Lekisa Umbombe Eci ku Kala Ovina Vimue Kua Kũlĩhĩle

1. Uloño upi Yehova a tu ĩha kuenda momo lie?

YEHOVA wa tu lulika luloño woku sokolola, oku lilongisa ovina viokaliye kuenda oku kuata elomboloko ndomo tu kapako ovina tua lilongisa. Momo lie Yehova a tu lulikila lonjila yaco? Wa ci lingila oco tu ‘sange ukũlĩhĩso watiamẽla kokuaye’ kuenda oku u vumba luloño wetu woku sokolola.—Olosap. 2:​1-5; Va Rom. 12:1.

2. (a) Nye tu sukila oku kũlĩha catiamẽla kokuetu muẽle? (Yovi 37:​23, 24) (Talavo ociluvialuvia.) (b) Momo lie ci kuetele esilivilo oku kuata elomboloko liokuti ka tu sukila oku kũlĩha ovina viosi?

² Ocili okuti Yehova wa tu lulika luloño woku lilongisa, pole, kuli ovina vialua ka tua kũlĩhĩle. (Tanga Yovi 37:​23, 24.) Sokolola eci catiamẽla ku Yovi. Yehova wa linga apulilo alua kokuaye a situlula okuti kua kala ovina vialua Yovi ka kũlĩhĩle. Ombangulo yaco, ya kuatisa Yovi oku vokiya ocituwa caye cumbombe kuenda oku pengulula onjila yaye yoku sokolola. (Yovi 42:​3-6) Cimuamue haico okuti, tu sukila oku lekisa umbombe kuenda oku limbuka okuti ka tua kũlĩhĩle ovina viosi. Lonjila eyi, tu pondola oku kolela okuti, Yehova olonjanja viosi o ka tu sapuila ovina tu sukila oku kũlĩha oco tu nõle olonjila viwa.—Olosap. 2:6.

3. Nye tu konomuisa vocipama cilo?

³ Vocipama cilo, tu konomuisa ovina vimue ka tua kũlĩhĩle kuenda esunga lieci pamue ekambo liukũlĩhĩso waco li ponduila oku tatamisa ekalo liomuenyo wetu. Tu konomuisavo esunga lieci ci kuetele esilivilo oku yuvula oku kũlĩha ovina vimue. Oku lilongisa ovina viaco, ci ka pamisa ekolelo lietu liokuti, Yehova “Una wa lipua kukũlĩhĩso,” o ka tu sapuila ovina tu sukila oku kũlĩha.—Yovi 37:16.

KA TUA KŨLĨHĨLE ETEKE ESULILO LI KEYA

4. Ndomo ca tangiwa kelivulu lia Mateo 24:​36, ocina cipi ka tua kũlĩhĩle?

⁴ Tanga Mateo 24:36. Ka tua kũlĩhĩle eteke esulilo lioluali lulo li keya. Toke muẽle Yesu eci a kala palo posi, ka kũlĩhĩlevo eci catiamẽla “keteke lowola yaco.”a Noke, eye wa sapuila kovapostolo vaye okuti Yehova Usokiyi wa Velapo Wotembo, wa kũlĩha otembo ku ka pita ovina a “tumbika lomoko yaye.” (Ovil. 1:​6, 7) Yehova wa tumbika ale otembo a ka nena esulilo lioluali lulo, pole, etu ka tu kuete epondolo lioku kũlĩha otembo ya suapo ovina viaco vi ka lipita.

5. Nye ci pondola oku lipita letu omo okuti ka tua kũlĩhĩle eteke esulilo li keya?

⁵ Ndomo Yesu a ci popia, etu ka tua kũlĩhĩle otembo tu ka sukila oku talamẽla oco esulilo liye. Omo liaco, tu pondola oku pua epandi ale oku yeva esumuo, ca piãla enene nda tu kasi ale oku talamẽla eteke lia Yehova vokuenda kuotembo yalua. Handi vali, pamue ka ci leluka kokuetu eci vakuepata lietu ale omanu vakuavo, va tu yola epembe omo okuti esulilo handi ka lieyile. (2 Pet. 3:​3, 4) Pamue tu sima okuti nda tua kũlĩhĩle eteke esulilo liya, nda ca leluka oku kala vakuepandi kuenda oku pandikisa kesepu liomanu vakuavo.

6. Etu ka tua kũlĩhĩle eteke esulilo li keya. Momo lie eci ci kuete esilivilo kokuetu?

⁶ Yehova omo okuti ka tu situluile eteke a ka nena esulilo lioluali lulo, o kasi oku tu ĩha epuluvi lioku lekisa kokuaye okuti, tu kasi oku u vumba omo tu u sole kuenda tua kolela kokuaye. Etu tu yongola oku vumba Yehova otembo ka yi pui okuti, ka tu ci lingi lika toke eci esulilo liya ndu okuti ekolelo lietu li kuete otembo ya sokiyiwa. Ka tu ka tiamisili calua utima kotembo “eteke lia Yehova” li keya, ca velapo oku sokolola kovina viwa vi ka lipita eci eteke liaco li keya. Nda tua ci linga, ukamba wetu la Yehova u ka pamisiwa, ekolelo tu u kuetele li ka livokiya kuenda tu ka likolisilako oku u sanjuisa.—2 Pet. 3:​11, 12.

7. Ovina vipi tua kũlĩha?

⁷ Ci kuete esilivilo oku tiamisila utima kovina tua kũlĩha viokuti, oloneke via sulako via fetika kunyamo wo 1914. Yehova pocakati Cembimbiliya, wa tu ĩha ovitumasuku vi lekisa okuti unyamo wo 1914 wa laikele oku kala efetikilo lioloneke via sulako. Eye wa sitululavo ndomo oluali lua laikele oku kala oku upisa kunyamo waco. Omo liaco, tua kolela okuti “eteke linene lia Yehova li kasi ocipepi.” (Sof. 1:14) Handi vali, tua kũlĩhavo upange Yehova a tu tuma oku linga okuti, oku kunda ‘olondaka viwa Viusoma’ komanu vosi. (Mat. 24:14) Esapulo liaco li kasi oku sandekiwa kueci ci soka 240 kolofeka lovikanjo kuenda kueci ci pitahãla 1.000 kalimi. Ka tu sukila oku kũlĩha eci “catiamẽla keteke lowola yaco” oco tu lekise ombili kupange waco u kuete esilivilo.

KA TUA KŨLĨHĨLE NDOMO YEHOVA A PONDOLA OKU ENDISA OVINA

8. Ondaka yokuti “upange wa Suku” yi tiamisiwila kovina vipi? (Ukundi 11:5)

⁸ Etu halonjanja viosiko tua kũlĩha “upange wa Suku.”(Tanga Ukundi 11:5.) Ondaka eyi, yi tiamisiwila kovina Yehova a siata oku linga levi eye a ecelela okuti vi lipita oco a tẽlise ocipango caye. Ka tua kũlĩhĩle asunga osi a vetiya Yehova oku ecelela okuti ocina cimue ci lipita, ale ovina eye a ka linga oco a tu kuatise. (Osa. 37:5) Embimbiliya li sokisa ekambo lioku kũlĩha “upange wa Suku,” ndeci ka tua kũlĩhĩle oku kula kuomõla umue vimo liukãi wa mina. Ndaño muẽle olonoño, ka vi kuete elomboloko ndomo ovina viaco vi lipita. Cimuamue haico okuti, ka tua kũlĩhĩle lonjila ya suapo ndomo Yehova a pondola oku endisa ovina.

9. Omo okuti ka tua kũlĩhĩle ndomo Yehova a ka tu kuatisa, tu pondola oku liyeva ndati?

⁹ Omo okuti ka tua kũlĩhĩle ndomo Yehova a ka tu kuatisa, ci pondola oku tu kokela atatahãi poku nõla onjila yimue. Citava okuti tu kuata usumba woku linga alikolisilo oco tu vokiye upange tu lingila Yehova ndeci, oku leluisa omuenyo wetu ale oku ilukila kocikanjo cimue kuli esukila liakundi. Pamue tu fetika oku sima okuti, Yehova ka kasi oku tu sumũluisa nda ka tu kasi oku tẽlisa ovimãho vietu, nda ka tu kasi oku mola onima yi tunda kupange wetu woku kunda ale nda tu kasi oku liyaka lovitangi kupange umue tu kasi oku linga vocisoko ca Yehova.

10. Omo okuti ka tua kũlĩhĩle lonjila ya suapo ovina Yehova a ka linga, ovituwa vipi vi kuete esilivilo tu pondola oku kuata?

¹⁰ Omo okuti ka tua kũlĩhĩle lonjila ya suapo ovina Yehova a ka linga, ci tu kuatisa oku kuata ovituwa ndeci, umbombe kuenda eliketiso. Ci tu kuatisavo oku kuata elomboloko liokuti Yehova wa kũlĩha eci ciwa kokuetu. (Isa. 55:​8, 9) Handi vali, ekolelo tu kuetele Yehova li ka livokiya kuenda tu ka kolela okuti eye o ka tu kuatisa kovina viosi. Eci tu kuata onima yiwa kupange woku kunda ale ceci tu litunda ciwa kupange umue wocisoko, tu eca esivayo liosi ku una o sesamẽla okuti, Yehova. (Osa. 127:1; 1 Va Kor. 3:7) Eci ovina ka vi tundi lonjila ndomo tua lavokaile, tu sukila oku ivaluka okuti Yehova wa kũlĩha ovina viosi. (Isa. 26:12) Tu linga cosi ci kasi vepondolo lietu loku kolela okuti, Yehova o ka tu kuatisa, momo tua kũlĩha okuti eye o ka tu songuila, ndaño ka ka ci linga locikomo ndeci olonjanja vimue a enda oku linga kosimbu.—Ovil. 16:​6-10.

11. Ovina vipi vi kuete esilivilo tua kũlĩha viatiamẽla ku Yehova?

¹¹ Tua kũlĩha okuti Yehova olonjanja viosi o lekisa ovituwa ndeci, ocisola, esunga kuenda olondunge. Ocina cikuavo tua kũlĩha ceci okuti, Yehova wa kapako calua ovina tua siata oku u lingila kuenda evi tu lingila vamanji. Ka tu kuete atatahãi okuti Yehova olonjanja viosi o sumũlũisa omanu vana va lekisa ekolelo kokuaye.—Va Hev. 11:6.

KA TUA KŨLĨHĨLE OVINA VI KA LIPITA HẼLA

12. Nye tu lilongisila kukanda wa Tiago 4:​13, 14?

¹² Tanga Tiago 4:​13, 14. Ka tua kũlĩhĩle ovina vi ka lipita letu hẽla. Voluali lulo, ovina vialua ka tu lavoka, vi pondola oku lipita letu momo “otembo kuenda ovina viya ño ocipikipiki.” (Uku. 9:11) Omo liaco, ka tu tẽla oku kũlĩha nda ovina tua sokiya oku linga vi ka tẽlisiwa, ale nda tu ka kala lomuenyo oco tu linge ovina viaco.

13. Omo okuti ka tua kũlĩhĩle ovina vi ka pita kovaso yoloneke, tu pondola oku liyeva ndati?

¹³ Pamue ka ci leluka kokuetu oku pandikisa, momo ka tua kũlĩhĩle lonjila ya suapo ovina vi ka pita kovaso yoloneke. Ndamupi? Pamue tu sakalala calua lovina vi pondola oku lipita kovaso yoloneke kuenje tu pumba esanju. Ekalo liomuenyo wetu li pondola oku pongoloka vocipikipiki kuenje ci tu kokela evalo kuenda esumuo. Eci ovina ka vi tundi lonjila ndomo tua lavokaile, tu pondola oku yeva esumuo.—Olosap. 13:12.

14. Nye tu sukila oku kũlĩha kuenda oku linga oco tu kuate esanju liocili? (Talavo ociluvialuvia.)

¹⁴ Eci tu liyaka lovitangi, tu kuete epuluvi lioku lekisa okuti ka tu kasi oku vumba Yehova omo liovina eye a tu ĩha, pole, tu ci lingila omo liocisola tu u kuetele. Embimbiliya li lekisa okuti ka tu pondola oku lavoka okuti, Yehova o tu teyuila kovitangi viosi kuenda eye ka sokiya ovina vi ka lipita komuenyo wetu. Yehova wa kũlĩha okuti, esanju lietu ka lia tambele koku kũlĩha ovina viosi vi ka lipita kovaso yoloneke. Ocili okuti, tu pondola oku kuata esanju poku kuama olonumbi via Yehova kuenda oku vi pokola. (Yer. 10:23) Eci tu sanda ekuatiso lia Yehova poku nõla onjila yimue, ka tu ka sakalala calua loku sokolola ovina vi pondola oku lipita. Tu ka kuata ovisimĩlo ndevi via Tiago eci a popia hati: “Nda Yehova wa panga, tu ka kala lomuenyo kuenda tu ka linga eci loco.”—Tia. 4:15.

15. Nye tua kũlĩha catiamẽla kovaso yoloneke?

¹⁵ Etu ka tua kũlĩhĩle ovina vi ka lipita kovaso yoloneke, pole, tua kũlĩha okuti Yehova wa tu likuminya omuenyo ko pui. Komanu vamue, omuenyo waco oku ka kala kilu kuenda ku vakuavo palo posi. Tua kũlĩha okuti Yehova lalimue eteke a kemba kuenda lacimue ci pondola oku u tateka oku tẽlisa olohuminyo viaye. (Tito 1:2) Yehova eye lika o pondola oku “sapula ovina vi keya, tunde kosiahũlu ovina ka via lingiwile handi.” Ovina viosi Yehova a popele kosimbu via tẽlisiwa kuenda ovina eye a popia okuti vi ka lipita kovaso yoloneke, vi ka tẽlisiwavo. (Isa. 46:10) Tua kolela okuti ka kuli lacimue ci pondola oku tateka Yehova oku tu sola. (Va Rom. 8:​35-39) Ndaño tu liyaka lovitangi vialua komuenyo wetu, eye o tu ĩha olondunge, elembeleko kuenda ongusu tu sukila oco tu pandikise. Ka tu kuete atatahãi okuti Yehova o ka tu kuatisa kuenda o ka tu sumũlũisa.—Yer. 17:​7, 8.

KA TU TẼLA OKU KUATA ELOMBOLOKO LIA SUAPO LIONJILA NDOMO YEHOVA A TU KŨLĨHA

16. Nye Yehova a kũlĩha catiamẽla kokuetu okuti ka tu kuete elomboloko lia suapo? (Osa. 139:​1-6)

¹⁶ Tanga Osamo 139:​1-6. Ululiki Wetu wa kũlĩha ovina viosi viatimẽla kokuetu kuenda onjila ndomo tua tuwa ci kaile ketimba ale kovisimĩlo. Eye otembo yosi wa tu kapako. Yehova ka yevi lika ovina tu popia, pole, eye o tẽla oku kuata elomboloko liovina tua yonguile oku popia. Yehova o letevo ovina viosi tu linga kuenda esunga lieci tu lingila ovina viaco. Soma Daviti wa lekisa okuti Yehova olonjanja viosi wa likapelako oku tu kuatisa. Ocili okuti, ci komõhisa oku kũlĩha okuti Ñala Tõlo yoluali luosi, Ululiki wovailu kuenda wongongo, wa kapako calua omunu lomunu pokati ketu! Eci ci tu ivaluisa olondaka via Daviti eci a popia hati: “Si tẽla oku kuata elomboloko liukũlĩhĩso waco. Owo walua calua kokuange okuti, si tẽla oku u konomuisa.”—Osa. 139:​1-6, etosi.

17. Momo lie pamue ka ca lelukilile kokuetu oku tava okuti Yehova wa tu kũlĩha ciwa?

¹⁷ Omo lionjila ndomo tua kula, ocituwa cofeka yetu ale ovina tua kolelele osimbu ka tua kũlĩhĩle ocili, citava okuti ka ci leluka kokuetu oku tenda Yehova nda Isia umue ukuacisola haeye wa tu kapako. Ale pamue, tu sima okuti akandu tua linga kosimbu alua calua okuti, Yehova lalimue eteke a ka tu tava ndakamba vaye kuenda okuti eye o kasi ocipãla letu. Ndaño muẽle Daviti olonjanja vimue wa endavo oku liyeva ndoco. (Osa. 38:​18, 21) Pamue omunu umue o kasi oku likolisilako calua oku ambata omuenyo umue u sanjuisa Yehova, o lipula ndoco: Nda okuti Yehova wa ndi kũlĩha, momo lie eye a yonguila okuti ndi liwekapo oku ambata ekalo limue liomuenyo okuti kokuange ka lia lelukile oku li siapo?

18. Momo lie ci kuetele esilivilo oku tava okuti Yehova wa tu kũlĩha ciwa? (Talavo ociluvialuvia.)

¹⁸ Ci kuete esilivilo oku tava okuti Yehova wa tu kũlĩha ciwa okuti etu muẽle ci sule kuenda eye o lete ovina viwa kokuetu, vina okuti ka tu pondola oku vi mola. Yehova ndaño o lete akulueya etu, wa kũlĩha alikolisilo tua siata oku linga oco tu u sanjuise kuenda eye o tu sole calua. (Va Rom. 7:15) Eci tu kuata elomboloko liokuti Yehova wa kũlĩha alikolisilo tu linga, ci tu ĩha ongusu tu sukila oco tu u vumbe lekolelo kuenda lesanju.

19. Nye tua kũlĩha catiamẽla ku Yehova?

¹⁹ Ka tu kuete atatahãi okuti Yehova eye ocisola. (1 Yoa. 4:8) Tua kũlĩha okuti ovina viosi eye a tu pinga oco tu vi linge, o vi pingila omo a tu sole kuenda o tu yonguila uwa. Handi vali, tua kũlĩha okuti Yehova o yongola okuti tu kuata omuenyo ko pui. Oco a ci tẽlise, eye wa tu ĩha ocisembi. Ombanjaile yaco, yi tu kuatisa oku kolela okuti ndaño lekambo lietu lioku lipua, tu pondola oku sanjuisa Yehova. (Va Rom. 7:​24, 25) Tua kũlĩhavo okuti, “Suku wa velapo, ovitima vietu vi sule kuenda eye wa kũlĩha ovina viosi.” (1 Yoa. 3:​19, 20) Yehova wa kũlĩha ovina viosi viatiamẽla kokuetu kuenda eye wa kolela okuti tu pondola oku linga ovina viosi a tu pinga.

20. Momo lie ka tu sukilila oku sakalala lovina ka tua kũlĩhĩle?

²⁰ Yehova o tu sapuila ovina viosi tu sukila oku kũlĩha. Omo liaco, ka tu sukila oku sakalala lovina ka tua kũlĩhĩle. Pole, tu pondola oku tiamisila utima kovina vi kuete esilivilo. Nda tua ci linga, tu lekisa okuti tumanu vamue ambombe kuenda tua kolela lutima wosi ku Yehova “Una wa lipua kukũlĩhĩso.” (Yovi 36:4) Ocili okuti cilo, ka tu kuete elomboloko liovina vimue, pole, tua kũlĩha okuti Yehova o kamamako oku tu longisa otembo ka yi pui. Omo liaco, tu kuete esanju lioku kũlĩha okuti, lalimue eteke tu ka liwekapo oku lilongisa ovina viokaliye viatiamẽla ku Suku yetu.—Uku. 3:11.