Tu Sanjukili Yehova Utungi Wetu

1. Momo lie tu popela okuti, Yehova eye Utungi wa velapo?

KOSÃI ya Kuvala yunyamo wo 2010, kofeka yo Inglaterra, kua eciwa ombanjaile yeci ci panda 70 kolohuluwa violondolale, omo liocikuata cimue cosimbu ca pangiwa lotuma.Tu komõha calua poku limbuka okuti, utungi o pondola oku pengulula otuma, kuenje yi linga ocikuata cimue ca posoka okuti, ci landisiwa londando yimue ya tĩla. Omo okuti Yehova eye utungi wa velapo, ka sokisiwa lomunu umue o kuete uloño woku tunga ovina viotuma. Embimbiliya li popia hati, Yehova wa lulika omunu “leve lioposi.” Olondaka evi vi lomboloka okuti, omunu wa lulikiwa lonata. (Efet. 2:7) Ulume waco okuti Adama, wa kala “omõla a Suku,” kuenda wa lulikiwa luloño woku setukula ovituwa viaye.—Luka 3:38.

2, 3. Tu kuama ndati ongangu ya va Isareli vana va likekembela?

² Eci Adama a lueyela Yehova Suku, Utungi waye, weya oku liwekapo oku kala omõla waye. Pole, omãla va Adama, va nõla Yehova oco a linge Ombiali yavo. (Va Heveru 12:1) Omo liepokolo va siata oku lekisa Kutungi wavo, va yongola okuti, o linga Isiavo, pole, Satana hayeko. (Yoano 8:44) Epokolo afendeli va Yehova va siata oku lekisa kokuaye, li tu ivaluisa olondaka va Isareli vana va likekembela va popele vati: “A Yehova, ove vuisietu; etu tutuma, ove [utungi wetu]. Etu vosi tupange wovaka ove.”—Isaya 64:8.

³ Koloneke vilo, afendeli va Yehova va siatavo oku lekisa umbombe kuenda epokolo. Ovo va limbuka okuti, oku tukula Yehova vati Isiavo, esumũlũho kokuavo. Kuenje, va yongola okuti, Yehova Utungi wavo, amamako oku va pengulula. Ove hẽ o yongola oku kala ndotuma ya leñela okuti, Suku o pondola oku yi pengulula oco yi linge ocikuata cimue ci kuete esilivilo lia velapo? Anga hẽ tua kapako vamanji okuti va siata oku ecelela oku penguluiwa la Yehova? Oco tu kuatisiwe oku kuata ovisimĩlo via sunguluka, vocipama cilo tu konomuisa ndomo Yehova a siata oku nõla omanu vana a yongola oku pengulula. Tu konomuisavo esunga lieci a siatela oku va pengulula, kuenda ndomo a ci linga.

YEHOVA O NÕLA OMANU A YONGOLA OKU PENGULULA

4. Yehova wa siata oku nõla ndati omanu vana a yongola okuti, o va kokela kokuaye? Tukula ulandu umue.

⁴ Yehova ka siatele oku tenda omanu ndeci tu va tenda. Pole, o kũlĩhĩsa ovina vi kasi vutima, kuenje o limbuka ndomo omunu lomunu pokati ketu a tuwa. (Tanga 1 Samuele 16:7b.) Yehova wa lekisa ocituwa caco eci a sokiya ekongelo liatete Liakristão. Eye wa kokela kokuaye kuenda Komõla waye omanu valua okuti, vamue va tendiwile ndu okuti, ka va kuete esilivilo. (Yoano 6:44) Umue pokati komanu vaco Saulu, Ufariseo okuti, wa ‘kala ukuakupembula omanu, wa enda oku va lambalala, kuenda oku litenga vovitangi viavo.’ (1 Timoteo 1:13) Pole, Yehova wa kũlĩhĩsa utima wa Saulu, kuenje wa limbuka okuti, ka kalele ndotuma ka yi kuete esilivilo. (Olosapo 17:3) Momo, Yehova wa limbukile okuti citava oku pengulula Saulu oco a linge ‘ocikuata ca nõliwa.’ Kuenje, o kundila komanu “vakualofeka, kolosoma kuenda komãla va Isareli.” (Ovilinga 9:15) Yehova wa nõlavo omanu vakuavo oco va penguluiwe okuti, va linga “ocikuata ca posoka,” oku kongelamo vana va kala oloholua, vana vambatele omuenyo wa vĩha, kuenda vana va kuatele ocituwa coku nyana. (Va Roma 9:21; 1 Va Korindo 6:9-11) Omo Liovisonehua va lilongisa, va pamisa ekolelo liavo ku Yehova, kuenje, va ecelela okuti, o va pengulula.

5, 6. Oku kolela okuti Yehova eye Utungi wetu ci tu kuatisa ndati oku lekisa ovituwa viwa (a) komanu tu sanga vocikanjo cetu? (b) Ku vamanji?

⁵ Tua kolela okuti, Yehova o pondola oku nõla omanu va sunguluka, oco a va kokele kokuaye. Eli olio esunga lieci tu sukilila oku yuvula oku kuata ovisimĩlo ka via sungulukile viatiamẽla komanu va kasi vocikanjo cetu, kuenda vekongelo. Kũlĩhĩsa ulandu wulume umue o tukuiwa hati Michael okuti, wa lekisa ocituwa ka ca sungulukile eci Olombangi Via Yehova via endele konjo yaye. Eye wa popia hati: “Vepuluvi liaco, sia yonguile oku va yevelela. Momo kokuange va kala ndomanu vamue ka va kuete esilivilo. Nda va kuatelele onyeño yalua! Eteke limue ndeya oku lisanga lepata limue lia ndi komõhisa calua, omo liovituwa viavo viwa. Pole, eteke likuavo eci nda limbuka okuti epata liaco Olombangi Via Yehova, nda komõha calua! Kuenje, ovituwa viavo via ndi vetiya oku konomuisa esunga lieci nda vi suvukila. Kuenje, ndeya oku limbuka okuti, eci veyile konjo sia tavele oku va yevelela, omo liekambo lioku kũlĩha ndomo va tuwa. Momo, nda kapeleko lika ovina ka via sungulukile omanu va enda oku popia viatiamẽla kokuavo, pole, sia kapeleko ovina viwa va siata oku linga.” Omo okuti Michael wa yonguileoku kũlĩha ovina vikuavo viatiamẽla Kolombangi Via Yehova, wa tava oku lilongisa Embimbiliya. Noke wa papatisiwa, kuenje, wa linga ukundi wotembo yosi.

⁶ Nda tu tava okuti Yehova eye Utungi wetu, ci tu vetiya oku kuata ovisimĩlo via sunguluka viatiamẽla ku vamanji. Kuenje, tu limbuka okuti, va siata oku ecelela oku penguluiwa la Yehova. Eye o tenda omanu lonjila yimue ya sunguluka. Momo, o pondola oku limbuka ovina vi kasi vutuma wavo, kuenda wa kũlĩha okuti, ekambo liavo lioku lipua, ndopo li sulila. Yehova wa kũlĩhavo ndomo omunu lomunu pokati kavo a pondola oku linga apongoloko. (Osamo 130:3) Nda tua kuata ovisimĩlo via sunguluka viatiamẽla ku vamanji, ci tu vetiya oku kuama ongangu ya Yehova. Tu pondolavo oku talavaya la Yehova Utungi wetu, poku kuatisa vamanji oku amamako oku pamisa ekolelo liavo. (1 Va Tesalonike 5:14, 15) Omo liaco, akulu vekongelo va sukila oku lekisa ongangu yiwa poku linga upange waco.—Va Efeso 4:8, 11-13.

MOMO LIE YEHOVA A SIATELA OKU TU PENGULULA?

7. Momo lie wa kapelako epindiso lia Yehova?

⁷ Omanu vamue va siata oku popia vati: ‘Lalimue eteke nda kapeleko epindiso nda tambula kolonjali viange, toke eci nda cita omãla vange.’ Pole, osimbu tuamamako oku linga akulu tu kapako epindiso tua tambula. Momo, tua kũlĩha okuti, lia eciwa locisola. (Tanga Va Heveru 12:5, 6, 11.) Yehova o tu sole calua, momo, tumãla vaye, kuenje o tu pindisa, ale o tu pengulula lepandi. Omo okuti Yehova eye Isietu, o yongola okuti, tu kuata olondunge, esanju, kuenda ocisola. (Olosapo 23:15) Yehova ka yongola okuti tu tala ohali, kuenda tu fa ndomanu vana ka va yongola oku likekembela akandu avo.—Va Efeso 2:2, 3.

8, 9. Yehova wa siata oku tu longisa ndati koloneke vilo, kuenda o ka amamako ndati oku tu pindisa kovaso yoloneke?

⁸ Osimbu ka tua kũlĩhĩle Yehova, citava okuti tua kuatele ovituwa vialua ka via sungulukile. Pole, Yehova wa tu pengulula, kuenda wa tu kuatisa oku linga apongoloko. Kuenje, cilo tu kuete ovituwa vimue viwa. (Isaya 11:6-8; Va Kolosai 3:9, 10) Tu kuete ombembua la vamanji. Momo, Yehova wa linga esokiyo liaco lilikasi koloneke vilo, oco a tu pengulule. Tua limbuka okuti, tua kolapo omo lioku kala la vamanji, ndaño tu kasi voluali lumue lua vĩha. Kuli vamanji vamue va tekuiwa lepata lina okuti, ka lia lekisile ocisola kokuavo. Pole, cilo, va limbuka ocisola vamanji va siata oku lekisa kokuavo, omo liombembua va kuete. (Yoano 13:35) Momo, tua lilongisa oku lekisa ocisola komanu vosi. Omo liaco, ca velapo kokuetu ceci okuti, cilo tua kũlĩha Yehova Isietu, kuenje, tua limbuka ocisola a siata oku lekisa kokuetu.—Tiago 4:8.

⁹ Voluali luokaliye, tu ka tambula asumũlũho alua omo lioku kuata ombembu kumue la vamanji. Tu ka kuatavo esanju eci tu ka kala voluali luokaliye lua vialiwa Lusoma wa Yehova Suku. Vokuenda kuotembo yaco, Yehova o ka amamako oku tu pengulula, kuenda oku tu pindisa lonjila yimue okuti, cilo ka tu pondola oku limbuka ndomo a ka ci linga. (Isaya 11:9) Yehova o ka pongolola ovisimĩlo vietu, kuenda tu ka li pua. Kuenje, ci ka leluka oku kuata elomboloko liovina a ka tu longisa, kuenda oku pokola kolonumbi viaye. Omo liaco, tuamamiko oku ecelela okuti, Yehova o tu pengulula, kuenda tu lekisi okuti, tua kapako ocisola a tu kuetele.—Olosapo 3:11, 12.

NDOMO YEHOVA A SIATA OKU TU PENGULULA

10. Yesu wa setukula ndati Utungi wa Velapo okuti ukuepandi, haeye wa loñoloha?

¹⁰ Ndeci utungi wolombia wa loñoloha a kũlĩha otuma a yongola oku pengulula, Yehova Utungi wetu, wa tu kũlĩhavo ciwa. Eye wa kũlĩha ciwa oloñeyi vĩvi tua siata oku kuata, ovina ka tu tẽla oku linga, kuenda evi tua linga okuti via pamisa ukamba wetu laye. Pole, Yehova poku tu pindisa o kapako ekalo lietu. (Tanga Osamo 103:10-14.) Tu pondola oku lilongisa ndomo Yehova a siata oku tu tenda, eci tu limbuka ovituwa Yesu a lekisa poku kala lolondonge viaye ka via lipuile. Momo, olonjanja vimue via enda oku lihoya oco vi limbuke helie wa velapo pokati kavo. Nda ove wa kalele kumue lavo, nda wa tenda ndati ovituwa viovapostolo? Pamue ove nda wa sima okuti, ovapostolo ka va kalele ndotuma ya leñela. Pole, Yesu wa kũlĩhĩle okuti, ovapostolo vaye va laikele lika oku penguluiwa, nda va tava kelungulo a eca lepandi, kuenda va setukula ongangu yaye yoku lekisa umbombe. (Marko 9:33-37; 10:37, 41-45; Luka 22:24-27) Noke liepinduko lia Yesu, ovapostolo va tambuile espiritu lia Suku, kuenje, va liwekapo oku lihoya catiamẽla koku limbuka helie wa velapo pokati kavo. Kuenje, va tiamisila lika utima kupange Yesu a ecele kokuavo.—Ovilinga 5:42.

11. Daviti wa lekisa ndati okuti wa kala ndotuma ya leñela, kuenda tu pondola oku kuama ndati ongangu yaye?

¹¹ Koloneke vilo, Yehova wa siata oku tu kuatisa Lembimbiliya, espiritu sandu liaye, kuenda ekongelo oco a tu pengulule. Embimbiliya li pondola oku tu pengulula ndati? Tu sukila oku tanga Embimbiliya, oku sokolola ovina tua tanga, kuenda oku pinga ekuatiso ku Yehova oco a tu kuatise oku kapako ovina tua siata oku lilongisa. Soma Daviti wa soneha ndoco: “Hu ivalukila pula wange, leci hu sokoluaila pokulendela kuteke.” (Osamo 63:6) Eye wa sonehavo ndoco: “Manduila Yehova wa njimba onumbi. Ndaño [kuteke] utima wange u ndungola.” (Osamo 16:7) Soma Daviti wa sokolola elungulo Yehova a ecele kokuaye, kuenje, wa ecelela okuti li pengulula ovisimĩlo viaye, ndaño okuti ka ca lelukile oku tava kelungulo liaco. (2 Samuele 12:1-13) Soma Daviti wa tu sila ongangu yiwa yoku lekisa umbombe kuenda epokolo. Omo liaco, o sukila oku lipula ndoco: ‘Eci ndi tanga Embimbiliya nda siata hẽ oku sokolola ovina nda tanga, loku ecelela okuti elungulo lia Suku li pengulula ovisimĩlo viange? Ndi pondola hẽ oku kapako ovina viaco?’—Osamo 1:2, 3.

12, 13. Yehova wa siata oku tu pengulula ndati lekuatiso liespiritu sandu, kuenda ekongelo?

¹² Espiritu sandu li pondola oku tu pengulula volonepa via litepa. Olio, li pondola oku tu kuatisa oku setukula ekalo lia Yesu, kuenda oku lekisa ovituwa via litepa viepako liespiritu. (Va Galatia 5:22, 23) Cimue pokati kovina viaco ocisola. Omo okuti tu sole Yehova Suku, tu yongola oku pokola kokuaye, kuenda oku penguluiwa laye. Momo, tua kũlĩha okuti, olonumbi viaye vi pondola oku tu kuatisa. Espiritu sandu li pondolavo oku pamisa ekolelo lietu, oco tu yuvule oku penguluiwa loluali lulo lua vĩha. (Va Efeso 2:2) Eci upostolo Paulu a kala umalẽhe, wa yapuisiwile lasongui vetavo lia va Yudea va kuepela. Pole, espiritu sandu lio kuatisa oku linga apongoloko. Eye wa popia hati: “Kovina viosi ñuete ongusu mekonda lia una o nyĩha unene.” (Va Filipoi 4:13) Tu sukilavo oku pinga espiritu sandu ku Yehova, momo tua kũlĩha okuti, wa siata oku tambulula olohutililo tu linga lutima wosi.—Osamo 10:17.

¹³ Yehova wa siatavo oku tu pengulula lekuatiso liekongelo, kuenda akulu vekongelo. Nda akulu vekongelo va limbuka okuti tu kuete ovituwa vimue ka via sungulukile, va tu kuatisa. Pole, poku eca elungulo, ka va li tiamisila kovisimĩlo viavo. (Va Galatia 6:1) Ovo va siata oku likutilila ku Yehova lumbombe, oco va kuate elomboloko kuenda uloño. Noke, va linga akonomuiso lekuatiso Liembimbiliya, kumue lalivulu etu, oco va sange olonumbi vi pondola oku tu kuatisa. Nda akulu vekongelo va eca kokuove elungulo limue liatiamẽla kocituwa cove ka ca sungulukile coku wala, ivaluka okuti, va kasi oku ci lingila omo liocisola Suku a ku kuetele. Nda wa kapako elungulo liaco, o kala ndotuma ya leñela Yehova a pondola oku pengulula, kuenje o kuatisiwa.

14. Ndaño okuti Yehova o kuete omoko yoku pengulula otuma, wa siata oku lekisa ndati esumbilo kelianjo lietu lioku nõla eci tu yongola oku linga?

¹⁴ Nda tua kuata elomboloko ndomo Yehova a siata oku tu pengulula, ci tu kuatisa oku kuata ukamba la vamanji. Ci tu kuatisavo oku kuata ovisimĩlo via sunguluka viatiamẽla komanu va kasi vocikanjo cetu, oku kongelamo vana tu longisa Embimbiliya. Kosimbu, nda utungi o yongola oku pengulula otuma, wa enda oku yi yelisa okuti, upamo ovawe, kuenda ovinene vikuavo. Omo okuti Yehova eye Utungi wa Velapo, wa siata oku kuatisa omanu vana va yongola oku penguluiwa. Eye ka siatele oku va kisika oco va linge apongoloko, pole, o lekisa kokuavo olonumbi via sunguluka. Kuenje, va nõla nda va yongola oku linga apongoloko ale sio.

15, 16. Ondonge yimue ya lekisa ndati okuti, yi yongola oku penguluiwa la Yehova? Tukula ulandu umue.

¹⁵ Tu konomuisi ulandu wa pita la manji umue o tukuiwa hati Tessie, o kasi kofeka yo Australia osimbu ka lingile Ombangi ya Yehova. Kokuaye ca lelukile oku lilongisa ovina viatiamẽla kueci Embimbiliya li longisa. Pole, ka pamisile lonjanga ukamba waye la Yehova, kuenda ka kuatele ocituwa coku endaenda kolohongele. Manji wa kala oku linga laye elilongiso, wa likutilila ku Yehova, kuenje, wa nõlapo oku liwekapo oku u longisa Embimbiliya. Pole, kueya oku pita ocina cimue ci komõhisa. Momo, onjanja yimue manji wa kala oku longisa Embimbiliya ku Tessie, wo pula esunga lieci ka kasilili oku linga apongoloko. Kuenje, wa tambulula hati, o kasi ndomunu umue ukuambambe. Momo, o sole calua omapalo yoku nganyala olombongo. Pole, cilo wa liwekapo oku linga omapalo yaco.

¹⁶ Ka pa pitile otembo yalua Tessie wa fetika oku endaenda kolohogele, kuenda oku lekisa ovituwa viwa ndaño okuti akamba vaye va enda oku u sanumula. Ndaño wa kuata omãla vatito, pole, vokuenda kuotembo, wa papatisiwa, kuenje, wa linga ukundi wotembo yosi. Nda omanu tu longisa Embimbiliya va fetika oku linga apongoloko oco va sanjuise Suku, eye o kuata ukamba lavo. Kuenje, o va pengulula oco va linge ocikuata cimue ci kuete esilivilo lia velapo.

17. (a) Nye o sima catiamẽla ku Yehova Utungi wove? (b) Ovina vipi viatiamẽla koku penguluiwa tu ka konomuisa vocipama ci kuãimo?

¹⁷ Koloneke vilo, omanu vamue vakuakutunga ovina viotuma va siata oku lavulula poku pengulula otuma, oco yi linge ocikuata cimue ca posoka. Cimuamue haico Yehova a siata oku linga okuti, o lekisa epandi poku tu pengulula lalungulo aye. Kuenje, o lavulula nda tu kapako alungulo aco ale sio. (Tanga Osamo 32:8.) Ove hẽ o pondola oku limbuka nda Yehova wa ku kapako? O tẽla hẽ oku limbuka ndomo Yehova a siata oku ku pengulula lutate? Nda wa ci limbuka, ovituwa vipi vi ku kuatisa oku kala ndotuma Yehova a pondola oku pengulula? Ovituwa vipi o sukila oku yuvula, oco ku ka kale ndotuma yimue ya kola okuti, ka ca lelukile oku yi pengulula? Olonjali vi pondola oku kuatisiwa ndati la Yehova oco vi pengulule omãla vavo? Ocipama ci kuãimo, ci ka tambulula apulilo a lingiwa ndeti.