Ene Amalẽhe, Pamisi Onjongole Yene Yoku Vumba Yehova
“Ivaluka Usovoli wove voloneke viove viutila.”—UKU. 12:1.
1. Elaleko lipi lia eciwa komãla a va Isareli?
CI SOKA 3.500 kanyamo konyima, Mose uprofeto wa Yehova, wa handelekele ovitunda kuenda akulu vendamba vo ko Isareli hati: “Ongolola omanu vosi, okuti alume lakãi lomãla, . . . okuti va yevelela loku lilongisa oku sumbila Yehova, Suku yene, kuenje va panga oku tẽlisa lutate olondaka viosi viocihandeleko cilo.” (Esin. 31:12) Kũlĩhĩsa omanu va lalekiwa oku liongolola kefendelo: alume lakãi, kuenda omãla. Ocili okuti, amalẽhe va kalavo pokati komanu va handelekiwa oku yevelela, loku lilongisa kuenda oku kuama olonumbi via Yehova.
2. Yehova wa lekisa ndati esakalalo liaye kamalẽhe va kala vekongelo Liakristão vatete?
2 Kocita catete, Yehova wa amamako oku lekisa esakalalo kamalẽhe. Vovikanda upostolo Paulu a tumisile kakongelo, Suku wo handelekele oku kongelamo olonumbi via loña kamalẽhe. (Tanga Va Efeso 6:1; Va Kolosai 3:20.) Amalẽhe Akristão va pokola kalungulo aco, va pamisa ocisola va kuetele Isiavo wo kilu kuenje, va sumũlũisiwa.
3. Koloneke vilo amalẽhe va lekisa ndati onjongole yavo yoku vumba Suku?
3 Anga amalẽhe koloneke vilo va lalekiwavo hẽ oku fendela Yehova? Oco! Afendeli va Suku va sanjuka calua omo lioku mola okuti amalẽhe valua va kasi oku pokola kelungulo lia Paulu liokuti: “Tu sokololi ndomo tu tela oku livetiya pokati oku kala locisola lovilinga viwa. Ka tu ka liweki oku ongoloka ndomo vamue va lingainga, puãi tu likuatisi pokati lalungulo, ca piãla vali omo vu lete okuti eteke liaco li kasi ocipepi.” (Va Hev. 10:24, 25) Omãla valua va kasi oku likongela lolonjali viavo kupange woku kunda olondaka viwa Viusoma wa Suku. (Mat. 24:14) Amalẽhe valua unyamo lunyamo va lekisa ocisola cavo ku Yehova poku papatisiwa, kuenda va tambula asumũlũho eyilila koku kala olondonge via Kristu.—Mat. 16:24; Mar. 10:29, 30.
Tava Cilo Kelaleko
4. Otembo yipi amalẽhe va sukila oku tava kelaleko lia Suku lioku u vumba?
4 Elivulu Liukundi 12:1 li popia hati: “Ivaluka Usovoli wove voloneke viove viutila.” Anyamo añami ove wumalẽhe o sukila oku kuata oco o tave kelaleko lioku vumba Yehova? Ovisonehua ka vi lekisa anyamo a sukiliwa. Omo liaco, ku ka tiukile konyima poku sima okuti handi ku kuete utunga woku vumba Yehova. Ndaño o kuete anyamo atito, pole o vetiyiwa oku tava lonjanga kelaleko eli.
5. Ndamupi olonjali vi kuatisa omãla vavo oku kula kespiritu?
5 Ene wamalẽhe, valua pokati kene vu kasi oku kuatisiwa oku kula kespiritu lolonjali viene ale umue pokati kavo. Nda oco, vu sokisiwa la Timoteo una wa tukuiwa Vembimbiliya. Inaye Eunike kumue la inakulu yaye Loise, vo longisa ovisonehua vi kola tunde vutila. (2 Tim. 3:14, 15) Olonjali viove via ku pindisa poku ku longisa Embimbiliya, poku likutilila love, loku endaenda kolohongele viekongelo levi vinene, kuenda oku ku ambata kupange woku kunda. Ocili okuti, oku ku pindisa volonjila via Suku, oco ocikele cinene olonjali viove via tambula ku Yehova. Anga wa sanjukila ocisola locikembe va ku kuetele?—Olosap. 23:22.
6. (a) Ndomo ca lekisiwa Vosamo 110:3, efendelo lipi li sanjuisa Yehova? (b) Nye tu ka konomuisa vocipama cilo?
6 Osimbu o kula, Yehova o yongola okuti, o kuama ongangu ya Timoteo yoku “limbuka ndeci ci kasi ocipango ca Suku, okuti ciwa, ca sunguluka, ca pua eko.” (Va Rom. 12:2) Mekonda liaco, ove o ka likolisila oku linga ovopange osi vekongelo, halocimãhoko coku sanjuisa olonjali viove, pole, o cilingila oku sanjuisa Suku. Nda wa vumba Yehova lutima wove wosi, o ka tẽla oku u sanjuisa. (Osa. 110:3) Oco hẽ, o lekisa ndati okuti o yongola oku pamisa onjongole yove yoku yevelela Yehova loku kuama olonumbi viaye? Tu konomuisi olonjila vitatu vi ka ku kuatisa oku ci linga. Ovio vi ka tiamisiwila kelilongiso, kolohutililo, kuenda kovituwa. Omo liaco, tu konomuisi olonjila viaco, yimosi yimosi vonjanja.
Kũlĩha Yehova Ndomunu
7. Ongangu yipi Yesu a tu sila yoku lilongisa Ovisonehua, kuenda nye co kuatisa?
7 Enanga liatete o sukila oku eca oco o pamise onjongole yove yoku vumba Yehova, oku tanga Embimbiliya eteke leteke. Nda wa tanga Ondaka ya Suku olonjanja viosi, o ka kuata ukũlĩhiso Wembimbiliya loku imũla usuke wove konepa yespiritu. (Mat. 5:3) Yesu wa tu sila ongangu yiwa. Eci a kuata 12 kalima, olonjali viaye vio “sanga vonembele, wa tumala pokati kalongisi oku va yevelela loku va pula pula.” (Luka 2:44-46) Yesu wa kala lonjongole yoku kuata elomboloko Liovisonehua tunde vutila. Nye co kuatisa oku kuata onjongole yaco? Inaye Maria kumue la Yosefe isiaye yokatumba ovo vo kuatisa. Omo okuti va kala afendeli va Suku, va pindisa Yesu lovilongua vi kola tunde vutila.—Mat. 1:18-20; Luka 2:41, 51.
8. (a) Otembo yipi olonjali vi sukila oku kuatisa omãla oku kuatela ocisola Ondaka ya Suku? (b) Lombolola ulandu umue u lekisa esilivilo lioku pindisa omãla tunde vutila.
8 Koloneke vilo olonjali via sumba Suku via limbuka esilivilo lioku longa omãla vavo locili Cembimbiliya, tunde vutila. (Esin. 6:6-9) Eci oco manji Rubi a linga eci a cita Joseph, omõlaye watete. Eye wa kuata ocituwa coku u tangela Elivulu Liasapulo Embimbiliya oloneke viosi. Osimbu a kala oku kula wo kuatisa oku patekela ovisonehua vialua. Anga Joseph wa kuatisiwa hẽ lepindiso liaco? Eci a fetika oku vangula, eye wa tẽlele ale oku lombolola ovolandu alua Embimbiliya volondaka viaye muẽle. Eci a kuata anyamo atãlo, wa linga onepa yaye yatete Kosikola Yupange Wakristão.
9. Oku tanga Embimbiliya loku sokolola ovinimbu vialio, ci kuete esilivilo lie?
9 Oco vu kule konepa yespiritu, ene wamalẽhe vu sukila oku kuata ocituwa coku tanga Embimbiliya eteke leteke, tunde vutila toke eci vu linga akulu. (Osa. 71:17) Momo lie tu popela tuti, oku tanga Embimbiliya ci ko kuatisi oku kula kespiritu? Kũlĩhisa eci Yesu a sapuila Isiaye vohutililo: “Omuenyo ko pui wowu, oku ku kũlĩha, ove lika vu Suku yocili.” (Yoa. 17:3) Osimbu amamako oku kuata ukũlĩhiso wa Yehova, o ka limbuka okuti eye Omunu muẽle, kuenda ocisola u kuetele ci li vokiya. (Va Hev. 11:27) Olonjanja viosi o tanga ovinimbu vimue Viembimbiliya, epuluvi lioku kũlĩha ciwa Yehova. Lipula ndoco: ‘Ulandu owu u ndi longisa nye catiamẽla Kekalo lia Yehova? Ovinimbu evi Viembimbiliya vi lekisa ndati ocisola ca Suku locikembe a ñuetele?’ Oku kuata otembo yoku sokolola apulilo aco, ci ka ku kuatisa oku limbuka ndomo Yehova a tuwa, kuenda eci a yongola kokuove. (Tanga Olosapo 2:1-5.) Ndeci ca pita la Timoteo, ove o ka vetiyiwa oku tava ‘kovina wa lilongisa’ Vovisonehua, kuenda o ka kuatisiwa oku vumba Yehova lutima wove wosi.—2 Tim. 3:14.
Ndomo Olohutililo vi Pamisa
Ocisola o Kuetele Yehova
10, 11. Olohutililo vi pamisa ndati onjongole yove yoku vumba Suku?
10 Enanga liavali o sukila oku eca oco o pamise onjongole yove yoku vumba Yehova lutima wosi, oku linga olohutililo. Kosamo 65:2, tu tangako ndoco: “Ove, okuakuyeva ohutililo, kokuove ku kokela omanu vosi.” Eci va Isareli va kuatele ukamba la Suku, ovingendeleyi via endaile konembele ya Yehova, via kuatelevo epuluvi lioku amẽla kokuaye volohutililo. (1 Olos. 8:41, 42) Suku hokuacameko. Vosi va pokola kolonumbi viaye, va kolela okuti va yeviwa laye. (Olosap. 15:8) Ocili okuti vondaka “omanu vosi,” mua kongelavo amalẽhe.
11 Ove wa kũlĩha okuti oku sapela ciwa ku pamisa ukamba. Citava okuti ove o sole oku sapuilako ekamba liove ovisimĩlo, ovina vi ku sakalaisa, kuenda olonjongole viove. Cimuamue haico, poku linga olohutililo lutima wosi, o kasi oku sapela Lululiki wove. (Va Fil. 4:6, 7) Vangula la Yehova lutima wosi ndeci o lingainga lolonjali viove ale lekamba liove lia velapo. Ocili okuti olohutililo viove vi lekisa ovisimĩlo o kuetele Yehova. Ove o ka limbuka okuti osimbu o pamisa ukamba wove la Yehova, olohutililo viove vi kuata esilivilo lia velapo.
12. (a) Momo lie olondaka viwa havioko lika vi sukiliwa poku linga olohutililo viocili? (b) Nye ci ka ku kuatisa oku limbuka okuti Yehova o kasi ocipepi love?
12 Olondaka viwa havioko lika vi tu kuatisa oku linga olohutililo viocili. Popia eci o yevite vutima. Volohutililo viove, lekisa ocisola, esumbilo, kuenda ekolelo liove ku Yehova. Osimbu o limbuka ndomo Yehova a tambulula olohutililo viove, o ka tava okuti, “Yehova o kasi ocipepi la vosi vo vilikiya.” (Osa. 145:18) Ocili okuti Yehova o ka amẽla kokuove, loku ku pamisa oco o tamalãle Leliapu kuenda o ka ku kuatisa oku nõla onjila yiwa komuenyo.—Tanga Tiago 4:7, 8.
13. (a) Ukamba uwa la Suku wa kuatisa ndati manji umue ukãi? (b) Ukamba wove la Suku u ku kuatisa ndati oku tamalãla lalambalalo?
13 Konomuisa ndomo manji umue ukãi o tukuiwa hati Cherie, a pandikisa omo lioku kuata ukamba la Yehova. Eci a kala oku tangela kosikola yelilongiso lia pita pokati, wa tambula ukanda umue wuvangi omo lioku kala ondonge yiwa haeye wa loñolohele kolomapalo vioku lupuka. Eci a mala elilongiso liaco, wa lalekiwa oku ka tangela kosikola yelilongiso lia velapo. Cherie wa popia hati: “Elaleko liaco lia kala eyonjo limue linene, momo alongisi kumue lakamba vange vo kosikola, va ndi siliñinya oku tava kelaleko liaco.” Pole, eye wa limbuka okuti oku kuata elilongiso lia velapo loku endaenda kosikola oku pokuisa etimba oco a lupuke ciwa, nda ca tateka otembo a sukilile koku vumba Yehova. Nye Cherie a linga? Eye wa lombolola hati: “Noke yoku likutilila ku Yehova, nda likala elaleko liaco, kuenje nda fetika oku talavaya ndukundi wotembo yosi.” Cilo wa tẽlisa ale anyamo atãlo kupange waco. Handi wamisako hati: “Si liveli omo lionjila nda nõla. Ñuete esanju omo onjila nda nõla yeca esivayo ku Yehova. Ocili okuti nda wa pitisa kovaso Usoma wa Suku, ovina viosi vikuavo vi ku vokiyiwa.”—Mat. 6:33.
Ovituwa Viwa vi Lekisa Okuti
o Kuete ‘Utima wa Pua Evĩho’
14. Ovituwa viwa vi kuetele esilivilo lie kovaso a Suku?
14 Enanga liatatu o sukila oku eca oco o pamise onjongole yove yoku vumba Yehova lutima wosi, oku kuata ovituwa viwa. Yehova o sumũlũisa amalẽhe va liyelisa kovituwa. (Tanga Osamo 24:3-5.) Umalẽhe Samuele, wa likala oku setukula ovituwa vĩvi viomãla va Eli, wa kala Ocitunda Cinene. Omanu va limbukile ovituwa viwa via Samuele. Embimbiliya li tu sapuila hati: “Ukuenje Samuele wamamako kutunga kuenda koku soliwa la Suku loku soliwa lomanu.”—1 Sam. 2:26.
15. Esunga lipi o kuete lioku lekisa ovituwa viwa?
15 Ndomo Paulu a ci popia, tu kasi voluali lumue okuti omanu va linga vakuakulisola, vakueyengu, va siñaila olonjali viavo, vakualutukãi, ka va kuete efendelo, va linga olongangala, vakuepela, vakuakusola calua esanju, Suku ci sule. (2 Tim. 3:1-5) Omo lioku kala pokati komanu va kuete ovituwa vĩvi, ka ca lelukile oku amamako lovituwa viwa. Pole, olonjanja viosi eci o linga eci ciwa loku likala oku linga ovina vĩvi, o lekisa okuti o kasi konele ya Yehova loku teyuila uviali waye. (Yovi 2:3, 4) O ka sanjukavo poku kũlĩha okuti, o kasi oku tava kevetiyo lia Yehova liokuti: “Kuata olondunge amõlange, sanjuisa utima wange, oco nambulule u o njimbula.” (Olosap. 27:11) Handi vali, oku kũlĩha okuti Yehova wa ku sanjukila ci pamisa onjongole yove yoku u vumba.
16. Manji umue ukãi wa sanjuisa ndati utima wa Yehova?
16 Umalẽhe umue ukãi o tukuiwa hati Carol, wa kakatelele kolonumbi Viembimbiliya eci a kala oku tanga kosikola, kuenje omanu va limbuka ovituwa viaye viwa. Nye ca pita laye? Carol wa enda oku pembuiwa lamalẽhe vakuavo kosikola, omo utima waye wa pindisiwa Lembimbiliya, ka wo ecelele oku panga onepa kovipito viateke ohusa ndaño kovipito vikuavo viofeka. Olonjanja vimue, wa kuataile epuluvi lioku eca uvangi. Noke lianyamo amue, Carol wa tambula ukanda womunu umue va tangela kosikola yimuamue, una wa popia hati: “Nda lavokaile calua oku ku sanga oco hu wĩhe olopandu. Nda limbuka ovituwa viove viwa longangu yove yoku kala umalẽhe Ukristão, kuenda utõi wa lekisa woku yuvula oku panga onepa kovipito viateke ohusa. Ove, ove Wumbangi ya Yehova nda kũlĩha tete.” Ongangu ya Carol ya vetiya ekamba liaye lio kosikola oku lilongisa Embimbiliya. Vukanda a sonehela Carol wa lombolola okuti tunde eci a papatisiwa pa pita ale 40 kanyamo! Ene amalẽhe, koloneke vilo vu pondolavo oku vetiya vakuavitima via sunguluka oku kũlĩha Yehova, nda wa kakateli kolonumbi Viembimbiliya ndeci Carol a linga.
Ene Amalẽhe Sivayi Yehova
17, 18. (a) O liyeva ndati poku mola amalẽhe vekongelo liove? (b) Amalẽhe va lavoka oku tambula asumũlũho api?
17 Vosi yetu tu kasi vocisoko ca Yehova koluali luosi, tu kuete esanju lioku mola ombili amalẽhe va siata oku lekisa kefendelo liocili! Amalẽhe vaco va pamisa onjongole yavo yoku vumba Yehova poku tanga Embimbiliya, oku likutilila kuenda poku ambata omuenyo umue u litava locipango ca Suku. Ongangu yavo yi lembeleka olonjali viavo kuenda afendeli vosi va Yehova.—Olosap. 23:24, 25.
18 Kovaso yoloneke, amalẽhe vakuekolelo va ka kongeliwa komanu va ka popeliwa haivo va ka iñila voluali luokaliye lua Suku. (Esit. 7:9, 14) Ovo va ka tambula asumũlũho ka a pui osimbu va amamako oku sanjukila Yehova, kuenje, va ko sivaya otembo yenda ño hũ.—Osa. 148:12, 13.
O Tẽla Oku Lombolola?
• Ekuatiso lipi amalẽhe va pondola oku eca kefendelo liocili?
• Momo lie oku sokolola kueci wa tanga Vembimbiliya ci kuetele esilivilo?
• Olohutililo vi ku kuatisa ndati oku amẽla ku Yehova?
• Onima yipi yiyilila koku lekisa ovituwa viwa Viakristão?
[Elitalatu kemẽla 5]
Ove o kuete hẽ ocituwa coku tanga Embimbiliya eteke leteke?