OCIPAMA 25
Cipi Ocipango ca Suku Catiamẽla Kokuetu?
Embimbiliya li popia okuti omuenyo womanu “umbumbulu kuenda weyuka ovitangi.” (Yovi 14:1) Eci oco Suku a tu yonguila? Nda hacoko, cipi ocipango ca Suku catiamẽla kokuetu? Anga hẽ ci ka tẽlisiwa? Konomuisa atambululo a suapo Embimbiliya.
1. Yehova o yongola okuti tu kuata omuenyo upi?
Yehova o yongola okuti tu kuata omuenyo umue wa velapo. Eci a lulika omanu vatete, Adama la Eva, wa va kapa vocumbo cimue ca posoka okuti, vocumbo Cedene. Noke “Suku wa va sumũlũisa kuenje Suku wa va sapuila hati: ‘Liciti, siati kuenda yukisi ilu lieve loku lu viala.’” (Efetikilo 1:28) Yehova wa yonguile okuti ovo va kuata omãla, va lingisa ongongo yosi ocumbo celau loku tata ovinyama. Eye wa yonguile okuti, omanu vosi va kuata uhayele wa lipua loku kala otembo ka yi pui.
Ndaño ovina ka vi kasi ndomo via sokiyiwile,a ocipango ca Suku ka ca pongolokele. (Isaya 46:10, 11) Eye handi o yongola okuti, omanu vakuepokolo va kala otembo ka yi pui vekalo lia lipua.—Tanga Esituluilo 21:3, 4.
2. Tu sanjukila ndati omuenyo cilo?
Yehova wa tu ‘lulika lenyona liukũlĩhĩso’ okuti, onjongole yoku kũlĩha loku u fendela. (Tanga Mateo 5:3-6.) Eye o yongola okuti, tu kuata ukamba wa pama laye, “loku endeila volonjila viaye, loku u sola” kuenda oku u vumba “lutima [wetu] wosi.” (Esinumuĩlo 10:12; Olosamo 25:14) Nda tu ci linga, tu kuata esanju liocili ndaño ceci tu liyaka lovitangi. Poku fendela Yehova, tu limbuka okuti, omuenyo wetu u kuete ocimãho kuenda tu ambata omuenyo ndeci eye a yongola.
LILONGISA ONDONGOSI
Lilongisa eci catiamẽla kocisola calua Yehova a lekisa poku tu pongiyila ongongo kuenda eci Ondaka yaye yi longisa catiamẽla kocimãho comuenyo.
3. Yehova o yongola okuti tu kuata omuenyo umue uwa
Tala OVIDEO, noke konomuisa epulilo li kuãimo.
Momo lie Suku a lulikila ongongo?
Tanga Ukundi 3:11, noke konomuisa epulilo li kuãimo.
Eci ci ku longisa nye catiamẽla ku Yehova?
4. Ocipango ca Yehova ka ca pongolokele
Tanga Olosamo 37:11, 29 kuenda Isaya 55:11, noke konomuisa epulilo li kuãimo.
Tua kũlĩha ndati okuti ocipango ca Yehova catiamẽla kokuetu ka ca pongolokele?
Onjo ya tatiwa lãvi yi pondola oku tumbuluiwa. Cimuamue haico ci ka pita longongo yina ya siata oku tatiwa lãvi lomanu okuti, Suku o ka yi tumbuluila vana vo sole
5. Oku fendela Yehova ci tu ĩha ocimãho komuenyo
Oku kũlĩha ocimãho comuenyo, ci tu nenela esanju. Tala OVIDEO, noke konomuisa epulilo li kuãimo.
Terumi wa kuatisiwa ndati poku lilongisa ocimãho comuenyo?
Tanga Ukundi 12:13, noke konomuisa epulilo li kuãimo:
Omo okuti Yehova wa siata oku tu lingila ovina vialua, nye tu sukila oku linga oco tu lekise olopandu kokuaye?
UMUE PAMUE O PULA: “Cipi ocimãho comuenyo?”
Nda wa tambulula ndati?
NYE WA LILONGISA?
Yehova o yongola okuti, tu sanjukila omuenyo otembo ka yi pui vekalo lia lipua palo posi. Nda tu u fendela lutima wetu wosi, omuenyo wetu u kuata ocimãho—ndaño muẽle cilo.
Oku Pitulula
Cipi ca kala ocipango catete ca Yehova catiamẽla ku Adama la Eva?
Tua kũlĩha ndati okuti ocipango ca Yehova catiamẽla komanu ka ca pongolokele?
O kuata ndati ocimãho komuenyo?
OCO O KŨLĨHE OVINA VIKUAVO
Kũlĩhĩsa uvangi u lekisa okuti, ocumbo Cedene ca kalako muẽle.
“Ocumbo Cedene—Uhembi ale Ocili?” (Utala Wondavululi 1 wa Susu 2011)
Lilongisa esunga lieci tu kolelela okuti, ongongo yi ka kala otembo ka yi pui.
“Ongongo yi ka Nyõliwa?” (Ocipama ci sangiwa lika vo Internet)
Kũlĩhĩsa eci Embimbiliya li popia catiamẽla koku kuata ocimãho komuenyo wove.
“Omuenyo u Kuete Ocimãho Cipi?” (Ocipama ci sangiwa lika vo Internet)
Tala ndomo ulume umue wa simĩle okuti o kuete cosi, pole, kuo kambelele cimue komuenyo waye.
a Vocipama ci kuãimo, o ka lilongisa esunga lieci ka tu kuetele omuenyo waco koloneke vilo.