Nye Ndi Sukila Oku Linga Nda Ñuete Ocitangi Coku Vela? (Onepa 2)

Ovitangi vioku vela viya volonjila via litepa.

• Omanu vamue eci va vela ci limbukiwa, osimbu okuti vakuavo ka ci limbukiwa.

• Ovitangi vimue vioku vela viya “lonjanja noke vi pita”, osimbu okuti vikuavo “viya kuenda ka vi piti vali” kuenje vikoka evalo eteke leteke.

• Ovitangi vimue vioku vela citava okuti vi sakuiwa ale oku nyua ovihemba vi tepulula lika evalo, osimbu okuti akuavo ka a-a kuete ovihemba vioku a sakula kuenda a kapa kohele omuenyo womunu.

Amãlehe va liyakavo lovitangi viaco vioku vela. Vocipama eci, o ka kũlĩha amãlehe vakuãla va kasi oku liyaka lovitangi vioku vela. Nda ove o kuete ocitangi cimue coku vela, o ka pamisiwa lolondaka viavo.

• GUÉNAELLE

• ZACHARY

• ANAÏS

• JULIANA

GUÉNAELLE

Ocina cimue ka ca lelukile kokuange oku tava okuti ñuete ocitangi coku vela. Ndi yongola oku linga ovina vialua, pole eteke leteke ndi sukila oku linga ovina vi likuata lekalo liange.

Ñuete uvei u tateka owoño oku talavaya ciwa. Olonjanja vimue onepa yimue yetimba liange yi fetika oku tetemẽla ale yi pua ongusu. Si tẽla oku linga ovina via leluka ndeci, oku enda, oku vangula, oku tanga, oku soneha kuenda oku kuata elomboloko liwa lieci vakuetu va vangula. Eci evalo liaco li piãla, akulu vekongelo va likutilila kumosi lame. Eci ovo va ci linga, ci ñuatisa oku tulumuha.

Ndaño ndi liyaka lovitangi viaco, nda kũlĩha okuti Yehova o kala ocipepi lame oco a ñuatise. Si yongola okuti uvei wange u nateka oku u vumba lutima wosi. Ocina catete nda pitisa kovaso oku kuatisa vakuetu oku lilongisa ohuminyo Yembimbiliya yokuti ndopo Yehova o ka pongolola ongongo oco yi kale ocumbo celau okuti, ka mu ka kala vali ohali.—Esituluilo 21:1-4.

Etosi lioku sokolola: Ndeci Guénaelle a linga, ove o lekisa ndati ohenda ku vakuene?—1 Va Korindo 10:24.

ZACHARY

Eci nda kuata anyamo 16, olondotolo via limbuka okuti ñuete uvei wo kanser vowoño. Olondotolo via ndi sapuila okuti ndi kala lika komuenyo olosãi ecelãla. Tunde opo nda sakalala lomuenyo wange.

Omo liocitumãlo apa uvei waco u kasi, onẽle yange yondio ka yi kuete vali ongusu. Omo okuti ka citava oku enda, olonjanja viosi ci sukila okuti omunu umue o kala konjo oco a ñuatise.

Omo liuvei waco, cilo si tẽla oku vangula ciwa. Osimbu sia kuatiwile luvei waco nda kuatele ongusu yalua kuenda nda solale olomapalo vioku endela vovava, oku imba o basquete kuenda o vôle. Omo okuti, Ndimbangi ya Yehova nda kuatele ombili yalua kupange woku kunda. Ndi sima okuti omanu valua ka vakuete elomboloko lioku pumba ongusu yoku linga ovina ove o sole.

Olondaka vi sangiwa kelivulu lia Isaya 57:15 vi ndi pamisa calua momo vi eca elavoko liokuti Yehova o kasi ocipepi ‘lava va sumua’ kuenda wa ñapako. Handi vali kelivulu lia Isaya 35:6, Yehova o likuminya okuti ndi ka tẽla vali oku enda kuenda oku u vumba luhayele wa lipua.

Olonjanja vimue ka ci leluka oku liyaka locitangi cange, pole nda kolela okuti Yehova o kasi ponele yange. Lekuatiso liohutililo, olonjanja viosi ñuete omunu umue ndi sapela laye eci ndi sumua ale ceci ñala lusumba woku fa. Lacimue ci tẽla oku ndi tepa kocisola ca Yehova.—Va Roma 8:39.

Zachary wa fa eci a kuata 18 kanyamo noke yolosãi vivali tunde eci a pulisiwa. Ekolelo liaye kohuminyo ya Suku yoku pindula omanu oco va kale vocumbo celau palo posi liamamako toke eci a fa.

Etosi lioku sokolola: Ohutililo yi pondola oku ku kuatisa ndati oku amamako oku kala vocisola ca Suku, ndeci ca pita la Zachary?

ANAÏS

Eci pa pita oloneke vimue noke yoku citiwa, uvei umue vowoño wa ñokela ehonguo etimba liosi ca piãla enene vovolu.

Cilo, ndi tẽla oku enda ocinãla cimue lekuatiso liolomuleta vikuete alola, pole olonjanja vialua ndi sukila omangu yalola nda njongola oku enda ocinãla calua. Ñuetevo ocitangi cikuavo kovoko okuti ka ci ngecelela oku linga ovina vikuavo ndeci, oku soneha.

Ndaño uvei wange wa siata oku ndi kokela ovitangi vialua, ovihemba va kasi oku ndi sakula lavio via siatavo oku ñokela ovitangi. Njivaluka okuti olonjanja vimue vosemana, ngenda kosipitali oco va ka ndi siũle. Eci va ndipelala onjanja yatete nda kuata anyamo 5 kuenda toke cilo nda pelaliwa ale olonjanja vikuãla. Olonjanja vivali via sulako ka via lelukile momo ca sukilile oku kala olosãi vitatu ocipãla lonjo oco ndi mioñolohe.

Epata liange lia siata oku ñuatisa calua. Tu yola yola kuenda oku ci linga ci ndi kuatisa calua ca piãla enene nda nda sumua. Ina yange kuenda vamanjange akãi va ñuatisa oku lipongiya, momo si tẽla oku ci linga lika liange. Ocina cimue nda yonguile oku linga oku wala osapato ya lepa. Pole oku sokolola ciwa nda yi walele ale: Eci nda kala omõla, nda wala osapato kovoko kuenda nda tunda loku yala, kuenda vosi tua fetika oku yola yola!

Si ecelela okuti uvei wange u nateka oku linga ovina ndi tẽla. Ame ndi lilongisa alimi akuavo. Ame ndi sole oku liteva, omo okuti si tẽla oku papalela vakimba okalunga ale vekokoto. Omo okuti Ndimbangi ya Yehova, ndi sole oku enda kupange woku kunda oco ndi vangule lavakuetu catiamẽla kekolelo liange. Kuenda omanu va yevelela lutate eci mbangula lavo.

Tunde vovomõla olonjali viange via ndongisa okuti ocitangi cange ndopo ci pita. Cilo nda pamisa ekolelo liange ku Yehova kuenda kohuminyo yaye yoku malako ohali yosi, oku kongelamo yange. Eci ci nyiha ongusu yi ñuatisa oku amamako.—Esituluilo 21:3, 4.

Etosi lioku sokolola: Ndeci Anaïs a linga, nye o sukila oku linga oco ku ka ecelele okuti uvei wove u ku “tateka” oku linga ovina o tẽla?

JULIANA

Ñuete uvei umue u tu kuiwa hati, (autoimune dolorosa) okuti u pondola oku nyõla utima, apuvi kuenda osonde. Toke cilo wa nyõla ale olongela viange.

Eci nda kuata anyamo 10 olondotolo via limbuka okuti ñuete uvei u tukuiwa hati, lúpus, wa siata oku ñokela evalo, ekavo kuenda esumuo. Olonjanja vimue ndi sima okuti si kuete esilivilo.

Eci nda kuata anyamo 13, Ombangi yimue ya Yehova ya veta kepito lietu. Eye wa tanga lame elivulu lia Isaya 41:10 kuna Suku a popia hati: “Ku ka kuate ohele, momo ñasi love . . . hu kuata leka liange liondio hailio liesunga.” Tunde opo nda fetika oku lilongisa Embimbiliya Lolombangi Via Yehova. Cilo papita ale anyamo ecelãla ndi kasi oku vumba Suku lutima wosi kuenda si yongola oku ecelela okuti uvei wange u nateka oku linga ovina ndi tẽla. Nda limbuka okuti Yehova wa siata oku nyiha “unene wa piãla” kuenda ci ñuatisa oku amamako lovisimĩlo via sunguluka.—2 Va Korindo 4:7.

Etosi lioku sokolola: Elivulu lia Isaya 41:10 li pondola oku ku kuatisa ndati oku amamako lovisimĩlo via sunguluka, ndomo ca pita la Juliana?