Ove Hẽ Wa Kapako Ovina Yehova A Linga Oco A Ku Yovole?
“Yehova, Suku ya Isareli, a sivayiwe, momo wa vanja komanu vaye kuenje wa va yovola.”—LUKA 1:68.
1, 2. Ocindekaise cipi ci likuata locitangi cekalo lietu, kuenda apulilo api tu konomuisa?
SOKOLOLA ndeci okuti, o kasi kosipitali oku vela. Kuenje, wa kapiwa vohondo muli omanu va kuete uvei umuamue okuti, lomue wa kũlĩha ovihemba viaco. Eci o yeva okuti, ndotolo o kasi oku sandiliya ovihemba viaco, o fetika oku kuata elavoko liokuti, o sakuiwa. Kuenje, o talamẽla esapulo liatiamẽla kalikolisilo a ndotolo yaco. Noke, wa yeva okuti, kuli ndotolo umue wa sanga ovihemba viaco! Eye wa likolisilako calua oco o sakuiwe. Nye o yeva vutima? O vetiyiwa oku lekisa esumbilo, loku eca olopandu ku ndotolo wa sandiliya onjila yoku ku yovola kolofa, kumue lomanu vakuavo.
2 Ndaño ka ca lelukile oku kuata elomboloko liulandu owu, pole, watiamẽla kovitangi tua siata oku liyaka lavio. Omunu lomunu pokati ketu, wa siata oku liyaka lovitangi vialua okuti, via tukuiwa ndeti vi sule. Tu sukila oku yovuiwa lonjanga. (Tanga Va Roma 7:24.) Yehova kumue Lomõlaye, va likolisilako calua, oco va tu yovole. Omo liaco, tu konomuisi apulilo akuãla a velapo. Momo lie tu sukilila oku yovuiwa? Nye Yesu a linga oco tu yovuiwe? Eyovo liaco lia vetiya Yehova oku linga nye? Tu lekisa ndati okuti tua kapako esilivilo lieyovo lia tunda ku Suku?
Esunga Lieci tu Sukilila Oku Yovuiwa
3. Ekandu li sokisiwa ndati luvei umue?
3 Esapulo limue lia lingiwa, lia lekisa okuti, kunyamo wo 1918, uvei umue u tukuiwa hati, gripe Espanyola, wa ponda eci ci pitahãla ekũi liolohuluwa viomanu. Kuli ovovei akuavo okuti, a pondavo omanu valua. Ndaño ovovei aco ka a sambuka calua, pole, a ponda omanu valua.a Nye ci popiwa nda tua sokisa ekandu lovovei aco? Ivaluka elivulu lia Va Roma 5:12 li popia hati: “Ndeci ekandu lia iñila voluali lomunu umuamue, kuenda okufa kueya lekandu, haico okufa kua sambukila omanu vosi, momo vosi va linga ekandu.” Ekandu lia sambukila omanu vosi va kasi voluali, momo lomue wa lipua. (Tanga Va Roma 3:23.) Omanu va ñami va fa omo liekandu? Paulu wa soneha hati, “omanu vosi” va kasi loku fa, omo liekandu.
4. Ovisimĩlo vipi Yehova a kuete, viatiamẽla kotembo yetu yoku kala komuenyo, kuenda via litepa ndati levi viomanu valua koloneke vilo?
4 Koloneke vilo, omanu valua va siata oku sima okuti, ekandu lolofa, vi panga onepa komuenyo. Ovo va kuete ohele yoku fa ocipikipiki, pole, ka va kapeleko olofa vina viya omo lioku kuka. Omanu ka va siatele oku kapako ovina Ululiki a likuminya oku linga. Otembo yetu yoku kala komuenyo, yitito calua, kuenda ka yi sokisiwa lonjongole Yehova a kuatele eci a lulika omanu. Kovaso a Yehova, lomue wa tẽlisa ‘eteke limosi’ komuenyo. (2 Pet. 3:8) Ondaka ya Suku yi tu sapuila okuti, omuenyo wetu u pita ombamba ndowangu, ale ndofela. (Osa. 39:5; 1 Pet. 1:24) Tu sukila oku ivaluka ondaka eyi. Momo lie? Nda tua kũlĩhĩle ovitangi viyilila “kuvei” tu kasi lawo, nda tua limbuka esilivilo lioku ‘sakuiwa,’ ale lioku yovuiwa.
5. Ovina vipi tua pumba omo liekandu?
5 Oco tu kuate elomboloko liovitangi viyilila kekandu, tu sukila oku kũlĩha ohali tua siata oku liyaka layo omo liekandu tua piñala. Pamue ka ca lelukile oku sokolola ovitangi viaco, momo ekandu lia tu tateka oku kuata ekalo liwa Adama la Heva va kuatele. Eci va lulikiwa, va kuatele omuenyo wa lipua. Omo liaco, va sukilile oku lava ovisimĩlo viavo, kuenda ovina va yongola oku linga. Omo okuti va kala afendeli va Yehova Suku, va kuatele epondolo lioku lekisa ovituwa ndevi Viaye. Pole, ka va kapeleko ombanjaile yomuenyo wa lipua. Omo liesino liavo, va pumba omuenyo wa li pua Yehova a va yonguilile kumue lomãla vavo. (Efet. 3:16-19) Ovo va kuatiwa ‘luvei’ una wa tu sambukila, okuti, owo tu konomuisa vocipama cilo. Ndaño Yehova wa va pisa, pole, wa eca elavoko lioku tu yovola.—Osa. 103:10.
Ceci Yesu a Linga Oco tu Yovuiwe
6, 7. (a) Yehova wa lekisa ndati okuti veyovo lietu mua kongelele eliangiliyo li kuete esilivilo lia velapo? (b) Ocilumba ca eciwa la Havele, kuenda vina via eciwa lomanu vakuavo vakuekolelo eci handi ka kua kale Ocihandeleko, vi tu longisa nye?
6 Yehova wa kũlĩhĩle ovina a sukilile oku linga, oco a yovole omãla va Adama la Heva. Ocitumasuku celivulu Liefetikilo 3:15, ci lombolola ovina via kongela voku tu yovola. Yehova wa likuminyile okuti, oka nena ‘ombuto,’ ale onjovoli yika kundula Satana. Pole, onjovoli yaco ya sukilile oku tala ohali loku lumaniwa kocisendemãhi. Ndaño ombuto yaco ya sukilile oku tala ohali, pole, ovitangi viaco vi lomboloka nye? Ovitangi vipi Omunu wa nõliwa la Yehova a sukilile oku liyaka lavio?
7 Oco omanu va popeliwe, onjovoli yaco ya sukilile oku tuvika akandu avo, oco va taviwe la Suku. Nye ca kongelele voku tuvika akandu aco? Mua kongelele oku eca ocilumba. Eci Havele a eca ocilumba cocinyama ku Yehova, wa taviwa laye. Noke, omanu vakuavo vakuekolelo kosimbu ndeci: Noha, Avirahama, Yakoba, kuenda Yovi, va ecavo ovilumba viovinyama via sanjuisa Suku. (Efet. 4:4; 8:20, 21; 22:13; 31:54; Yovi 1:5) Vokuenda kuotembo, Ocihandeleko Suku a ecele ku Mose, ca lombololavo esilivilo lioku eca ovilumba.
8. Nye ocitunda cinene ca enda oku linga Keteke Lioku Tuvika Akandu onjanja yimosi vunyamo?
8 Ocilumba ca enda oku eciwa Keteke Lioku Tuvika Akandu, ca kuata esilivilo lia velapo pokati kovilumba via kisikiwile Vocihandeleko. Keteke liaco, ocitunda cinene ca enda oku linga ovina vialua viocindekaise. Eye tete wa enda oku eca ocilumba ku Yehova coku tuvika akandu ovitunda. Noke, wa enda oku eca ocilumba coku tuvika akandu omanu vana ka vatiamẽlele kepata liovitunda. Ocitunda cinene, oco lika ca enda oku iñila Vohondo yi Kola votavernakulu, onjanja yimosi vunyamo, Veteke liaco. Eye wa enda oku nyila osonde yovilumba kocikasia covisila. Kilu liocikasia caco ci kola, kua enda oku kala elende limue li nina li lekisa oku molẽha kua Yehova.—Etu. 25:22; Ovis. 16:1-30.
9. (a) Keteke Lioku Tuvika Akandu, ocitunda cinene, ca kala ocindekaise celie, kuenda ovilumba viaco vi lomboloka nye? (b) Ocitunda cinene oku iñila Vohondo yi Kola ca lombolokele nye?
9 Lekuatiso liespiritu sandu, upostolo Paulu, wa situlula elomboloko liovina viaco. Eye wa lekisa okuti, ocitunda cinene ca kala ocindekaise ca Mesiya, Yesu Kristu, osimbu okuti, ovilumba viaco via lombolokele oku fa Kuaye ndocilumba cocisembi. (Va Hev. 9:11-14) Ocilumba caco ca lipua, ca tuvika akandu ovisoko vivali viomanu ndeci: Ocisoko covitunda olombuavekua okuti, vamanji ya Kristu, va soka 144.000, kuenda “olomeme vikuavo.” (Yoa. 10:16) Eci Yesu ocitunda cinene a iñila Vohondo yi Kola kilu, wa lekisa ku Yehova Suku esilivilo liocilumba caye cocisembi.—Va Hev. 9:24, 25.
10. Ovitangi vipi Mesiya a liyaka lavio, via tukuiwa vovitumasuku Viembimbiliya?
10 Veyovo liomãla va Adama la Heva mua kongelele ovina vialua vi kuete esilivilo lia velapo. Mesiya wa sukilile oku eca omuenyo waye ndocilumba! Ovaprofeto vana va soneha Ovisonehua vio Heveru, va lombolola ciwa ovina viaco. Uprofeto Daniele wa lombolola okuti, “Mesiya, haeye Soma,” oka “tepiwako,” ale oka pondiwa, oco a ‘tuvike akandu omanu.’ (Dan. 9:24-26) Isaya wa lombolola okuti, Mesiya oka suvukiwa, loku yambuiwa, kuenda oku pondiwa omo liakandu omanu.—Isa. 53:4, 5, 7.
11. Omõla a Suku wa lekisa ndati onjongole yoku lieca ndocilumba oco a tu yovole?
11 Osimbu Omõla wongunga wa Suku keyile palo posi, wa kũlĩhĩle ovina a sukilile oku linga oco a tu yovole. Eye wa sukilile oku tala ohali, kuenda oku pondiwa. Anga hẽ, eci Isiaye o sapuila ovina viaco, wa likala oku cilinga? Sio, ka likalele, pole, wa pokola kolonumbi via Isiaye. (Isa. 50:4-6) Eci Yesu a kala palo posi, wa tẽlisa ocipango ca Isiaye. Momo lie? Eye wa tambulula loku popia hati: “[Ndi] sole Isia.” Noke wamisako hati: “Ocisola ca velapo eci ka kuli, cokuti omunu o pesila akamba vaye omuenyo waye.” (Yoa. 14:31; 15:13) Ocili okuti, tua yovuiwa locisola Comõla wa Suku. Ndaño wa ci linga loku pesela omuenyo waye wa lipua, pole, wa kuata esanju lialua omo lioku tu yovola.
Ceci Yehova a Linga Oco a tu Yovole
12. Helie wa linga eliangiliyo liocisembi, kuenda momo lie a lingila eliangiliyo liaco?
12 Yesu hayeko wa Sokiya ndomo ocilumba cocisembi ceciwa. Yehova eye wa linga eliangiliyo lioku tu yovola oco a tẽlise ocipango Caye. Upostolo Paulu wa lombolola okuti, utala wa kala vonembele kuna omanu va enda oku kapa ovilumba, wa kala ocindekaise cocipango ca Yehova. (Va Hev. 10:10) Omo liaco, eyovo lietu lia lingiwa vonduko yocilumba ca Kristu, ombanjale yimue tua tambula ku Yehova. (Luka 1:68) Eyovo liaco, li lomboloka ocindekaise cocipango caye ca lipua, kuenda cocisola cavelapo a kuetele omanu.—Tanga Yoano 3:16.
13, 14. Ongangu ya Avirahama yi tu kuatisa ndati oku limbuka ovina Yehova a tu lingila?
13 Nye Yehova a linga oco a lekise ocisola caye kokuetu? Ka calelukile oku kuata elomboloko liaco. Pole, ulandu u sangiwa Vembimbiliya, u tu kuatisa oku kuata elomboloko liaco. Yehova wa pingile ku Avirahama ulume umue ukuekolelo oco a linge ocina cimue okuti, ka calelukile oku ci linga. Eye, wa pinga ku Avirahama oco a ece omõlaye Isake ndocilumba. Avirahama wa kala onjali ukuacisola. Momo Yehova poku u sapuila catiamẽla ku Isake, wa popia hati, ‘omõlove wongunga, una o sole.’ (Efet. 22:2) Pole, Avirahama wa kũlĩhĩle okuti, oku linga ocipango ca Yehova, oco ca velapo okuti, ocisola a kuatela Isake ci sule. Omo liaco, wa nõlapo oku pokola. Pole, Yehova ka ecelele okuti, Avirahama o linga ocina cimue Eye muẽle a yonguile oku tẽlisa kovaso yoloneke. Noke wa tuma ungelo oku sapuila Avirahama oco kaka ponde omõlaye. Avirahama wa nõlelepo oku pokola ku Suku yaye ndaño loseteko yaco. Momo, wa kũlĩhĩle okuti, omõlaye oka tualiwa komuenyo eci aka pinduiwa. Eye wa kuatele ekolelo liokuti, Suku oka tẽlisa ocipango caye. Omo liaco, Paulu poku lombolola catiamẽla ku Avirahama, wa popia hati, wa tambula Isake “ndocisetahãi” cepinduko.—Va Hev. 11:19.
14 Ove hẽ, o tẽla oku limbuka esumuo Avirahama a kuata osimbu a kala oku pongiya omõlaye oco a eciwe ndocilumba? Ulandu wa Avirahama, u tu kuatisa oku limbuka esumuo Yehova a kuata poku lumba una a tukula hati, ‘Omõlaye wa soliwa.’ (Mat. 3:17) Ivaluka okuti, Yehova wa sumuile calua. Momo, wa kala pamosi lomõlaye vokuenda kuanyamo ka a tendiwa. Yesu wa talavaya la Isia ndomõla wa soliwa, haeye ‘omesele,’ kuenda wa kala Kapitiya kaye okuti, “Ndaka.” (Olosap. 8:22, 30, 31; Yoa. 1:1) Ka tu tẽla oku kuata elomboloko liepandi Yehova a lekisa, eci Omõlaye a talisiwa ohali, loku sepuiwa, kuenda oku pondiwa ndondingaĩvi. Eyovo lietu, lia kala ocina ca velapo Yehova a linga! Tu lekisa ndati olopandu keyovo lietu?
O Lekisa Ndati Okuti wa Kapako Eliangiliyo Lioku Yovuiwa?
15. Yesu wa tẽlisa ndati eliangiliyo lioku tuvika akandu, kuenda asumũlũho api eyililako?
15 Yesu wa tẽlisa eliangiliyo liocilumba coku tuvika akandu noke yoku pinduiwa. Kuenje, eci a tiukila kilu, wa eca ku Isiaye esilivilo liocilumba caye. Eliangiliyo liaco, lia nena asumũlũho alua komanu. Ocilumba caco, tete ca kuatisa olombuavekua via Kristu oku tambula ongecelo yakandu. Noke, ca kuatisavo ‘omanu vosi,’ oku tambula ongecelo yakandu. Koloneke vilo, omo liocilumba caco, vana va likekembela akandu avo lutima wosi okuti, va linga olondonge via Kristu, va pondola oku kuata ukamba la Yehova Suku. (1 Yoa. 2:2) Eliangiliyo liaco, li tiamisiwila ndati kokuove?
16. Ocindekaise cipi ci tu kuatisa oku eca olopandu keliangiliyo Yehova a linga lioku tu yovola?
16 Tu kũlĩhĩsi vali ocindekaise tua konomuisa kefetikilo liocipama cilo. Sokolola ndeci okuti, ndotolo una wa sanga ovihemba vioku sakula uvei wove, weya vohondo yene, kuenje wa sapuila olombeyi viosi hati: Ombeyi yosi ya tava oku sakuiwa loku pokola kolonumbi via kisikiwa, o kaya. Nye o pondola oku linga, nda valua pokati kolombeyi o kasi lavo ka va tava oku pokola kolonumbi via ndotolo? Anga hẽ, o tava kocisimĩlo cavo ndaño wa kũlĩha okuti, oku pokola kolonumbi vio ndotolo ci ku kuatisa? Sio, ku tava kokuavo! Pole, o sukila oku eca olopandu ku ndotolo, omo lioku kuama olonumbi viaye poku sakuiwa, kuenje, o sapuilako vakuene catiamẽla konjila wa nõlapo. Cimuamue haico catiamẽla kokuetu. Tu sukilavo oku eca olopandu ku Yehova omo a tu yovola vonduko yocilumba cocisembi Comõlaye.—Tanga Va Roma 6:17, 18.
17. Tu lekisa ndati olopandu kovina Yehova a tu lingila oco a tu yovole?
17 Ovilinga vietu ovio vi lekisa okuti, tua sanjukila ovina Yehova Lomõlaye va tu lingila oco va tu yovole kekandu kuenda koku fa. (1 Yoa. 5:3) Omo liaco, tu sukila oku tamãlala lonjongole yoku linga ekandu. Tu yuvuli oku linga ekandu ocipango, kuenda oku ambata ovimuenyo vivali. Nda tua linga ovina ka via sungulukile, ci lekisa okuti, ka tua kapeleko eliangiliyo liocisembi Yehova a linga lioku tu yovola. Omo liaco, tu sukila oku lekisa olopandu ku Suku poku amamako oku liyelisa kovaso Aye. (2 Pet. 3:14) Tu pondola oku ci linga poku kundila omanu catiamẽla kelavoko lietu lioku yovuiwa, oco va kuatevo ekalo lia yela kovaso a Yehova kuenda elavoko lioku kala palo posi otembo ka yi pui. (1 Tim. 4:16) Yehova kumue Lomõlaye, va sesamẽla esivayo tu eca longusu yetu yosi otembo ka yi pui! (Mar. 12:28-30) Sokolola ovina a tu likuminya! Tu lavoka otembo eci omanu vosi vaka yovuiwa kekandu. Omo liovina Yehova a tu lingila, tu lavoka oku kuata omuenyo wa lipua otembo yenda hũ, ndeci a yonguile kefetikilo!—Va Rom. 8:21.
[Atosi pombuelo yamẽla]
a Esapulo limue lia lekisa okuti, uvei wo gripe espanyola, wa sambukilile komanu valua voluali, kuenje valua pokati komanu vaco va fa. Uvei waco, wa litepa lowu u tukuiwa hati, Ebola okuti, ndaño u molẽha lika olonjanja vimue, pole, wa siata oku ponda omanu valua va kuatiwa lawo.
O Tambulula Ndati?
• Momo lie o sukilila oku yovuiwa lonjanga?
• Ocituwa ca Yesu coku li eca ndocilumba, ci ku kuatisa oku linga nye?
• Nye o yevite vutima omo liombanjaile yocisembi ca eciwa la Yehova?
• Nye o vetiyiwa oku linga omo lieliangiliyo lia Yehova lioku ku yovola?
[Elitalatu kemẽla 27]
Keteke Lioku Tuvika Akandu ocitunda cinene ca va Isareli ca kala ocindekaise ca Mesiya
[Elitalatu kemẽla 28]
Ocituwa Avirahama a lekisa coku lumba omõlaye, ci tu longisa ovina vialua viatiamẽla keliangiliyo liocilumba ca eciwa la Yehova