Esulilo Liovina Vĩvi Li Kasi Ocipepi!

SUKU wa tu ĩha Ondaka yaye, yi lombolola esunga lieci omanu va lingila ovina vĩvi. Eye wa tu ĩhavo elianjo lioku linõlela eci tu yongola oku linga kuenda epondolo lioku lekisa esuluviko li tu kuatisa oku yuvula oku linga ovina ka via sungulukile. (Esinumuĩlo 30:15, 16, 19) Omo liaco, tu sukila oku kũlĩhĩsa olonjongole vĩvi vi kasi vutima wetu kuenda oku sandiliya onjila yoku vi yuvula. Oku yuvula oku linga ovina vĩvi, ci tu kuatisa oku kuata esanju kumue la vakuetu.—Osamo 1:1.

Ndaño tu likolisilako oku yuvula oku linga ovina vĩvi, pole, oluali lu kasi oku amamako oku vĩhisiwa lovilinga vĩvi viomanu. Embimbiliya li tu lungula hati: “Limbuka eci okuti, koloneke via sulako kuiya otembo yohali.” Poku lekisa esunga lieci ku kasilili “ohali” yalua, olio lia amisako hati: “Momo omanu va linga vakuakulisola, vakuakusola olombongo, vakuakulipandiya, vakueyengu, vakuakatombangunja, haivo va siñaila olonjali viavo, vakualutukãi, ka va kuete efendelo, ka va kuete ocikembe la vangadiavo. Va linga vakuamanya, vakualundi, haivo ka va tẽla oku likandangiya, va linga olongangala, ka va sole eci ciwa, haivo olomakuli, vakuacipango, vakuepela, vakuakusola ca lua esanju, Suku ci sule. Va limolehisa nda vakuekolelo lioku kolela Suku, puãi va likala unene walio. Oco litepa lavo.”—2 Timoteo 3:1-5.

Citava okuti vocitumasuku ca tukuiwa ndeti, wa limbukamo ondaka ya popia hati, “koloneke via sulako.” Ondaka yaco yi lomboloka nye kokuove? Ndomo tua ci kũlĩha, ondaka ‘oloneke via sulako,’ yi lomboloka okuti kuli cimue ci kasi oku pitila kesulilo. Ocina caco nye? Kũlĩhĩsa eci Suku a likuminya Vondaka yaye.

Omanu vãvi va ka kunduiwa.

“Okasimbu kaño handi kuenje ondingaĩvi ka yi kalapo. Ndaño o vanjiliya pomangu yaye lutate, eye kepo. Ambombe puãi va piñala ofeka, kuenje va sanjukila okusalala kualua.”—OSAMO 37:10, 11.

“Yehova o silamela vosi vo sole, olondingaĩvi puãi, o vi nyõla.”—OSAMO 145:20.

Ohali ka yika kalako vali.

“O popela osuke eci yi vilikiya, ndaño ohukui lu ka kuete oñuatisi. O popela ovimuenyo viavio kundiandia lo kungangala.”—OSAMO 72:12, 14.

“Eteke limue ovina via lulikiwa vi panduluiwa kupika wenyõleho ha vi moli eyovo liulamba womãla va Suku.”—VA ROMA 8:21.

Olonjongole viosi viomanu vi ka tẽlisiwa.

“Vosi va tumãla, omunu omunu vemi liuyuva waye, pamue vemi liukuyu waye, kuenje lomue o va lingisa usumba.”—MIKA 4:4.

“Va tunga olonjo kuenje va kalamo; va kũla oviumbo viayuva kuenje va lia epako liavio. Ka va tungi okuti umue wiñi o kalamo. Ka va kũli okuti umue wiñi o liako. Momo oloneke viomanu vange vi linga ndoloneke vioviti, lava va nõlĩwa lame va lialia ño-o kupange wovaka avo.”—ISAYA 65:21, 22.

Ku ka kala lika esunga.

“Suku hẽ, ka tetuluila lesunga vaye va noliwa, ava vo vilikaiya utanya luteke? . . . Mopia lene siti, O va tetuluila lombili.”—LUKA 18:7, 8.

“Yehova o sole esunga, ka yanduluka olosandu viaye. Vakuesunga va tatiwa oloneke viosi.”—OSAMO 37:28.

Ocipululu ci ka piñanyiwa lesunguluko.

“Olonungi viovoluali vi lilongisa esunga.”—ISAYA 26:9.

“Mekonda liohuminyo yaye, tu lavoka ilu liokaliye loluali luokaliye omu mu kala esunga.”—2 PETULU 3:13.

Cilo Omanu va Kasi Ale Oku Pongoluiwa

Vosi yetu tua sanjukila olohuminyo via tukuiwa ndeti. Oco hẽ, nye ci tu kuatisa oku kolela okuti ovina viaco vi ka tẽlisiwa? Kuli uvangi u lekisa okuti olohuminyo via Suku, vi ka tẽlisiwa. Upi uvangi waco? Uvangi waco u limbukiwila kapongoloko olohuluwa viomanu voluali va kasi oku linga koloneke vilo ndeci: oku siapo ocipululu, ukahonga, ungangala, lovituwa vikuavo vĩvi, kuenje va kasi oku lilongisa oku kala vakuacili, vakuambembua, haivo vakuahenda. Ci pitahãla olohulukãi epanduvali Kolombangi via Yehova voluali, va kuete elitokeko liwa, kuenje va yula olonepele viakova, viapata, violofeka, haivo ka va litengi vopulitika. Va yulavo olonepele viatiamẽla kovokuasi, ana a siata oku nena esuvu, ungangala, loku pesela osonde yomanu valua.a Apongoloko aco, a pamisa ekolelo lietu liokuti olohuminyo via Suku vi ka tẽlisiwa muẽle voluali luosi.

Nye ca siata oku vetiya omanu oku linga apongoloko aco? Etambululo liaco li sangiwa vocitumasuku cikuavo Cembimbiliya ca sonehiwa luprofeto Isaya. Eye wa soneha hati:

“Ombinji yi tunga pamuamue lomõla omeme, kuenda ongue yi lala lala lomõla ohombo; onãle leyove liohosi vi endela pamuamue, kuenje okamõla ka vi songuila. . . . [Ohosi] yi lia lia owangu ndongombe. Ocisembe ci mangalela kututa wa salili; lomõla wa sumũha imba okuokuo veleva liondala. Ka va lingi cĩvi ndaño oku nyõla komunda yange yosi yi kola, momo kilu lieve ku yuka ukũlĩhĩso wa Yehova ndeci ovava eyuka vokalunga.”—Isaya 11:6-9.

Anga hẽ, ocitumasuku eci ci lekisa lika ombembua yi ka kala pokati komanu lovinyama? Sio, kuli ovina vialua vi ka lingiwa. Kũlĩhĩsa okuti, onepa ya sulako yocinimbu caco ya tukula eci ci ka nena apongoloko aco. Oyo ya popia hati: “Kilu lieve ku yuka ukũlĩhĩso wa Yehova.” Anga hẽ, ukũlĩhĩso wa Suku, u pondolavo oku pongolola ovituwa viovinyama? Sio. Owo, u pongolola lika ovituwa viomanu! Ocitumasuku eci, ci lekisa okuti vana va kuatele ovituwa vĩvi ndevi viovinyama, va kasi oku siapo ovituwa viaco kuenje va likolisilako oku kuama ongangu ya Kristu omo lioku lilongisa Embimbiliya loku pokola kolonumbi vialio.

Kũlĩhĩsa ulandu wa Petulu.b Eci a iñila vocisoko cimue colongangala, wa simĩle okuti wa kala oku yakela esunga. Noke yoku pindisiwa vocisoko caco, wa tumiwa oku ka lundula onjo yimue yolosipayu. Osimbu a kala oku lipongiya, wa kuatiwa kuenje wa kapiwa vokayike. Petulu wa kala vokayike ci soka 18 kolosãi, pole wa amamako oku kala ongangala. Vokuenda kuotembo yaco, ukãi waye wa fetika oku lilongisa Embimbiliya Lolombangi Via Yehova. Noke yoku tunda vokayike, Petulu wa fetikavo oku lilongisa Embimbiliya kuenje ovina a lilongisa viatiamẽla ku Yehova Suku, vio vetiya oku pongolola ovituwa viaye, kuenda ovimãho viomuenyo waye. Eye wa popia hati: “Ndeca olopandu ku Yehova omo okuti vokuenda kuotembo nda kala ongangala, sia pondele omunu. Cilo ndi talavaya losipata yespiritu lia Suku okuti Embimbiliya, oco ndi kundile omanu esapulo liolondaka viwa Viusoma okuti va kuata ombembua yocili, kuenda esunga.” Noke Petulu wa endele konjo yina yolosipayu a tumiwile oku ka nyola, kuenje wa va kundila esapulo liombembua kuenda elavoko lioku kala voluali lumue ka mu ka kala vali ungangala.

Ondaka ya Suku yi kuete unene woku kuatisa omanu oku pongolola ovituwa viavo, kuenda tu pondola oku kolela kohuminyo ya Suku yokuti ovina vĩvi vi kasi voluali, ndopo vi sulila. Omanu ka va ka linga vali ovina vĩvi, pole, va ka pongoloka loku kala vakuesunga otembo ka yi pui. Noke Yehova o ka kundula Satana Eliapu ono yovina viosi vĩvi, haeye wa siata oku yapula omanu lunene waye. Embimbiliya li popia hati: ‘Oluali luosi lu kasi povaka Eliapu.’ (1 Yoano 5:19) Pole, ndopo o ka nyõliwa. Vana ka va yongola oku siapo ovituwa vĩvi, va ka nyõliwavo. Hesanjukuolio tu ka kuata omo liasumũlũho aco!

Nye omunu a sukila oku linga oco aka kuate asumũlũho aco? Ivaluka okuti “ukũlĩhĩso wa Yehova,” u kasi oku vetiya omanu oku linga apongoloko komuenyo kuenda kovaso yoloneke u ka pongolola ekalo lioluali luosi. Nda wa kuata ukũlĩhĩso Wembimbiliya loku pokola kolonumbi vialio, ndeci Petulu a linga, o ka tambula esumũlũho lioku kala voluali lumue mu ka “kala esunga.” (2 Petulu 3:13) Omo liaco, tu ku vetiya oku likolisilako oku kuata ukũlĩhĩso watiamẽla ku Suku kuenda ku Yesu Kristu, una u ku tuala komuenyo ko pui.—Yoano 17:3.

[Atosi pombuelo yamẽla]

[Etosi lia velapo kemẽla 9]

Ove, o pondola oku kuata elavoko lioku kala voluali mu ka “kala esunga.”—2 PETULU 3:13