Nye Embimbliya Lipopia Catiamẽla Kekambo Liokulia Koloneke Vilo?

“Ka kuli onjala.” Eci oco asongi voluali luosi va yongola oku linga oco va tetulule ovitangi viomanu ale ndomo va linga esokiyo lioku lieca okulia komanu vosi.a Anga hẽ eteke limue voluali ka mu ka kala vali onjala? Nye Embimbiliya li popia?

Embimbiliya lia popele ale catiamẽla kekambo liokulia koloneke vilo

Embimbiliya lia lekisa okuti ku ka kala ekambo liokulia kotembo yetu okuti “koloneke via sulako.” (2 Timoteo 3:1) Suku hayeko wa siata oku koka ekambo liokulia, pole, eye o tu lungula eci catiamẽla kekalo liaco. (Tiago 1:13) Kũlĩhisa ovitumasuku vivali Viembimbiliya.

“Ku ka kala onjala . . . kocitumãlo locitumãlo.” (Mateo 24:7) Ocitumasuku eci Cembimbiliya, ca lekisa okuti ku ka kala onjala kovitumãlo vialua. Ulandu umue womanu va lilongisa ndomo okulia ku pangiwa kuenda ku eciwa, wa lekisa okuti: “Ekalo lioluali liatiamẽla konjala kuenda kekambo liokulia kuwa, li kasi oku livokiya.”b Omanu valua ka va kuete ndomo va landa okulia va sukila. Ci sumuisa calua, momo valua pokati kavo ka va tẽla oku amamako lomuenyo.

“Kuenje nda mola okavalu ka tekãva kuenda u wa tumãlako o kuete ombalãsa peka.” (Esituluilo 6:5) Vocitumasuku eci, okavalu kuenda u wa endelako va lomboloka onjala koloneke vilo via sulako.c Ombalãsa yi kasi peka liomunu wa endela kokavalu, ya sokiyiwila oku yonga okulia. Osimbu ukuakuendela kokavalu a tumala kokavalu kaco, eca esapulo liokuti, olondando viokulia via livokiya calua kuenda o lungula omanu oco va seleke okulia. (Esituluilo 6:6) Eci ci lekisa ciwa ekambo liokulia koluali luosi koloneke vilo, osimbu omanu valua ka va tẽla oku sanga ale oku landa okulia kuwa.

Ndomo ekambo liokulia li kapuako

Olonoño via lekisa okuti, ongongo yetu ima okulia kualua oco ku tekule vosi va kasimo. Oco hẽ, nye ca siata oku koka ekambo liokulia? Kuenda nye Embimbiliya li popia okuti oco Ululiki wetu Yehova,d a ka linga oco a tetulule ovitangi viaco?

Ocitangi: Olombiali ka vi tẽla oku malako uhukũi kuenda ekambo liesunga lina li koka okuti, omanu va kala onjala.

Ndomo ci tetuluiwa: Olombiali viomanu ka via lipuile, vi ka piñanyiwa luviali wa Suku okuti wa lipua. (Daniele 2:44; Mateo 6:10) Koloneke vilo, omanu valua olohukũi ka va kuete eci va lia, pole, Usoma wa Suku u ka pongolola ekalo liaco. Embimbiliya li popia eci catiamẽla ku Yesu Kristu Osoma Yusoma wa Suku hati: “Eye o ka yovola ohukũi yina yi kaluka oku pinga ekuatiso, kuenda o ka yovolavo osuke lomunu wosi ka kuete umue u kuatisa . . . Ku ka kala olomema vialua kilu lieve; vi ka supoka kosungu yolomunda.”—Osamo 72:12, 16.

Ocitangi: Ovoyaki a nyõla kuenda ekambo liolombongo vi tateka oku eca okulia.

Ndomo ci tetuluiwa: “[Yehova] o kasi oku nena esulilo liovoyaki kilu lieve liosi. O teya ohonji kuenda o nyanyõla onjelia; eye o timĩha akãlu uyaki vondalu.” (Osamo 46:9) Suku o ka nyõla ovota wuyaki kuenda omanu va siata oku koka uyaki. Omo liaco, ci ka leluka komanu vosi oku kuata okulia. Embimbiliya li likuminya ndoco: “Koloneke viaye ukuesunga o ka telẽha, kuenda ombembua yi ka kala kuosi.”—Osamo 72:7.

Ocitangi: Ovitangi vi tunda kekalo liotembo, lovilunga vi nyõla ovikũla kuenda vi ponda ovinyama.

Ndomo ci tetuluiwa: Suku o ka malako ovilunga via siata oku pita kilu lieve loku nena ekalo liwa oco okulia ku ime. Embimbiliya li popia okuti: “[Yehova] o tulumũla ehunguhungu liofela; Akimba okalunga a tulumũha. .  Eye o pongolola ekalasoko oco li linge oviva vieyuka oloneva, kuenda osi ya kukuta oco yi linge olono viovava. Eye o kokela vana va kuete onjala oku tungamo, . . . ovo va waya ombuto vovapia kuenda va kũla oviumbo viayuva Vima ovaima alua.”—Osamo 107:29, 35-37.

Ocitangi: Omanu vana olohembi kuenda vakuavitukiko va siata oku panga okulia kumue okuti, ka kua kolelepo ale ka ku pitĩla komanu vana va ku sukila.

Ndomo ci tetuluiwa: Usoma wa Suku u ka kundula omanu olohembi kuenda vakuavitukiko. (Osamo 37:10, 11; Isaya 61:8) Embimbiliya li tukula Yehova Suku okuti “Una o lekisa esunga ku vana va kembiwa, haeye Una eca okulia ku vana va kasi lonjala.”—Osamo 146:7.

Ocitangi: Onepa yimue yokulia voluali ya siata oku nyõliwa anyamo osi.

Ndomo ci tetuluiwa: Vemẽhi Liusoma wa Suku, okulia ku ka tepisiwa ciwa. Eci Yesu a kala palo posi wa yuvula oku sandola okulia. Ndeci, onjanja yimue eye wa tekula eci ci pitahãla 5.000. Noke eye wa sapuila olondonge viaye hati: “Ongololi ovimuanyũila via supapo okuti, lacimue ci pesiwa.”—Yoano 6:5-13.

Omo okuti Usoma wa Suku u ka malako ono yovitangi yi koka onjala, omanu vosi va ka sanjukila ovina vialua viwa kuenda okulia kuwa. (Isaya 25:6) Oco o lilongise otembo Usoma wa Suku u ka tẽlisa ovina viaco, tanga ocipama losapi hati: “Otembo Yipi Usoma wa Suku u ka Viala Ongongo?”