OCIPAMA 03
Ove hẽ o Pondola Oku Kolela Kembimbiliya?
Embimbiliya lia likuminya ovina vialua kuenda li eca alungulo alua. Citava okuti, o lekisa onjongole yoku kũlĩha ovina olio li longisa, pole, pamue o lekisavo utate. O pondola hẽ oku kolela kolohuminyo kuenda kalungulo a tunda velivulu limue liosimbu? O pondola hẽ oku tava kueci Embimbiliya li popia catiamẽla koku sanjukila omuenyo cilo kuenda kovaso yoloneke? Olohuluwa viomanu, via ci linga. Tu ku laleka oku ci lingavo.
1. Embimbiliya elivulu limue liovolandu ocili ale wuhembi?
Embimbiliya li popia okuti, olio li kuete “olondaka viocili.” (Ukundi 12:10) Olio li lombolola ovolandu ocili atiamẽla komanu vana okuti va kalako muẽle. (Tanga Luka 1:3; 3:1, 2.) Valua vakuovolandu kuenda vakuakulembulula ovina viosimbu, va eca ovovangi atiamẽla kateke a sambiliyiwa, komanu, kovitumãlo kuenda kovolandu a sonehiwa Vembimbiliya.
2. Momo lie tu popela okuti Embimbiliya lia koleliwa ndaño okuti liosimbu?
Embimbiliya lia tukula ovina ka via kũlĩhĩwile kotembo via sonehiwa eci handi ka via pitile. Ndeci, olio li tukula eci catiamẽla kuloño. Ovina vialua olio li popia, ka via tendiwile lomanu valua okuti viocili, eci ovio via sonehiwa. Pole, uloño wo koloneke vilo, weca uvangi wokuti eci Embimbiliya li popia, ca suapo. Olio ‘olonjanja viosi lia koleliwa, cilo kuenda otembo ka yi pui.’—Olosamo 111:8.
3. Momo lie tu kolelela kueci Embimbiliya li popia catiamẽla kovaso yoloneke?
Vembimbiliya mu sangiwa ovitumasukua via tukula “ovina ka via lingiwile handi.” (Isaya 46:10) Olio lia lombolola ovolandu alua viovitumasuku osimbu ka via pitile. Olio lia lombololavo ekalo lioluali koloneke vilo lonjila yimue yi komõhisa. Vocipama cilo, tu ka konomuisa ovitumasuku vimue Viembimbiliya. Oku tẽlisiwa kuavio ku komõhisa!
LILONGISA ONDONGOSI
Konomuisa ndomo uloño wo koloneke vilo u litava leci Embimbiliya li popia kuenda kũlĩhĩsa ovitumasuku vimue Viembimbiliya vi komõhisa.
4. Uloño u likuata Lembimbiliya
Kosimbu omanu valua va tavele okuti, ongongo ya kunamẽla kocina cimue. Tala OVIDEO.
Limbuka olondaka vi sangiwa velivulu lia Yovi okuti, tunde eci via sonehiwa pa pita ale ci soka 3.500 kanyamo. Tanga Yovi 26:7, noke konomuisa epulilo li kuãimo:
Momo lie ci komõhisila ocisimĩlo cokuti, oku “ka kuli cimue” oko ongongo ya nyoñamisiwila?
Vokuenda kuovita vivali vianyamo a pita, ka kua kaile elomboloko lia suapo liatiamẽla koku ñuala ñuala kuovava vongongo. Omo liaco, limbuka eci Embimbiliya lia popele vokuenda kuolohuluwa vianyamo a pita. Tanga Yovi 36:27, 28, noke konomuisa apulilo a kuãimo:
Nye ci ku komõhisa vali catiamẽla kelomboluilo lioku ñuala ñuala kuovava vongongo?
Oku konomuisa ovisonehua wa mala oku tanga, ci pamisa hẽ ekolelo liove Kembimbiliya?
5. Embimbiliya lia tukula ovolandu a kuete esilivilo
Tanga Isaya 44:27–45:2, noke konomuisa epulilo li kuãimo:
Ovina vipi Embimbiliya lia popele vokuenda kueci ci soka 200 kanyamo osimbu o Bavulono ka ya nyõliwile?
Ovolandu a eca uvangi wokuti, Kuro Soma yo Persia kuenda olohoka viaye, va yula olupale luo Bavulono kunyamo wo 539 O.Y.b Ovo va papula ovava olui luna lua enda oku teyuila olupale. Noke lioku iñila volupale okuti olombundi via siwa upulule, ovo va yula olupale luaco okuti, ka va yakele. Ndaño pa pita ale ci pitahãla 2.500 kanyamo, o Bavulono yi kasi ovingululu toke etaili. Tala eci Embimbiliya lia popele.
Tanga Isaya 13:19, 20, noke konomuisa epulilo li kuãimo:
Ovina via pita lo Bavulono, vi eca ndati uvangi woku tẽlisiwa kuocitumasuku eci?
Ovingululu vio Bavulono ko Irake yo koloneke vilo
6. Embimbiliya lia tukuile ale ovina tu lete koloneke vilo
Embimbiliya li tukula otembo yetu okuti, ‘oloneke via sulako.’ (2 Timoteo 3:1) Kũlĩhĩsa eci Embimbiliya lia popia catiamẽla koloneke vilo.
Tanga Mateo 24:6, 7, noke konomuisa epulilo li kuãimo:
Ekalo lipi lĩvi Embimbiliya lia popia okuti olio lia laikele o ku kala koloneke via sulako?
Tanga 2 Timoteo 3:1-5, noke konomuisa apulilo a kuãimo:
Ovituwa vipi via siata komanu koloneke vilo via sulako Embimbiliya li tukula?
Pokati kovituwa evi, vipi wa siata oku mola?
OMANU VAMUE VA POPIA VATI: “Embimbiliya elivulu limue liovolandu wuhembi.”
Kocisimĩlo cove, nye ci ku vetiya oku tava okuti Embimbiliya lia koleliwa?
NYE WA LILONGISA?
Ulandu, uloño, ocitumasuku, viosi vi lekisa okuti ove o sukila oku kolela Kembimbiliya.
Oku Pitulula
Anga hẽ Embimbiliya elivulu limue liovolandu ocili ale wuhembi?
Kolonepa vipi uloño u litava Lembimbiliya?
O sima hẽ okuti Embimbiliya li popia eci catiamẽla kovaso yoloneke? Momo lie o simĩla ndoco?
OCO O KŨLĨHE OVINA VIKUAVO
Anga hẽ kuli cimue Embimbiliya li popia catiamẽla kuloño okuti haciliko?
“Anga hẽ Uloño u Likuata Lembimbiliya” (Ocipama ci sangiwa lika vo Internet)
Ovovangi api atiamẽlea “koloneke via sulako”?
“6 Kovitumasuku vi Kasi Oku Tẽlisiwa Koloneke Vilo” (Utala Wondavululi, 1.° wa Kupemba 2011)
Lilongisa ndomo ocitumasuku Cembimbiliya catiamẽla Kuviali wo Helasi ca tẽlisiwa.
Limbuka ndomo ovitumasuku Viembimbiliya via kuatisa ulume umue oku pongolola ovisimĩlo a kuatele catiamẽla Kembimbiliya.
“Kokuange ka Kua Kaile Suku” (Utala Wondavululi, No. 5 2017)
a Ovitumasuku, asapulo a tunda ku Suku atiamẽla kovina vi ka pita kovaso yoloneke.
b O.Y., ci lomboloka “Otembo Yale” kuenda K.K., ci lomboloka “Kotembo ya Kristu.”