Elungulo Liwa

AKULU vekongelo va kuete oku “tẽla oku lungula londaka . . . yocili.” (Tito 1:9) Olonjanja vimue eci ci kuete oku lingiwila vakalo amue a tĩla. Ci kuete esilivilo oku kuama olonumbi vi sangiwa Vembimbiliya poku eca elungulo. Pole, akulu vekongelo va kuete oku kapako elungulo li popia hati: “Kolisako. . . oku [lungula, NW].” (1 Tim. 4:13) Ndaño okuti eci ca lomboluiwa palo catiamisiwila tete kakulu vekongelo ale ku vana va yongola oku kuata ocikele eci, kuli apuluvi amue okuti olonjali vi sukila oku lungula omãla vavo, ale vana va songola alilongiso Embimbiliya va sukila oku lungula olondonge viavo Viembimbiliya. Omo liaco, olonumbi evi vi kuete oku kapiwakovo.

Akalo Amue Asukila Oku Eca Elungulo. Oco ku limbukiwe otembo ku sukiliwa oku eca elungulo, ciwa oku konomuisa ovolandu a sonehiwa Vembimbiliya atiamẽla koku eca elungulo. Upostolo Petulu wa vetiya akulu vekongelo oku kapako lutate ovikele viavo ndangombo volomeme via Suku. (1 Pet. 5:1, 2) Upostolo Paulu wa sapuila Tito oco a vetiye alume amãlehe okuti va “lisuluvika.” (Tito 2:6) Upostolo Paulu wa vetiya vamanjaye Akristão oku “popia popia cimuamue,” kuenda oku yuvula vana va koka olonepele pokati ka vamanji. (1 Va Kor. 1:10; Va Rom. 16:17; Va Fil. 4:2) Ndaño okuti upostolo Paulu wa pandiya vamanji vo kekongelo lia va Tesalonike omo liovina viwa va lingaile, eye wa va vetiya oku kapako vali alilongiso va tambuile. (1 Va Tes. 4:1, 10) Petulu wa vetiya vamanjaye Akristão oco “va yuvul[e] oloñeyi vietimba.” (1 Pet. 2:11) Yuda wa vetiya vamanji oku likolisilako oku “yakela ekolelo” liavo omo liovilinga vĩvi viomanu vakuevĩho. (Yuda 3, 4) Akristão vosi va vetiyiwa oku li lungula pokati, oco pokati kavo lomue ka ka tĩlisue leliaño liekandu. (Va Hev. 3:13) Petulu wa vetiya va Yudea vana okuti handi ka va tavele ku Kristu hati: ‘Lipopeli kocitumbulukila eci cevĩho.’​—Ovil. 2:40.

Ovituwa vipi vi sukiliwa poku eca elungulo lutõi vakalo aco? Ndamupi omunu eca elungulo a pondola oku lekisa onjanga yoku linga eci a kasi loku popia, pole ka tĩli enene?

‘Ci Lingiwe Locisola.’ Nda elungulo ka lia eciwile ‘locisola,’ lika molẽha ndu okuti lia tĩla. (Filem. 9) Ocili okuti, eci ku sukiliwa elinga limue lionjanga, olondaka via hundi vi kuete oku lekisa onjanga yaco. Nda hundi wa vangula londaka yimue yomboka, cika molẽha ndu okuti eye o kasi loku livondela. Elungulo li kuete oku eciwa lutõi kuenda locikembe co kutima. Elungulo lieciwa locisola, lika vetiya vali olonjeveleli. Paulu poku vangula eci catiamẽla kokuaye kuenda kakamba vaye, wa sapuila va Tesalonike hati: “Vu ci ndeci tua kala lene okuti tua soka nda isia lomãla vaye muẽle. Tuo lunguli omunu omunu.” (1 Va Tes. 2:11) Akulu ava vekongelo, va lungowaile vamanjavo locisola. Omo liaco ecelela okuti olondaka viove vi lekisa esakalalo liocisola o kuetele olonjeveleli viove.

Kala ukuotate, ku ka sumuise vana o kasi loku likolisilako oku vetiya oku linga eci wa vangula. Pole, ku ka yuvule oku sapuila olonjeveleli viove “ocipango cosi ca Suku.” (Ovil. 20:27) Omanu vana va limbuka esilivilo lialungulo, ka va ka sumua kuenda ka va ka ku sola citito omo ño okuti wa va vetiya oku linga eci ca sunguluka.​—Osa. 141:5.

Olonjanja vialua, ci kuatisa oku eca epandiyo liocili osimbu handi ka kua eciwile elungulo. Sokolola ovina viwa vamanjove va siata oku linga, vina okuti vi sanjuisa Yehova ndeci: ekolelo va lekisa kupange wavo, ocisola ci va vetiya oku likolisilako kuenda epandi va lekisa eci va nyikiwa. (1 Va Tes. 1:2-8; 2 Va Tes. 1:3-5) Eci cika kuatisa vamanjove oku limbuka okuti va soliwe kuenda ekalo liavo lia ku lomboloka, kuenje cika ecelela okuti va tava ciwa kalungulo a eciwa.

‘Lepandi Liosi.’ Elungulo li kuete oku eciwa ‘lepandi liosi.’ (2 Tim. 4:2) Nye hẽ ca kongeliwamo? Vepandi mua kongela oku kolela poku liyaka lovina vĩvi ale poku sanumuĩwa. Omunu wosi okuti ukuepandi, amamako loku kuata elavoko liokuti olonjeveleli viaye vika kapako eci eye a kasi loku popia. Oku eca elungulo locituwa ndeci, cika kuatisa olonjeveleli viove oco ka vi ka sime okuti ove o va kuetele ocisimĩlo cĩvi. Ekolelo liove liokuti vamanjove va yongola oku vumba Yehova ndeci va pondola, lika vetiya onjongole yavo yoku linga eci ciwa.​—Va Hev. 6:9.

‘Oku Lungula Londaka Yocili.’ Ndamupi hẽ ukulu wekongelo a pondola “oku lungula londaka yocili? Poku “kolela lika ondaka yocili ndomo yo longisiwa.” (Tito 1:9) Omo liaco, ku ka vangule ovisimĩlo viove muẽle, kapako Ondaka ya Suku ndongusu kelungulo liove. Ecelela okuti Embimbiliya olio li songuila ovisimĩlo viove kueci ci sukiliwa oku popiwa. Lekisa esilivilo lioku kapako eci Embimbiliya li popia catiamẽla kondaka yi kasi loku popiwa. Kũlĩhĩsa ciwa ovitangi viyilila koku likala oku songuiwa Londaka ya Suku cilo kuenda kotembo yokovaso, kuenje ci lomboluila olonjeveleli viove oco va limbuke esukila lioku ci kapako.

Kũlĩhĩsa okuti wa lombolola ciwa kolonjeveleli viove eci ovo va sukila oku linga kuenda ndomo va kuete oku ci linga. Kũlĩhĩsavo okuti ca va lomboloka ciwa okuti alomboluilo ove a kunamẽla muẽle Vembimbiliya. Nda Ovisonehua viecelela limue elisanjo kueci catiamẽla ketepiso limue, lombolola toke apa elisanjo liaco li sulila. Noke, koku malusula kuove, eca evetiyo lia sulako lioku pamisa onjongole yolonjeveleli viove yoku linga eci ca popiwa.

‘Oku Vangula Lutõi.’ Oco ece elungulo liwa ku vakuene, o sukila oku ‘vangula lutõi vekolelo.’ (1 Tim. 3:13) Nye hẽ ci kuatisa omunu oku vangula lutõi? Ceci “ongangu [yaye] yovilinga viwa,” yi likuata leci eye a kasi loku vetiya vamanjaye oku linga. (Tito 2:6, 7; 1 Pet. 5:3) Omo liaco, vana va kasi loku vetiyiwa oku kapako elungulo, vaka limbuka okuti una o kasi loku va vetiya ka kevelela okuti ovo va linga cina okuti eye muẽle ka kasi loku ci linga. Ovo vaka mõla okuti va pondola oku setukula ekolelo liaye ndeci eye muẽle a kasi loku likolisilako oku setukula Kristu.​—1 Va Kor. 11:1; Va Fil. 3:17.

Elungulo litiamisiwila Vondaka ya Suku hailio lieciwa locisola, li pondola oku sulila vuwa wa velapo. Ava va kuete ocikele coku eca elungulo va kuete oku likolisilako oku ci linga ciwa.​—Va Rom. 12:8.