Oku Ñuala Ñuala ku Komõhisa Kuolunyi lu Kala Kapako

Nda wa setekele ale oku ponda olunyi umue, wa kũlĩha ndomo ca tĩla oku ci linga. Olonyi viaco vi tila lonjanga eci vi saluisiwa kuenda eci umue a seteka oku vi kuata.

Olonoño via limbuka okuti olunyi umue ulikasi okuti olunyi lu kala kapako, lu tẽla oku ñuala ñuala lonjila yi komõhisa ndeci olombalãu vioku yeva okuti, lu ci linga vosengundu yimue. Ulongisi umue wo kosikola ya velapo o tukuiwa Michael Dickinson wa popia okuti, “vepuluvi olonyi viaco vi citiwa vi tẽla ale oku palãla ndomunu wa loñoloha koku endisa ombalãu. Eci nda ci sokiwa loñaña yi citiwa okuti yi tẽla ale oku endisa ombalãu yoku yeva.”

Vakuakukonomuisa va filmala oku ñuala ñuala kuolonyi viaco kuenje va limbuka okuti ovio vi veta avava avo 200 kolonjanja vosengundu yimosi. Pole, ovio vi veta lika avava onjanja yimosi oco vi ñualile konele yikuavo loku tila ohele.

Vakuakukonomuisa va limbuka okuti onjanga ovio vi lekisa poku tila ci pitahãla 50 kolonjanja okuti oku pakula kuiso ci sule. Ulongisi Dickinson o lombolola hati: “Olunyi lu limbuka lonjanga yalua oku ku kasi ohele loku nõla oku lu tilila.”

Ocili okuti, onjila ndomo olunyi lu kala kapako lu ci linga, ndaño okuti owoño walio lutito calua, elumbu limue olonoño vi yongola oku kũlĩha.

Nye o sima? Oku ñuala ñuala ku komõhisa kuolunyi lu kala kapako kua tukuluka ño? Ale kua lulikiwa?