Casapalo, 25 ya Mbalavipembe
Siafane wa fetika oku li tangela kovaso ya soma.—2 Asa. 34:18.
Eci Soma Yosiya a kuata 26 kanyamo, wa fetika oku semũlũla onembele. Vokuenda kupange waco, kua sangiwa “elivulu Liocihandeleko ca Yehova cina ca eciwile ku Mose.” Eci soma a yeva eci elivulu lia popia, lonjanga yalua wa linga apongoloko oco a pokole kovina via sonehiwamo. (2 Asa. 34:14, 19-21) Ove hẽ wa setekele ale oku tanga Embimbiliya oloneke viosi? Nda oco, o kasi hẽ oku litunda ciwa? Wa siata hẽ oku soneha ovinimbu vimue okuti vi pondola oku ku kuatisa? Eci Yosiya a kuata 39 kanyamo, wa linga ekandu limue linene lio kokela ovitangi komuenyo waye. Eye ka sandele olonumbi via Yehova, pole, wa likolela eye muẽle. (2 Asa. 35:20-25) Tu pondola oku lilongisilako kulandu owu. Ndaño tu kuete anyamo alua, ale tu kasi otembo yalua oku vumba Yehova, tu sukila oku amamako oku pamisa ukamba wetu la Yehova. Omo liaco, tu sukila oku likutilila olonjanja viosi ku Yehova oku pinga olonumbi viaye, oku lilongisa Embimbiliya kuenda oku yevelela alungulo Akristão va pama konepa yespiritu. Nda wa ci linga, o ka yuvula oku linga akandu anene kuenje o ka kuata esanju lialua.—Tia. 1:25. w23.09 12 ¶15-16
Calumingu, 26 ya Mbalavipembe
Suku o tamalãla la vakuakulipanda, puãi eca ohenda ya piãla kambombe.—Tia. 4:6.
Embimbiliya li tukula akãi valua va solele Yehova loku u vumba. Ovo ‘va likandangiyile kovituwa’ kuenda va koleliwile kovina viosi.’ (1 Tim. 3:11) Handi vali, vamanji akãi va pondola oku sanga vekongelo liavo vamanji akãi Akristão vakuangangu yiwa yoku setukula. Ene a vamanji afeko, momo lie ka vu likolisililako oku kũlĩha vamanji vamue akãi va pama konepa yespiritu vana vu pondola oku kuama ongangu yavo? Limbuki ovituwa viavo viwa, noke sokololi ndomo vu pondola oku lekisa ovituwa viaco. Ocituwa cimue ci kuete esilivilo koku kula konepa yespiritu umbombe. Nda ukãi umue embombe, o ka kuata ukamba uwa la Yehova kuenda la vakuavo. Ndeci, ukãi umue o sole Yehova, lumbombe o likolisilako oku kuama olonumbi vioku songola Isiaye wokilu a tumbika. (1 Va Kor. 11:3) Olonumbi viaco vi pondola oku kapiwako vekongelo kuenda vepata. w23.12 18-19 ¶3-5
Sengunda, 27 ya Mbalavipembe
Ulume o sole ukãi waye o li sole eye muẽle.—Va Efe. 5:28.
Yehova o lavoka okuti ulume o kuele o sola ukãi waye, poku wĩha ovina a sukila konepa yoketimba, kovisimĩlo kuenda konepa yespiritu. Oku kuata uloño woku sokolola, oku sumbila akãi kuenda oku koleliwa, vi ka ku kuatisa oku kala ulume uwa volohuela. Noke lioku kuela pamue o kala isia. Nye o pondola oku lilongisila ku Yehova catiamẽla koku kala isia umue? (Va Efe. 6:4) Yehova wa sapuila komõlaye Yesu hati, o soliwe kuenda wo sanjukila. (Mat. 3:17) Nda okuti wa linga isia umue, li kapelako oku sapuila olonjanja viosi komãla vove okuti o va sole. Va pandiya lutima wosi kovina viwa ovo va linga. Va isia vana va setukula ongangu ya Yehova, va kuatisa omãla vavo oku kala alume kuenda akãi va pama konepa yespiritu. O pondola oku lipongiyila cilo ovikele viaco, poku tata locisola omanu vakuavo vakuepata liove, la vamanji vekongelo, loku va sapuila okuti o va sola kuenda wa va kapako.—Yoa. 15:9. w23.12 28-29 ¶17-18