Suku Helie?

Tunde eci omanu va lulikiwa, ovo va siata oku fendela olosuku vialua kuenda olosuku viakãi. Pole, Embimbiliya li tukula o Suku yimue ya “velapo okuti, olosuku viosi vikuavo vi sule.” (2 Asapulo 2:5) Suku yaco helie? Nye cu velisapo okuti, olosuku viosi vikuavo omanu va fendela vi sule? Vocipama cilo, lilongisa ndomo o Suku yaco yi li situluila kokuove.

1. Yipi onduko ya Suku kuenda nye ci lekisa okuti eye o yongola okuti tu yi kũlĩha?

Suku o li situluila kokuetu pocakati Cembimbiliya. Eye wa popia hati: “Ame ndi Yehova. Eyi oyo onduko yange.” (Tanga Isaya 42:5, 8.) Onduko “Yehova” kelimi lio Heveru yi lomboloka okuti, “Eye o Koka Okuti Cimue ci Kala.” Yehova o yongola okuti tu kũlĩha onduko yaye. (Etundilo 3:15) Tu pondola oku ci kolela ndati? Vembimbiliya onduko yaye ya tukuiwa eci ci pitahãla 7.000 kolonjanja!a Onduko Yehova ya tiamẽla ku “Suku yocili kovailu kuenda kilu lieve.”—Esinumuĩlo 4:39.

2. Nye Embimbiliya li tu sapuila catiamẽla ku Yehova?

Embimbiliya li tu sapuila okuti, pokati kolosuku viosi vi fendeliwa lomanu, Yehova eye lika Suku yocili. Momo lie? Kuli asunga alua. Yehova o kuete unene wa velapo kuenda eye lika “Fũ kilu lieve liosi.” (Tanga Olosamo 83:18.) Eye “Ukuonene wosi,” eci ci lomboloka okuti, eye o kuete unene woku linga cosi a nõla oku linga. Eye “wa lulika ovina viosi” ndeci, oluali kuenda ovina viosi vi kasi lomuenyo kilu lieve. (Esituluilo 4:8, 11) Ca litepa lomunu ceci okuti, Yehova eye lika okuti otembo yosi oko a kasi kuenda o kala otembo ka yi pui.—Olosamo 90:2.

3. Suku o kuete olonduko vialua viesumbilo, pole, o kuete lika onduko yimosi

Oco o tale etepiso li kasi pokati konduko yesumbilo yomunu umue kuenda onduko yaye muẽle tioka, Tala OVIDEO, noke konomuisa epulilo li kuãimo.

OVIDEO: Olonduko Vialua Viesumbilo, Pole Onduko Yaye Muẽle Yimosi (0:41)

• Etepiso lipi li kasi pokati konduko yesumbilo ndeci “Ñala,” kuenda onduko yaye muẽle?

Embimbiliya li popia okuti, omanu va fendela olosuku kuenda oloñala vialua. Tanga Olosamo 136:1-3, noke konomuisa epulilo li kuãimo:

• Helie “Suku yolosuku” kuenda “Ñala yoloñala”?

4. Yehova o yongola okuti, ove u kũlĩha loku tukula onduko yaye

OVIDEO: Anga Suku o Kuete Onduko?—Onepa Yimue (3:11)

• O sima hẽ okuti Yehova o yongola okuti onduko yaye yi kũlĩhĩwa? Momo lie?

Yehova o yongola okuti, omanu va tukula onduko yaye. Tanga Va Roma 10:13, noke konomuisa apulilo a kuãimo:

• Momo lie ci kuetele esilivilo oku tukula onduko ya Suku Yehova?

• O liyeva ndati eci umue a ivaluka onduko yove loku yi tukula?

• Nye o sima ndomo Yehova a liyeva eci ove o tukula onduko yaye?

5. Yehova o yongola okuti ove o kala ekamba liaye

OVIDEO: Elikolisilo Liange Lioku Sanda Suku Yocili (8:18)

• Ndomo ca lekisiwa vovideo, oku lilongisa onduko ya Suku ca kuatisa ndati Soten?

Osimbu kua lingile ukamba la umue, tete o kũlĩha onduko yaye. Tanga Tiago 4:8a, noke konomuisa apulilo a kuãimo:

• Yehova oku laleka oku linga nye?

• Oku kũlĩha loku tukula onduko ya Suku ci ku kuatisa ndati oku pamisa ukamba wove laye?

NYE WA LILONGISA?

Yehova, onduko ya Suku yocili. Eye o yongola okuti, tu u kũlĩha kuenda tu tukula onduko yaco oco tu pamise ukamba wetu laye.

Oku Pitulula

• Yehova wa litepa ndati lolosuku viosi vikuavo omanu va siata oku fendela?

• Momo lie tu sukilila oku tukula onduko ya Suku?

• Nye ci lekisa okuti Yehova o yongola okuti ove o pamisa ukamba wove laye?

OCO O KŨLĨHE OVINA VIKUAVO

Konomuisa asunga atãlo lieci tu tavela okuti kuli Suku.

“Anga hẽ Kuli Suku?” (Ocipama ci sangiwa lika vo Internet)

Momo lie ca sungulukila oku tava okuti otembo yosi Suku hako a kasi?

“Helie wa Lulika Suku?” (Utala Wondavululi 1 Yenyenye 2014)

Lilongisa esunga lieci tu sukilila oku tukula onduko ya Suku, ndaño ka tua kũlĩhĩle ndomo va enda oku yi tukola kosimbu.

“Helie Yehova?” (Ocipama ci sangiwa lika vo Internet)

Onjila ndomo tu tukula Suku yi kuete hẽ esilivilo? Limbuka esunga lieci tu popela okuti, eye o kuete onduko yaye muẽle.

“Suku o Kuete Olonduko Viñami?” (Ocipama ci sangiwa lika vo Internet)