Setukula Onjila ya Yehova la Yesu Yoku Sokolola

1-2. Nye ca kongela voku sola Yehova, kuenda Yesu wa lekisa ndati ocisola caco?

YESU wa situlula ciwa ocihandeleko ca velelepo pokati Kocihandeleko ca eciwile ku Mose, eci eye a popia hati: “Sola Yehova Suku yove lutima wove wosi, lomuenyo wove wosi, longusu yove yosi, lolondunge viove viosi.” (Luka 10:27) Limbuka okuti ocisola tu kuetele Yehova, mua kongela utima wetu, olonjongole vietu, ovisimĩlo kuenda ekalo lietu. Mua kongelavo efendelo lietu liutima wosi kuenda ongusu yetu. Handi vali, voku sola Yehova mua kongelavo olondunge vietu, oku kongelamo onjila ndomo tu sima catiamẽla kovina vimue. Pole, lalimue eteke tu ka kuata elomboloko liosi, lionjila ndomo Yehova a sokolola. Pole, tu pondola oku kuata elomboloko liwa konjila ndomo Yehova a sokolola poku lilongisa “ovisimĩlo via Kristu.” Momo Yesu wa situlula lonjila ya lipua ovisimĩlo via Isiaye.—1 Va Kor. 2:16.

² Yesu wa sola Yehova lolondunge viaye viosi. Eye wa kũlĩhĩle ocipango ca Yehova kuenda wa nõlelepo oku ci kapako komuenyo waye, ndaño ca lombolokele oku tala ohali omo lioku linga eci ca sunguluka. Omo okuti Yesu wa tiamisilile utima koku sanjuisa Isiaye, eye ka ecelele okuti cimue ci velapo komuenyo waye okuti oku linga ocipango ca Yehova ci sule.

3. Esumũlũho lipi Petulu a kuata kuenda nye eye a vetiya Akristão oku linga? (1 Petulu 4:1)

³ Petulu lovapostolo vakuavo va kuata esumũlũho lioku kala la Yesu kuenda oku lilongisa konjila ndomo eye a enda oku sokolola. Eci Petulu a soneha ukanda waye watete, eye wa vetiya Akristão oku lisola lutima umuamue ndeci Kristu.a (Tanga 1 Petulu 4:1.) Kelimi liatete eci Petulu a soneha hati: “lekisi utima umuamue,” eye wa tukula ondaka yi situlula asualali va limalẽhela oku enda kuyaki. Omo liaco, nda Akristão va lilongisa oku sokolola ndomo Yesu a enda oku sokolola, ovo va ka tẽla oku liyaka lolonjongole ka via sungulukile kuenda loluali lua vialiwa la Satana.—2 Va Kor. 10:​3-5; Va Efe. 6:12.

4. Nye tu konomuisa vocipama cilo?

⁴ Vocipama cilo, tu konomuisa ndomo (1) tu setukula onjila ya Yehova yoku sokolola, yina yi ka tu kuatisa oku kuata ovisimĩlo ndevi viaye, (2) oku lekisa umbombe kuenda (3) oku kuata olondunge poku kolela ku Yehova kuenda oku likutilila. Oco tu ci linge, tu kũlĩhĩsa ndomo Yesu a enda oku sokolola kuenda ndomo tu u setukula.

SETUKULA ONJILA YA YEHOVA YOKU SOKOLOLA

5. Vepuluvi lipi Petulu ka sokoluile ndeci Yehova a sokolola?

⁵ Vepuluvi limue Petulu ka setukuile onjila ya Yehova yoku sokolola. Yesu wa sapuilile kovapostolo vaye okuti, wa laikele oku enda ko Yerusalãi, loku eciwa kasongui vetavo, oku kangisiwa kuenda oku pondiwa. (Mat. 16:21) Petulu wa kũlĩhĩle okuti Yesu wa kala Mesiya wa likuminyiwile una wa laikele oku popela va Isareli. Omo liaco, ca tĩlile calua ku Petulu oku tava okuti Yehova o ka ecelela Yesu oku pondiwa. (Mat. 16:16) Kuenje Petulu wa kovongela Yesu pokanele yu wo sapuila hati: “A Ñala, likuatela ohenda; lalimue eteke eci ci ka pita love.” (Mat. 16:22) Omo okuti Petulu ka kaile oku sokolola ndeci Yehova a sokolola, Yesu ka tavele kocisimĩlo caye.

6. Yesu wa lekisa ndati okuti wa setukula onjila ya Yehova yoku sokolola?

⁶ Yesu wa enda oku setukula ciwa onjila ya Isiaye yoku sokolola. Kuenje wa sapuila Petulu hati: “Pita konyima yange, a Satana! O kasi oku ñapela ewe liocilondokua, momo ku kuete ovisimĩlo via Suku, pole, viomanu.” (Mat. 16:23) Ovisimĩlo via Petulu via molẽhele ndu okuti viwa, pole, Yesu wa likala elungulo liaye. Vepuluvi liaco, Petulu wa lilongisa okuti wa sukilile oku sokolola ndeci Yehova a sokolola. Tu pondolavo oku lilongisa ovina vialua kulandu owu.

7. Petulu wa lekisa ndati okuti wa yonguile oku pongolola ovisimĩlo viaye oco vi kale ndevi via Yehova? (Tala koñoño.)

⁷ Vokuenda kuotembo, Petulu wa limbuka okuti ovisimĩlo viaye via sukilile oku kala ndevi via Yehova. Eci ca situluiwa vepuluvi Yehova a sokiya okuti, Vakualofeka va panga onepa kafendeli vaye. Yehova wa tuma Petulu oku ka kundila Korneliu, una wa kala omunu watete Ukualofeka oku linga Ukristão. Va Yudea va yuvuile oku kuata ukamba la Vakualofeka, omo liaco Petulu wa sukilile oku linga apongoloko kovisimĩlo viaye oco a tẽle oku va kundila. Eci Petulu a limbuka ocipango ca Yehova catiamẽla ku Vakualofeka, eye wa pongolola ovisimĩlo viaye. Kuenje eci a tumiwa ku Korneliu, eye wa enda ka “likalele.” (Ovil. 10:​28, 29) Petulu wa kundila Korneliu kumue lepata liaye noke va papatisiwa.—Ovil. 10:​21-23, 34, 35, 44-48.

8. Tu lekisa ndati okuti tu kuete ovisimĩlo vimuamue levi via Yehova? (1 Petulu 3:8 kuenda etosi)

⁸ Noke lianyamo amue, Petulu wa vetiya Akristão oku “sokolola lonjila yimuamue.” (Tanga 1 Petulu 3:8 kuenda etosi.) Etu tuafendeli va Yehova tu pondola oku kuata ovisimĩlo vimuamue la vamanjetu, nda tua setukula onjila ya Yehova yoku sokolola catiamẽla kovina tua lilongisa Vembimbiliya. Ndeci, Yesu wa vetiya olondonge viaye oku pitisa kovaso Usoma komuenyo wavo. (Mat. 6:33) Omo lioku kapako onumbi eyi, pamue ukundi umue vekongelo lietu o nõlapo oku kala ukundi wotembo yosi, ale oku litumbika kocikele cikuavo cupange wotembo yosi. Tu sukila oku yuvula oku u sapuila olondaka viu kokela oku sima okuti, ka nõlele onjila yiwa, pole, tu u kuatisa poku u sapuila olondaka viepandiyo omo lionjila yiwa a nõlapo.

LEKISA UMBOMBE

9-10. Yesu wa lekisa ndati okuti wa kala embombe?

⁹ Vuteke osimbu Yesu ka file, eye wa longisa Petulu kuenda ovapostolo vakuavo esilivilo lioku lekisa umbombe. Pole, tete Yesu wa tuma Petulu la Yoano oco va pongiye ovina via sukiliwile kondalelo ya sulako osimbu ka file. Vimue pokati kovina via sukiliwile citava okuti, oku pongiya ombasiya yimue kuenda etuaya, oco okuti umue o sukula olomãhi via vana va lalekiwa osimbu ka va lile. Pole, helie wa laikele oku lekisa umbombe oco a linge upange waco?

¹⁰ Yesu lumbombe, wa lieca olumue poku linga upange waco u komõhisa. Olondonge citava okuti, via komõha poku mola Yesu oku linga ocina cimue okuti, ca lingawaile lika lupika umue. Embimbiliya li lekisa okuti Yesu wa lula ocikutu caye, wa itika etuaya vombunda kuenda wa kapa ovava pombasiya kuenje wa fetika oku sukula olomãhi viavo. (Yoa. 13:​4, 5) Citava okuti, cambatele otembo oco Yesu a sukule olomãhi viosi viovapostolo 12, oku kongelamo Yuda wa laikele oku u pakula. Pole, Yesu lumbombe wa linga upange waco wosi. Noke Yesu lepandi, wa va pula hati: “Eci ndo lingili co lomboloki? Ene vu nukula ‘Ulongisi’ kuenda ‘Ñala’ kuenje vu popia ciwa, momo ame muẽle. Pole, nda okuti ame ndi Ñala kuenda Ulongisi nda sukula olomãhi viene, ene vu sukilavo oku lisukula pokati olomãhi viene.”—Yoa. 13:​12-14.

11. Petulu wa lekisa ndati okuti wa lilongisa oku kala embombe? (1 Petulu 5:5) (Talavo ociluvialuvia.)

¹¹ Petulu wa lilongisila kumbombe wa Yesu. Noke lia Yesu oku tiukila kilu, Petulu wa linga ocikomo cimue. Eye wa sakula ulume umue wa citiwa lulema. (Ovil. 1:​8, 9; 3:​2, 6-8) Ocikomo caco ca komõhisa omanu valua. (Ovil. 3:11) Kuenje nda ca vetiya Petulu oku livelisapo, momo wa kulila vepata limue okuti omanu va enda oku velisapo calua oku kuata oluhimo. Pole, eye wa lekisa umbombe loku vetiya omanu oco va ece esivayo liaco ku Yehova kuenda ku Yesu eci a va sapuila hati: “Ulume u vu lete ndeti haeye wa kũlĩhi, wa pamisiwa vonduko ya Yesu kuenda lekolelo lietu vonduko yaye.” (Ovil. 3:​12-16) Vukanda umue Petulu a sonehela Akristão, eye wa va vetiya oku kala ambombe. Ondaka yaco yi tu ivaluisa epuluvi eci Yesu a itikile etuaya vombunda kuenda oku sukula olomãhi viovapostolo.—Tanga 1 Petulu 5:5.

12. Tu pondola oku amamako ndati oku lekisa umbombe ndeci Petulu a linga?

¹² Tu pondola oku setukula ongangu ya Petulu poku lilongisa oku lekisa umbombe. Pole, ivaluka okuti, voku lekisa umbombe wocili mua kongela ovina vialua okuti oku vangula lika lonjila yimue yumbombe ci sule. Ondaka Petulu a tukula yokuti “umbombe,” yi lekisa okuti vumbombe wocili mua kongela ovisimĩlo vietu viondongosi. Etu tua siata oku lingila vakuetu ovina viwa omo tu sole Yehova kuenda omanu, pole, hamomoko tu sole oku komõhiwa la vakuetu. Tu lekisa okuti tuambombe vocili eci tu lingila upange Yehova kuenda vamanjetu lesanju, ndaño okuti, omanu vakuavo ka va limbuka ovina tu linga.—Mat. 6:​1-4.

‘KUATA OLONDUNGE’

13. Nye ca kongela voku ‘kuata olondunge?’

¹³ Nye ca kongela voku ‘kuata olondunge?’ (1 Pet. 4:7) Ukristão umue ukualondunge, o nõla olonjila vi likuata lovisimĩlo via Yehova. Eye wa kũlĩha okuti, ka kuli ocina cimue ca velapo vali okuti oku kuata ukamba la Yehova ci sule. Handi vali, eye o kuete ocisimĩlo ca sunguluka catiamẽla kokuaye muẽle kuenda wa kũlĩha okuti ka tẽla ovina viosi. Omunu ukualondunge o lekisa okuti wa kolela ku Yehova poku likutilila olonjanja viosi oku pinga olonumbi kokuaye.b

14. Vepuluvi lipi Petulu ka kolelele Yehova?

¹⁴ Vuteke wasulako osimbu Yesu ka file, wa sapuila olondonge viaye hati: “Vosi yene uteke ulo vu ka njanduluka.” Petulu poku likolela calua eye muẽle wo tambulula hati: “Ndaño vosi vakuavo va ku yanduluka, ame lalimue eteke ndi ka ku yanduluka!” Vuteke waco, Yesu wa lungula vamue pokati kolondonge viaye hati: “Amamiko oku lavulula kuenda likutilili olonjanja viosi.” (Mat. 26:​31, 33, 41) Nda Petulu wa kuamele elungulo liaco, citava okuti nda wa kuata utõi woku popia okuti wa kala ondonge ya Yesu. Pole, eye wa likala Ñala yaye kuenje noke wa livela calua omo lieci a linga.—Mat. 26:​69-75.

15. Nye ca kuatisa Yesu oku amamako lolondunge vuteke osimbu ka file?

¹⁵ Yesu wa kolelele lutima wosi ku Yehova. Ndaño okuti wa lipuile, eye wa likutilila olonjanja vialua vuteke osimbu ka file. Kuenje eci co wĩha utõi woku tẽlisa ovina Yehova a yonguile okuti o vi linga. (Mat. 26:​39, 42, 44; Yoa. 18:​4, 5) Petulu wa mola Yesu oku likutilila olonjanja vialua vepuluvi liaco ka lia lelukile kuenje eye lalimue eteke a ivaleleko.

16. Tua kũlĩha ndati okuti Petulu wa lekisa olondunge? (1 Petulu 4:7)

¹⁶ Vokuenda kuotembo, Petulu wa fetika oku kolela calua ku Yehova kuenda oku likutilila kokuaye oku pinga olonumbi viaye. Noke lia Yesu oku pinduiwa, eye wa likuminya ku Petulu kuenda kovapostolo vakuavo okuti, ovo va laikele oku tambula espiritu sandu oco va tẽle oku kunda olondaka viwa. Pole, Yesu wa pinga kokuavo oco va talamẽle ko Yerusalãi toke eci ovina viaco vi lingiwa. (Luka 24:49; Ovil. 1:​4, 5) Nye Petulu a linga osimbu a kala oku talamẽla? Eye kumue la vamanji vakuavo “vamamako lolohutililo.” (Ovil. 1:​13, 14) Noke kukanda waye watete, wa vetiya Akristão oku lekisa olondunge kuenda oku likutilila oku pinga olonumbi ku Yehova. (Tanga 1 Petulu 4:7.) Petulu wa lilongisa oku kolela calua ku Yehova kuenda wa kuatisa calua ekongelo.—Va Gal. 2:9.

17. Nye tu sukila oku linga oco tu lekise okuti tuakualondunge? (Talavo ociluvialuvia.)

¹⁷ Oco tu kale vakualondunge, tu sukila oku amamako oku likutilila ku Yehova. Eci tu nõla onjila yimue yi kuete esilivilo, tu likutilila ku Yehova oku pinga onumbi yaye loku kolela okuti eye wa kũlĩha eci ca velapo kokuetu.

18. Tu setukula ndati ciwa Yehova?

¹⁸ Tu eca olopandu ku Yehova omo a tu lulika lepondolo lioku setukula ovituwa viaye. (Efet. 1:26) Ocili okuti ka tu tẽla oku setukula Yehova lonjila ya lipua. (Isa. 55:9) Pole, ndeci Petulu a linga, olonjanja viosi tu yongola oku sokolola ndeci Yehova a sokolola. Tu ci linga poku amamako oku setukula onjila ya Yehova yoku sokolola oco o kale embombe kuenda oku kuata olondunge.