Ceci Ciwa Leci Cĩvi: Ondaka Yimue Vosi Yetu Tua Siata Oku Liyaka Layo

Nda wa sukilele oku enda kocitumãlo cimue kua kũlĩhile, nye nda wa linga?

1. 1. Nda wa kuama onjila o sima okuti oyo ya suapo.

2. 2. Nda wa kuama omanu vakuavo loku lavoka okuti ovo va kũlĩha onjila ya suapo.

3. 3. Nda wa sanda oku songuiwa lonumbi yimue ya koleliwa ndeci o GPS, omapa yimue ale ekamba limue wa kũlĩha ciwa onjila.

Nda ove wa nõla onumbi yatete ale yavali, o ka pitĩla kocitumãlo cimue, pole, hakocitumãloko wa yonguile. Nda wa nõla onumbi yatatu, kolela okuti o ka pitĩla kocitumãlo wa yonguile.

Omuenyo wetu u sokisiwa loku linga ungende umue kuenda tu lavoka okuti ocitumãlo tua loña, oku kuata esanju kovaso yoloneke. Oco tu pitĩle, ca tamba lika kocitumãlo tu kopa olonumbi poku nõla olonjila tu kuama.

Ocili okuti olonjila vialua tu nõla, ka vi ka kuata esilivilo lialua komuenyo wetu. Pole, kuli vimue via velapo okuti vi situlula ovituwa vietu, ale ndomo tu tenda eci ciwa leci cĩvi. Olonjila viaco, vi pondola oku sanjuisa ale oku tu sumuisa oku kongelamo vana tu sole vokuenda kuotembo yalua. Volonjila viaco mua kongela ovina ndeci:

• Oku lipekela kuenda olohuela

• Oku kala ukuacili, upange kuenda olombongo

• Ndomo o tata omãla

• Ndomo o tata vakuene

O pondola oku kolela ndati okuti olonjila o nõla kolonepa via tukuiwa ndeti vi ka ku kuatisa lepata liove oku kuata esanju kovaso yoloneke?

Omumu lomunu pokati ketu wa siata oku lipula ndoco: Olonumbi vipi vi ka songuila olonjila ndi nõla?

Orevista yilo yi ka lombolola esunga lieci olonumbi Viembimbiliya via koleliwila catiamẽla kueci ciwa leci cĩvi kuenda ndomo ovio vi pondola oku tu kuatisa.