Ndomo Eko ngelo li Setukula Ovisimĩlo Via Yehova Viatiamẽla ku Vana va Linga Ekandu Linene

1. Nye Yehova a yonguila komanu vosi?

YEHOVA wa lulika omanu lelianjo lioku nõla. Ove o pondola oku talavaya lombanjaile yaco olonjanja viosi poku nõla onjila yimue o yongola oku kuama. Onjila ya velapo omunu umue a pondola oku kuama, oku litumbika ku Yehova kuenda oku tiamẽla kepata liafendeli Vaye. Yehova o yongola okuti vosi va ci linga. Momo lie? Momo eye o sole omanu kuenda o va yonguila uwa. Yehova o yongolavo okuti ovo va sanjukila oku kuata ukamba laye kuenda oku kala otembo ka yi pui.—Esin. 30:19, 20; Va Gal. 6:7, 8.

2. Nye Yehova a yonguila ku vana okuti handi ka va likekembelele? (1 Yoano 2:1)

² Yehova ka kisika omunu laumue oco o fendele. Eye ecelela okuti, omunu lomunu o nõla eci a yongola oku linga. Oco hẽ nye ci pondola oku pita nda Ukristão umue wa papatisiwa, o lueya ocihandeleko ca Suku poku linga ekandu limue linene? Nda eye ka likekembela o tundisiwa vekongelo. (1 Va Kor. 5:13) Pole, ndaño okuti omunu waco o tundisiwa vekongelo, Yehova o yongola okuti eye o likekembela loku kuata vali ukamba Laye. Eli olio esunga lia velapo a lingila eliangiliyo liocisembi, oco cecelele okuti vana va linga ekandu, pole, va likekembela va eceliwa. (Tanga 1 Yoano 2:1.) Suku yetu ukuacisola, o vetiya vana va linga akandu anene oco va likekembele.—Sak. 1:3; Va Rom. 2:4; Tia. 4:8.

3. Nye tu konomuisa vocipama cilo?

³ Yehova o yongola okuti tu setukula ocituwa caye catiamẽla komanu vana va linga akandu anene. Ocipama cilo, ci ka lombolola ndomo tu pondola oku ci linga. Poku tanga ocipama cilo, sanda oku limbuka (1) ndomo ekandu limue linene lia tetuluiwa vekongelo lio ko Korindo kocita catete, (2) onumbi upostolo Paulu a eca eci umue wa linga ekandu linene a likekembela kuenda (3) ceci ulandu waco Wembimbiliya u situlula catiamẽla kocituwa ca Yehova catiamẽla Kakristão vana va linga akandu amue anene.

CECI EKONGELO LIA LINGA ECI MANJI UMUE A LINGA EKANDU LINENE KOCITA CATETE

4. Nye ca pita vekongelo lio ko Korindo kocita catete? (1 Va Korindo 5:1, 2)

⁴ Tanga 1 Va Korindo 5:1, 2. Paulu vokuenda kungende waye watatu wumisionaliu, wa yeva asapulo a sumuisa atiamẽla kekongelo lia tumbikiwile ndopo ko Korindo. Manji umue wo vekongelo liaco, wa enda oku lipekela la ina yaye yokatumba. Ocituwa caco cĩvi calua, momo “ndaño muẽle vakualofeka va ci tendelevo okuti ca vĩha!” Pole, ekongelo lia simĩle okuti, manji yaco, amamako oku kala vekongelo. Citava okuti, vamue vekongelo va kala oku sima okuti va kasi oku lekisa ohenda ndeci Yehova. Pole, Yehova ka ecelela okuti pokati kafendeli vaye pa kala vakuakandu. Omo liocituwa caco ka ca sungulukile, vamue ka va kaile afendeli va Yehova citava okuti, ca va kokela ocilondokua kuenda oku popia ovina ka via sungulukile kafendeli va Yehova. Omunu waco, wa ponduilevo oku vetiya Akristão vakuavo oku setukula ocituwa caye. Kuenje Paulu wa vetiya ekongelo oku linga nye?

5. Paulu wa sapuila ekongelo oku linga nye kuenda nye a yonguile oku popia? (1 Va Korindo 5:13) (Talavo ociluvialuvia.)

⁵ Tanga 1 Va Korindo 5:13. Yehova wa vetiya Paulu oku sonehela ukanda umue kekongelo u lombolola okuti, omunu umue wa linga ekandu okuti ka likekembela, o sesamẽla oku tundisiwa vekongelo. Oco hẽ vamanji vekongelo va ponduile oku u tata ndati? Paulu wa va sapuila oco va ‘liwekepo oku linga ukamba’ laye. Eci ca lombolokele nye? Paulu wa lombolola okuti, vocihandeleko caco mua kongelele oku yuvula “oku lia lulume waco.” (1 Va Kor. 5:11) Oku lia kumosi lomunu umue ci leluka oku kuata ukamba laye. Omo liaco, Paulu wa yonguile oku popia okuti, ekongelo ka lia sesamẽlele oku kuata ukamba lulume waco oco ci teyuile ekongelo kelinga liaye lĩvi. (1 Va Kor. 5:5-7) Handi vali, oku yuvula oku kala lulume waco, nda co kokela oku limbuka okuti, wa linga ocina cimue ca sumuisa calua Yehova kuenda o pondola oku yeva osõi loku vetiyiwa oku likekembela.

6. Ekongelo lia tambuluiya ndati ukanda wa Paulu kuenda ulume wa lingile ekandu nye a linga?

⁶ Paulu noke lioku tuma ukanda waye Kakristão vo ko Korindo, wa fetika oku lipula ndomo ekongelo lia ponduile oku tambuluiya ukanda waco. Oku sulako Tito wa nena esapulo limue lia sanjuisa calua Paulu. Ekongelo lia tambuluiya ciwa ukanda waye. (2 Va Kor. 7:6, 7) Ovo va kuamele ciwa olonumbi via Paulu kuenje va tundisa ulume una wa kala oku linga ekandu. Handi vali, eci kua pita olosãi vimue tunde eci Paulu a va sonehela ukanda, ulume wa lingile ekandu wa likekembela kelinga liaye! Eye wa pongolola ovituwa viaye lovilinga kuenje wa fetika oku kapako olonumbi via Yehova viesunga. (2 Va Kor. 7:8-11) Kaliye nye Paulu a sapuila ekongelo oku linga?

NDOMO EKONGELO LIA KALA OKU TATA UKUEKANDU WA LIKEKEMBELA

7. Noke lioku tundisa vekongelo ulume wa linga ekandu, onima yipi yeyililako? (2 Va Korindo 2:5-8)

⁷ Tanga 2 Va Korindo 2:5-8. Paulu wa popia okuti, ‘epindiso lia eciwa lomanu valua, lia tẽla komunu waco.’ Volondaka vikuavo, ci lomboloka okuti, epindiso lia tẽlisa ocimãho cayo vokuaye. Momo noke liomunu waco oku tundisiwa vekongelo, eye wa limbuka okuti wa sukilile oku likekembela.—Va Hev. 12:11.

8. Nye Paulu a sapuila noke ekongelo oku linga?

⁸ Omo okuti ulume wa linga ekandu wa likekembelele ale, Paulu wa vetiya akulu vekongelo oku ecelela okuti eye o tiuka vekongelo. Paulu wa va sapuilavo oku ‘wecela locisola loku u lembeleka” kuenda oku ecelela okuti, eye o ‘limbuka ocisola vo kuetele.’ Paulu wa yonguile okuti, ovo va lekisa kolondaka, lokovilinga viavo okuti, va ecela ulume wa likekembela kuenda vo sole. Lonjila eyi, va ponduile oku lekisa kokuaye okuti va sanjukila oku tiuka kuaye vekongelo.

9. Momo lie vamue ka va sanjukilile oku ecela ondingakandu ya likekembela?

⁹ Citava okuti, vamue kefetikilo ka va sanjukilile oku yeva okuti ulume una wa lingile ekandu, wa tiuka vali vekongelo. Momo lie tu ci popela? Momo ovilinga viaye via koka ovitangi vekongelo liosi kuenda osõi komanu vamue. Omo okuti, ekongelo liaco lia likolisilileko calua oku kapako olonumbi via Yehova, vamue va simĩle okuti ka ca sungulukile omunu wa linga ekandu limue linene oku taviwa oku tiuka vali vekongelo. (Sokisa Luka 15:28-30.) Momo lie ca kuatelele esilivilo ekongelo oku lekisa ocisola cocili ku manjavo wa tiuka vekongelo?

10-11. Nye ca ponduile oku pita nda akulu vekongelo va likalele oku ecela ondingakandu ya likekembela?

¹⁰ Sokolola eci nda ca pita nda okuti akulu vekongelo va likalele oku ecela ulume wa likekembela lutima wosi o tiuka vekongelo, ale voku tiuka kuaye vamanji va likala oku lekisa ocisola kokuaye. Ocili okuti, eye nda wa yuliwa “lesumuo lialua.” Momo nda wa liyeva okuti lalimue eteke a ka vumba vali Yehova. Toke muẽle, nda wa liwekapo oku likolisilako oku tumbulula ukamba waye la Yehova.

¹¹ Handi vali, nda vamanji vekongelo va likalele oku ecela, ondingakandu ya likekembela, ovo nda va kapa kohele ukamba wavo la Yehova. Momo lie? Momo ka va kaile oku setukula Yehova una wa siata oku ecela olondingakandu via likekembela, pole, nda va setukula Satana ongangala, una ka lekisa ohenda. Ovo va ponduile oku ecelela Eliapu oku vetiya ulume waco oku liwekapo oku vumba Yehova.—2 Va Kor. 2:10, 11; Va Efe. 4:27.

12. Ekongelo lia ponduile oku setukula ndati Yehova?

¹² Ekongelo lio ko Korindo nda lia setukula ndati Yehova okuti Satana sio? Poku kuama onjila ndomo Yehova a tenda vakuakandu va likekembela. Limbuka eci asonehi vamue Vembimbiliya va popia catiamẽla ku Yehova. Eye ‘uwa, kuenda olonjanja viosi wa likapelako oku ecela.’ (Osa. 86:5) Mika wa soneha hati: “Helie a Suku wa lisoka love, Una ecela eko kuenda ka kapiko akulueya?” (Mika 7:18) Isaya wa lombololavo hati: “Olondingaĩvi vi tinduke konjila yavo yĩvi kuenda omanu vakuevĩho va siepo ovisimĩlo viavo vĩvi; Va tiuke ku Yehova, una o ka va kuatela ohenda, ku Suku yetu, momo eye o ka ecela lutima wosi.”—Isa. 55:7.

13. Momo lie ca sungulukilile oku ecelela okuti ulume wa likekembela o tiuka vali vekongelo? (Tala okakasia losapi hati: “Otembo Yipi Ulume wo ko Korindo a Tiuka Vekongelo?”)

¹³ Oco ekongelo lio ko Korindo li setukule Yehova, va sukilile oku ecela ulume una wa likekembela loku lekisa kokuaye okuti, vo sole kuenda va sanjuka omo eye a tiuka. Paulu wa lombolola okuti nda va ecela ulume wa likekembela, ekongelo lia ponduile oku lekisa ‘epokolo kovina viosi.’ (2 Va Kor. 2:9) Ndaño okuti ulume wa tundisiwile vekongelo vokuenda kuolosãi vimue, eye wa likekembela. Omo liaco, ka kua kaile esunga liakulu vekongelo oku u tateka oku tiuka vekongelo.

NDOMO TU SETUKULA ESUNGA LOHENDA YA YEHOVA

14-15. Nye tu lilongisila kulandu wa pita vekongelo lio ko Korindo? (2 Petulu 3:9) (Talavo ociluvialuvia.)

¹⁴ Ulandu u lombolola ndomo ocitangi ca tetuluiwa ko Korindo yosimbu, wa sonehiwa kuenda oku kongeliwa Vembimbiliya “oco u tu longise.” (Va Rom. 15:4) Ulandu waco u tu longisa okuti, Yehova ka ecelela vana va linga akandu anene haivo ka va likekembela, oku amamako oku kala vekongelo. Vamue va pondola oku sima okuti, omo Yehova ukuahenda, ecelela okuti omunu umue ka likekembela, amamako oku kala vekongelo. Pole, hacoko Yehova a linga. Ndaño okuti Yehova ukuahenda, eye ka tava ovilinga vĩvi kuenda olonumbi viaye vieci ciwa, leci cĩvi, ka vi pongoloka. (Yuda 4) Nda Yehova wa ecelelele okuti umunu una ka likekembela amamako vekongelo, nda ca kapa kohele vosi vekongelo.—Olosap. 13:20; 1 Va Kor. 15:33.

¹⁵ Handi vali, tua lilongisa okuti Yehova ka yongola okuti umue o nyõliwa. Eye o yongola okuti omanu vosi va popeliwa. Yehova o lekisa ohenda komanu vana va likekembela lutima wosi haivo va yongola oku tumbulula ukamba wavo laye. (Esek. 33:11; Tanga 2 Petulu 3:9.) Kuenje eci ulume wo ko Korindo a likekembela kuenda oku siapo elinga liaye lĩvi, Yehova wa vetiya Paulu oco a sapuile ekongelo okuti, ulume wa sukilile oku eceliwa kuenda oku tambuiwa vali vekongelo.

16. O liyeva ndati poku kũlĩha ndomo ocitangi ca lipita vekongelo lio ko Korindo ca tetuluiwa?

¹⁶ Ulandu wa lipita vekongelo lio ko Korindo, u lekisa okuti Yehova ukuacisola calua, ukuesunga kuenda ukuahenda. (Osa. 33:5) Oku ci kũlĩha, ka ci tu vetiya hẽ oku sivaya vali calua Yehova? Momo vosi yetu tuakuakulueya kuenda tu sukila ongecelo ya Yehova. Omunu lomunu pokati ketu, o sukila oku eca olopandu ku Yehova omo liocisembi, cina ca ecelela okuti akandu etu a eceliwa. Ci lembeleka calua oku kũlĩha okuti, Yehova o sole calua afendeli vaye kuenda o va yonguila eci ciwa!

17. Nye tu konomuisa vocipama cikuãimo?

¹⁷ Oco hẽ koloneke vilo, nye ci sukila oku lingiwa nda omunu umue wa linga ekandu? Akulu vekongelo va setukula ndati ocisola ca Yehova poku kuatisa omunu oku likekembela? Ocituwa cipi ekongelo li sukila oku lekisa eci akulu vekongelo va nõlapo oku tundisa ale oku tambula omunu umue vekongelo? Tu konumuisa apulilo aco vocipama cikuãimo.