Kolela Yehova Loku Kuata Utõi
“Imba ovaso ku Yehova. Kolisako. Utima wove u kuate utõi. Ocili, imba ovaso ku Yehova.”—OSAMO 27:14.
1. Elavoko li kuete esilivilo lie? Ondaka yaco ya tukuiwa olonjanja viñami Vembimbiliya?
ELAVOKO liocili li kasi ndocinyi. Olio li tu kuatisa oku yuvula oku tiamisila utima kovitangi violuali lulo. Kuenje, tu kuata utõi woku lavoka lesanju ovina vikeya kovaso. Yehova eye lika o tu ĩha elavoko liaco lekuatiso Liondaka yaye. (2 Timoteo 3:16) Ondaka ‘elavoko,’ ya tukuiwa eci ci soka 160 kolonjanja Vembimbiliya. Oyo yi lomboloka oku talamẽla lonjongole ocina cimue ka ca tẽlisiwile.a Elavoko liaco, lia velapo onjongole yoku kolela kocina cimue ka ci tẽlisiwa.
2. Elavoko lia kuata esilivilo lie komuenyo wa Yesu?
2 Eci Yesu a liyaka lovitangi, ka tiamisilile lika utima waye kohali. Pole, wa u tiamisila ku Yehova. Embimbiliya li popia hati: “[Eye], mekonda liesanju lio kapiwila kovaso, wa pandikisa oku tala ohali kuti, wa pembula osõi, kuenje cilo wa tumãla kondio yocalo ca Suku.” (Va Heveru 12:2) Yesu omo lioku tiamisila utima kelavoko lioku kemãlisa uviali wa Yehova londuko Yaye, wa amamako oku pokola Kokuaye ndaño lovitangi.
3. Elavoko li kuete esilivilo lie komanu va Yehova?
3 Soma Daviti poku lekisa elitokeko li kasi pokati kelavoko lutõi, wa popia hati: “Imba ovaso ku Yehova. Kolisako. Utima wove u kuate utõi. Ocili, imba ovaso ku Yehova.” (Osamo 27:14) Nda tu yongola oku pamisa utima wetu, tu sukila oku yuvula atatahãi atiamẽla kelavoko lietu okuti, li pama vutima. Nda tua cilinga, tu kuama ongangu ya Yesu yoku lekisa utõi lombili kupange woku kunda a ecele kolondonge viaye. (Mateo 24:14; 28:19, 20) Handi vali, elavoko lia tukuiwa kumosi lekolelo kuenda ocisola. Momo ovituwa viaco ovio vi kuatisa omanu va Yehova oku pandikisa kovitangi.—1 Va Korindo 13:13.
Ove hẽ ‘o Kuete Elavoko’?
4. Akristão olombuavekua kuenda “olomeme vikuavo,” va lavoka nye?
4 Omanu va Yehova va kuete elavoko li komõhisa. Akristão olombuavekua va lavoka oku viala la Yesu kilu. Pole, “olomeme vikuavo,” vi lavoka oku “panduluiwa kupika wenyõleho ha vi moli eyovo liulamba womãla va Suku.” (Yoano 10:16; Va Roma 8:19-21; Va Filipoi 3:20) ‘Veyovo liaco liulamba,’ mua kongela oku yovuiwa kekandu kuenda kovitangi vi tunda kekandu liaco. Yehova ukuakueca ‘olongavelo viosi via kanguka,’ wa likuminya ovina viwa komanu vosi vo kolela.—Tiago 1:17; Isaya 25:8.
5. Tu pondola ndati oku ‘yuka elavoko’?
5 Elavoko, li kuete esilivilo lia velapo komuenyo wetu Tuakristão. Elivulu lia Va Roma 15:13, li popia hati: “Suku yelavoko o yukisi esanju liosi lombembua vekolelo liene okuti, longusu yespiritu sandu, vu supoka lelavoko.” Elavoko ka li kasi ndondiyelo ya kapiwa vowelema. Pole, li kasi ndolosongo viekumbi komẽle. Momo li kuatisa omunu oku kuata ombembua, esanju, kuenda utõi. Ivaluka okuti, tu pondola lika oku ‘yuka elavoko’ nda tua kolela Kondaka ya Suku loku tambula espiritu sandu Liaye. Elivulu lia Va Roma 15:4, li popia hati: “Cosi ca sonehiwa kosiahũlu ca sonehiwila oku tu longisa okuti, epandi kuenda oku kolisiwa lovisonehua ku tu kokela elavoko.” Omo liaco, li pula ndoco: ‘Anga hẽ nda siata oku pamisa elavoko liange poku lilongisa Embimbiliya kuenda oku litanga eteke leteke? Vohutililo nda siata hẽ oku pinga espiritu sandu lia Yehova?’—Luka 11:13.
6. Nye tu sukila oku linga oco tu pamise elavoko lietu?
6 Yesu Kristu Usongui wetu, wa pamisiwa Londaka ya Suku. Oku sokolola ulandu womuenyo waye, ci tu kuatisa oku yuvula ‘ekavo okuti ka tu leñela vovitima vietu.’ (Va Heveru 12:3) Nda elavoko lietu lia hongua, utima wetu u tekela kovina vikuavo ndeci: koku sandiliya ovokuasi kuenda ovina vikuavo violuali. Noke, tu nyõla ekalo lietu kespiritu. Kuenje ka tu kuata vali epandi lutõi woku pokola kolonumbi via Yehova. Nda ka tua yuvuile ovituwa evi, ekolelo lietu li kala ‘ndocimbaluku ca teka.’ (1 Timoteo 1:19) Omo liaco, elavoko li pamisa ekolelo lietu.
Elavoko li Pamisa Ekolelo
7. Elavoko li pamisa ndati ekolelo?
7 Embimbiliya li popia hati: “Ekolelo olio ociseveto covina vi lavokaiwa, hailio ombangi yovina ka vi molaiha.” (Va Heveru 11:1) Ndaño okuti, elavoko halioko oñuatisi yekolelo, pole, li kuete esilivilo lialua. Kũlĩhĩsa ulandu wa Avirahama. Eci a tambula ohuminyo ku Yehova yokuti, eye lukãi waye Sara vaka cita omõla, ka ca va lelukilile oku tava kohuminyo yaco. Momo va kukile calua. Kuenje kovisimĩlo viomanu, ka va kale vali lepondolo lioku cita omõla. (Efetikilo 17:15-17) Oco hẽ, Avirahama wa tendele ndati ohuminyo yaco? Embimbiliya li popia hati: “Ndaño co tĩlĩla, [oku tava kondaka yaco] haimo wa pandikisa ño lekolelo liaye liokuti o linga isia yolofeka via lua.” (Va Roma 4:18) Ohuminyo Avirahama a tambuile ku Suku yoku cita omõla, ya pamisa ekolelo liaye. Kuenje ekolelo liaco lia pamisavo elavoko liaye. Eli olio esunga lieci eye lukãi waye Sara va kuatela utõi woku tunda kofeka yavo loku siapo epata liavo. Kuenje va enda kofeka yamale loku kala volosinge vokuenda kuotembo yosi yomuenyo wavo.
8. Ekolelo li pamisa ndati elavoko?
8 Avirahama wa pamisile elavoko liaye omo lioku pokola ku Yehova ndaño lovitangi. (Efetikilo 22:2, 12) Cimuamue haico catiamẽla kokuetu. Nda tua pokola ku Yehova loku pandikisa kupange waye, tuka tambula onima. Upostolo Paulu wa popia hati: “Epandi li koka unu, unu u koka elavoko, elavoko ka li tu kutisa osõi.” (Va Roma 5:4, 5) Eli olio esunga lieci a popela hati: “Tu yongola okuti ene vosi, omunu omunu, vu lekisa ombili yaco oku suisapo elavoko liaco toke kesulilo.” (Va Heveru 6:11) Omo okuti, elavoko liaco li tunda kukamba wetu la Yehova, li tu kuatisa oku kuata utõi lesanju eci tu liyaka lovitangi.
“Osimbu vu Lavoka Sanjuki”
9. Nye ci tu kuatisa oku ‘sanjukila elavoko lietu’?
9 Elavoko li tunda ku Yehova, lia velapo ovina vi kasi voluali. Osamo 37:34, yi popia hati: “Imba ovaso Yehova, endela vonjila yaye, kuenje oku kemãlisa hu piñala ofeka. O mõla muẽle okunyõleha kuolondingaĩvi.” Omo liaco, tu kuete esunga lioku sanjuka ‘osimbu tu lavoka’ olohuminyo via Yehova. (Va Roma 12:12) Oco tu amameko lesanju, tu sukila oku pamisa elavoko lietu. Ove hẽ, wa siata oku sokolola elavoko wa tambula ku Suku? Wa siata hẽ oku sokolola ndu okuti, o kasi ale Voluali Luokaliye kuenje, o kuete uhayele, lekalo liwa, kuenda wa ñualiwa lika lomanu va lisole pokati haivo va linga upange u nena esanju? Wa siata hẽ oku sapula komanu elavoko liaco? Valivulu vetu mu sangiwa oviluvialuvia vialua vi lekisa Oluali Luokaliye. Ove hẽ, wa siata oku sokolola oviluvialuvia viaco? Oku vi sokolola, ku kasi ndoku yelisa ovindalasa vionjanela ya imba ovaso kosamua kuli ovina via posoka. Momo nda omunu ka vi yelisile, vi liña. Kuenje ka moli ovina viwa vi kasi kosamua. Noke ovaso a fetika oku yapukila kovina vikuavo. Omo liaco, tu sukila oku yuvula ocituwa eci.
10. Oku kũlĩha okuti Yehova eca onima, ci pamisa ndati ukamba wetu laye?
10 Ocisola tu kuetele Yehova, oco ci tu vetiya oku u vumba. (Marko 12:30) Pole, tu sukilavo oku tiamisila utima wetu konima a tu likuminya. Momo Yehova o yongola okuti, tu kuata elavoko liaco. Elivulu lia Va Heveru 11:6, li popia hati: “Okusunguluka ku Suku ka ku tẽliwa te lekolelo. Momo wosi o yongola oku kokela ku Suku, co sesamẽla oku kolela okuti kuli Suku, kuenda okuti Suku eca onima kuava vo sanda.” Momo lie Yehova a yonguila okuti tu u kũlĩha ndomunu Ukuakueca onima? Momo nda tua ci linga, tu lekisa okuti Yehova eye Isietu wokilu. Eye ukuacali kuenda o sole omanu vaye. Nda Yehova ka tu ĩhile ‘elavoko lioloneke viwa kovaso,’ omuenyo wetu nda weyuka lika esumuo.—Yeremiya 29:11.
11. Elavoko lia kuatisa ndati Mose oku nõla onjila ya sunguluka?
11 Mose wa tu sila ongangu yiwa yoku tiamisila utima kelavoko li tunda ku Yehova. Omo okuti, wa tekuiwa ndonekulu ya Fareo, wa kala lepuluvi lioku kuata unene, lekemãlo kuenda ukuasi woko Egito. Anga hẽ, wa sukilile oku tiamisila lika utima kovina evi? Ale wa sukilile oku tiamisila utima koku vumba Yehova? Vokuenda kuotembo, Mose wa kuata utõi woku nõla onjila ya sunguluka. Momo lie? Momo, ‘wa lavoka oku tambula onima.’ (Va Heveru 11:24-26) Eye wa pamisile elavoko a tambuile ku Yehova.
12. Momo lie elavoko Liukristão li sukilila oku kala ndongalau?
12 Upostolo Paulu, wa sokisa elavoko ndongalau yoku kapa kutue. Ongalau yaco, yi teyuila olondunge vietu okuti tu nola onjila ya sunguluka, loku pitisa kovaso ovina vi kuete esilivilo kuenda oku pandikisa kovitangi. (1 Va Tesalonike 5:8) Ove hẽ, o kuete elavoko li kasi ndongalau? Nda wa pamisa elavoko liove, ndeci Mose la Paulu va linga, oka yuvula oku kolela ‘kukuasi u pua pua woluali lulo. Kuenje oka kolela lika ku Suku u o tu ĩhaĩha ovina viosi ha tu sanjuka lavio.’ Oku yuvula ovisimĩlo viomanu viatiamẽla koku sanda ovokuasi, ka ca lelukile. Momo omunu poku ci linga, o sukila oku likolisilako loku kuata utõi. Omo liaco, sandiliya oku kuata ‘omuenyo ko pui’ u lavoka omanu va kuete ekolelo haivo va sole Yehova.—1 Timoteo 6:17, 19.
“Lalimue Eteke hu Yanduluka”
13. Ohuminyo yipi Yehova a eca komanu vaye?
13 Omanu vana va tiamisila elavoko liavo koluali lulo, va sukila oku sokolola ciwa oloneke vio kovaso. Momo ovitangi violuali lulo, vi kasi oku livokiya calua. (Mateo 24:8) Pole, ava va tiamisila elavoko liavo ku Yehova, ka va kuete usumba. Ovo vamamako ‘lutima wa tula, kuenda ka va kuata usumba wovina vĩvi.’ (Olosapo 1:33) Omo okuti, ka va tiamisila elavoko liavo koluali lulo, va pokola kelungulo lia Paulu wa popia hati: “Ko ka kali locipululu colombongo. Tẽli lovina vu kuete, momo [Yehova] wa linga hati: Ame lalimue eteke hu yanduluka ndaño oku ku sia.”—Va Heveru 13:5.
14. Momo lie Akristão ka va sukilila oku kuata ohele yovina va sukila komuenyo wavo?
14 Ohuminyo ya Suku yoku linga hati, “lalimue eteke hu yanduluka,” yi lekisa okuti, Eye okamamako oku tu tata. Yesu poku lekisa ndomo tu kolela kohenda ya Yehova, wa popia hati: “Tete vanjiliyi usoma waye kuenda esunga liaye, kuenje ovina evi viosi viu vokiyiwi. Oco ko ka kali lohele ya hẽla momo hẽla yi kala lohele yalio.” (Mateo 6:33, 34) Yehova wa kũlĩha okuti, ka ca lelukile oku lekisa ombili kupange Waye osimbu tu sandiliya ovina tu sukila komuenyo wetu. Pole, tu sukila oku kolela kolondunge viaye kuenda konjongole yaye yoku tu kuatisa.—Mateo 6:25-32; 11:28-30.
15. Ukristão o kuata ndati ‘iso liyela’?
15 Ekolelo lietu ku Yehova, tu li lekisa poku kuata ‘iso liyela’ ale poku tiamisila utima kovina viespiritu. (Mateo 6:22, 23) Omunu wosi wa tiamisila utima kovina viespiritu, ka kuete ocipululu. Oku kuata iso liyela, ka ci lomboloka oku kala ohukũi. Kuenda ka ci lomboloka oku liwekapo oku sanda ovina tu sukila komuenyo. Pole, ci lomboloka oku leluisa omuenyo loku li pokuisa konepa yespiritu osimbu tu amamako oku pitisa kovaso upange wa Yehova.—2 Timoteo 1:7.
16. Ekolelo lutõi vi kuatisa ndati oku pitisa kovaso ocipango ca Yehova?
16 Voku kuata iso liyela ale utima wa sunguluka, mua kongela oku kuata ekolelo kuenda utõi. Sokolola ndeci okuti, cime cove kupange oku kisika oku talavaya olowola vialua okuti ku endi kolohongele. Anga hẽ o pondola oku pitisa kovaso ocipango ca Yehova? Nda omunu ka kuete ekolelo liokuti Yehova o tata omanu Vaye, Satana o tõlisa eyonjo liaye. Noke o liwekapo oku endaenda kolohongele. Ocili okuti, ekambo liekolelo ku Yehova, lieca epuluvi lioku yonjiwa la Satana. Kuenje tu liyaka lovitangi vialua.—2 Va Korindo 13:5.
“Imba Ovaso ku Yehova”
17. Omanu vana va kolela ku Yehova va sumũlũha ndati cilo?
17 Embimbiliya li lekisa okuti, omanu vana va lavoka ku Yehova loku kolela Kokuaye, lalimue eteke va konyoha. (Olosapo 3:5, 6; Yeremiya 17:7) Olonjanja vimue va liyaka lovitangi viuhukũi. Pole, ka va sokisa ovitangi viaco lasumũlũho va lavoka oku tambula. Ovo va lekisa okuti, va ‘imba ovaso ku Yehova’ loku kolela okuti, Eye oka eca ovina viwa komanu vaye. (Osamo 37:4, 34) Omo liaco, vamamako lesanju liavo. Embimbiliya li popia hati: “Elavoko liukuesunga li tẽlisiwa lesanju, elavoko liondingaĩvi puãi li nyõlẽha.”—Olosapo 10:28.
18, 19. (a) Ohuminyo yipi Yehova a tu ĩha? (b) Ndamupi tu kapa Yehova ‘kondio yetu’?
18 Omõla nda o kasi oku enda la isiaye, o liyeva okuti wa koka. Kuenje ka kuata usumba. Cimuamue haico catiamẽla kokuetu osimbu tu amamako oku endaenda la Isietu Yehova. Eye wa sapuilile va Isareli hati: “Ku ka kuate ohele, momo ñasi love. . . . hu kuatisa. . . . Momo ame Yehova, Suku yove, hu kuata peka liondio. Ame muẽle mopia love siti: Ku ka kuate usumba, hu kuatisa.”—Isaya 41:10, 13.
19 Olondaka evi vi lekisa okuti, Yehova o kuatisa omanu vaye. Soma Daviti wa popia hati: “Oloneke viosi ñapa ñapa Yehova kovaso ange. Omo eye o kasi kondio yange si sengiwa.” (Osamo 16:8) Ndamupi tu kapa Yehova ‘kondio yetu’? Tu cilinga volonepa vivali. Catete, tu ci linga poku ecelela oku songuiwa Londaka Yaye. Cavali, poku kolela kolohuminyo viaye. Ukualosamo Asafe wa imba ocisungo hati: “Ñasi ño hũ love. Wa ñapa peka liondio. O songuila loku njimbaimba onumbi. Noke o nambula vulamba.” (Osamo 73:23, 24) Olondaka evi vi tu kuatisa oku kolela kovina tu lavoka kovaso.
“Eyovo Liene li Kasi Ocipepi”
20, 21. Omanu vana va imba ovaso ku Yehova, va lovoka nye?
20 Osimbu oloneke viamamako, tu sukila oku kapa Yehova kondio yetu. Eci atavo esanda aka kunduiwa, oluali lua Satana luka pita vohali yalua. Ohali yaco ka ya la pita voluali tunde kefetikilo. (Mateo 24:21) Omanu vana ka va kuete ekolelo ku Yehova, vaka kuata usumba walua. Pole, vokuenda kuotembo yaco yohali, omanu va Yehova vaka yolela lesanju. Yesu wa popia hati: “Eci ovina evi vi fetika oku lingiwa, petuli ovaso ene, petulivo ovitue viene, momo eyovo liene li kasi ocipepi.”—Luka 21:28.
21 Tu sukila oku sanjukila elavoko Yehova a tu ĩha, kuenda oku yuvula oku yapuisiwa la Satana. Tu sukilavo oku pamisa ekolelo lietu, locisola, kuenda oku sumbila Suku. Nda tua cilinga, tuka kuata utõi woku pokola ku Yehova loku pandikisa kovitangi kuenda oku tamãlala Leliapu. (Tiago 4:7, 8) Embimbiliya li popia hati: “Kolisiko ene vosi wakuakuimba ovaso ku Yehova. Ovitima viene vi kuate utõi.”—Osamo 31:24.
[Atosi pombuelo yamẽla]
a Vovisonehua Viohelasi ondaka “elavoko,” yi tiamisiwila lika Kakristão olombuavekua. Pole, vocipama cilo, ondaka yaco, ka yi tiamisiwila lika kokuavo.
Lipi Etambululo Liove?
• Elavoko lia kuatisa ndati Yesu oku kuata utõi?
• Elitokeko lipi li kasi pokati kekolelo lelavoko?
• Elavoko lekolelo vi kuatisa ndati Ukristão oku pitisa kovaso ovina vi kuete esilivilo?
• Momo lie vana va imba ovaso Yehova va kuetele ekolelo liovina vi keya kovaso?
[Elitalatu kemẽla 26]
Ove hẽ o tẽla oku sokolola ndomo oka kala Voluali Luokaliye?