Oku Kuatisa Vana va li Pita Lovilunga Kunyamo 2021—Ka Tua Yandulukile Vamanjetu

Vokuenda kunyamo wupange 2021a oluali luamamako oku liyaka lefengi lio COVID-19. Ndomo ca lomboluiwa vocipama losapi “Ekuatiso Voluali Luosi Poku Liyaka Lefengi Voluali Luosi,” tua pesela olohuluwa violondolaleb oco vi kuatise vamanji omo liefengi kuenda tua sokiya eci ci pitahãla 950 Kovisoko Vioku Kuatisa Vana va Pita Lovilunga.

Ocili okuti, osimbu efengi li amamako, ovilunga vikuavo levi vi kokiwa lomanu vakuavo, vi kasi oku kokela ohali vamanjetu voluali luosi. Omo lieci ci pitahãla 200 kovilunga viaco, Ocimunga Casongui Cosungu Yolombangi Via Yehova, ca tava oku talavaya leci ci soka 8 kolohulukãi violohulukãi violondolale oku kongelamo ekuatiso lia eciwa omo lio COVID-19. Kũlĩha ndomo kua talavayiwa lolombanjaile viove kovilunga vivali via pita ndopo, oco vi kuatise omanu va liyaka lovilunga viaco.

Oku Totãla Kuomunda Nyiragongo

Keteke 22 yosãi ya Kupemba yunyamo 2021, ko Republika Demokratika yo Kongo, kua fetika ocilunga coku totãla Kuomunda Nyiragongo. Andunde ondalu yaco a nyõla olonjo, olosikola kuenda olono viovava. Pole, andunde aco haoko lika a kokele ohele. Vokuenda kuoloneke, noke lioku totãla kuaco, oneketela yi kuete owule ya wila volupale luo Goma kuenda kua kala oku luluma kualua kuongongo. Onepa yalua yomanu va kala volupale luaco, va handelekiwa oku tundamo. Omanu valua va tila, vamue va enda kongave yo Ruanda.

Pokati komanu vaco, pa kala 5.000 Kolombangi Via Yehova. Vamue va pumba olonjo viavo omo lioku totãla kuaco; vakuavo noke lioku tila va nyaniwa ovikuata via kala volonjo viavo. Ocisoko Coku Kuatisa Vana va Pita Lovilunga co ko Ruanda leci co ko Republika Demokratika yo Kongo, via likolisilako oku eca ekuatiso. Catiamẽla kocimunga cimue coku eca ekuatiso, o betele yo Kongo (Kinshasa) ya lombolola ndoco: “Ndaño okuti ekalo volupale lia tĩlile ale osimbu ka kua eciwile ocihandeleko coku tundamo, ocimunga ceca ekuatiso ca fetikile ale oku eca okulia, ovava, ovowalo okolohama kuenda ovowalo akuavo.” Volupale lumue mua kala ci pitahãla 2.000 ya vamanjetu, ocimunga cimue ceca ekuatiso, ca tunga olombalaka, ca eca olombindi kuenda ca lombolola ndomo vamanji va pondola oku tepulula ohele yoku sambuisiwa o COVID-19 kuenda o kolera.

Noke liolosãi vitatu tunde eci kua pita ocilunga, vamanjetu va eca eci ci pitahãla olotonelada epandu violuoso, olotonelada epandu viosema, olotonelada vitatu viulela woku teleka lawo kuenda olotonelada vitatu viovava. Oco ku tetẽliwe olombongo, o filiale ya sokiya oku landa okulia kualua kuo vofeka okuti, ka ku tundi kolofeka vikuavo kuna kua tĩlapo vali.

Manji umue ukãi okuti onjo yaye yokaliye ya nyõliwa loku totãla kuomunda wa popia hati: “Tua yeva esumuo lialua kuenda evalo.” Pole, eye lepata liaye, va tambula ekuatiso konepa yetimba kuenda yespiritu. Cilo eye hati: “Lekuatiso lia Yehova, tu kuete eci tu sukila. Tua limbuka okuti, Yehova o tu kuatisa poku liyaka lovitangi kuenda o vi leluisa lonjila yimue okuti, tu tẽla oku liyaka lavio.”

Ocitangi cekambo liolombongo ko Venezuela

Ko Venezuela kua siata oku pita ovitangi vialua viekambo liolombongo vokuenda kuanyamo alua. Vamanjetu va kasi oku amamako oku pandikisa lohali yaco, ekambo liokulia kuenda elivokiyo liungangala. Ocisoko ca Yehova, ka ca yandulukile vamanji vaco.

Vokuenda kunyamo wa pita wupange, kua pesiwa eci ci pitahãla 1.5 kolohulukãi lolohulukãi violondolale, oco ku landiwe loku ambatiwa okulia kuenda onjapãu kapata a sukilile ekuatiso. O filiale yo ko Venezuela ya popia hati: “Ka ca lelukile oku ambata 130 kolotonela viokulia kolonepa viosi viofeka osãi losãi kuenda oku ku eca povaka a vamanjetu va sukila ekuatiso.” Oco okulia ka ku ka nyõlehe, vamanji va siata oku tumisa okulia kuna ku tumãla otembo yalua. O filiale yamisako ndoco: “Tua siata oku landa okulia kualua vokuenda kuepuluvi lina ku onguiwa, momo ondando yaco ka ya tĩlile calua. Kuenje tu tuta okulia kuaco lonjila yimue yecelela oku tetẽla olombongo.”

Leonel, o panga onepa Kocisoko Coku Kuatisa Vana va Pita Lovilunga ko Venezuela, wa popia hati: “O sole calua ocikele caye. Upange woku kuatisa, ocina cimue cilikasi. Ocikele eci ca siata oku ndi kuatisa calua tunde eci ukãi wange a fa lo COVID-19. Nda siata oku linga ovopange loku kuatisa vamanji vana va sukila ekuatiso. Nda siata oku mola ndomo Yehova a tẽlisa ohuminyo yaye yokuti, eye ka yanduluka afendeli vaye.”

Manji umue wa tambula ekuatiso okuti wa pangele ale onepa Kocisoko Coku Kuatisa Vana va Pita Lovilunga wa popia hati: “Yilo, onjanja yange yoku kuatisiwa. Ka tua tambuile lika ekuatiso konepa yetimba. Vamanji va ndi kuatisavo kumue lukãi wange oku tula utima. Ovo va tu tata, va tu lembeleka kuenda va tu pamisa.”

Pamue ku pita ovilunga vimue okuti, viya ño ocipikipiki. Pole, ocisoko ca Yehova olonjanja vialua ci kuata loku eca ovina vioku popela lonjanga omo liolombanjaile weca kupange woku kunda u kasi oku lingiwa voluali luosi. Olonjila vimue vioku eca olombanjaile viove, vi lekisiwa vonumbi donate.jw.org. Tu eca olopandu vialua omo liocituwa cove coku eca.