Suku o Pondola Oku Sumua Ndomo tu Pondola oku u Sanjuisa

Anga hẽ eteke limue va ku sumuisile ale okuti wa lila?—a Citava okuti tua pitile ale locitangi caco. Olonjanja vimue evalo ka li kasi vetimba lietu. Citava okuti umue o tu lundila ovina vĩvi. Oku lundiliwa ku sumuisa ale sio?— Suku o sumuavo nda vo lundila. Tu konomuisi ondaka yaco, oco tu limbuke ndomo tu pondola oku sanjuisa Suku loku yuvula oku u sumuisa.

Embimbiliya li lekisa okuti omanu vamue va popia vati va sole Suku, pole, va siata oku linga ovina viu ‘sumuisa.’ Ocili okuti, poku ci linga, “va valula” Suku! Lomue o tẽla oku valula etimba lia Yehova Suku. Eye wa velapo. Tu konomuisi esunga lieci Yehova a siatela oku sumua nda ka tu lingi ovina a popia.

Omanu vavali vatete Yehova a lulika palo posi, vo nenela esumuo lialua. Kavali kavo va kapiwile vonepa yimue Yongongo ya posoka ya tukuiwile hati, “ocumbo Cedene.” Omanu vaco vavali velie?— Tete Suku wa lulika Adama, noke liotembo yimue wa lulika Heva. Omo liaco, tu konomuisi ovina va linga okuti, via sumuisa Yehova.

Eci Yehova a va kapa vocumbo, wa va sapuila oco va ci tate. Eye wa va sapuilavo oco va cite omãla loku kala lavo kumosi vocumbo celau okuti ka va fi. Pole, osimbu Adama la Heva ka va citile handi omãla, va linga ocina cimue ka ca sungulukile. Wa kũlĩha eci va linga?— Ungelo umue wa vetiya Heva kuenda Adama oku tomba olonumbi via Yehova. Tu konomuisi ndomo ca pita.

Ungelo umue wa iñilila vonyoha loku lekisa ndu okuti, onyoha oyo ya kala oku vangula. Heva wa sanjukila olondaka a yeva konyoha viokuti, o pondola oku “lisoka la Suku.” Omo liaco, Eye wa pokola kolondaka onyoha yo sapuila. Ove hẽ wa kũlĩha eci onyoha yo vetiya oku linga?—

Heva wa lia kepako liuti una Yehova a sapuilile Adama hati, ka ci tava oku liako. Osimbu Suku ka lulikile Heva, wa sapuilile Adama hati: ‘Citava oku lia koviti viosi vio vocumbo. Te lika uti woku kũlĩha eci ciwa leci cĩvi, owo ka ci tava oku liako, momo eteke o liako haico o fa.’

Heva wa kũlĩhĩle ocihandeleko caco. Pole, wa luluvala kuti waco kuenje wa limbuka ‘okuti, wa posokela oku u tala. Kuenje, wa yunga epako, noke wa lia.’ Noke wa ecavo epako ku Adama, kuenje “wa liavo.” Momo lie Adama a cilingila?—Momo wa solele calua Heva okuti Yehova ci sule. Eye wa nõlapo oku sanjuisa Heva okuti Suku hayeko. Pole, oku pokola ku Yehova oco ocina cavelapo okuti omunu ukuavo ci sule!

Ove hẽ ivaluka onyoha ya sapela la Heva? Ndeci omunu a pondola oku lekisa ndu okuti ombuneka oyo yi kasi oku vangula, kua kalavo omunu umue wa vanguila vonyoha. Ondaka yelie ya tunda vonyoha?— Mua tunda ondaka “yonyoha yosiahũlu, yi tukuiwa hati, Satana Eliapu.”

Ove hẽ wa kũlĩha ndomo o pondola oku sanjuisa Yehova?— O pondola oku ci linga poku pokola kokuaye. Satana wa popia hati, o pondola oku yapuisa omanu vosi oco va linge eci a yongola. Omo liaco, Yehova o tu lungula hati: “Kuata olondunge amõlange, sanjuisa utima wange, oco nambulule u o njimbula.” Satana wa imbula Yehova. Eye wa popia hati, o pondola oku yapuisa omanu vosi oco va liwekepo oku vumba Yehova. Omo liaco, sanjuisa Yehova poku pokola kokuaye kuenda oku u vumba! Ove hẽ o likolisilako oku ci linga?—