“Usoma Wove Wiye”

Yehova wa likuminya hati: ‘Ka ku ka kala vali oku lila, upongo, oku vela ale oku fa. Ame ndi ka puenya asuelẽla osi vovaso avo. Ovina viosi vĩvi vio kosimbu ka vi ka ivalukiwa vali.’

Yehova wa kapa Adama la Eva vocumbo Cedene oco va kale lombembua kuenda lesanju. Ovo va sukilile oku fendela Isiavo wo kilu kuenda oku yukisa ongongo lomãla vavo. Adama la Eva va sinĩla Yehova, pole, ocipango caye ka ca pongolokele. Velivulu lilo tua lilongisa okuti ovina viosi Suku a likuminya vi tẽlisiwa. Usoma waye u ka nena asumũlũho a komõhisa palo posi ndomo eye a likuminyile ku Avirahama.

Ndopo Satana lolondele viaye kumue lolondingaĩvi viosi, va ka kunduiwa. Kuenje omanu vana va ka puluka, va ka fendela Yehova. Etu ka tu ka vela vali ale oku fa. Oloneke viosi tu ka pasuka letimba lieyuka ongusu kuenda esanju lioku kala komuenyo. Ongongo yi ka linga ocumbo ceposo. Omanu vosi va ka kuata okulia kuwa kuenda olonjo via koka. Ovo va ka li sola pokati kuenda ka va ka kala olongangala. Ovinyama via tema ka vi ka kuata vali usumba letu kuenda etu ka tu ka vi kuatelavo usumba.

Eci Yehova a ka fetika oku pindula omanu ci ka nena esanju lialua. Tu ka yolela omanu vo kosimbu, ndeci Abele, Noha, Avirahama, Sara, Mose, Ruti, Ester kuenda Daviti. Ovo va ka talavaya letu koku pongolola Ongongo oco yi linge ocumbo ceposo. Otembo yosi ku ka kala upange walua woku linga okuti, u soliwe.

Yehova o yongola okuti ove o ka kala vocumbo caco ceposo. Ove o ka kũlĩha Yehova lonjila yimue okuti lalimue eteke wa yi sokoluile. Omo liaco, pamisa ukamba wove la Yehova oloneke viosi, okupisa cilo kuenda otembo ka yi pui!