Yehova O Sesamẽla Esivayo Lietu
“Sivayi Yehova.”—OSA. 111:1.
1, 2. Ondaka “Aleluya” yi lomboloka nye, kuenda ya tukuiwa olonjanja viñami Vovisonehua Viohelasi?
AKRISTÃO vesanda volonembele viavo, va siata oku tukula ondaka hati: “Aleluya.” Omanu vamue, va siata oku tukula ondaka yaco, poku sapela. Ka valuile va kũlĩha elomboloko liondaka yaco yi kola. Pole, valua va siata oku tukula ondaka yaco, vambata omuenyo umue ka weci esivayo ku Suku. (Tito 1:16) Elivulu limue li lombolola ovina vi kasi Vembimbiliya, li popia hati, ondaka “Aleluya,” ya tukuiwa “olonjanja vialua lasonehi volosamo vimue, oco va laleke omanu vosi oku sivaya Yehova.” Vamue vakuakukonomuisa Embimbiliya, va popia hati, ondaka “Aleluya,” yi lomboloka “oku sivaya Yehova.”
2 Vembimbiliya li Kola kelivulu Liosamo 111:1, ku popia hati: “Sivayi Yehova.” Kelimi Liohelasi ondaka eyi ya tukuiwa olonjanja vikũala kelivulu Liesituluilo 19:1-6, poku sanjukila esulilo liatavo esanda. Eci ocitumasuku caco ci tẽlisiwa, afendeli vocili vaka tukula ondaka “Aleluya” lesumbilo.
Ovilinga Viaye Vinene
3. Momo lie tua siatela oku endaenda kolohongele olonjanja viosi?
3 Usonehi Wosamo 111, wa lekisa esunga lieci tu sukilila oku sivaya Yehova. Ocinimbu 1, ci popia hati: “Mandula Yehova lutima wange wosi vonjango ya vakuesunga lo vekongelo.” Koloneke vilo, Olombangi Via Yehova via siata oku kuama ongangu yaye. Omo liaco, tua siata oku endaenda kolohongele vekongelo, kuenda viofeka, oco tu sivaye Yehova.
4. Omanu va siata oku konomuisa ndati ovilinga via Yehova?
4 “Ovilinga via Yehova vinene. Ava va vi sanjukila va vi kũlĩhisa.” (Osa. 111:2) Tu konomuisi ondaka “kũlĩhisa.” Elivulu limue li lombolola okuti, ocinimbu eci, ci tiamisiwila komanu va konomuisa ovopange a Suku, “oco va kuate elomboloko liovina viaco.” Yehova wa lulika ovina vialua vi komohisa. Eye wa kapa ekumbi, ongongo, kuenda osãi pocitumãlo vi sesamẽla, oco ongongo yi kuate owuya, ocinyi, utanya luteke, olotembo, kuenda olongave vio kalunga.
5. Elomboloko omanu va kuete liovina via lulikiwa li lekisa nye?
5 Olonoño, via limbuka ndomo Suku a lulika oluali okuti, lu ñuala ñuala kekumbi, kuenda wa lulikavo osãi. Ovina viaco, vi ecelela okuti, ku kala apongoloko olotembo vokuenda kunyamo. Olonoño via lilongisavo okuti, ovina viosi vi kasi voluali, via sokiyiwa ciwa. Ulongisi umue ukuoloño woku semulula ovina, velivulu losapi hati, “The Designed ‘Just So’ Universe,” wa popia hati: “Ca leluka oku kuata elomboloko lieci olonoño vimue via pongoluila ovisimĩlo viavo vokuenda kueci ci soka 30 kanyamo a pita. Ovo va lombolola hati, oku tava okuti oluali lua tukuluka ño, ci sukila oku kuata ekolelo liocili. Momo kuli uvangi walua u lekisa okuti oluali lua lulikiwa la umue ukuoloño wa velapo.”
6. Nye o sima poku limbuka ndomo Suku a lulika omunu?
6 Ovina vikuavo vi komohĩsa kovopange a Suku, tu vi limbukila koku lulikiwa kuetu. (Osa. 139:14) Eci a lulika omunu, vetimba liaye wa kapamo ovimatamata viosi a sukila, kuenda uloño woku talavaya. Wa tu lulikavo lepondolo lioku vangula, oku yevelela, oku soneha, kuenda oku tanga. Omanu valua va kuete epondolo lioku linga ovina viaco. Wa lulikiwa lonjila yimue yi komohĩsa okuti, etimba liove li pondola oku talama, oku linga ovopange, kuenda okulia oco o kuate ongusu. O kuete ovimatamata vi ku kuatisa oku sokolola. Omo liaco, ovina Suku a lulika, ka vi sokisiwa levi olonoño via siata oku linga. Pole, omanu va tẽla lika oku linga ovina vimue lekuatiso liuloño va tambula ku Suku. Ndaño olonoño via loñoloha calua, pole, ka vi tẽla oku linga ovopange tu linga lovaka etu. Omo liaco, li pula ndoco: ‘Anga hẽ, olonjo kuenda ovina vikuavo via posoka, ka via pangiwile lovaka a lulikiwa la Suku?’
Ovilinga Vinene Via Suku Kuenda Ovituwa Viaye
7. Momo lie tu sukilila oku popia okuti, Embimbiliya li panga onepa kovopange a Suku?
7 Vupange wa Yehova, mua kongela ovina vi komohĩsa a lingila omanu ndomo via tukuiwa Vembimbiliya. Yehova eye wa tuma oku soneha Embimbiliya, kuenda alivulu aco a kuete ovisimĩlo vimuamue. Olio, ‘li kuete esilivilo lioku tu longisa.’ (2 Tim. 3:16) Elivulu Liefetikilo, li lombolola ndomo Suku a kundula olondingaĩvi voluali koloneke via Noha. Elivulu Lietundilo, li lekisa ndomo Yehova a kemalisa oku Kola kuaye, poku yovola va Isareli kupika Wegito. Omo okuti ukualosamo wa kũlĩhĩle ovolandu aco, wa popia hati: “Upange [wa Yehova] we yuka ulamba lunene. Esunga liaye li kala ño-o hũ, ka li pui. Ovikomo viaye wa vi lingila onjivaluko. Yehova ukuacali haeye ukuahenda.” (Osa. 111:3, 4) Ove hẽ, ku tava okuti, ovopange a Yehova oku kongelamo ovina a kasi oku linga cilo ‘vieyuka ulamba lunene’?
8, 9. (a) Ovilinga via Yehova via litepa ndati levi viomanu? (b) Ovituwa vipi via Suku o sole?
8 Ukualosamo wa tukulavo ovituwa vimue via Yehova ndeci, esunga, ocisola kuenda ohenda. Ove wa kũlĩha okuti ovilinga viomanu vakuakandu, olonjanja vimue ka vi lekisa esunga. Ovo pamue va lekisa ocipululu, onya, kuenda epela. Uvangi waco u limbukiwila kovota va siata oku panga oku linga ovoyaki kuenda oku kuata ovokuasi. Ovina viaco via siata oku nena ohali kuenda olofa viomanu valua. Handi vali, ovilinga vialua viomanu, via siata oku nena ohali yalua kolosuke. Kolofeka vimue, va siata oku kisika olomandekua oco va tunge olonjo viakokoto vioku kenda olosoma. Ocili okuti, ovilinga vialua viomanu koloneke vilo, ka via siatele lika oku nena ohali, pole, vi kasivo oku “nyõla ilu lieve.”—Tanga Esituluilo 11:18.
9 Ovilinga via Yehova via litepa levi viomanu, momo viesunga! Vovilinga viaye mua kongela eliangiliyo liohenda lioku yovola omanu vakuakandu. Suku poku eca ocisembi, wa “lekisa esunga liaye.” (Va Rom. 3:25, 26) Handi vali, ‘esunga liaye li kala ño-o hũ, otembo ka yi pui.’! Esunga lia Suku li limbukiwila kohenda a siata oku lekisa komanu vakuakandu. Eye olonjanja vimue poku vetiya omanu vaye oco va likekembele akandu vavo loku linga esunga, wa va pinga lohenda yocili.—Tanga Esekiele 18:25.
Yehova o Tẽlisa Olohuminyo Viaye
10. Ongangu yipi Yehova a lekisa yatiamẽla koku tẽlisa ocisila a lingile la Avirahama?
10 “Ecaeca okulia kuava vo sumbila. Ohuminyo yaye ka yu limbi.” (Osa. 111:5) Citava okuti vocinimbu eci ukualosamo wa kala oku tukula ocisila Suku a lingile la Avirahama. Yehova wa likuminyile oku sumũluisa ombuto ya Avirahama kuenda wa lombolola okuti, vaka piñala olombundi viovanyali vavo. (Efet. 22:17, 18; Osa. 105:8, 9) Eye wa tẽlisa ohuminyo yaco, kuenje ombuto ya Avirahama ya linga ofeka ya Isareli. Epata liaco lia kala otembo yalua kupika Kegito, pole, noke “Suku wa ivaluka ocisila caye cina a lisila la Avirahama” kuenje wa va yovola. (Etu. 2:24) Ovituwa Yehova a lekisa noke yoku va yovola, via eca uvangi wocali caye. Eye wa va ĩha okulia kuoku tekula etimba liavo kuenda okulia kuespiritu oco va pokole kolonumbi viaye. (Esin. 6:1-3; 8:4; Neh. 9:21) Vokuenda kuotembo, ofeka yaco olonjanja vimue ya enda oku lekisa esino, kuenje Suku wa tuma kokuavo ovaprofeto oco va likekembele. Eci papita 1.500 kanyamo tunde eci va Isareli va yovuiwa kumandekua Kegito, Suku wa tuma Omõlaye wongunga palo posi. Va Yudea valua va likala Yesu kuenda va ecelela okuti o pondiwa. Noke Yehova wa sokiya ofeka yikuavo yokaliye, yespiritu okuti, “Isareli ya Suku.” Ofeka yaco kumosi la Kristu, ovo va linga ombuto yespiritu ya Avirahama una Yehova a sapuilile hati, omanu vosi vaka sumũlũhila kokuaye.—Va Gal. 3:16, 29; 6:16.
11. Yehova o kasi oku ‘ivaluka ndati ocisila caye’ a lingile la Avirahama?
11 Yehova o kasi oku amamako oku “ivaluka ocisila caye” kuenda oku eca asumũlũho a likuminyile a tunda kocisila caco. Koloneke vilo wa siata oku eca okulia kuespiritu kueci ci pitahãla 400 kalimi. Eye o kasi oku amamako oku tambulula olohutililo vietu viatiamẽla kovina tu sukila ndomo ca lekisiwa kolondaka vi popia hati: “Eteke leteke tu ihe okulia kuaco.”—Luka 11:3; Osa. 72:16, 17; Isa. 25:6-8.
Unene wa Yehova u Komohĩsa
12. Va Isareli kosimbu va tambula ndati “ovipiñalo violofeka”?
12 “Wa tukulula komanu vaye unene wupange waye woku va iha ovipiñalo violofeka.” (Osa. 111:6) Ulandu umue ukomohĩsa wa va Isareli okuti owo ukualosamo a kala oku ivaluka, ceci va yovuiwa Kegito. Eci Yehova a ecelela okuti va Isareli va iñila Vofeka Yohuminyo, wa va ĩha unene woku yula olosoma via kala kutundilo kuenda kutakelo Wolui Yordão. (Tanga Nehemiya 9:22-25.) Yehova wa eca kokuavo “ovipiñalo violofeka.” Unenekuowo wa Suku!
13, 14. (a) Ukualosamo wa ivaluka nye catiamẽla kunene Suku a lekisa ko Bavulono? (b) Yehova wa siata oku yovola ndati omanu vaye?
13 Tua kũlĩha ciwa okuti, Yehova ndaño wa kuatisa calua va Isareli, pole, ovo ka va lekisile esumbilo kokuaye ndaño kolosekulu viavo Avirahama, Isake, kuenda Yakoba. Ovo vamamako lesino toke eci Suku a tuma va Bavulono oku vopa vofeka yavo kuenje vambatiwa kumandekua. (2 Asa. 36:15-17; Neh. 9:28-30) Nda usonehi Wosamo 111 wa kala komuenyo noke yeci va Isareli va tunda kumandekua ko Bavulono ndeci olonoño vimue vakuakukonomuisa Embimbiliya va popia, wa kuata esunga lioku eca esivayo ku Yehova omo liocili Caye kuenda unene waye. Suku wa lekisa unene waco poku yovola va Yudea kumandekua ko Bavulono yina ya kala uviali wa velapo woluali okuti, ka va eci olomandekua.—Isa. 14:4, 17.
14 Eci papita ovita vitãlo kanyamo, Yehova wa lekisa unene waye poku yovola omanu kupika wekandu kuenda woku fa. (Va Rom. 5:12) Eyovo liaco lia yulula onjila kueci ci soka 144.000 komanu oco va linge olondonge via Kristu olombuavekua. Kunyamo wo 1919 Yehova wa lekisa unene waye poku yovola ocisupe colombuavekua kupika walongiso atavo esanda. Upange va kasi oku linga koloneke vilo via sulako, weca uvangi wekuatiso liunene wa Suku. Ovo poku pandikisa toke koku fa, vaka viala oluali kumue la Kristu kilu oco va sumũlũise omanu vana va likekembela. (Esit. 2:26, 27; 5:9, 10) Omanu vaco, vaka piñala oluali luosi okuti cina ca pita la va Isareli yosimbu ci sule.—Mat. 5:5.
Olonumbi Via Suku Via Kolapo, Kuenda ka vi Pongoloka
15, 16. (a) Vovilinga viovaka a Yehova mua kongela nye? (b) Ovihandeleko vipi Yehova a ecele ku va Isareli?
15 “Ovilinga viovaka aye ocili lesunga. Ovisila viaye viocili muẽle. Via kola, lalimue eteke vi pongoloka. Via sovuiwa locili lesunga.” (Osa. 111:7, 8) ‘Vovilinga viovaka’ a Yehova mua kongela ovawe avali muna mua sonehiwile ovihandeleko ekũi via kuata esilivilo ku va Isareli. (Etu. 31:18) Ovihandeleko viaco, kuenda ovisila vikuavo Viocihandeleko ca Mose, via tunda kolonumbi via Suku via kolapo, haivio ka vi pongoloka.
16 Cimue pokati kolonumbi viaco ale ovihandeleko ca popele hati: “Ame Yehova, Suku yove, ndi Suku yesepa.” Ocihandeleko caco ca popelevo hati, Yehova “o sola locisola ka ci pongoloka olohulukãi viava [vo] sole haivo va linga ovihandeleko [viaye].” Vovawe aco, mua kalavo olonumbi ka vi pongoloka vi popia hati, “sumba so la nyõho;” “ku ka ive,” kuenda ocihandeleko catiamẽla koku yuvula oku livela ovina via vakuetu.—Etu. 20:5, 6, 12, 15, 17.
Esumbilo Lietu li Kola
17. Esunga lipi va Isareli va kuatele lioku sumbila onduko ya Suku?
17 “Wa tumisa omanu vaye eyovo. Wa handeleka okuti ocisila caye ci laviwa otembo ka yi pui. Onduko yaye yi kola, haiyo yi koka oku sumbiwa.” (Osa. 111:9) Ukualosamo wa ivalukavo ocisila ka ci pongoloka Yehova a lingile la Avirahama. Omo liocisila caco, Yehova ka yandulukile omanu vaye eci va kala onjanja ya tete kumandekua Kegito leci va kala kumandekua ko Bavulono. Volonjanja viaco vivali, Suku wa yovola omanu vaye. Omo liaco, va Isareli va sukilile oku sumbila onduko ya Suku.—Tanga Etundilo 20:7; Va Roma 2:23, 24.
18. Momo lie ove o simila okuti oku tukuiwa londuko ya Suku esumũlũho liocili?
18 Cimuamue haico ca siata oku pita Lakristão vocili koloneke vilo, vana va yovuiwa kupika wekandu loku fa. Tu sukila oku likolisilako oku pokola konumbi yatete ya lekisiwa vohutililo Yesu a longisa yi popia hati: “Onduko yove yi sumbiwe.” (Mat. 6:9) Oku sokolola ulamba wonduko yaco, ci tu vetiya oku yi sumbila. Usonehi Wosamo 111, wa kũlĩhĩle esilivilo lioku lekisa esumbilo liaco eci a popia hati: “Okusumbila Yehova oko efetikilo liolondunge. Ava vo sumbaila [okuti va lava ovihandeleko viaye] ovo va loñolõha cocili.”—Osa. 111:10.
19. Nye tuka konomuisa vocipama cikuãimo?
19 Oku sumbila Suku ku tu kuatisa oku yuvula oku linga eci cĩvi. Ku tu kuatisavo oku lekisa ovituwa via Suku ndomo ca lekisiwa Vosamo 112 yina tuka konomuisa vocipama cikuãimo. Osamo yaco yi lekisa ndomo tu pondola oku tiamẽla kolohuluwa viomanu vana vaka sivaya Suku otembo ka yi pui. Eye o sesamẽla ovina via velapo. Momo “esivayo liaye li kala ño-o hũ, ka li pui.”—Osa. 111:10.
Apulilo Oku Sokolola
• Momo lie Yehova a sesamẽlela esivayo lietu?
• Ovituwa vipi via Yehova via situluiwa kovilinga viaye?
• O tenda ndati esumũlũho lioku tukuiwa londuko ya Suku?
[Elitalatu kemẽla 20]
Ocimaho cetu coku enda enda kolohongele, oku sivaya Yehova
[Elitalatu kemẽla 23]
Ovihandeleko viosi via Yehova via tunda kolonumbi viaye via kolapo