AMALẼHE VA PULA
Ci Kuete hẽ Esilivilo Oku Likutilila?
Ndomo ca lekisiwa vekonomuiso limue lia lingiwa, ci pitahãla 80 kolo pursento kamalẽhe voku Amerika va likutilila, pole, onepa yimue oyo lika yi likutilila oloneke viosi. Ocili okuti, vamue pokati kamalẽhe vaco va lipula ndoco: “Anga hẽ ohutililo ocina cimue ño ci tu lingisa oku liyeva ciwa ale kuli ocina ci kuavo?”
Ohutililo yi lomboloka nye?
Ohutililo onjila yimue yocili yoku sapela Lululiki wovina viosi. Sokolola kueci ci lomboloka! Yehova wa velapo omanu kovina viosi. Pole, ndaño ndoco, “eye ka kasi ocipãla lomunu lomunu pokati ketu.” (Ovilinga 17:27) Kuenje, Embimbiliya li tu ĩha elaleko li komohĩsa liokuti: “Ameli ku Suku kuenje eye amela kokuene.”—Tiago 4:8.
Ndi amela ndati ku Suku?
Onjila yimue yoku ci linga oku likutilila—momo onjila yoku sapela la Suku.
Onjila yi kuavo oku lilongisa Embimbiliya—momo onjila yimue Suku a “sapela” love.
Onjila yaco yoku sapela la Suku pocakati cohutililo kuenda coku lilongisa Embimbiliya, yi ka ku kuatisa oku kuata ukamba wa pama laye.
“Oku sapela la Yehova omunu wa Velapo Veluali Luosi, esumũlũho linene umue a pondola oku kuata.”—Jeremy.
“Oku sapuila ku Yehova ovisimĩlo viange viondongosi, ci ndi kuatisa oku liyeva ciwa.”—Miranda.
Anga hẽ Suku o Yevelela muẽle?
Ndaño okuti o tava ku Suku kuenda o likutilila kokuaye, pamue o pondola oku tatãla naito nda eye o yevelela muẽle. Pole, Embimbilya li popia okuti Yehova u “kuakuyeva ohutililo.” (Olosamo 65:2) Olio li kulaleka oku ‘yeka kokuaye asakalalo ove osi.’ Momo lie? ‘Momo eye oku tata.’—1 Petulu 5:7.
Sokolola naito: Olonjanja viosi wa siata hẽ oku sanda otembo yoku sapela lakamba vove? Cimuamue haico o pondola oku linga la Suku. Olonjanja viosi sapela laye kuenda ci linga poku tukula onduko yaye Yehova. (Olosamo 86:5-7; 88:9) Embimbiliya li ku laleka oku ‘Likutilila olonjanja viosi.’—1 Va Tesalonike 5:17.
“Ohutililo ombangulo yimue ndi kuata la Isiange wokilu muna ndi situlula utima wange locili.”—Moisés.
“Ndi sapela la Yehova catiamẽla kovina viondongosi, ndeci ndi linga la inange ale lekamba limue nda kolela.”—Karen.
Ovina vipi ndi sukila oku likutilila?
Embimbiliya liti: “Kovina viosi lolohutililo kuenda apingilo kumue loku eca olopandu, apingilo ene a kũlĩhĩwe la Suku.”—Va Filipoi 4:6.
Oco hẽ tu pondola oku likutilila catiamẽla kovitangi vietu? Oco! Momo Embimbiliya li popia hati: “Imba ocilemo cove ku Yehova Kuenda eye o ka ku kuatisa.”—Olosamo 55:22.
Ocili okuti eci tu likutilila ka tu sukila lika oku vangula catiamẽla kovitangi vietu. Ufeko umue o tukuiwa Chantelle wa popia hati: “Ukamba wetu la Yehova nda ka wa endele ciwa nda nda kaile lika oku pinga ekuatiso kokuaye. Ndi sima okuti ciwa tete oku eca olopandu kuenda ñuete ovina vialua vioku eca olopandu.”
Sokolola naito: Ovina vipi vi ku vetiya oku eca olopandu? O tẽla hẽ oku sokolola kovina vitatu ove o pondola oku eca olopandu ku Yehova etaili?
“Toke muẽle ovina vitito, ndeci oku tala onelẽho yimue ya posoka, ci pondola oku tu vetiya oku eca olopandu ku Yehova.”—Anita.
“Sokolola kociluvo cimue ci ku komõhisa ale kocinimbu cimue Cembimbiliya ci ku vetiya calua kuenje likutilila ku Yehova loku eca olopandu omo liovina viaco.”—Brian.