Ku ka Ecelele Okuti Akulueya a Vamanji a ku Kokela Ocilondokua

1, 2. Nye Embimbiliya lia popele catiamẽla kevokiyo liafendeli va Yehova?

VOLUALI luosi, muli ocisoko cimue okuti omanu vaco va sole Yehova, kuenda va yongola oku amamako oku u fendela. Omanu vaco Olombangi Via Yehova. Ndaño okuti va siata oku lueya, pole, Yehova o kasi oku va songuila lespiritu sandu liaye. Omo liaco, tu konomuisi olonjila via litepa vi lekisa ndomo Yehova a siata oku va sumũlũisa.

² Kunyamo wo 1914, voluali ka mua kalele omanu valua va enda oku fendela Yehova. Pole, Yehova wa siata oku sumũlũisa upange woku kunda. Kuenje, omanu valua va siata oku lilongisa ocili ci sangiwa Vembimbiliya, noke va linga Olombangi Via Yehova. Omo liaco Yehova wa lombolola eci catiamẽla kevokiyo liaco poku popia hati: “U o sule o linga epata, lu [utito] o linga ofeka ya pama. Ame ndi Yehova ndi ci yayuisa kotembo yaco.” (Isaya 60:22) Koloneke vilo, tu pondola oku limbuka ndomo ocitumasuku eci ci kasi oku tẽlisiwa. Afendeli va Yehova va kasi ndepata limue linene. Voluali muli olofeka vimue okuti, etendelo liomanu vaco litito calua, kuenda ka li sokisiwa letendelo Liolombangi Via Yehova.

3. Afendeli va Yehova va siata oku lekisa ndati okuti va kuete ocisola?

³ Vokuenda kuoloneke vilo via sulako, Yehova wa siata oku kuatisa afendeli vaye oco va likuatele ocisola pokati. Omo okuti Yehova “Suku eye ocisola,” tu sukila oku setukula ongangu yaye. (1 Yoano 4:8) Yesu wa vetiya olondonge viaye oco vi ‘lisole pokati.’ Eye wa vi sapuilavo hati: “Poku ci linga, vosi va limbuka okuti vulondonge viange . . . nda wa lisoli pokati.” (Yoano 13:34, 35) Vokuenda kuanyamo asulako afendeli va Yehova va siata oku likuatela ocisola pokati kavo, ndaño ceci vakualofeka va linga uyaki. Vokuenda kuyaki wavali wa pita voluali, ci soka 55 kolohuluwa viomanu va pondiwa. Pole, afendeli va Yehova ovo lika ka va litengele vuyaki waco. (Tanga Mika 4:1, 3.) Kuenje, utõi waco wa va kuatisa oku pua ‘eko liosonde yomanu vosi.’—Ovilinga 20:26.

4. Momo lie afendeli va Yehova va siatela oku livokiya koloneke vilo?

⁴ Etendelo liafendeli va Yehova Suku li kasi oku amamako oku livokiya, ndaño Satana wa siata oku tu lambalala. Satana eye “suku yoluali lulo.” (2 Va Korindo 4:4) Omo okuti Satana eye usongui wovisoko viosi viopulitika yoluali lulo, kuenda wovingungu viasapulo, o yongola okuti, tu liwekapo oku kunda olondaka viwa. Pole, ka pondola oku ci linga. Omo Satana wa kũlĩha okuti kuo kambela otembo yitito, wa siata oku seteka oku tu tateka, oco tu liwekepo oku fendela Yehova.—Esituluilo 12:12.

OVE HẼ O LEKISA ESUNGULUKO NDA VAMANJI VA KU LUEYELA?

5. Momo lie olonjanja vimue vamanji vamue va siatela oku popia olondaka vi tu sumuisa? (Tala elitalatu kefetikilo liocipama cilo.)

⁵ Afendeli va Yehova va kũlĩha okuti, oku lekisa ocisola kokuaye kuenda komanu vakuavo, ci kuete esilivilo. Yesu wa popia hati: “‘Sola Yehova Suku yove lutima wove wosi, lomuenyo wove wosi kuenda lolondunge viove viosi.’ Eci oco ocihandeleko catete haico ca velapo. Cavali ca lisoka leci, [ci popia hati]: ‘Sola ukuẽle ndeci o lisole ove muẽle.’” (Mateo 22:35-39) Pole, Embimbiliya li lekisa okuti, omanu vosi va citiwa lekambo lioku li pua, omo liekandu va piñala ku Adama. (Tanga Va Roma 5:12, 19.) Citava okuti vamanji vamue vekongelo va tu linga ocina cimue cĩvi, ale va tu popisa olondaka vi tu sumuisa. Nye tu sukila oku linga, nda tua pita locitangi caco? Anga hẽ tuamamako lukamba wetu la Yehova? Tuamamako hẽ oku kala vakuacili kokuaye kuenda kafendeli vaye? Embimbiliya li tukula ovolandu atiamẽla kafendeli vamue va Yehova okuti va linga ovina ka via sungulukile, ale va popia olondaka vimue via sumuisa omanu vakuavo. Omo liaco, tu konomuisi ovina tu pondola oku lilongisa kovolandu a pita lomanu vaco.

6. Momo lie Eli a ecelela okuti, ka lungula omãla vaye?

⁶ Ovolandu a lekisa okuti, Eli, wa kala ocitunda cinene ko Isareli, pole, omãla vaye vavali va lueyele ovihandeleko via Yehova. Embimbiliya li popia hati: “Omãla va Eli ka va sungulukile muẽle, [kuenda] ka va sumbilile Yehova.” (1 Samuele 2:12) Eli wa kũlĩhĩle okuti, omãla vaye va kala oku linga ovina ka via sungulukile. Pole, ka va lunguile. Noke, Yehova wa yambula Eli kumue lomãla vaye vavali. Kuenje, Yehova ka tavele vali okuti, ovitumbulukila via Eli vi linga ovitunda via velapo. (1 Samuele 3:10-14) Nda ove wa kalele kotembo ya Eli, kuenje wa limbukile okuti wa ecelela omãla vaye oku linga ovina ka via sungulukile, anga hẽ nda ca ku kokela ocilondokua? Ocitangi caco nda ca tepulula hẽ ekolelo liove ku Yehova, kuenje o liwekapo oku u fendela?

7. Ekandu lipi Daviti a lingile, kuenda nye Yehova Suku a linga catiamẽla kekandu liaco?

⁷ Omo okuti Daviti wa kuatele ovituwa viwa, Yehova wa lekisile ocisola calua kokuaye. (1 Samuele 13:13, 14; Ovilinga 13:22) Pole, Daviti wa lingile ovina vimue ka via sungulukile. Eci Uriya a kala kuyaki, Daviti wa lipekelele la Batisieva, una wa kala ukãi wa Uriya, kuenje, wa mina. Pole, Daviti ka yonguile okuti, ocitangi caco ci kũlĩhĩwa lomanu vakuavo. Omo liaco, wa vilikiya Uriya wa kala kuyaki, oco eye oku sapela laye, kuenda oku u vetiya oku ka lala konjo yaye. Momo, Daviti wa yonguile okuti, Uriya o lipekela lukãi waye Batisieva, oco omanu va sime okuti, eye wo minisa. Pole, Uriya ka tavele oku ka lala konjo yaye. Omo liaco, Daviti wa tuma Uriya oku tiukila kuyaki, oco a pondiwe. Omo liekandu linene Daviti a linga, epata liaye lia liyaka lovitangi vialua. (2 Samuele 12:9-12) Pole, Yehova wa lekisa ohenda ku Daviti, kuenje wo wecela. Momo, wa kũlĩhĩle okuti, Daviti wa yonguile oku linga ovina via sunguluka. (1 Olosoma 9:4) Nda ove wa kalele kotembo yaco, nye nda wa yeva vutima omo liovina vĩvi Daviti a linga? Ove hẽ nda wa liwekapo oku fendela Yehova?

8. (a) Nye upostolo Petulu a linga ca lekisa okuti, ka tẽlisile ohuminyo yolondaka a popele? (b) Ndaño okuti Petulu wa lueyele, momo lie Yehova a tavela okuti amamako oku linga upange waye?

⁸ Ulandu ukuavo Wembimbiliya, watiamẽla kupostolo Petulu. Yesu wo nõlele oco a linge upostolo. Pole, olonjanja vimue Petulu wa enda oku popia ovina vimue ka via sungulukile. Onjanja yimue Petulu wa popele hati, lalimue eteke a laikele oku siapo Yesu, ndaño omanu vosi vo siapo. (Marko 14:27-31, 50) Pole, eci Yesu a tualiwa vokayike, ovapostolo vosi vo siapo, oku kongelamo Petulu. Noke, vokuenda kuolonjanja vitatu via litepa, Petulu wa popele hati, ka kũlĩhĩle Yesu. (Marko 14:53, 54, 66-72) Pole, Petulu wa sumuile calua omo liovina ka via sungulukile a linga. Omo liaco, Yehova wo wecela, kuenda wa tava okuti, amamako oku linga upange waye. Nda ove wa kalele ondonge ya Yesu kotembo yaco, kuenda wa kũlĩhĩle ovina vĩvi Petulu a linga, anga hẽ nda wamamako oku kolela ku Yehova?

9. Momo lie o sukilila oku kolela ku Yehova olonjanja viosi?

⁹ Noke lioku konomuisa ovolandu a pita lafendeli vamue va Yehova, tua limbuka okuti, vamue pokati kavo va linga ovina ka via sungulukile, kuenda va sumuisa omanu vakuavo. Nda koloneke vilo wa pita locitangi caco, nye o sukila oku linga? Anga hẽ, o liwekapo oku endaenda kolohongele, ale o tepa ukamba wove la Yehova kumue lafendeli vaye? O limbuka hẽ okuti Yehova ukuahenda, kuenda o yongola okuti, manji wa lueya o likekembela? Citava okuti, manji umue wa linga ekandu linene, kuenda ka yongola oku likekembela. Ove hẽ wa kolela okuti, Yehova wa kũlĩha ekandu liaco, kuenda o ka linga cimue votembo a sokiya? Nda ci sukiliwa citava okuti, Yehova o tundisa manji yaco vekongelo. Ove hẽ o tava okuti, Yehova wa siata oku linga ovina via sunguluka?

AMAMAKO OKU LEKISA ESUNGULUKO

10. Yesu wa tendele ndati akulueya a Yuda Isikariote kuenda a Petulu?

¹⁰ Vembimbiliya tu tangamo ovolandu omanu valua va lekisa esunguluko ku Yehova, kuenda kafendeli vaye, ndaño okuti omanu vamue va kala kumue lavo va enda oku linga akandu anene. Yesu wa lekisa ongangu yiwa catiamẽla kondaka yaco. Noke yoku pita uteke wosi loku likutilila oco Isiaye o kuatise, wa nõla 12 kovapostolo. Pole, umue pokati kavo okuti, Yuda Isikariote, weya oku u pakula. Onjanja yimue upostolo Petulu wa popelevo hati, ka kũlĩhĩle Yesu. (Luka 6:12-16; 22:2-6, 31, 32) Yesu ka lundilile Yehova, ale ovapostolo, eci omanu vamue va linga ovina vio sumuisile. Yesu wa kuatele ukamba wocili la Isiaye, kuenda wamamako oku u vumba lekolelo. Omo liaco, Yehova wa eca kokuaye onima yoku u pindula, kuenje, noke wo vialeka komangu Yusoma Vuviali wo kilu.—Mateo 28:7, 18-20.

11. Nye Embimbiliya lia popele catiamẽla kafendeli va Yehova okuti, oco ca laikele oku pita lavo koloneke vilo?

¹¹ Ongangu ya Yesu yi tu longisa oku lekisa esunguluko ku Yehova kuenda kafendeli vaye. Tu kuete esunga lioku ci linga. Tu pondola oku limbuka okuti, Yehova o kasi oku songuila afendeli vaye koloneke vilo via sulako. Eye o kasi oku kuatisa afendeli vaye kupange woku kundila olondaka viwa voluali luosi, kuenda ovo lika va kasi oku linga upange waco. Ovo va likuete omunga lesanju lialua, omo liovina Yehova a siata oku va longisa. Yehova wa lombolola ulandu waco eci a popia hati: “Tala akuenje vange, omo ovitima viavo via sanjuka, va imba ovisungo.”—Isaya 65:14.

12. Tu tenda ndati akulueya a vamanji?

¹² Tu kuete esanju, momo, Yehova wa siata oku tu songuila, kuenda oku tu kuatisa oku linga ovina vialua viwa. Pole, tua litepa lomanu vana va panga onepa koluali lulo lua Satana okuti, ka va kuete esanju, kuenda elavoko lio kovaso yoloneke. Ka ca sungulukile okuti, tu tepa ukamba wetu la Yehova kumue lafendeli vaye, omo lia manji umue wa tu linga ocina cimue cĩvi, ale wa popia ovina ka via sungulukile! Pole, tu sukila oku amamako oku lekisa esunguluko ku Yehova, kuenda oku pokola kolonumbi viaye. Omo liaco, tu sukila oku kũlĩhĩsa ndomo tu tenda akulueya a vamanji.

NYE O SUKILA OKU LINGA NDA VA KU LUEYELA?

13, 14. (a) Momo lie tu sukilila oku lekisa epandi komanu vakuavo? (b) Ohuminyo yipi tu yongola oku ivaluka?

¹³ Nye o sukila oku linga nda manji umue wa linga ocina cimue cĩvi, ale wa ku popisa olondaka vimue via ku sumuisa? Embimbiliya li popia hati: “Ku ka teme lonjanga, momo okutema kua tunga volonulo viaveke.” (Ukundi 7:9) Omo okuti vosi yetu tua piñala ekandu, olonjanja vimue tua siata oku lueya. Omo liaco, ka tu sukila oku lavoka okuti, olonjanja viosi vamanji va popia ovina viwa, ale va linga lika eci ca sunguluka. Tu sukilavo oku yuvula oku tiamisila utima kakulueya avo. Nda ka tua ci lingile, ka tu kuata esanju poku fendela Yehova. Kuenje, ekolelo lietu li tepuluka, kuenda tu nõlapo oku tunda vocisoko ca Yehova. Noke, tu liwekapo oku fendelele Yehova, ale ka tu kuata vali elavoko lioku kala voluali luokaliye.

¹⁴ Nye ci pondola oku ku kuatisa oku amamako oku fendela Yehova lesanju, ndaño okuti omanu vamue va linga ovina vi ku sumuisa? Tu sukila oku ivaluka ohuminyo ya Yehova yi tu lembeleka yi popia hati: “Tala, ndulika ilu liokaliye kuenda ongongo yokaliye; ovina viale ka vi ivalukiwa, [kuenda] ka vi sokoluiwa.” (Isaiya 65:17; 2 Petulu 3:13) Yehova o ka eca lika asumũlũho kokuove, nda wamamako oku kolela kokuaye.

15. Nye Yesu a popia okuti oco tu sukila oku linga nda manji umue wa tu lueyela?

¹⁵ Ocilo okuti, ka tu kasi handi voluali luokaliye. Omo liaco, Nda manji umue wa tu lueyela, tu sukila oku sokolola ovina Yehova a yongola okuti, ovio tu linga. Yesu wa popia hati: “Nda ene weceli akandu omanu va ku lueyeli, Isiene wo kilu ecelavo akandu ene; pole, nda ka weceli akandu omanu, Isiene ka ecelavo akandu ene.” Eci Petulu a pulile ku Yesu nda tu sukila oku ecelela lika “olonjanja epanduvali,” Yesu wo tambulula hati: “Si ku sapuila okuti olonjanja epanduvali, pole, 77 kolonjanja.” Omo liaco, Yesu wa tu longisa okuti, olonjanja viosi tu sukila oku ecela vana va tu lueyela.—Mateo 6:14, 15; 18:21, 22.

16. Ongangu yipi yiwa Yosefe a tu sila?

¹⁶ Ongangu Yosefe a lekisa, yi tu longisa ocituwa tu sukila oku lekisa, nda manji umue wa linga ovina vi tu sumuisa. Yosefe kumue la manjaye, ovo lika va kala omãla va Yakoba la Rahele. Ndaño Yakoba wa kuatele omãla vakuavo va soka ekũi, pole, wa solele calua Yosefe okuti, vakuavo ci sule. Kuenje, ca vetiya omãla vakuavo oku kuatela onya Yosefe. Omo liaco, vo landisa kupika, kuenje, wa tualiwa Kegito. Eci pa pita anyamo alua, Soma yo ko Egito weya oku nõla Yosefe, kuenje, wa kala omunu wavali wa kuatele ekemãlo vofeka yaco. Momo, wa komõhele calua omo liupange uwa Yosefe a enda oku linga. Noke, va kota lia Yosefe va endele Kegito oku ka landa okulia, omo lionjala ya kala vofeka yavo. Eci va mola Yosefe ka vo limbukile, pole, eye wa va limbuka. Ndaño okuti va kota liaye vo lingile ovina vĩvi, pole, ka va kangisile. Momo, wa kũlĩhĩsa lutate, oco a limbuke nda va siapo ovituwa viavo vĩvi. Eci Yosefe a limbuka okuti, va siapo ovituwa vĩvi, wa va sapuila hati, ame manjene. Noke, wa va lembeleka, kuenda wa va sapuila hati: “Ko ka kuati usumba. Ene muẽle lotumãla tuene ame ndu tekuli.”—Efetikilo 50:21.

17. Nye o sukila oku linga nda manji umue wa ku lueyela?

¹⁷ Ivaluka okuti, vosi yetu tua siata oku lueya, kuenda ove wa siatavo oku lueyela omanu vakuavo. Nda wa limbuka okuti wa sumuisa manji umue, kuama elungulo Liembimbiliya. Pinga ongecelo kokuaye, kuenda tumbulula ombembua laye. (Tanga Mateo 5:23, 24.) Nda vakuetu va tu ecela, tu kuata esanju. Omo liaco, tu sukilavo oku ecela vakuetu. Ukanda wa Va Kolosai 3:13, u popia hati: “Amamiko oku likapako omunu lukuavo, oku liecela pokati lutima wosi, nda umue o kuetele ondaka ukuavo. Ndeci Yehova o weceli lutima wosi, cimuamue haico vu linga.” Nda tu sole vamanji, tu sukila oku yuvula oku sumua omo liovina vĩvi va tu lingile kosimbu. (1 Va Korindo 13:5) Nda tua va ecela, Yehova o tu ecelavo. Nda vamanji va tu lueyela, tu sukila oku va ecela, ndeci Isietu Yehova a siata oku tu ecela.—Tanga Osamo 103:12-14.