EKUATISO KEPATA
Ndomo o Likandangiya Konyeño
Ohueli yove pamue yi linga ale yi vangula ocina cimue ci ku sumuisa kuenje ove o yuvula oku situlula onyeño yove. Pole, eci eye a limbuka okuti cimue ka ci kasi ciwa kuenda o fetika oku linga apulilo, onyeño yove yi livokiya. O likandangiya ndati konyeño kapuluvi aco?
Ceci o sukila oku kũlĩha
Oku ecelela okuti onyeño yi ku yula, ci pondola oku kapa kohele uyale wove. Akonomuiso a lekisa okuti oku ecelela oku yuliwa loyeño ci koka okuti atesão a londa, uveyi wovutima, esumuo kuenda ovitangi vimo. Onyeño yi kokavo ekambo liotulo, asakalalo, uvei umue kekova kuenda uvei vowoño. Embimbiliya li kuete asunga alua poku popia hati: ‘Onyeño yimbapo .., momo ci ku ka ku nenela lika ovitangi.’—Osamo 37:8.
Ocikumbiti ci pondolavo oku nena ovitangi. Oku ecelela okuti onyeño yi livokiya, ci sokisiwa luveyi umue u nyõla vokati. Citava okuti o kuata ocituwa cimue cesino. Eci ci pondola oku koka okuti ka ci leluka oku kala pamosi kuenje oku koka ovitangi kolohuela.
Ceci o pondola oku linga
Sanda ovituwa viwa kohueli viove. Soneha ovituwa vitatu o sole calua kokuaye. Onjanja yikuavo o kala lonyeño omo liocina cimue eye a linga, sokolola kovituwa wa limbuka kokuaye. Eci cci pondola oku ku kuatisa oku likandangiya konyeño.
Onumbi Yembimbiliya: “Eci olopandu.” —Va Kolosai 3:15.
Kuata ocituwa coku ecela. Tete, seteka oku kuata ovisimĩlo ndevi viohueli viove. Eci ci ka ku kuatisa okulekisa ohenda. (1 Petulu 3:8) Noke, lipula ndoco: ‘Ovina eye a linga vĩvi calua okuti ka citava oku u ecela?’
Onumbi Yembimbiliya: “Ulamba ...oku siluila ũvi vo linga.”—Olosapo 19:11.
Situlula ovisimĩlo viove lohenda kuenda utate. Poku vangula, tukula ondaka “ame.” Ndeci, poku vangula ku ka popie okuti: “Ove kua siatele oku ndi telefonalela oco o sapuile apa o kasi,” pole, popia ndoco: “Ame ndi sakala eci ku tekãva kuenda si cĩ nda ove o kasi ciwa.” Oku vangula ovina viaco lesumbilo, ci pondola oku ku kuatisa oku likandangiya konyeño.
Onumbi Yembimbiliya: “Olondaka viene vi kale lumbombe, loku singiwa lomongua.”—Va Kolosai 4:6.
Lekisa esumbilo poku yevelela. Noke yoku situlula ovisimĩlo viove, ku ka tete kondaka eci ohueli yove yi vangula. Eci eye a mala oku vangula, pitulula ovina vimue wa yeva oco o kũlĩhĩse nda ca ku lomboloka ciwa. Oku yevelela lutate ci pondola oku ku kuatisa oku likandangiya konyeño.
Onumbi Yembimbiliya: “Omunu lomunu a kale ukuanjanga koku yevelela, a livale koku popia.”—Tiago 1:19.