Yehova Ukuacisola Ka Ci Pongoloka
“Yehova . . . ocisola caye ka ci pui ca lua cimue.”—OSAMO 145:8.
1. Ndamupi Suku a kasi oku lekisa ocisola caye?
“SUKU eye ocisola.” (1 Yoano 4:8) Olondaka evi vi lekisa okuti, ocituwa ca Yehova coku viala cendisiwa locisola. Ocili okuti, ndaño muẽle omanu vana okuti ka va pokola kokuaye, va siata oku kuatisiwa lutanya kuenda ombela yina eye a siata oku eca locisola! (Mateo 5:44, 45) Omo liocisola Suku a kuetele omanu voluali, ndaño muẽle ovanyãli vaye, nda va likekembela akandu avo, ci tava okuti va tambula omuenyo ko pui. (Yoano 3:16) Pole, ndopo muẽle Yehova oka kundula olondingaĩvi vina ka vi yongola oku likekembela oco omanu vana vo sole va kuate omuenyo ko pui voluali luokaliye luesunga.—Osamo 37:9-11, 29; 2 Petulu 3:13.
2. Ocisola cipi Yehova a siata oku lekisa komanu vana va kuete ukamba laye?
2 Yehova wa siata oku lekisa ocisola kafendeli vaye vocili lonjila yimue ya velapo. Ocisola caco ca lomboluiwa vondaka yo Heveru ya pongoluiwa hati, “ocisola ka ci pui” ale “ocisola ka ci pongoloka.” Soma Daviti wo ko Isareli yosimbu, wa velisilepo calua ocisola ka ci pui ca Suku. Daviti omo lieci ca pita laye muẽle kuenda oku sokolola ndomo Suku a tata omanu vaye, co vetiya oku imba ocisungo hati: “Yehova . . . ocisola caye ka ci pui ca lua cimue.”—Osamo 145:8.
Oku Limbuka Omanu Vana Vakuacili ku Suku
3, 4. (a) Ndamupi Osamo 145 yi tu kuatisa oku limbuka omanu vakuacili ku Yehova? (b) Ndamupi omanu vakuacili ku Suku vo “pandiya”?
3 Hana, ina yuprofeto Samuele, catiamẽla ku Yehova Suku wa popia hati: “Eye o tata olomãi viomanu vaye vakuacili.” (1 Samuele 2:9) Omanu vaco “vakuacili” velie? Soma Daviti wa eca etambululo. Noke yoku eca esivayo kovituwa vi komohĩsa via Yehova, Dativi wa popia hati: ‘Olosandu viove ale omanu vove vakuacili, va ku pandiya.’ (Osamo 145:10) Ndamupi omanu va pondola oku pandiya Suku? Ovo va ci linga poku eca esivayo kokuaye ale poku vangula eci ciwa catiamẽla kokuaye.
4 Omanu vakuacili ku Yehova va limbukiwila kolombangulo viavo, poku vangula ciwa catiamẽla Kokuaye. Eci va likongela la vakuavo kuenda eci va kala kolohongele viekongelo, nye va siata vali oku vangula? Ocili okuti, ovo va siata oku vangula eci catiamẽla Kusoma wa Yehova! Omanu vakuacili ku Suku va kuete ovisimĩlo vimuamue ndevi via Daviti, eci a imba ocisungo hati: ‘Va vangula ulamba wuviali wove a Yehova, loku sapula unene wove.’—Osamo 145:11.
5. Ndamupi tua kũlĩha okuti Yehova o yevelela eci omanu vaye vakuacili va vangula ciwa catiamẽla kokuaye?
5 Anga hẽ Yehova wa siata oku yevelela eci omanu vaye vakuacili va eca esivayo kokuaye? Oco muẽle, Eye wa siata oku yevelela lutate eci ovo va popia. Vocitumasuku catiamẽla kefendelo liocili koloneke vietu, uprofeto Malakiya wa soneha okuti: “Ava va sumba Yehova va livangola pokati, Yehova wa va yevelela, kuenje co lomboloka. Oco kuo sonehĩwĩla elivulu lionjivaluko yava va sumba Yehova, haivo va sokolola onduko yaye.” (Malakiya 3:16) Ci sanjuisa calua Yehova eci omanu vaye vakuacili va vangula ciwa catiamẽla kokuaye, kuenje eye o va ivaluka.
6. Upange upi u tu kuatisa oku limbuka omanu vakuacili ku Suku?
6 Omanu vakuacili ku Yehova va limbukiwilavo kutõi wavo woku vangula lomanu vana okuti ka va kasi handi oku fendela Suku yocili. Omanu vakuacili ku Suku, ‘va situluila komãla vomanu ovilinga viunene waye kuenda ulamba weposo liuviali waye.’ (Osamo 145:12) Ove hẽ wa siata oku sanda otembo yoku sapuila komanu vana ka va lilongisa Embimbiliya oco va kũlĩhe eci catiamẽla kusoma wa Yehova? Usoma waye ka u sokisiwa lowu womanu okuti ndopo u kunduiwa, momo usoma waye u kala otembo ka yi pui. (1 Timoteo 1:17) Omanu va sukila oku lilongisa lonjanga eci catiamẽla kusoma wa Yehova ka u pui kuenda oku tiamẽla kusoma waco oco vaka popeliwe. Soma Daviti wa imba ocisungo hati: “Uviali wove uviali ko pui. Okutulamela kuove ku kala kovitumbulukila viosi.”—Osamo 145:13.
7, 8. Nye ca pita kunyamo wo 1914? Kuenda uvangi upi u lekisa okuti Suku cilo o kasi oku viala lekuatiso Liusoma Womõlaye?
7 Tunde kunyamo wo 1914, kuli esunga lialua lioku vangula eci catiamẽla kusoma wa Yehova. Kunyamo waco, Suku a tumbika Usoma wa Mesiya oko kilu. Yesu Kristu, Omõla wa Daviti eye Osoma yaco. Handi vali, Yehova wa tẽlisa ohuminyo yaye yokuti, usoma wa Daviti u tumbikiwa kuenda u kala otembo ka yi pui.—2 Samuele 7:12, 13; Luka 1:32, 33.
8 Uvangi u lekisa okuti Yehova cilo o kasi oku viala lekuatiso Liusoma Womõlaye Yesu Kristu, u limbukiwila koku tẽlisiwa kuocitumasuku catiamẽla kondimbukiso yoku tukuluka kuaye. Ondimbukiso ya velapo yi limbukiwila kupange una Yesu a tukuile hati, uka lingiwa lomanu vosi vakuacili ku Suku poku popia hati: “Olondaka evi viwa viusoma vikundiwila koluali luosi oco vilinge uvangi kolofeka viosi, noke kuiya esulilo.” (Mateo 24:3-14, NW) Omanu vosi vakuacili ku Suku va kasi oku tẽlisa ocitumasuku eci lombili yocili. Ci pitahãla olohuluwa epandu viakundi vusoma ndeci, alume, akãi kuenda omãla, va litumbika koku linga upange owu okuti lalimue eteke uka pituluiwa vali. Ndopo muẽle esulilo li keyilila omanu vosi ka va sole Usoma wa Yehova.—Esituluilo 11:15, 18.
Ekuatiso li Tunda Kuviali wa Yehova
9, 10. Oku litepa kupi ku sangiwa pokati ka Yehova lolombiali viomanu?
9 Nda Tuakristão vana va litumbika, ukamba wetu la Ñala yetu Wavelapo Yehova, u tu nenela asumũlũho alua. (Osamo 71:5; 116:12) Omo okuti tua sumbila Suku kuenda tumanu vamue vakuesunga, tu sanjukila oku taviwa laye kuenda oku kuata ukamba wocili laye kespiritu. (Ovilinga 10:34, 35; Tiago 4:8) Pole, eci hacoko olombiali viomanu via siata oku linga. Ovio vi sole oku kuata ukamba lomanu vana va kemãla ndeci, va kesongo kasualali, vakualomĩlu via velapo okuti olohuasi, vana va kemãla koku tasula ombunje kuenda omanu vana va kemãla kovitalukilo. Ombiali yimue ya kemãla poku lombolola eci catiamẽla kuhukũi u sangiwa kolonepa vimue viocifuka caye, eye vukanda umue wasapulo vo Afrika wa lombolola ndoco: “Ndi kuete elomboloko lieci valua pokati ketu ka va tavela oku enda kovitumãlo viaco kuli uhukũi. Esunga liaco lieli okuti, etu ka tu yongola oku ivaluka okuti kuli ekalo liaco lĩvi. Ekalo liaco li tu veta kutima kuenda li tu sakalaisa calua omo [liakãlu] atĩla tu kuete.”
10 Ocili okuti, olombiali vimue via siata oku sakalala calua lekalo liwa liomanu vavo. Pole, ndaño olombiali vina viwa, ka via kũlĩhĩle ciwa omanu vavo. Omo liaco, tu pondola oku pula ndoco: Anga hẽ kuli ombiali yimue okuti yi tata ciwa omanu vaye vosi poku eca lonjanga ekuatiso komunu lomunu eci a liyaka lovitangi? Ocili okuti kuli. Daviti wa soneha ndoco: “Yehova o yakela [omanu] vosi va yongola oku kupuka. O petula vosi va petama.”—Osamo 145:14.
11. Ovitangi vipi omanu va Suku vakuepokolo va siata oku liyaka lavio? Kuenda ekuatiso lielie ovo va kuete?
11 Omanu vakuacili ku Yehova Suku, va siata oku liyaka lovitangi vialua omo liekambo liavo liokulipua kuenda omo okuti va kasi voluali lua vialiwa la Satana ‘ondingaĩvi.’ (1 Yoano 5:19; Osamo 34:19) Akristão va siata oku pita velambalalo. Vamue va siata oku liyaka lovitangi viuveyi umue ka u kayi ale pamue oku sumua omo lioku fisa umue ukuepata liavo. Olonjanja vimue, akulueya kuomanu vakuacili ku Yehova a siata oku tepulula epandi liavo kuenje ‘va hongua.’ Pole, ndaño lovitangi viaco, Yehova wa siata oku va ĩha ekuatiso kuenda oku va pamisa kespiritu. Soma Yesu Kristu o kuetevo onjongole yimuamue lomanu vaye vakuepokolo.—Osamo 72:12-14.
Okulia Votembo ya Sunguluka
12, 13. Ndamupi Yehova a siata oku angiliya cosi ‘ovina vi kasi lomuenyo’ vi sukila?
12 Yehova, omo liocisola caye ka ci pui, wa siata oku eca komanu vaye ovina viosi va sukila. Vekuatiso liaco mua kongela oku eca kokuavo okulia kuna ku va tekula. Soma Daviti wa soneha ndoco: “[Omanu] vosi va ku imba ovaso, kuenje o va avela okulia kuvo waco. O nyanyumula eka liove, kuenje o kutisa [ovina] viosi vi kasi lomuenyo.” (Osamo 145:15, 16) Ndaño kotembo yovitangi, Yehova o pongolola ovina oco omanu vaye vakuacili va kuate ‘okulia kueteke.’—Luka 11:3; 12:29, 30.
13 Daviti wa popia hati, ‘ovina viosi vi kasi lomuenyo’ vi tekuiwa. Vovina viaco mua kongela ovinyama. Nda kilu lieve ka kua kaile ovikũla, kuenda vokalunga ka mua kaile ovikũla, ovinyama vio vovava, olonjila kuenda ovinyama vio vusenge, nda ka kua kaile ofela yi kuatisa oku fuima kuenda ovikulia vioku litekula. (Osamo 104:14) Omo liaco, Yehova wa kũlĩha eci ovina viaco viosi vi sukila oku tambula oco vi tekuiwe.
14, 15. Ndamupi okulia kuespiritu kua siata oku eciwa koloneke vilo?
14 Omanu va litepa lovinyama momo va sukila ovina viespiritu. (Mateo 5:3) Ci komohĩsa calua oku limbuka ndomo Yehova a siata oku eca komanu vaye vakuacili ovina viespiritu ovo va sukila! Eci Yesu ka file handi, wa lingile ohuminyo yokuti, “ukuenje wa kolelua haeye wa lunguka,” oka eca kolondonge viaye ‘okulia kuespiritu kotembo ya sunguluka.’ (Mateo 24:45) Koloneke vilo, olombuavekua vina vi kasi handi palo posi okuti viatiamẽla ketendelo lieci ci soka 144.000, ovo vatiamẽla kocisoko cukuenje wa kolelua. Lekuatiso liavo, Yehova wa siata oku eca okulia kualua kuespiritu.
15 Onepa yalua yomanu va Yehova koloneke vilo, va siata oku kuatisiwa lukũlĩhĩso wasuapo Wembimbiliya lia pongoluiwila kelimi liavo. Ovo va sumũlũha calua omo va kuete Embimbiliya li tukuiwa hati, Tradução do Novo Mundo das Escrituras Sagradas! Handi vali, alivulu ana a lombolola eci ci kasi Vembimbiliya a kasi oku sandekiwa kueci ci pitahãla 300 kalimi. Okulia kuaco oku kuespiritu kua siata oku sumũlũisa afendeli vocili va sangiwa voluali luosi. Helie o sesamẽla esivayo omo liovina viaco evi viosi? Yehova eye o sesamẽla esivayo liaco. Omo liocisola caye ka ci pui, eye wa siata oku kuatisa ocisoko cukuenje wa kolelua oco va ece ‘okulia kotembo ya sunguluka.’ Leliangiliyo liaco, ‘ovina viosi vi kasi lomuenyo’ koloneke vilo, via siata oku tekuiwa konepa yespiritu. Omanu va Yehova va sanjuka calua omo va kuete elavoko liokuti ndopo muẽle oluali luka pongoluiwa Ofeka Yelau.—Luka 23:42, 43.
16, 17. (a) Ovolandu api a lekisa okuti okulia kuespiritu kua siata oku eciwa votembo ya sunguluka? (b) Ndamupi Osamo 145 yi lekisa ovisimĩlo viomanu va Suku vakuacili kueci catiamẽla kocitangi ca votuiwa la Satana?
16 Tu konomuisi ulandu umue watiamẽla kokulia kuespiritu kua tambuiwa votembo ya sunguluka. Vokuenda kunyamo wo 1939, Uyaki Wavali Woluali Luosi wa fetikila kolofeka vio ko Europa. Kunyamo waco, Vutala Wondavululi 1 wosãi ya Kuvala, mua kala ocipama cimue losapi ya linga hati, “Oku Yuvula Oku litenga Vopulitika.” Omo okuti ondaka yaco ya va lomboluiwa ciwa vocipama caco, Olombangi via Yehova kolonepa viosi violuali vieya oku limbuka okuti, via sukilile oku yuvula oku litenga vovoyaki oluali. Kuenje, eci ceya oku wengula onyeño yolombiali vio kolonepa vivali viuyaki wa pita vokuenda kuanyamo epandu. Ndaño okuti omanu vakuacili ku Suku va pita velambalalo lialua, lopo vamamako kupange woku kunda olondaka viwa Viusoma. Okupisa kunyamo wo 1939 toke wo 1946, ovo va sumũlũisiwa levokiyo limue li komohĩsa lieci ci soka 157 kolopursendu. Handi vali, ulandu wepandi va lekisa vokuenda kuotembo yuyaki li kasi oku amamako oku kuatisa omanu oku limbuka etavo liocili.—Isaya 2:2-4.
17 Yehova ka siatele lika oku eca okulia kuespiritu votembo ya sunguluka, pole okulia kuaco ku tekula. Osimbu olofeka via litumbikile kuyaki vokuenda Kuyaki Wavali Woluali Luosi, omanu va Yehova va kuatisiwa loku pitisa kovaso ocina cimue ci kuete vali esilivilo okuti epopelo liavo li sule. Yehova wa va kuatisa oku kuata elomboloko liokuti, ocitangi ca velapo, ocitangi cimue okuti mua kongela oluali luosi, catiamẽla komoko ya Yehova yoku viala. Ci sanjuisa calua oku kũlĩha okuti, omo lioku kala kuavo vakuacili, omunu lomunu pokati kavo wa kuata onepa koku teyuila omoko ya Yehova yoku viala kuenda oku lekisa okuti, Eliapu ohembi! (Olosapo 27:11) Ca litepa la Satana ukuakulundila Yehova, ceci okuti, omanu va Yehova va kasi oku amamako oku popia hati: “Yehova ukuesunga [kolonjila] viaye viosi.”—Osamo 145:17.
18. Ulandu upi wokaliye watiamẽla koku eca okulia kuespiritu votembo ya sunguluka okuti ku pamisa cocili?
18 Ulandu ukuavo u lekisa ndomo okulia kuespiritu kua siata oku eciwa votembo ya sunguluka, elivulu losapi ya linga hati, Achegue-se a Jeová, lina lia eciwa kovita viomanu vana “Vakuambili Koku Kunda Usoma” okuti, lia sandekiwa Kolohongele Viofeka via lingiwila voluali luosi kunyamo wo 2002 toke wo 2003. Elivulu liaco, lia pongiyiwa “lukuenje wa kolelua haeye wa lunguka” kuenda lia sandekiwa Lolombangi via Yehova, li lombolola ovituwa vi komohĩsa via Yehova oku kongelamo ovituwa vina via tukuiwa Vosamo 145. Elivulu liaco lika kuatisa omanu vakuacili ku Suku oco va kuate ukamba wocili laye.
Yilo Oyo Otembo Yoku Kuata Ukamba Wocili la Yehova
19. Otembo yipi yi kasi ocipepi? Kuenda ndamupi tu pondola oku pandikisa eci tuka pitĩla kotembo yaco?
19 Otembo yoku tetulula ocitangi cuviali wa velapo wa Yehova yi kasi ocipepi. Ndomo ocitumasuku ci lombolola kelivulu lia Esekiele kocipama 38, Satana ndopo oka tẽlisa ocikele caye coku kala “Goge vofeka ya Magoge.” Vocikele caco muka kongela oku lambalala omanu va Yehova voluali luosi. Satana oka ñualelapo omanu va Suku oco a konyole epandi liavo. Omo liaco, afendeli va Yehova vaka sukila ekuatiso liocili lina ovo vaka pinga lutima wavo wosi. Anga hẽ esumbilo va kuetele Suku kuenda ocisola va lekisa kokuaye cika kala ño olivova? Sio, momo Osamo 145 yi popia hati: “Yehova o kasi ocipepi [lomanu] vosi vo vilikiya, okuti vo vilikiya ocili. O muisa [omanu] vosi vo sumbila evi va yongola. O yeva uteto wavo, o va popela. Yehova o silamela vosi vo sole, olondingaĩvi puãi [oka] vi nyõla.”—Osamo 145:18-20.
20. Ndamupi olondaka Viosamo 145:18-20 vika tẽlisiwa kotembo yo kovaso?
20 Omanu va Yehova vana va kuete ukamba wocili laye vaka sanjuka calua eci eye aka lekisa unene waye poku kundula ovanyãli vosi! Eci otembo yaco yikeya, Yehova oka yeva lika omanu vana “okuti vo vilikiya ocili.” Eye kaka yeva omanu vana vakuambambe. Ondaka ya Suku yi lekisa okuti, olondingaĩvi viosi vika seteka oku vilikiya onduko ya Yehova Suku vakukutu a sulako, pole ka vika tambuluiwa.—Olosapo 1:28, 29; Mika 3:4; Luka 13:24, 25.
21. Ndamupi omanu va Yehova va siata oku lekisa okuti va sanjukila oku tukula onduko yaye yi kola?
21 Komanu vana va sumbila Yehova, yilo oyo otembo yoku u “vilikiya ocili.” Omanu va Suku, va sanjukila oku tukula onduko yaye poku linga olohutililo viavo kuenda poku eca atambululo kolohongele viavo viekongelo. Ovo va tukula onduko ya Suku volombangulo viavo vio pokolika. Handi vali, ovo va siatavo oku kuata epandi liocili poku tukula onduko ya Yehova kupange wavo woku kunda olondaka viwa.—Va Roma 10:10, 13-15.
22. Momo lie tu sukilila oku amamako oku yuvula ovituwa viosi vĩvi violuali kuenda olonjongole viaco?
22 Oco tu amameko lukamba wetu la Yehova Suku, tu sukila oku yuvula ovina viosi vi pondola oku nyõla ekalo lietu kespiritu, ndeci, oku sola calua ovokuasi, ovitalukilo vina ka via sungulukile, ocituwa cekambo lioku ecela vakuetu kuenda ocituwa coku yuvula oku kuatisa olosuke. (1 Yoano 2:15-17; 3:15-17) Nda tua kuama ovituwa viaco vĩvi, tuka wila vekandu linene li tu tateka oku taviwa la Yehova. (1 Yoano 2:1, 2; 3:6) Tu sukila oku ivaluka okuti, Yehova oka lekisa lika kokuetu ocisola caye ka ci pui haico ka ci pongoloka nda tu amamako oku lekisa ekolelo kokuaye. —2 Samuele 22:26.
23. Elavoko lipi omanu va Suku va kuete?
23 Tu kapi lika ovitima vietu kekalo liwa omanu va Yehova va kasi oku lavoka. Nda tua ci linga, tuka kuata elavoko li komohĩsa lioku kongeliwa komanu vana vaka sanjukila esumũlũho lioku sivaya Yehova “oloneke viosi” kuenda ‘otembo ka yi pui.’ (Osamo 145:1, 2) Tu lekisivo ‘ocisola ca Suku lelavoko lioku tambula omuenyo ko pui.’ (Yuda 20, 21) Osimbu tu amamako oku kuatisiwa lovituwa vi komohĩsa via Isietu wokilu, oku kongelamo ocisola caye ka ci pui eye a siata oku lekisa komanu vana vo sole, ovisimĩlo vietu vi kale ndevi Daviti a lekisa volondaka via sulako Viosamo 145, poku popia hati: “Omela wange u sapula esivayo lia Yehova. Vosi vakuetimba va pandole ño-o hũ onduko yaye yi kola.”
Ndamupi o Tambulula?
• Ndamupi Osamo 145 yi kuatisa oku limbuka omanu vakuacili ku Suku?
• Ndamupi Yehova a siata oku ‘tekula ovina viosi vi kasi lomuenyo’?
• Momo lie tu sukilila oku kuata ukamba wocili la Yehova?
[Elitalatu kemẽla 9]
Omanu vakuacili ku Suku va sanjukila oku vangula eci catiamẽla kovilinga viaye vi komohĩsa
[Elitalatu kemẽla 10]
Omanu va Yehova va siata oku lekisa epandi poku kuatisa vana ka va lilongisa Embimbiliya
[Elitalatu kemẽla 11]
Animals: Parque de la Naturaleza de Cabárceno
[Elitalatu kemẽla 11]
Yehova wa siata oku eca okulia “[kovina] viosi vi kasi lomuenyo”
[Elitalatu kemẽla 12]
Yehova eca ongusu loku songuila omanu vaye va sandiliya ekuatiso liaye volohutililo