Kuamẽlela Okuendela Vonjila ya Yehova

“Imba ovaso Yehova, endela vonjila yaye, kuenje o ku kemalisa hupiñala ofeka.”−OSAMO 37:34.

1, 2. Kusoma Daviti okuendela vonjila ya Yehova kuakongelele nye, kuenda kokuetu oloneke vilo kukongela nye?

“JIMBE onumbi yonjila nda posokela oku endelamo, momo nda tiamisa utima wange kokuove.” (Osamo 143:8) Akristão oloneke vilo vasiata okupitulula lutima wavo wosi olondaka evi via Soma Daviti. Ovo vayongola muẽle ocili okusanjuisa Yehova kuenda okuendela vonjila yaye. Eci cikongela nye? Ku Daviti, eci calombolokele oku lava ovihandeleko via Suku. Okuti muakongelele okukolela Yehova loku u fendela lesunguluko, kuenda okuyuvula vakualofeka lolosuku viavo. Ka Kristão, okuendela vonjila ya Yehova mukongela vali calua.

² Cimue cakongeliwa vokuendela vonjila ya Yehova oloneke vilo okukolela kocilumba cocisembi ca Yesu Kristu, loku u limbuka okuti eye ‘onjila, haeye ocili, haeye omuenyo.’ (Yoano 3:16; 14:6; Va Heveru 5:9) Eci cilombolokavo okutẽlisa “ocihandeleko ca Kristu,” cikongela okulisola pokati, capiãla enene okusola vamanji a Yesu olombuavekua. (Va Galatia 6:2; Mateo 25:34–40) Ava vakasi okuendela vonjila ya Yehova vasole ovihandeleko viaye. (Osamo 119:97; Olosapo 4:5, 6) Ovo vasole calua esumuluho liavo liokukuata onepa kupange wa Kristão. (Va Kolosai 4:17; 2 Timoteo 4:5) Ohutililo onepa yimue valinganga olonjanja viosi vomuenyo wavo. (Va Roma 12:12) Kuenje ‘valavulula lutate ndomo vanda oco okuti vandaenda nda vakualondunge ha ndavako va kamba olondunge.’ (Va Efeso 5:15) Ovo ka va tolokala ukuasi wavo wespiritu lovikuata ale loloñeyi vietimba vikuete ño esilivilo liokatembo kamue katito. (Mateo 6:19, 20; 1 Yoano 2:15–17) Okulekisa esunguluko ku Yehova kuenda okuamamako loku u kolela cikuete esilivilo liocili. (2 Va Korindo 1:9; 10:5; Va Efeso 4:24) Momo lie? Momo ekalo lietu lialisoka leli lia va Isareli yosimbu.

Cisukila Esunguluko Kuenda Ekolelo

3. Momo lie esunguluko, ekolelo, kuenda okutava ku Yehova vikatukuatisila okutuihinya vonjila yaye?

³ Va Isareli vakala ofeka yimue yitito, vañualiwile lanyali vanda loku fendela olosuku viesanda okuti vovipito viavo vanda lokukongelamo ovombondo a piãla. (1 Asapulo 16:26) Va Isareli ovo lika va vumbaile Suku yocili kamõleha lovaso, Yehova, kuenje eye wavahandelekele oco vakuame ovituwa viavelapo kuwa. (Esinumuilo 6:4) Cimuamue haico oloneke vilo omanu vamue ño vatito vafendela Yehova, kuenje vakasi voluali lumue okuti cipitãhala olohuluwa violohuluwa epandu komanu vakasi okukuama ovihandeleko latavo alitepa leli liavo. Nda tukasi pokati kolohulukãi evi vitito, te tua lunguka oco katu ka kokiwili konjila yivi. Ndamupi? Lokulekisa esunguluko ku Yehova Suku, lekolelo kokuaye, kuenda okukolela okuti okatẽlisa olohuminyo viaye viosi cikatukuatisa. (Va Heveru 11:6) Eci cikatukuatisavo oku yuvula okukapa ekolelo lietu kovina vakualuali vakolela.−Olosapo 20:22; 1 Timoteo 6:17.

4. Momo lie omanu vakualuali ‘olondonge viavo vikasilili vowelema’?

⁴ Upostolo Paulu walekisa ndomo Akristão vasukila okulitepa la vakualuali eci asoneha hati: “Cimue ndu sapuili longusu, kuenje vonduko ya Ñala ndi cimbila uvangi, ceci, siti, Ka ci tava vali ene oku lingainga nda vakualofeka vakuavo va kasi luveke wovovitima. Olondunge viavo vi kasi vowelema. Omo ovitima viavo via siva, oco va kasilili lonumbi, kuenje okukala kuavo kua litepa lomuenyo wa Suku.” (Va Efeso 4:17, 18) Yesu eye “ocinyi cocili.” (Yoano 1:9) Vosi vo likala ale valinga hati vokolela pole kavapokola ‘kocihandeleko ca Kristu,’ ‘olondunge viavo vi kasi vowelema.’ Kupãla lokuendela vonjila ya Yehova, ‘okukala kuavo kua litepa lomuenyo wa Suku. Ndaño okuti ovo vasima okuti vakualondunge violuali, puãi ‘va kasi vonumbi’ kueci catiamẽla ku kulihiso utuala komuenyo, wa Yehova Suku lowu wa Yesu Kristu.−Yoano 17:3; 1 Va Korindo 3:19.

5. Nda okuti ocinyi cocili haimo cikasilili okutaimila voluali, momo lie valua ovitima viavo via sivila?

⁵ Pole, ocinyi cocili cikasi oku tamila voluali! (Osamo 43:3; Va Filipoi 2:15) ‘Olondunge viocili vikasi oku vilakayaila volokololo.’ (Olosapo 1:20) Unyamo wapita Olombangi via Yehova viapesela eci cipitãhala ohuluwa yalivala kokusapuila ava valisungue lavo eci catiamẽla ku Yehova Suku kuenda ku Yesu Kristu. Cisoka ocita cohulukãi catambuluiya ciwa. Anga hẽ, citukomõhisa omo okuti valua vakuavo kava tavele? Sio. Momo Paulu walombolola hati ‘ovitima viavo via siva.’ Vamue ovitima viavo via siva omo kavasole okuliketisa ale vakuakusola olombongo. Vakuavo vasiata oku tianguluiwa letavo liesanda ale lovisimilo viasiata calua oloneke vilo, viokuamamako voluali. Olohali viapiãla vomuenyo, viasiata okukokela valua okuimba onyima ku Suku. Vakuavo valikala oku kuama ovihandeleko viasunguluka via Yehova. (Yoano 3:20) Citava okuti utima wa umue okasi okuendela vonjila ya Yehova u siva kueci catiamẽla kovina evi?

6, 7. Ndaño okuti vakala afendeli va Yehova Suku, onjanja yipi va Isareli valueyele, kuenda momo lie?

⁶ Eci oco capita la va Isareli yosimbu, ndomo Paulu alekisa. Eye wasoneha hati: “Ovina evi via tu lingila ndalungulo okuti ka tu liveli eviho ndeci ovo va livelele. Ko ka lingi vakuakufendela oviteka ndavamue pokati kavo, ndeci ca sonehiwa okuti, omanu va tumala oku lia loku nyua kuenje va katuka oku piluka. Ka tu ka lingi ukahonga ndeci vamue pokati kavo va linga, kuenje eteke liongongo kua fa akui avali kolohulukãi kolohulukãi vitatu!”-1 Va Korindo 10:6–8.

⁷ Paulu wakala lokutukula tete otembo eci va Isareli vafendela ociñumañuma culu congombe vemi Liomunda Sinai. (Etundilo 32:5, 6) Eci cakala okusinila ocihandeleko ca Suku ovo muẽle valikuminyile okucikuama olosemana vimue ño konyima. (Etundilo 20:4–6; 24:3) Noke, Paulu watukula otembo eci va Isareli va kekamele kolongolo okufendela Baale lomãla vakãi va va Moavi. (Atendelo 25:1–9) Efendelo liaco liociñumañuma congombe lianda lokulingiwa ‘lolo miluko’ viumbondo wapiãla.a Kefendelo lia Baale vanda lokuvandekako ukahonga. (Esituluilo 2:14) Momo lie va Isareli valingilile ekandu eli? Momo ovo vaecelela okuti ovitima viavo ‘vilivela eviho’−ndaño muẽle ovina viaco viakongelele okufendela oviteka ale ovilinga vikuavo ka via sungulukile vianda loku vandekiwako.

8. Nye tusukilila okulilongisila kueci capita la va Isareli?

⁸ Paulu walekisa okuti te tuopako ongangu kovipito evi. Tupako ongangu ya nye? Catila calua okuti umue Ukristão okekama kolongolo okufendela ociñumañuma culu congombe ale okufenela o suku ya va Moavi yosimbu. Pole nye hẽ cipopiwa catiamẽla kukahonga ale kovituwa vikuavo viumbondo? Ovina evi viasiata calua oloneke vilo, kuenje nda tuacelela okuti olonjongole viovina viaco vikula vutima wetu, ovio vikalipindikisa pokati ketu la Yehova. Esulilo liaco likakala limuamue ndu okuti tuafendela oviteka−okulitepa ku Suku. (Cisokisa la Va Kolosai 3:5; Va Filipoi 3:19.) Omo liaco, Paulu wasulako londaka yaye yatiamẽla kovipito evi lokulungula vakuetavo lavakuavo hati: “Tili efendelo lioviteka.”−1 Va Korindo 10:14.

Ekuatiso Liokuendela Vonjila ya Suku

9. (a) Ekuatiso lipi tuasiata okutambula oco tuamameko okuendela vonjila ya Yehova? (b) Vonepa yipi tuyevela ‘ondaka yitundilila konyima yetu’?

⁹ Nda okuti tuyongola muẽle okuamamako lepandi okuendela vonjila ya Yehova, katu ka kamba ekuatiso. Isaya wasapula ocitumasuku citi: “Eci vu tiamẽla kondio pamue kepili oco ovatui enen a yeva ondaka yi tundilila konyima yene, yiti, Enjui, eyi oyo onjila, endelimo.” (Isaya 30:21) Ndamupi ‘ovatui etu’ ayeva ‘ondaka yi tundilila konyima yetu’? Lomue oloneke vilo oyeva muẽle ondaka yimue ale esapulo limue litunda ku Suku. “Ondaka” yi yeviwa, yiya kokuetu vosi lonjila yimuamue. Catete haico cavelapo, oyo yi yilila Vovisonehua viafuimilua, Embimbiliya, okuti likuete ovisimilo via Suku kuenda muasonehiwa ovilinga viaye lomanu. Omo okuti eteke leteke tuasiata okulekisiwa ovina viñi viñi vitundilila kuava okuti “okukala kuavo kua litepa lomuenyo wa Suku,” oco tukuate uhayele uwa wespiritu, tusukila okutanga Embimbiliya kuenda okusokolola olondaka vialio olonjanja viosi. Eci cikatukuatisa okuyuvula ‘ovina viaño’ oco ‘tuangiliyiwile ovopange osi awa.’ (Ovilinga 14:14, 15; 2 Timoteo 3:16, 17) Eci cikatupamisa, lokutukolisa, kuenda okutukuatisa okuti ‘onjila yetu yi sumuluha.’ (Yehosua 1:7, 8) Kuendavo, Ondaka ya Yehova yituvetiya hati: “ Cilo, amãla vange, njeveleli. Va sumuluha ava va lava lava olonjila viange. Tavi kalungulo ho lunguki, ko ka a likali.”−Olosapo 8:32, 33.

10. Onepa yipi yavali yokuyeva ‘ondaka yitundilila konyima yetu’?

¹⁰ ‘Ondaka yi tundilila konyima yetu’ yi yililavo pokati ku “ukuenje wa kolelua haeye wa lunguka,” wasiata okueca “okulia . . . kotembo ya tukuiwa.” (Mateo 24:45–47) Yimue onjila yokueca okulia kuaco, okusandekiwa kualivulu alombolola Embimbiliya, kuenje anyamo asulako ndeti okulia kuaco kuasiata okupiãla. Ndeci pokati korevista Utala Wondavululi, elomboloko lietu liatiamẽla kovitumasuku liasokiyiwa. Lorevista eyi, tua kua ku vetiyiwa oco tupandikise vupange wokukunda kuenda wokulongisa omanu oco valinge olondonge, ndaño lesepulo liapiãla, tua kua ku kuatisiwa oco tu yuvule olonjanjo kuenda okuamisako okukuata ovituwa viwa via Kristão. Tusole calua okulia kuaco kuasiata okueciwa kotembo yatukuiwa!

11. Lombolola onepa yatatu etu tupondola okuyeva ‘ondaka yitundilila konyima yetu’?

¹¹ Ukuenje wakolelua haeye wa lunguka layevo otuiha okulia pokati kolohongele vietu violonjanja viosi. Viaco evi vikongela olohongele viekongelo, olohongele vimbo viasiata okulingiwa olonjanja vivali vunyamo, kuenda olohongele vinenepo vali viofeka. Helie Ukristão wocili okuti kaci esilivilo kolohongele viaco? Ovio vituiha ekuatiso liocili liokuendela vonjila ya Yehova. Omo okuti valua vasiata okupesila otembo yalua kupange ale kosikola pokati kavana okuti havakuetavo liavoko, okuliongoluila pamosi la Kristão vakuavo olonjanja viosi cipopela omuenyo. Olohongele vituiha epuluvi ‘lioku livetiya pokati oku kala locisola lovilinga viwa.’ (Va Heveru 10:24) Etu tusole calua vamanjetu kuenje tusolevo okuliongoluila pamosi lavo.−Osamo 133:1.

12. Epandi lipi Olombangi via Yehova vikuete, kuenda ndamupi ovo valekisa epandi liaco koloneke viapita ndopo?

¹² Omo liokupamisiwa lokulia kuaco kuespiritu, cimue cisoka olohulukãi epandu komanu etali vakasi okuendela vonjila ya Yehova, kuenda olohulukãi vikuavo vikasi okulilongisa Embimbiliya oco vikulihe ndomo vapondola okucilingavo. Anga hẽ ovo vasumua ale vatepuluka kepandi omo okuti ovo vatito calua okuvasokisa lolohuluwa viomanu vikasi kulo kilu lieve? Lalimue eteke! Ovo vayongola muẽle okuamamako lepandi okuyevelela ‘ondaka yi tundilila konyima yavo,’ kuenda okulinga ocipango ca Yehova lesunguluko. Lokulekisa kowiñi epandi liavo, vokuenda kunyamo wo 1998/99 Kohongele Yofeka kuenda Yokolofeka Vikuavo yatukuiwa okuti “Onjila ya Suku Yitukuatisa Komuenyo,” olonjeveleli viakalako viakuminya lutima wavo wosi kueci cataviwa. Vikuãiko ndeti ovio olondaka vieci cataviwa.

Ceci Cataviwa

13, 14. Olombangi via Yehova visokisa ndati ekalo lioluali?

¹³ “Etu Tulombangi via Yehova tualiongoluila kulo Kohongele yikuete osapi yiti “Onjila ya Suku Yitukuatisa Komuenyo,” tuatava lutima wetu wosi okuti onjila ya Suku oyo yavelapo komuenyo. Pole, tualimbuka okuti, omanu valua oloneke vilo vakuete ovisimilo vialitepa viatiamẽla kondaka eyi. Ocisoko comanu casiata okuseteka ovisimilo viñi viñi, violoño levi viatavo vasima okuti ovio vinena omuenyo uwa. Pole okukulihisa ciwa espulo liomanu kuenda ekalo lioluali cilo, lieca uvanga wocili condaka ya Suku yasonehiwa kelivulu lia Yeremiya 10:23: ‘Omunu . . . ka tẽla eye muẽle oku suñamisa okuenda kuaye.’

¹⁴ ”Oloneke viosi tuasiata okumõla uvangi wulekisa ocili colondaka evi. Omanu valua okuti vasepula onjila ya Suku yitukuatisa komuenyo. Ovo vasiata okukuama eci valimbuka okuti ciwa kokuavo. Esulilo liaco lisiokukala liesumuo−ndeci enyõleha liepata, lokusia omãla okuti kavakuata elongiso; okusandiliya ño enene ukuasi, kuenje cisulila vokupumba ale vesumuo; eko kuenda ungangala kaukuete elomboloko. Wasiata okutalisa ohali omanu vakahandangalala; olonepele viakova lovoyaki, asiata okuponda etendelelo liakahandangalala liovimuenyo viomanu; okutuihinya kukahonga, kuasiata okunena ovoveyi añi añi asambuka. Evi vimueño handi vitito pokati kovitangi viatatama viasiata okulipindikisa vonjila yomanu yokusanda esanju, lombembua yasuapo.

15, 16. Catiamẽla konjila ya Suku yitukuatisa komuenyo, epandi lipi lialekisiwa kueci cataviwa?

¹⁵ “Omo liolohali viakahandangalala omanu vasiata okupita lavio kuenda omo okuti ‘eteke linene liovita via Suku Tõlo,’ litukuiwa Harmagedo, (Esituluilo 16:14, 16) likasi ocipepi, etu Tulombangi via Yehova, tuanõlapo okulinga ndoco:

¹⁶ “Catete: Tualisokisa okuti tumanu va Yehova Suku, momo omunu lomunu pokati ketu walitumbika kokuaye lutima waye wosi, kuenda tuka kuamẽlela okukuata ekolelo limue kalipongoloka keliangiliyo liocilumba cocisembi, lialingiwa la Yehova pokutuma Omõlaye, Yesu Kristu. Tuanõlapo okuendela vonjila ya Suku yitukuatisa komuenyo, kuenda oku kala Olombangi viaye lokupokola kusoma waye wukasi okuviliwa la Yesu Kristu.

17, 18. Olombangi via Yehova vikamamako okulekisa ekalo lipi liatiamẽla kovihandeleko viavelapo kuenda kelitokeko Liukristão lavamanji?

¹⁷ “Cavali: Tukamamako lokukuama ovihandeleko viavelapo viekalo kuenda viespiritu visangiwa Vembimbiliya. Tuanõlapo okuti katuendi vali ndomo vakualofeka vakasi okuenda luveke vovitima viavo. (Va Efeso 4:17–19) Tuka kuamẽlela okukala omanu vayela kovaso a Yehova okuti katulitengi veliño lioluali lulo.−Tiago 1:27.

¹⁸ “Catatu: Tukamamako lelitokeko lietu Liukristão lavamanji koluali luosi ndomo Embimbiliya lituma. Etu Tuakristão tuka tamãlãla okuyuvula ovilinga via vakualofeka, okuti katulitengi vonya ale volonepele viakova, violofeka ale viovambo.

19, 20. (a) Olonjali vina okuti Akristão vakalinga nye? (b) Ndamupi Akristão vosi vocili vakamamako oku li limbukisa okuti olondonge via Kristu?

¹⁹ “Cakuãla: Etu tukasi palo okuti tulonjali, tukalongisa onjila ya Suku komãla vetu. Tukaeca ongangu yiwa yatiamẽla komuenyo Wukristão, ndeci kokutanga Embimbiliya olonjanja viosi, kokulilongisila kumosi lepata kuenda kokutalavaya lutima wetu wosi kovopange vekongelo kuenda kupange wokukunda.

²⁰ “Catãlo: Vosi yetu tukalikolisilako okukuata ovituwa visivaya Suku ndomo vialekisiwa Lusovoli wetu kuenda tukalikolisilako okusetukula ekalo liaye lovilinga viaye, ndeci Yesu alinga. (Va Efeso 5:1) Tukalikolisilako okuti ovina vietu viosi vilingiwa locisola, oco tulimbukiwe okuti tulondonge vai Kristu.−Yoano 13:35.

21-23. Olombangi via Yehova vikamamako okulinga nye, kuenda ovo vakolela nye?

²¹ “Cepandu: Tukakuamelela okukunda olondaka viwa Viusoma wa Suku, kuenda okulinga olondonge lokuvilongisa okuendela vonjila ya Suku yitukuatisa komuenyo, loku va vetiya okutambula vali elilongiso kolohongele viekongelo.−Mateo 24:14; 28:19, 20; Va Heveru 10:24, 25.

²² “Cepandu vali: Omo tukasilili omunu lomunu kuenda omo tukasilili ocisoko cetavo, tukatuihinya okukapa ocipango ca Suku kovaso vomuenyo wetu. Omo liokukuama Ondaka yaye, Embimbiliya, ndusongui wetu, katukapambukila kondio ndaño kepili. Ndoco tukalekisa uvangi wokuti onjila ya Suku yavelapo calua okuyisokisa lolonjila violuali. Tuanõla muẽle okukuama onjila ya Suku yitukuatisa komuenyo−kuenda okupandikisa lesunguluko, otembo yilo kuenda toke kotembo yenda ño hu!

²³ “Tua tava konavo eyi omo okuti tuakolela kolohuminyo via Yehova viocisola, viokuti u olingainga ocipango ca Suku okala oloneke kavipui. Tua tava konavo eyi omo tualimbuka okuti okukuama ovihandeleko, alungulo lolonumbi Viembimbiliya oco cavelapo komuenyo oloneke vilo kuenda cangiliya ociseveto ciwa cotembo yikeya kovaso, oco tutamãlãle okuendela vonjila yomuenyo wocili. (1 Timoteo 6:19; 2 Timoteo 4:7b, 8) Cavelapo vali handi, tuatava konavo eyi omo okuti tusole Yehova Suku lutima wetu wosi, lomuenyo wetu, lovisimilo vietu viosi kuenda longusu yetu yosti!

24, 25. Etambululo kueci cataviwa liakala lipi, kuenda vana vakasi okuendela vonjila ya Yehova vanõlapo okulinga nye?

²⁴ “Vosi vakasi kohongele yilo Yofeka okuti vatava kolondaka evi vapopie hati OCO!”

²⁵ Ovita viovila voluali luosi vialuluma eci vosi vohongele vatambulula lolukandi hati, “OCO!” Olombangi via Yehova kavikuete atãtãhai lavamue vokuti ovo vaka kuamẽlela okuendela vonjila ya Yehova. Ovo vakolela Yehova kuenda vakolelavo okuti okatẽlisa olohuminyo viaye viosi. Ovo vakamamako lokupokola kokuaye, ndaño muẽle kueya ohali. Ovo vakamamako lepandi okulinga ocipango caye.

“Suku Okasi Letu”

26. Vekalo lipi liesumuluho vana vakasi okuendela vonjila ya Yehova vakasi?

²⁶ Olombangi via Yehova vi valuka elungulo liukualosamo liti: “Imba ovaso Yehova, endela vonjila yaye, kuenje o ku kemalisa hu piñala ofeka.” (Osamo 37:34) Ovo ka va valako olondaka vievetiyo via Paulu viti: “Nda Suku o kasi letu helie o tu katukila? U ka kuatelele Omõlaye ohenda, puãi wo tu wavela etu vosi, ka tu ihilevo hẽ ovina viosi kumue laye?” (Va Roma 8:31, 32) Oco muẽle nda tuakuamẽlela okuendela vonjila ya Yehova, eye okatuiha “ovina viosi ha tu sanjuka lavio.” (1 Timoteo 6:17) Kakuli ocitumãlo lacimue ciwa cikasiko okuti−okuendela vonjila ya Yehova, kumosi lavamanjetu alume lakãi vasoliwe cisule. La Yehova okasi konele yetu, tukakuamẽlela lepandi okukalamo kuenda okupanamala toke kesulilo, lekolelo liokuti kotembo yaye yasokiyiwa, tukamola okutẽlisiwa kuolohuminyo viaye viosi viakambako.−Tito 1:2.

Handi Ocivaluka?

◻ Nye cisukiliwa oco Ukristão aendele vonjila ya Yehova?

◻ Momo lie tusukilile okukolela Yehova kuenda okupokola kokuaye?

◻ Ekuatiso lipi likasiko oco litukuatise okuendela vonjila ya Yehova?

◻ Tukula vimue viavelapo pokati kolondaka viataviwa Kohongele viakala losapi yiti “Onjila ya Suku Yitukuatisa Komuenyo.”

[Elitalatu yemẽla 18]

Kohongele Yofeka kuenda Yokolofeka Vikuavo yakala losapi yiti “Onjila ya Suku Yitukuatisa Komuenyo” kuataviwa ohuminyo yimue yikuete esilivilo liocili