya Lia Siata Oku Kuatisa Julian

Ovitangi Esakalalo Lia Siata Oku Ndi Kokela

“Ame nda siata oku liyaka lesakalalo, esumuo lialua kuenda ovisimĩlo vĩvi. Nda siata oku liyaka lesakalalo vapuluvi ana sia lavokaile. Vepuluvi limue, ndi kasi ciwa, pole, noke ndi yeva esakalalo lialua ndaño ka kuli esunga liaco. Ndi yeva esakalalo ca piãla enene eci ndi kasi pokati komanu vakuavo. Nda siata oku sakalala leci ovo va pondola oku sima catiamẽla kokuange.

“Akamba vange vana va kũlĩha ocitangi cange cesakalalo, va linga cosi va tẽla oco va ndi kuatise. Ocili okuti, olonjanja vimue ovo va popia ovina vimue okuti ka vi kuatisa. Pole, ndi va pandula omo okuti va siata oku seteka oku ndi kuatisa.

“Olonjanja vimue, esakalalo liange, esumuo lialua kuenda ovisimĩlo vĩvi, vi lingisa okuti ci tĩla oku likutilila. Ndi sukila oku likolisilako calua oco ndi tiamisile utima kombangulo yange la Yehova pocakati kohutililo. Ovisimĩlo viange vi tungayala calua okuti olonjanja vialua si kuata elomboloko. Eci si tẽla oku lava ovisimĩlo viange, ci tĩla kokuange oku lombolola ku Yehova ovina ndi kasi oku sokolola ale ceci ndi yevite.”

Ndomo Embimbiliya Lia Siata Oku Ndi Kuatisa

“Nda siata oku lilongisa Vembimbiliya okuti olohutililo, ka vi sukila oku tumãla otembo yalua, oku vi linga lonjila yimue yoku vetiya ale oku longeka ciwa olondaka oco yi taviwe la Suku. Olonjanja vimue, nda si tẽla oku situlula ovisimĩlo viange kolondaka, ndi likutilila lika ndoco: ‘A Yehova, linga ohenda, ndi kuatise.’ Ndaño lolondaka viaco, ndi limbuka okuti, Yehova wa ndi kapako kuenda o nyĩha eci ndi sukila vepuluvi liaco. Sia siatele lika oku likutilila, pole, nda siatavo oku sanda ekuatiso liolondotolo. Ndi sanjukila oku popia okuti, nda pandula omo liekuatiso li tunda kolono evi momo ekalo liange lia mioñoloha calua. Ndaño okuti ci sukila alikolisilo alua oco ndi pinge ekuatiso ku Isiange wokilu, nda siata oku ci linga momo nda kolela okuti eye o ndi sole kuenda o yongola oku ndi kuatisa.”