Eliya wa amẽla ku Ahava kuenje wa popia hati: “Lamana, lia, nyua. Momo ku yevala okuõla kuombela ya lua.” (Ocinimbu 41) Anga hẽ osoma eyi yĩvi, yopako esilivilo? Ulandu waco ka u ci lombolola, pole tu pondola oku limbuka okuti olondaka viaye ka vi lekisa onjongole yoku likekembela. Eye ka tavele oku kuatisiwa luprofeto oco a sange ohenda ya Yehova. Ahava “wa katuka ha li loku nyua.” (Ocinimbu 42) Nye Eliya a linga?

Oco Eliya a kũlĩhe okuti Yehova wa laikele oku tẽlisa ohuminyo yaye, wa tuma ukuenje waye oku vanja kilu nda kuli ondimbukiso yombela. Eci ukuenje a tiuka wa popia hati: “Ka kuli cimue.” Kilu ka kua kaile alende. Kaliye o tẽla hẽ oku limbuka ocina cimue ci komõhisa? Ivaluka okuti Eliya wa sapuila Soma Ahava hati: “Ku yevala okuõla kuombela ya lua.” Momo lie uprofeto a popela olondaka viaco, nda kilu handi ka kua kaile alende ombela?

Eliya wa kũlĩhĩle ohuminyo ya Yehova. Omo a kala uprofeto wa Yehova, wa kolelele okuti Suku oka tẽlisa ondaka Yaye. Ekolelo Eliya a kuata lia kala ndu okuti o yevite ale ovilemilo viombela. Eci ci tu ivaluisa olondaka Viembimbiliya viatiamẽla ku Mose, hati: “Wa pandikisa ndu o lete una ka muiwa lovaso ositu.” Anga hẽ ove o tava okuti kuli muẽle Suku? Eye o tu ĩha esunga lialua lioku kolela kolohuminyo viaye.​—⁠Va Heveru 11:​1, 27.