Anga hẽ Embimbiliya li Longisa Okuti Eci Omunu a fa, o ka Citiwila Vetimba Likuavo?
Etambululo Liembimbiliya
Sio. Ondaka yokuti “eci omunu a fa, o ka citiwila vetimba likuavo,” ka yi sangiwa Vembimbiliya. Ocisimĩlo caco ca kunamela kelongiso liokuti omunu o kuete ocilelembia ka ci fi.a Omo liaco Embimbilia li longisa okuti omunu ka kuete ocilelembia ka ci fi. (Efetikilo 2:7; Esekiele 18:4)Eci omunu a fa ka kuete lacimue ci kala vali lomuenyo.—Efetikilo 3:19; Ukundi 9:5, 6.
Etepiso Lipi li Kasi Pokati Kelongiso Liokuti Eci Omunu a fa, o ka Citiwila Vetimba Likuavo kuenda Epinduko?
Embimbiliya li longisa okuti epinduko ka li tiamisiwila kelongiso liokuti eci omunu afa o kuete ocilelembia ka ci fi. Epinduko li lomboloka okuti omunu wa fa o ka kala vali lomueyo lekuatiso liunene wa Suku. (Mateo 22:23, 29; Ovilinga 24:15) Epinduko lieca elavoko liokuti vana va fa va ka kala voluali lumue luokaliye lelavoko liokuti ka va ka fa vali.—2 Petulu 3:13; Esituluilo 21:3, 4.
Ovisimĩlo ka Via Sungulukile Viatiamẽla Kelongiso Liokuti Eci Omunu a fa, o ka Citiwila Vetimba Likuavo kuenda Embimbiliya
Ovisimĩlo ka Via Sungulukile: Embimbiliya li popia okuti uprofeto Eliya eci a fa wa citiwila vetimba likuavo okuti Yoano Upapatisi.
Ocili: Suku wa popele okuti: “Ndu tumisi uprofeto Eliya,” kuenda Yesu wa lekisa okuti Yoano Upapatisi wa tẽlisa ocitumasuku caco. (Malakiya 4:5, 6; Mateo 11:13, 14) Pole, eci ka ci lomboloka okuti Eliya eci a fa wa citiwa vetimba likuavo okuti, Yoano Upapatisi. Yoano wa popia okuti hayeko Eliya. (Yoano 1:21) Omo liaco, Yoano wa linga upange ndowu wa Eliya woku sandeka esapulo lia Suku li tukuiwa hati, oku likekembela. (1 Olosoma 18:36, 37; Mateo 3:1) Yoano wa lekisa okuti wa kala ‘ukuotõi kuenda ukuonene ndeci Eliya.’—Luka 1:13-17.
Ovisimĩlo ka Via Sungulukile: Embimbiliya li lekisa okuti elongiso liokuti eci omunu a fa, o ka citiwila vetimba likuavo li lomboloka oku “citiwa evali.”
Ocili: Embimbiliya li lekisa okuti oku citiwa evali ci lomboloka oku citiwa locipango ca Suku okuti omunu o pongoluiwa osimbu handi a kasi lomuenyo. (Yoano 1:12, 13) Epongoloko liaco ka li lomboloka ekangiso omunu a tambula omo liovina a linga kosimbu, pole esumũlũho limue li tunda ku Suku li eciwa komanu vana va kuete elavoko li likasi liatiamẽla kovaso yoloneke.—Yoano 3:3; 1 Petulu 1:3, 4.
a Elongiso liokuti omunu o kuete ocilelembia ka ci fi kuenda liokuti eci omunu a fa, o ka citiwila vetimba likuavo, lia tunda ko Bavulono yosimbu. Noke olonoño vioko India via sokiya Elongiso Liokuti Omunu Lomunu o Kuete Eci vo Sokiyila Ale Komuenyo. Ndeci ca lomboluiwa velivulu li tukuiwa hati, Britannica Encyclopedia of World Religions, Elongiso Liokuti Omunu Lomunu o Kuete Eci Vo Sokiyila Ale Komuenyo ocihandeleko cimue catiamẽla kekalo liocina cimue kuenda esulilo liaco, ci lekisa okuti eci omunu a linga komuenyo cilo, ci ka kuata esulilo liaco komuenyo ukuavo.”—Kemẽla 913