OCIPAMA 29

Nye ci Pita Lomunu Umue Eci a fa?

Ci Kuete Atosi

O kuete hẽ omunu umue o sole calua okuti wa fa? Vepuluvi limue lievalo pamue o lipula ndoco: ‘Nye ci pita letu eci tu fa? Kuli hẽ elavoko liokuti, tu ka mola vali vana va fa?’ Vocipama cilo leci ci kuãimo, kũlĩhĩsa atambululo a lembeleka a sangiwa Vembimbiliya.

1. Nye ci pita letu eci tu fa?

Yesu wa sokisa olofa lotulo tualua. Omunu wa pekela otulo tualua, ka yevi eci ci pita apa a kasi. Olofa vi sokisiwa ndati lotulo? Omunu noke lioku fa, ka yevi evalo. Eye ka yevi ulika, ndaño wa solele calua akamba, lepata liaye. Embimbiliya liti: “Ava va fa ka va kũlĩhĩle lacimue.”—Tanga Ukundi 9:5.

2. Tu kuatisiwa ndati poku kũlĩha ocili catiamẽla kolofa?

Omanu valua va kuete usumba wolofa—kuenda wava va fa! Pole, o pondola oku lembelekiwa leci Embimbiliya li popia catiamẽla kolofa. Yesu hati: “Ocili cu yovoli.” (Yoano 8:32) Atavo amue a longisa okuti, noke liolofa viomunu umue, ocilelembia caye camamako lomuenyo, pole, eci hacoko Embimbiliya li longisa. Ocili okuti, lomue o tala ohali noke lioku fa. Handi vali, omo okuti ava va fa ka va kũlĩhĩle lacimue, ka va pondola oku tu linga cimue cĩvi. Omo liaco, ka kuli esunga lioku va fendela ale oku va likutililako.

Omanu vamue va popia okuti, va pondola oku vangula lava va fa. Pole, eci ka ci tẽliwa. Ndeci tu kasi oku lilongisa, vana va fa “ka va kũlĩhĩle lacimue.” Vana va sima okuti, va vangola la vangandiavo, va siata oku vangula lolondele vi li luvikiya ndomanu va fa. Omo liaco, oku kũlĩha ocili catiamẽla kolofa, ci tu teyuila kolondele. Yehova o tu lungula oco ka tu ka seteke oku vangula lava va fa, momo wa kũlĩha okuti, oku vangula lolondele ci tu panga lãvi.—Tanga Esinumuĩlo 18:10-12.

LILONGISA ONDONGOSI

Lilongisa ovina vikuavo Embimbiliya li longisa viatiamẽla kolofa kuenda pamisa ekolelo liove ku Suku una ukuacisola ka kangisa vana va fa.

Ulume umue lomãla vaye vavali vatito, va tumãla komangu yimue ponambi yukãi waye okuti ina yomãla. Akamba kuenda epata va liongolola oco va va lembeleke loku va kuatisa.

3. Lilongisa ocili catiamẽla kuava va fa

Koluali luosi, omanu va longisiwa ovina via litepa catiamẽla kueci ci pita letu eci tu fa. Ocili okuti, alua pokati kalongiso aco, wuhembi.

Alongiso api a siata posongo yove atiamẽla kuava va fa?

Oco o kũlĩhe eci Embimbiliya li longisa, tala OVIDEO.

OVIDEO: Nye ci Pita Letu Eci tu fa?—Onepa Yimue (1:19)

Alitalatu: Onepa yimue yulandu wovideo, ‘Nye ci Pita Letu Eci tu fa?—Onepa Yimue.’ 1. Omunu umue wa fa o kasi kohama yosipitali. 2. Ulume umue o kasi pokati komanu vavali, o suñila osimbu va linga ungende lomboyo.

Tanga Ukundi 3:20, noke konomuisa apulilo a kuãimo:

Ndomo ca lekisiwa vocinimbu eci, nye ci pita lomunu eci a fa?
Kuli hẽ cimue camamako lomuenyo eci omunu a fa?

Embimbiliya li tu sapuila eci catiamẽla kolofa via Lasaru ekamba lia Yesu. Osimbu o tanga Yoano 11:11-14, limbuka eci Yesu a popia catiamẽla ku Lasaru. Noke konomuisa apulilo a kuãimo:

Yesu wa sokisa olofa la nye?
Esokiso liaco li tu situluila nye catiamẽla kuava va fa?
Nye o sima kueci Embimbiliya li popia catiamẽla kolofa?

4. Ocili catiamẽla kolofa ci tu kuatisa

Oku kũlĩha ocili catiamẽla kolofa, ci tu kuatisa oku yuvula oku kuatela usumba vana va fa. Tanga Ukundi 9:10, noke konomuisa epulilpo li kuãimo:

Ava va fa va pondola hẽ oku tu linga cimue cĩvi?

Ocili Cembimbiliya ci tu yovolavo kelongiso liokuti, tu sukila oku likutililako vana va fa ale oku va fendela. Tanga Isaya 8:19 kuenda Esituluilo 4:11, noke konomuisa epulilo li kuãimo:

O sima okuti Yehova o tenda ndati omunu umue o fendela ale o sanda ekuatiso lia umue wa fa?

Alitalatu: Oviholo vi kuete elitokeko lefendelo lia vakukululu. 1. Ulume umue wa kekama kolongolo kuenda olikutilila kovaso yewe lieyambo limue loku lumba okulia. 2. Alume vatatu va wala uwalo wovinganji kuenda va piluka. 3. Omanu va kasi oku enda okuti, kovipala viavo va kapako olondimbukiso viakõlõkõlo kuenda vambata oviteka viakõlõkõlo Keteke Lioku Sambiliya Omanu va fa. — Oku kũlĩha ocili catiamẽla kolofa, ci tu yovola kovihilahila vi sumuisa Yehova

5. Tu lembelekiwa poku kũlĩha ocili catiamẽla kolofa

Omanu valua va longisiwa okuti, eci va fa, va ka talisiwa ohali omo liovina vĩvi va linga. Pole, ci tu kavuluisa oku kũlĩha okuti, lomue o tala ohali noke yoku fa—ndaño muẽle vana va linga ovina vĩvi. Tanga Va Roma 6:7, noke konomuisa epulilo li kuãimo:

Embimbiliya li popia okuti, eci omunu umue a fa, Suku ka tendi vali akandu aye. Kuenje o sima okuti omunu wa fa o kasi oku tala ohali omo liakandu a linga kosimbu?

Osimbu tu kũlĩha Yehova, tu limbuka okuti, eye lalimue eteke a kangisa vana va fa. Tanga Esinumuĩlo 32:4 kuenda 1 Yoano 4:8, noke konomuisa apulilo a kuãimo:

Suku una o kuete ovituwa via tukuiwa vovinimbu evi, ecelela hẽ okuti ava va fa va kangisiwa?
Oku kũlĩha ocili catiamẽla kolofa ci ku lembeleka? Momo lie?

OMANU VAMUE VA POPIA VATI: “Ñuete usumba weci ci ka pita lame eci ndi fa.”