Yovi
13 “Ocili, ovaso ange a mola ovina viosi evi,
Etũi liange lia yeva kuenda nda kuata elomboloko liaco.
2 Eci wa kũlĩhi, ame nda ci kũlĩhavo;
Ame si sule okuti ene wa velipo.
3 Catiamẽla kokuange, ndi nõlapo oku vangula Lukuonene Wosi;
Njongola oku lekisa esunga liange kovaso a Suku.+
4 Pole, vu ndi lundili lovohembi;
Vosi yene vulondotolo ka vi silivila.+
5 Nda wohĩliko, nda hĩse,
Nda ca lekisa olondunge konepa yene.+
6 Mangi ohenda, yeveleli ovisimĩlo viange,
Kuenda yeveleli apingilo omẽla wange.
7 Anga hẽ vu yongola oku vangula cimue cĩvi vonduko ya Suku,
Kuenda vu ka vangula elimbi oco eye a kuatisiwe?
8 Anga hẽ vu ka kala konele yaye,*
Vu ka seteka hẽ oku teyuila esunga lia Suku yocili?
9 Nye nda ca lipita lene nda eye wa ku konomuisili?+
Anga hẽ nda wo kembi ndeci vu linga komunu umue?
10 Eye o ko lemẽli muẽle,
Nda wa seteki oku lekisa ocame vuyombeki.+
11 Anga hẽ, ka vu ka kuatela usumba ulamba waye,
Kuenda usumba vu u kuetele ka u ka vu wili?
12 Olondaka viene violondunge,* olosapo vietiko;
Olondaka viene vieteyuilo via leñela ndoviyepelo vionata.
13 Amamiko oku ũha kovaso ange oco ndi vangule,
Kuenje cosi ci laika oku iya kokuange, ciye!
14 Momo lie ndi kapela omuenyo wange kohele,*
Loku kapa omuenyo wange povaka ange?
15 Ndaño okuti eye o pondola oku ndi ponda, pole, handi ndamamako oku kevelela;+
Ndi teyuila esunga liange* kovaso aye.
17 Yeveleli lutate kondaka yange;
Yeveleli esapulo liange.
18 Tali, cilo nda lipongiya oco ndi teyuile ocitangi cange;
Nda kũlĩha okuti ñuete esunga.
19 Helie o ka ndi katukila?
Nda ndohĩle, nda nda fa!*
20 A Suku, nyĩhe lika ovina vivali,
Oco si ka solame kovaso yove:
21 Upa eka liove lia lema kokuange okuti, li kala ocipãla,
Kuenda ku ka ecelele okuti, usumba ndu ku kuetele u njokokisa.+
22 Vilikiya kuenje ndi ka tambulula,
Ale ngecelele oku vangula kuenje nambulule.
23 Api akulueya ange lakandu ange?
Ndekise okulueya kuange kuenda ekandu liange.
25 Ove hẽ o ka seteka oku saluisa emẽla limue liambatiwa lofela,
Ale o ka landula ovinene via kukuta?
26 Momo o kasi oku amamako oku soneha alundi akãla atiamẽla kokuange,
Kuenda o ndi kangisa omo liakandu o vutila wange.
27 Ove o kapa olomãhi viange vovikumbi,
O kũlĩhĩsa olonjila viange viosi,
Kuenda o konomuisa olongenda viange.
28 Kuenje omunu* o nyõleha ndocina cimue ca vola,
Kuenda nduwalo wu liwa lombunji.