Anga hẽ Atavo Osi Amuamue? Anga hẽ Osi a Songuila ku Suku?
Etambululo Liembimbiliya
Sio, atavo ka a lisokele. Vembimbiliya mu sangiwa ovolandu alua atavo ka a sunjuisa Suku. Atavo aco a tendiwa volonepa vivali.
Onepa 1: Atavo va fendela olosuku viesanda
Embimbiliya li tukula efendelo liolosuku viesanda okuti “ovina viaño,” “ka vi kuete esilivilo” kuenda “ka vi kuatisa.” (Yeremiya 10:3-5; 16:19, 20) Yehovaa Suku wa handeleka epata lio kosimbu lia va Isareli hati: “Ku ka fendele olosuku vikuavo, te lika ame.” (Etundilo 20:3, 23; 23:24) Eci va Isareli va enda oku fendela olosuku vikuavo, “onyeño ya Yehova ya wengukila va Isareli.”—Atendelo 25:3; Ovisila 20:2; Olonganji 2:13, 14.
Suku ka pongoluile ocisimĩlo caye catiamẽla koku fendela vana “va tukuiwa okuti olosuku.” (1 Va Korindo 8:5, 6; Va Galatia 4:8) Eye o handeleka okuti vosi vana va yongola oku u fendela, va sukila oku liwekapo oku livala ukamba la vana va panga onepa kefendelo liesanda, poku popia hati: “Tundi pokati kavo, litepi lavo.” (2 Va Korindo 6:14-17) Nda okuti atavo osi a kaile amuamue, ha-o a songuila ku Suku, momo lie eye a ecela ocihandeleko eci?
Onepa 2: Oku fendela Suku yocili lonjila ka yi taviwa laye
Olonjanja vimue va Isareli va enda oku fendela Suku lovilinga kuenda ovituwa ndevi viefendelo liolosuku viesanda. Pole, Yehova wa pisa ocituwa coku tenga efendelo liocili, leli liesanda. (Etundilo 32:8; Esinumuĩlo 12:2-4) Yesu wa pisa asongui vetavo vo koloneke viaye omo lionjila va enda oku fendela Suku. Ovo va yonguile oku li molẽhisa ndu okuti vakuacili, pole, va kala vakuambambe kuenda ‘ka va sumbilile ovina via velapo Viocihandeleko ndeci, esunga, ohenda kuenda ekolelo.’—Mateo 23:23.
Cimuamue haico ci pita koloneke vilo okuti, omanu va pondola lika oku kuata ukamba wocili la Suku pocakati cetavo li longisa ocili. Ocili caco ci sangiwa Vembimbiliya. (Yoano 4:24; 17:17; 2 Timoteo 3:16, 17) Atavo ana a sandeka alongiso ka a likuata leci Embimbiliya li popia, a amũla omanu ku Suku. Alua pokati kalongiso omanu va siata oku sima okuti a sangiwa Vembimbiliya ndeci, Suku Umosi Muvatatu, ocilelembia ka ci fi kuenda ekangiso ka li pui—a tunda kefendelo liolosuku viesanda. Efendelo liaco, ‘liolivova,’ ale ka li kuete esilivilo omo okuti, li kuãhi ovihilayila viatavo, ovihandeleko via Suku havioko.—Marko 7:7, 8.
Suku wa suvuka ombambe yi lingiwa vatavo. (Tito 1:16) Oco omanu va kuate ukamba la Suku, etavo li sukila oku va kuatisa komuenyo wavo okuti, ka li kunamẽla lika kalongiso oviholo kuenda kovina viombambe. Ndeci Embimbiliya liti: “Nda umue o sima okuti ufendeli wa Suku, pole, ka kapi olelia kelimi liaye, o kasi oku kemba utima waye muẽle kuenje efendelo liaye ka li kuete esilivilo. Onjila yoku fendela ya lipua haiyo ya pua evĩho kovaso a Suku yetu haeye Isia, yeyi: oku tata olosiwe kuenda ovimbumba kohali yavo, loku li lava keliño lioluali.” (Tiago 1:26, 27; latosi) Ca sunguluka Embimbiliya oku tukula ondaka “etavo lia lipua,” momo efendelo liaco haliombambeko.