Ocili Catiamẽla ku Isia, Komõla, Kuenda Kespiritu Sandu

OMANU va tava kondotilina ya suku umosi muvatatu va siata oku popia hati, Suku wa kongeliwa vomanu vatatu okuti: Isia, Omõla, kuenda Espiritu Sandu. Elongiso liaco li lekisa okuti katatu kavo va lisoka. Vosi vakuonene, kuenda ka va kuatele efetikilo. Ovo siata oku longisa okuti, Isia Suku, Omõla Suku, kuenda Espiritu Sandu laliovo Suku. Pole, vosi yavo va tokekisiwa vosuku yimosi.

Ava va tava kondotilina yaco, ka va tẽla oku yi lombolola ciwa. Pole, lopo va siata oku tava okuti elongiso liaco li sangiwa Vembimbiliya. Puãi, Vembimbiliya ka mu sangiwa ondaka yi popia hati suku umosi “Muvatatu.” Nda ondaka yaco ka yi sangiwamo, anga hẽ ocisimĩlo caco ci sangiwamo? Oco tu tambulule epulilo eli, tu konomuisi ovisonehua omanu va siata oku tukula hati vi vetiya elongiso lia suku umosi Muvatatu.

“NDAKA HAEYE SUKU”

Kelivulu lia Yoano 1:1 tu tangako hati: “Kefetikilo Ndaka wa kala ale, kuenje Ndaka wa kala kumue la Suku, Ndaka haeye Suku.” Upostolo Yoano, noke wa lekisa ciwa okuti “Ndaka” Yesu. (Yoano 1:14) Pole, omo okuti Ndaka o tukuiwa hati Suku, vamue va siata oku sima hati, Omõla la Isia va tokekisua vosuku yimosi.

Ivaluka okuti onepa eyi Yembimbiliya tete ya sonehiwile kelimi lio Helasi. Ava va soneha Embimbiliya va liupa kelimi lio Helasi oku lipongoluila valimi akuavo. Asonehi valua Vembimbiliya ka va sonehele hati “Ndaka haeye Suku.” Momo lie? Momo va kũlĩhĩle ciwa elimi lio Helasi. Asonehi vaco va kuata elomboloko liokuti ondaka eyi hacoko yi sesamẽla oku pongoluiwa. Ndocindekaise: Embimbiliya limue pocinimbu eci li popia hati: “Ndaka wa kala suku.” Embimbiliya likuavo li popia hati: “Ndaka wa kala osuku.” Handi vali Embimbiliya likuavo li popia hati: “Ndaka wa kala la Suku kuenda wa kala lulamba ndowu waye.” Ambimbiliya ava ka a lekisa okuti Ndaka haeye Suku.a Puãi, a lekisa okuti omo liocikele ca velapo a kuete pokati kovilulikilo via Yehova, Ndaka o tukuiwa hati “suku.” Palo, ondaka “suku” yi lomboloka umue “ukuonene.”

KŨLĨHA OCILI CATIAMẼLAKO

Omanu valua ka va kũlĩhĩle elimi lio Helasi. Oco hẽ tu kuata ndati elomboloko lieci upostolo Yoano a yonguile oku popia? Sokolola okuti ulongisi umue o lombolola ondaka yimue kolondonge viaye. Noke pokati kolondonge pa kala oku li patãla kueci catiamẽla kelomboluilo liaco. Oco hẽ olondonge nda via potolola ndati ocitangi caco? Ocili okuti nda va pinga kulongisi oco a va lomboluile ciwa ondaka yaco. Oku kũlĩha alomboluilo akuavo nda ca va kuatisa oku kuata elomboloko liwa liondaka yaco. Cimuamue haico, oco tu kuate elomboloko liwa lieci ca sonehiwa kelivulu lia Yoano 1:1, tu sukila oku konomuisa ovinimbu vikuavo Vievanjeliu lia Yoano oco tu kũlĩhe ocikele ca Yesu. Oku kũlĩha alomboluilo akuavo atiamẽla kondaka eyi, cika ku kuatisa oku kuata elomboloko liwa.

Tu kũlĩhĩsi eci ca sonehiwa kocipama 1, ocinimbu 18 celivulu lia Yoano. Kocinimbu caco tu tangako hati: “Lomue wa la mola Suku [Ukuonenewosi].” Pole, omanu va mõla Yesu, una Yoano a tukula hati: “Ndaka wa linga omunu, kuenje wa tunga pokati ketu . . . tua mola ulamba waye.” (Yoano 1:14) Oco hẽ, ci tava ndati okuti Omõla o litokeka la Suku Ukuonenewosi? Upostolo Yoano wa popiavo hati Ndaka wa “kala kumue la Suku.” Ci tava ndati omunu oku kala la umue ukuavo, pole omunu waco haeye umuamue? Handi kelivulu lia Yoano 17:3 tu sangako olondaka via Yesu vi lekisa okuti eye la Isiaye havamuamueko. Eye o tukula Isiaye hati “ove lika vu Suku yocili.” Noke kesulilo Lievanjeliu liaye, Yoano o sulako loku popia hati: “Ovina evi via sonehiwila okuti vu kolela okuti Yesu eye Kristu, haeye Mõla a Suku.” (Yoano 20:31) Kũlĩhisa okuti Yesu o tukuiwa hati Omõla a Suku, ka tukuiwa hati Suku. Alomboluilo a sangiwa ndeti vovinimbu evi Vievanjeliu lia Yoano, a lekisa ciwa eci olondaka via sonehiwa kelivulu lia Yoano 1:1, vi lomboloka. Yesu, okuti haeye Ndaka, otukuiwa hati “suku” omo okuti okuete ocikele cinene. Pole, ocikele caye ka ca lisokele leci ca Suku Ukuonenewosi.

KONOMUISA UVANGI WACO

Sokolola handi ocindekaise culongisi wa tukuiwa konano. Ndaño lelomboluilo lia eciwa lulongisi, lopo handi vamue pokati kolondonge va kueta atatahãi. Oco hẽ nye vali va sukila oku linga? Ovo va sukila oku sandiliya ulongisi umue ukuavo oco a va ĩhe vali alomboluilo akuavo. Nda ulongisi ukuavo eci a lombolola cimuamue leci ca lombolola ulongisi watete, olondonge ka vi kuata vali atatahãi. Cimuamue haico nda okuete atatahãi eci Yoano a yonguile oku popia catiamẽla ku Yesu kuenda ku Suku Ukuonenewosi, ci tava oku konomuisa eci asonehi vakuavo Vembimbiliya va soneha. Konomuisa ño handi eci ca sonehiwa la Mateo, catiamẽla kesulilo lioluali lulo eye wa tukula olondaka via Yesu poku popia hati: “Eteke liaco lola yaco lomue wa yi kũlĩha, ndaño ovangelo vokilu, ndaño Omõla, te Isia lika.” (Mateo 24:36) Olondaka evi vi lekisa ciwa okuti Yesu hayeko Suku Ukuonenewosi.

Yesu wa popia hati, Isiaye wa kũlĩha vali calua okuti eye muẽle ci sule. Nda Yesu la Suku Ukuonenewosi va lisokele, eye nda wa kũlĩhavo eci Isiaye a kũlĩha. Eci ci lekisa okuti Omõla la Isia havamuamueko. Pole lopo umue pamue o popia hati: ‘olondaka evi via popiwa la Yesu eci a kala omunu.’ Oco hẽ nye ci popiwa catiamẽla kespiritu sandu? Nda espiritu sandu lia lisokele la Suku Isia, momo lie Yesu ka popelele hati olio lia kũlĩha eci Isiaye a kũlĩha?

Osimbu wamamako oku lilongisa Embimbiliya, oka kũlĩha ovinimbu vialua vi lombolola ondaka eyi. Ovio vi lombolola ocili catiamẽla ku Isia, Komõla, kuenda kespiritu sandu.—Osamo 90:2; Ovilinga 7:55; Va Kolosai 1:15.