Isaya
21 Esapulo limue lioku katukila ekalasoko li kasi ndokalunga, liokuti:*+
Ndofela yi komba onele yo kombuelo, ku kasi oku iya efengi limue,
Oku upisa vekalasoko liofeka yimue yi koka usumba.+
2 Ocinjonde cimue ka ca lelukile ca situluiwa kokuange:
Ofeka yelimbi yi kasi oku lekisa elimbi,
Ukuakukundula o kasi oku kundula.
Lamana, A Elami! Ñuala ocingonja, A Media!+
Ame ndi ka malako ohali yosi eye a kokela omanu.+
3 Eli olio esunga lieci ndi kuetele esumuo lialua.*+
Ndi kuetiwe levalo,
Ndevalo liukãi o kasi oku cita.
Nda sumua calua oco ndi yeve;
Nda sakalaisua calua oco ndi mole.
4 Utima wange u tukoka; Ndi luluma omo liusumba.
Uteke una nda lavoka otembo yalua, u ndi lulumisa.
5 Yali omesa kuenda pongiyi olomangu!
Li kuenda nyũi!+
Votoki, alombuale, waveki* ociyepelo!
6 Eci Yehova a ndi sapuila ceci hati:
“Kuende, kapa ondavululi yimue oco yi lombolole eci oyo yi mola.”
7 Kuenje eye wa mola ekãlu limue liuyaki li kasi oku naliwa lolokavalu vivali,
Ekãlu limue liuyaki li kasi oku naliwa lovimbulu,
Ekãlu limue liuyaki li kasi oku naliwa lolongamelo.
Eye wa kuata utate, wa kuata utate walua.
8 Noke eye wa vilikiya ndohosi:
“A Yehova, ndamamako oku talama kutala wondavululi vokuenda kueteke,
Kuenda uteke wosi ndi kasi pocitumãlo cange coku lavulula.+
9 Tali eci ci kasi oku iya:
Alume va kasi oku endela vekãlu limue liuyaki li kasi oku naliwa lolokavalu vivali!”+
Noke eye wa popia hati:
“Oyo ya kupuka! O Bavulono ya kupuka!+
Oviñumañuma viosi via songiwa violosuku viaye, via nyanyuiwa posi!”+
10 Amanu vange vana va sasiwa,
Ame nda ku sapuili eci nda yeva ku Yehova ukualohoka, Suku ya Isareli.
11 Esapulo limue lioku katukila o Duma* liokuti:
Omunu umue o kasi oku ñalukila oku upisa ko Seire:+
“Andavululi, kua kamba otembo yiñami oco ku ce?
Andavululi, kua kamba otembo yiñami oco ku ce?”
12 Ondavululi ya popia yiti:
“Omẽle yi kasi oku iya kuenda uteke u kasivo oku iya.
Nda vu yongola oku pula, puli.
Enjui vali!”
13 Esapulo limue lioku katukila etapi lio vekalasoko:
Vu ka pita uteke vusenge wetapi lio vekalasoko,
Avimunga via vakuakulinga ungende vio ko Dedane.+
14 Alonungi viofeka yo Tema,+
Ambati ovava ku una o kuete enyona,
Kuenda ambati ombolo ku una ukuakutila.
15 Momo ovo va tila osipata, osipata ya somuiwa,
Ohonji ya pongiyiwila oku asa kuenda ungangala u tunda kuyaki.
16 Momo Yehova wa ndi sapuila hati: “Vokuenda kunyamo umosi, ndanyamo wukuakutalavayela, ulamba wosi wo Kedare+ u ka sulila. 17 Vakualohonji va supapo pokati kasualali vo ko Kedare va ka tepuluka, momo Yehova Suku yo Isareli, eye wa ci popia.”