Andunde a Nyõla—Nye Embimbiliya li Popia?

Voluali luosi, omanu valua va kasi oku liyaka locitangi candunde a nyõla. Tala asapulo a kuãimo:

• “Voloneke via pita, ombala yo China ya pita locilunga cimue cĩvi calua combela ca velapo vokuenda ci soka 140 kanyamo, etande limue lieci ci soka . . . 744.8 kolomilimetulu yombela oku upisa Vocasapalo toke Votatu.”—AP News, 2 Yenyenye 2023.

• “Oku totalã kuomunda kua tukuiwa Khanun kua nena ombela yalua kuenda ofela kombuelo yo Japãu veteke liavali lia kuamamo vokuãla, okuti kua ponda omanu vavali. . . . Asapulo a lekisa okuti kolomunda viovocakati co Taiwan ovava a pitĩla eci ci soka 600 kolometulu vokulonga.”— Deutsche Welle, keteke 3 Yenyenye 2023.

• “Endunde liovava kesulilo liosemana [ko Nova Escócia] lia kokiwa lombela yalua ya pitĩla vokalunga ko atlantiku ko Kanada okuti, lia velapo olombela viosi via loka vokuenda kueci ci soka 50 kanyamo.”—BBC News, eteke 24 Yevambi Linene 2023.

Nye Embimbiliya li popia catiamẽla kovilunga ndevi?

Ondimbukiso yimue “yoloneke via sulako”

Embimbiliya li tu sapuila okuti tu kasi koloneke vi tukuiwa okuti “oloneke via sulako.” (2 Timoteo 3:1) Yesu wa eca ocitumasuku cokuti koloneke vietu tua laikele oku mõla “ovina vi yokokisa” ale ovina vi lingisa usumba. (Luka 21:11) Apongoloko kekalo lioluali a kasi oku panga onepa koku koka ovilunga viaco viya ño ocipikipiki, haivio vialua kuenda vinene.

Momo lie tu sukilila oku kuata elavoko?

Embimbiliya li tu sapuila okuti ovilunga viosi vi kasi oku pita voluali koloneke vilo, vi tu ĩha esunga lioku kuata elavoko. Momo lie? Yesu hati: “Eci vu mola ovina evi vi kasi oku lingiwa, limbuki okuti Usoma wa Suku u kasi ocipepi.”—Luka 21:31; Mateo 24:3.

Ovina vi kasi oku pita vi lekisa okuti eteke lina Usoma wa Suku u ka malako ovilunga oku kongelamo ombela, li kasi ocipepi.—Yovi 36:27, 28; Osamo 107:29.

Oco o lilongise ndomo Usoma wa Suku u ka mioñolola ekalo lioluali, tala ocipama losapi: “Helie o ka Yovola Ongongo?”