Ocipeta Coturanja ci Panamala ko ku Kupuka

Otoranja epako limue lingangama li kulila vuti umue. Eci li kupuka vuti, liamamako okuti ka linyõleha, ndaño uti waco u kuete 10 kolometulu koku lepa. Nye ci lingisa okuti epako liaco ka linyõleha ndaño lia kupukila posi?

Kũlĩhĩsa ndoco: Vakuakukonuisa va limbuka okuti onepa yi yela yi kasi vokati kocipeta coturanja ci kasi ndociyavi cimue ca sokiyiwa loloselula kuenda apuluvi pokati kavio. Nda ociyavi ci kala ocipepi calua lepako, epuluvi likala pokati loloselula lilua. Kuenje epuluvi liaco li pondola oku yuka ofela ale ovava. Eci epako olio li kupukila posi, ovava aco a kuatisa okuti ka linyõleha. Poku liveta posi ocipeta caco ci kõla kuenda ci soleka ongusu yelituno kuenje ka lituika.

Olonoño via panga efelefele limue liutale li panamala kelituno poku setukula ocipeta coturanja. Ovo vatava okuti ocina caco ca ponduile oku talavayiwa laco koku panga ovikoko via vakuakuendisa olomoto lolosikaleta kuenda ovina vioku liteyula koku li tusula kuoviendelo. Ocina caco ca ponduilevo oku teyuila ocitulilo covilu ko ku litusula kuolombungululu.

Nye o sima? Ocipeta coturanja ci panamala ko ku kupuka ca tukuluka ño? Ale ca lulikiwa?