Tua Longisiwa Lulongisi Wetu wa Velapo Vokuenda Kuomuenyo Wetu Wosi

ONGANGU YOLONJALI VIANGE

Kesulilo liunyamo wo 1950, olonjali viange via tunda ko Italia oku enda ko Kanada kuenda va tungila kolupale luo Kindersley, voluvumba luo Saskatchewan. Noke yotembo yimue, ovo va lilongisa ocili kuenje oco ca linga ocina ca velapo komuenyo wetu. Ndi ivaluka okuti, eci nda kala omõla, nda enda oku pita eteke liosi kupange woku kunda kumue lepata liange. Olonjanja vimue nda siata oku sewula poku popia hati, eci nda kuata anyamo ecelãla nda kala ale “ukundi wa sokamo!”

Ndaño okuti olonjali viange via kala olohukũi, ovo va likolisilako kupange wa Yehova loku ndi sila ongangu yiwa. Ndeci, kunyamo wo 1963, ovo va landisa ovina vialua va kuatele oco va kuate olombongo vioku enda kohongele yolofeka kolupale luo Pasadena, ko Kalifornia kofeka yo Estadus Unidus. Noke kunyamo wo 1972, tua ilukila volupale luo Trail, voluvumba luo Kolumbia Britanika kofeka yo Kanada. Oku tunda volupale tua kala toke kocitumãlo caco, ocinãla caco ci soka 1.000 kolokilometulu. Tua ilukila volupale luaco locimãho coku kuatisa vana va vangula elimi lio Italianu. Isiange wa talavaya pocitanda cimue kuenda upange waye wa kala woku yelisa loku semũlula ocitumãlo caco. Olonjanja vialua eye wa likala ovopange akuavo nda vo feta olombongo vialua, momo wa yonguile oku tiamisila utima koku vumba Yehova.

Ndi pandula calua omo liongangu yiwa olonjali viange via ndi sila kumue la vamanjange vatatu. Ongangu yavo, oyo ya kala onepa yatete kepindiso liange kupange wa Yehova kuenda va ndi longisa okuti: Nda nda pitisa kovaso upange Wusoma komuenyo wange, Yehova olonjanja viosi o ka ndi tata.—Mat. 6:33.

OKU FETIKA UPANGE WOTEMBO YOSI

Kunyamo wo 1980 nda kuela la Debbie, manji umue wa posoka haeye wa tiamisilile utima kupange wa Yehova. Etu tua yonguile oku iñila kupange wotembo yosi. Omo liaco, noke yoku pita olosãi vitatu tunde eci tua kuela, Debbie wa fetika upange wakundi votembo yosi. Noke yoku pita unyamo umosi tunde eci tua kuela, tua ilukila vekongelo limue litito lia kala lesukila liakundi kuenje nda fetikavo upange wakundi votembo yosi.

Vokuenda kuotembo, ka tua kuatele vali esanju kocikele cetu kuenje tua yonguile oku siapo ekongelo liaco. Pole, osimbu ka tua tundileko tua nõlapo oku sapela la manji o nyula akongelo. Eye wa lekisa ocisola poku sapela letu, pole, loku teta onimbu wa tu sapuila ndoco: “Onepa yimue yocitangi yi kasi kokuene. Vu kasi lika oku tiamisila utima kovitangi. Nda wa sandiliyi ovina viwa kocikele cene, vu ka kuata esanju.” Eli olio elungulo tua sukilile. (Osa. 141:5) Tua pongolola lonjanga onjila yetu yoku sokolola kuenda tua mola okuti, kua kala ovina vialua viwa ka tua limbukile kocikele cetu. Valua vekongelo lietu va yonguile oku linga vali calua kupange wa Yehova, oku kongelamo omãla kuenda vamanji vamue akãi okuti, alume vavo ka va kaile Olombangi Via Yehova. Eci ca kuata esilivilo lialua kokuetu. Momo tua lilongisa oku tiamisila utima kovina viwa loku kolela okuti, Yehova o pondola oku tetulula ocitangi cimue ci molẽha ndu okuti, ka ca lelukile oku ci yula. (Mika 7:7) Omo liaco, tua kuata vali esanju kocikele cetu kuenda ovina vieya oku pongoloka.

Kosikola yetu yatete yakundi votembo yosi, alongisi vaco va kala ale olomisionaliu kolofeka vikuavo. Ovo va tu lekisa alitalatu amue kuenda va tu lomboluila asumũlũho lovitangi ovo va kuata kovikele viavo. Kuenje tua nõlapo oku litumbikila ocimãho coku kala olomisionaliu.

Oco tu tẽlise ocimãho caco, kunyamo wo 1984 tua ilukila koluvumba luo Quebec, kuna okuti omanu vaco va vangula elimi lio Fransesi. Oku tunda koluvumba luaco toke ko Kolumbia Britanika, ocinãla caco ci soka 4.000 kolokilometulu. Ko Quebec tua sukilile oku likisa lekalo kuenda elimi liokaliye. Ocitangi cikuavo tua liyaka laco ceci okuti, ka tua kuatele olombongo vialua. Ndi ivaluka okuti vokuenda kuotembo yimue, tua lialia lika ekapa ulume umue a enda oku tu ecelela oku pupulula vepia liaye. Ukãi wange Debbie wa enda oku pongiya ekapa liaco volonjila via litepa! Ndaño lovitangi viaco, tua likolisilako oku pandikisa lesanju. Handi vali, tua limbuka ndomo Yehova a kala oku tu tata.—Osa. 64:10.

Eteke limue okuti ka tua lavokaile, o telefone ya vilikiya. Va tu laleka oku ka talavaya ko Betele yo ko Kanada. Tua yeva esanju lialua, pole, tua yevavo esumuo momo tua lisonehisile oco tu ka pindisiwe Kosikola yo Gileada. Pole, tua tava kelaleko liaco. Eci tua pitĩla ko Betele, tua pulisa manji Kenneth Little, o panga onepa kocimunga cakulu vo Filiale hati: “Nye ci popiwa nda va tu laleka kosikola yo Gileada?” Eye wa tambulula ndoco: “Ko ka sakalali. Nda va ku laleki tu tala eci tu linga.”

Noke yoku pita osemana yimosi, tua lalekiwa kosikola yo Gileada kuenje tua sukilile oku nõlapo onjila yimue. Manji Kenneth wa tu sapuila hati: “Ndaño wa nõli onjila yimue cilo, pamue kovaso yoloneke vu ka yongola oku nõlapo onjila yikuavo. Onjila yimue, ka ya velelepo yikuavo; Yehova o pondola oku sumũlũisa olonjila viaco vivali.” Tua tava kelaleko lioku pindisiwa kosikola yo Gileada kuenje vokuenda kuanyamo, tua limbuka okuti olondaka via manji Kenneth via kala viocili. Olonjanja vialua, tua ecavo elungulo limuamue ku vana va sukilile oku nõla ocikele va ponduile oku tava kupange wa Yehova.

KUPANGE WUMISIONALIU

Tua kuata esanju lioku kala pokati kueci ci soka 24 kolondonge viocisoko 83 cosikola yo Gileada. Osikola yaco ya lingiwila ko Brooklyn, ko Nova York, oku upisa kosãi ya Kupupu yunyamo wo 1987. Vamue pokati kalongisi vetu va kala manji Ulysses Glass kuenda Jack Redford. Olosãi viaco vitãlo via pita lonjanga kuenje tua malusula osikola yaco keteke 6 Yenyenye Linene liunyamo wo 1987. Etu tua tumiwa kofeka yo Haiti, kumue la manji John kuenda Marie Goode.

Kotembo yaco, ofeka yo Haiti ka ya la tambula vali olomisionaliu tunde kunyamo wo 1962, eci olomisionaliu via kalako via kisikiwa oku tunda vofeka. Noke yolosemana vitatu tunde eci tua malusula osikola, ame lukãi wange Debbie tua fetika oku talavaya kofeka yo Haiti. Ekongelo lietu lia kuatele 35 kakundi kuenda lia kala vimbo limue liolomunda. Kotembo yaco tua kala amalẽhe, ka tua loñolohele kuenda tua kala lika wetu vonjo yolomisionaliu. Omanu vo vimbo liaco va kala olohukũi calua haivo ka va tẽlele oku tanga. Kotembo yaco, vofeka yo Haiti mua kala uyaki kuendaomanu va enda oku tateka ombiali oku viala. Handi vali, mua kala ombuanja kuenda ahunguhungu ofela.

Tua lilongisa ovina vialua omo liepandi kuenda esanju vamanji vo ko Haiti va lekisa. Valua pokati kavo va kuatele omuenyo umue ka wa lelukile, pole, va solele Yehova kuenda upange woku kunda. Ndi ivaluka okuti manji umue ukãi wa kukile, ka tẽlele oku tanga, pole, wa patekelele eci cisoka 150 kovinimbu Viembimbiliya. Ekalo lia tĩla lio kofeka yaco, lia tu kuatisa oku vokiya ombili yetu yoku amamako oku kunda esapulo Liusoma okuti, owo u ka malako ovitangi viomanu. Ka tu kuete ndomo tu situlula esanju tu yevite lioku kũlĩha okuti vamue pokati komanu vatete tua longisa Embimbiliya, va linga akundi votembo yosi, akundi valikasi kuenda akulu vekongelo.

Kofeka yo Haiti nda kũlĩhĩle umalẽhe umue o tukuiwa Trevor, wa kala omisionaliu lietavo lio mórmon. Olonjanja vimue tua enda oku sapela eci catiamẽla Kembimbiliya. Noke lianyamo amue, umalẽhe waco wa ndi tumisa ukanda umue. Eye wa soneha hati: “Ame ndi ka papatisiwa kohongele yimbo yi kuãimo! Ndi yongola oku tiukila ko Haiti loku ka talavaya ndukundi olikasi, kocitumãlo cimuamue kuna nda kala omisionaliu lietavo lio mórmon.” Kuenje eci oco eye a linga vokuenda kuanyamo alua kumue lukãi waye.

OKU TALAVAYA KO EUROPA NOKE KO AFRIKA

Tua tumiwa oku ka talavaya konepa yimue yo Europa kuna okuti upange wetu woku kunda ka wa tatekiwile calua. Kunyamo wo 1992 tua pitĩla kolupale luo Liubliana, kofeka yo Eslovenia okuti, olupale lumue ocipepi locitumãlo olonjali viange via kulila osimbu ka va ilukilile ko Italia. Vo Lugoslavia yosimbu handi mua kala uyaki. O Betele yo Austria kolupale luo Viena, yo Kroacia kolupale luo Zagreb kuenda yo Servia kolupale luo Belgrado, ovio via enda oku songuila upange woku kunda vocikanjo caco. Pole, cilo ofeka lofeka ya ponduile oku kuata o Betele yavo.

Kofeka yo Eslovenia tua sukilile oku lilongisa elimi kuenda ovituwa viokaliye. Omanu kofeka yaco, va enda oku popia hati: “Jezik je težek,” ci lomboloka okuti “Elimi ka lia lelukile.” Ocili okuti elimi liaco ka lia lelukile muẽle! Tua komõha calua poku mola ndomo vamanji va likapeleleko oku tava lonjanga apongoloko osi a lingiwa vocisoko kuenda tua molavo ndomo Yehova a va sumũlũisa. Tua limbukavo ndomo Yehova olonjanja viosi a pengulula ovina locisola calua, loku ci linga vepuluvi lia sokiyiwa. Ovina vialua tua lilongisa vokuenda kuotembo tu kasi oku vumba Yehova, via tu kuatisa oku pandikisa eci tua kala kofeka yo Eslovenia kuenda toke cilo tu kasi oku lilongisa ovina viokaliye.

Pole, apongoloko eya oku amamako komuenyo wetu. Kunyamo wo 2000 tua tumiwa kofeka yo Kosta du Marfim yi sangiwa Kutakelo wo Afrika. Noke, kosãi ya Kuvala wo 2002 omo liuyaki, tua sukilile oku tilila kofeka yo Serra Leoa. Ekalo kofeka yaco lia kala ciwa, momo uyaki wa pitileko vokuenda 11 kanyamo wa puile ale. Ka ca lelukile kokuetu oku tunda ko Kosta du Marfim vocipikipiki. Pole, ovolandu tua lilogisa kofeka yaco a tu kuatisa oku amamako lesanju.

Ko Serra Leoa omanu valua va yonguile oku lilongisa ocili. Vamanji va kala vakuacisola kuenda va pandikisa vokuenda kuanyamo alua uyaki. Omo liaco, tua tiamisila utima kovina viaco viwa. Ndaño vamanji va kala olohukũi, ovo va kuatele ocituwa coku likuatisa pokati. Ndeci, manji umue ukãi wa ecele ovowalo amue kukãi wange Debbie. Kefetikilo Debbie ka yonguile oku tava, pole, manji yaco wo lipilikila poku u sapuila hati: “Vokuenda kuyaki vamanji vo kolofeka vikuavo va tu kuatisa, kaliye onjanja yetu yoku ci lingavo.” Ame lukãi wange Debbie tua nõlapo oku li tumbikila ocimãho coku setukula ongangu yavo.

Vokuenda kuotembo tua tẽla oku tiukila ko Kosta du Marfim, pole, ekalo lieya oku pongoloka vali. Omo liaco, kosãi ya Kuvala wo 2004 tua sukilile vali oku tila. Tua ambatiwa lelikopitu toke kocila cimue cuyaki casualali vo ko Fransa okuti, omunu lomunu wambata lika ekolombele limue litito kuenda tua pekela posi. Keteke lia kuamamo tua enda lombalãu toke kofeka yo Suíça. Tua pitĩla ko Betele vokati kuteke. Kuenje vamanji va panga onepa Kocimunga Cakulu vo Filiale, lalongisi Vosikola Yoku Pindisa Vamanji Alume ka va Kuelele va tu tambula locisola. Akãi vavo va kalavo kumosi lavo eci va tu tambula locisola. Ovo va tu yolela lesanju, va tu ĩha okulia, lovina vikuavo vi pepa vio ko Suíça. Tua komõha calua omo liocisola caco.

Tua talavaya vokuenda kuotembo yimue kofeka yo Gana noke tua tẽla oku tiukila kofeka yo Kosta du Marfim eci ovoyaki eya oku tepuluka. Ohenda ya vamanji ya tu kuatisa oku liyaka lekalo liaco ka lia lelukile kuenda apongoloko kocikele cetu. Ame la Debbie tu tava okuti ocisola vamanji va likuetele pokati ca siata calua vocisoko ca Yehova. Pole, ka ci lekisa okuti ka tu kapiko vali ovina vamanji va siata oku linga. Vokuenda kuotembo tua limbuka okuti ekalo liaco lia panga onepa kepindiso lietu.

KO ORIENTE MEDIO

Kunyamo wo 2006 tua tambula ukanda umue wa tunda Kombala Yolombangi Via Yehova wa lekisa okuti, tu kuete ocikele cikuavo cokaliye. Onjanja eyi tua tumiwa ko Oriente Medio. Kofeka yaco tua sukilile oku liyaka lovitangi, oku likisa alimi okaliye kuenda ovituwa vio kocitumãlo caco. Tua kũlĩhĩle okuti tua laikele oku lilongisa ovina vialua kofeka yaco, omo liovitangi vio pulitika kuenda viatavo. Tua solaile calua oku yeva alimi alua a litepa a kala vakongelo. Ndaño lovituwa via litepa, ca lelukile oku mola ndomo vamanji va likuatele omunga omo lioku kuama olonumbi viocisoko ca Yehova. Tua enda oku komõha calua omo vamanji va kala vakuotõi poku liyaka lelambalalo liepata, liomanu va lisunguile lavo, lia vana va tangela kumosi kuenda vana talavayela kumosi.

Kunyamo wo 2012 tua endele kohongele yofeka yilikasi ya lingiwa ko Tel-Aviv, kofeka yo Isareli. Eyi oyo ya kala ohongele yatete yinene, ya lingiwa lafendeli va Yehova vo kofeka yaco tunde ko Pendekoste yunyamo 33 K.K. Lia kala epuluvi limue okuti lalimue eteke tu ka ivalako!

Kanyamo tua kala ko Oriente Medio, tua nyula ofeka yimue okuti upange wetu wa kala oku tatekiwa. Tuambata alivulu amue, tua kunda kuenda tua endele kolohongele vimue vitito vimbo. Kolonepa viosi, tua enda oku mola asualali va limalẽha kuenda ovitumãlo viakuenje velombe va pulisa olopapelo viuvangi. Pole omo lioku lekisa utate kuenda oku kala ocipepi la vamanji vo kocitumãlo caco, tua liyevele okuti tua kolapo.

OKU TIUKILA VO AFRIKA

Kunyamo wo 2013, tua tambula ocikele cimue ca litepa. Tua lalekiwa oku ka talavaya ko Filiale yo Kinshasa, ko Kongu okuti ofeka yimue mueyuka ovina vialua via posoka, uhukũi kuenda kovoyaki. Ketikilo tua popia ndoco: “Tua kũlĩha o Afrika. Omo liaco, ci ka leluka kokuetu.” Pole, oku popia ocili, tua lilongisa ovina vialua kofeka yaco ca piãla enene kovongende, momo vofeka yaco ka kua kaile atapalo kuenda ayau awa. Ndaño ndoco tua mola ovina vialua viwa. Ndeci, vamanji va pandikisa lesanju kuenda ndaño luhukũi, va solaile calua oku kunda loku likolisilako oku enda enda kolohongele viekongelo kuenda kolohongele vimbo. Tua mola lovaso etu okuti, oku kula kupange wusoma ku tẽliwa lika lekuatiso kuenda asumũlũho a Yehova. Vokuenda kuanyamo tua kala ko Kongu, tua lilongisa ovolandu alua awa kuenda tua linga akamba va kasi ndepata kokuetu.

Kesulilo liunyamo wo 2017, tua tambula ocikele cokaliye coku ka talavaya ko Filiale yo Afrika du Sul okuti, oyo o Filiale yinenepo vali tua talavaya. Toke muẽle ovikele tua tambula via kala viokaliye kokuetu. Yimue vali onjanja, tua kuata ovina vialua vioku lilongisa. Ovolandu tua lipita lao a tu kuatisa calua. Tunde eci tua pitĩla kulo, tua sola calua oku kũlĩha vamanji okuti, va kasi ale oku pandikisa kupange wa Yehova vokuenda kuanyamo alua. Ci komõhisa calua oku mola ndomo vamanji ko Betele va talavaya lomunga, ndaño va tunda kovitumãlo via litepa kuenda va kuete ovituwa via litepa. Ca leluka oku mola ndomo Yehova a kasi oku sumũlũisa afendeli vaye lombembua, osimbu ovo va likolisilako oku wala omunu wokaliye, loku kapako olonumbi Viembimbiliya.

Vokuenda kuanyamo, ame lukãi wange Debbie tua tambula ovikele vi komõhisa, tua likisa lovituwa via litepa kuenda tua lilongisa alimi okaliye. Olonjanja vimue ka ca lelukile, pole, tua limbuka ocisola cocili Yehova a lekisa kokuetu pocakati cocisoko caye kuenda ca vamanji. (Osa. 144:2) Tua kolela okuti, upange wotembo yosi wa tu kuatisa oku kala afendeli vawa va Yehova.

Ndi pandula calua omo liovina olonjali viange via ndi longisa. Ndi pandulavo ekuatiso liukãi wange Debbie kuenda ongangu yiwa nda lilongisa ku vamanji vo koluali luosi. Omo liaco, poku tiamisila utima kovaso yoloneke, tua nõlapo oku amamako oku longisiwa Lulongisi Wetu wa Velapo.