Oku Kuata Ekalo Lia Kolapo Volonjango Viusoma Vokuenda Kuo COVID-19

“Osungu Yolombangi Via Yehova ya nõlapo okuti ndomo ci likuata lovihandeleko violombiali pocitumãlo, tu vetiya akongelo osi oku fetika oku linga olohongele viovokati kosemana oku upisa keteke 1 ya Kupupu.” Esapulo liaco, lia kapiwa vo jw.org kefetikilo liosãi Yelombo 2022 okuti, lia sanjuisa Olombangi Via Yehova voluali vosi. Pole, efengi lio COVID-19 ka lia pitile handi.a Apongoloko api kuenda ovimãleho vipi via sukiliwile oco vana veya kolohongele va teyuiwe kefengi liaco? Noke yanyamo avali okuti ka tua liongolulile pamisi, anga hẽ Olonjango vietu Viusoma nda vieyuka?

Ocili okuti, vamanjetu va lipongiya ale vokuenda kuolosãi vialua oco va fetike vali oku enda enda kolohongele Volonjango Viusoma.

Asukila a Litepa, Lolonjila Via Litepa Vioku a Tetulula

Noke yosãi yimue tunde eci tua liwekapo oku lingila olonhongele Volonjango Viusoma kunyamo 2020, Oseketa Yoku Tunga Voluali ko Warwick, New York, ya kũlĩhĩsa ndomo efengi lio COVID-19 lia laikele oku tateka oku liongoluila Volonjango Viusoma kuenda ovina via sukiliwile oku lingiwa, oco tu teyuile ovitumãlo viaco.

Ovina via sukiliwile konepa yimue yoluali, via litepele levi via sukiliwile konepa yikuavo. Manji Matthew De Sanctis, o talavaya ko WDC wa lombolola hati: “Kolofeka vimue, ocitangi ca kala coku kuata ocitumãlo coku pusa povaka. Nda Vonjango Yusoma kamuli alove ovava, ca sukilile oku katapa ovava polui. Kolofeka vikuavo, olombiali via pongolola ovihandeleko via tiamẽla kovipapafela kuenda kovina vikuavo viatiamẽla kuhayele loku liyelisa.”

Vamanji va tẽla ndati oku liyaka lapongoloko aco? Manji Matthew wa popia hati: Ovo va limbuka okuti Volonjango vialua Viusoma mua sukilile lika “oku kuama olonjila via sunguluka havio ka vi pesela olombongo vialua.” Ndeci, ko Papua Nova Gune, oco va sukule ovaka, va sukilile eci ci soka 20 kalitulu ovava violombaliti vi kuete alove. Kuenje vamanji va tẽla oku linga asokiyo va sukilile Vonjango Yusoma okuti, va pesela lika 40 yolondolale. Kolonjango vimue Viusoma vo Afrika, ci pitahãla 6.000 kovikuata vioku sukula ovaka via landiwa ko Asia.

Vapongoloko akuavo a lingiwa, mua kongelele oku kapa ale oku semulula ovipapafela oco vi talalise Volonjango Viusoma. Akongelo alua a landa anguena a lepa oco omanu ka va ka lambeko. Kua lingiwa alikolisilo alua oco ku tepuluiwe loku yelisa ovina omanu va lamba calua ndeci, apito kuenda kalove okuti ci leluka oku sambuisiwa luveyi waco. Akongelo amue volokalete viavo, va kapamo alove okuti ka asukila oku a sĩla oco ovava a pite. Kofeka yo Chile, kapongoloko a lingiwa va pesela eci ci soka 1.400 kolondolale Vonjango Lonjango Yusoma.

Osimbu va kala oku linga esokiyo liaco lioku liteyuila Vonjango Yusoma, vamanjetu va likolisilako oku eca olombanjaile viavo. Ndeci, kolofeka vimue, olombiali via eca ovikuata vioku pusa povaka kuenda ovipapafela. Olombetele via likuatisa pokati oco va talavaye ciwa lolombongo poku landa ovina vialua vonjanja yimosi. Olombetele kuenda Oseketa Yoku Landa Voluali Luosi, olonjanja vialua via linga esokiyo lioku landa ovina kovitumãlo vi pangiwila okuti, ka ci tepulula lika ondando, pole, ci tepululavo otembo.

“Eteyuilo Nda Sukilile”

Asokiyo a lingiwa Volonjango Viusoma okuti a kolapo, a siata oku teyuila kuenda oku kuatisa omanu vana va fetika ndopo oku enda enda kolohongele. Manji Dulcine wo ko Peru, wa popia okuti “wa kuata usumba” eci a yeva okuti tu tiukila Volonjango Viuoma. Eye hati: Nda kuatiwile luveyi wo COVID-19 eci wa fetika. Omo liaco, sia liyevele ciwa poku yeva okuti tu tiukila Volonjango Viusoma momo nda kũlĩhĩle okuti ndi ka kuatiwa vali luveyi waco. Pole eci nda pitĩla Vonjango Yusoma, nda limbuka okuti akulu vekongelo va kapa ovikuata vialua vioku liteyuila ndeci, ovikuata vioku pusa peka, anguena a lepa kuenda esokiyo lioku yelisa Onjango Yusoma, osimbu ohongele ka ya fetikile kuenda noke liohongele. Ovina viaco via ñuatisa oku kolapo.”b

Manji Sara wo ko Zambia, wa lipita locitangi ca litepa. Eye wa popia hati: “Noke yoku pita olosãi vialua, ulume wange wa fa luveyi wo COVID-19. Nda sakalele ndomo nda ponduile oku liyeva poku enda onjanja yatete kohongele lika wange.” Cilo, eye o liyevite ndati poku enda enda Konjango Yusoma? Eye hati: “Olohongele vi ñuatisa oku limbuka okuti Yehova o kasi letu vokuenda kuoloneke vilo via sulako. Cilo, ndi liyevite okuti ndi tambula evetiyo, ocisola kuenda ekuatiso ndi sukila li tunda kakulu vekongelo kuenda ku vamanji vosi.”

Vamanjetu voluali luosi, va sanjuka calua omo lioku tiukila Volonjango viavo Viusoma. Tu eca olopandu mo liolombanjaile viove okuti vialua pokati kavio via lingiwila pocakati co donate.jw.org. Olombanjaile viaco, vi tu kuatisa oku kolela okuti, ovitumãlo vialua viefendelo liocili via koleliwa kuenda via kolapo oco tu liongoluilemo.