Apulilo A Lingiwa La Vakuakutanga

Helie wa kala osipayu yonembele? Ovikele vipi a kuata?

Kua kala ovikele vialua via enda oku lingiwa la va Liwi. Vimue pokati kavio oku sokiya ocimunga colosipayu. Ocimunga caco ca enda oku songuiwa lusongui wonembele. Usonehi umue o tukuiwa Filo, wa lombolola ovikele viasongui vaco ndoco: “Vamue va [Lewi] va kuatele ocikele coku lava olombundi vioku iñila vonembele. Vakuavo va kuatele ocikele coku lavulula kovaso yocitumãlo ci kola. Ovo va enda oku lavulula oco okuti una ka kuete omoko yoku iñilamo ka pondola oku iñila, ndaño muẽle wa ci linga ocipango ale sio. Vamue va enda oku lendela vakuavo koku lavulula vokuenda kuteke kuenda kutanya.”

Olosipayu viaco via ponduile oku kuatisa Ekanga kapuluvi osi. Ocimunga ca va Yudea oco lika ca tambula omoko kombiali yo Roma yoku kuata ovota.

Ulume umue ukuakukonomuisa Embimbiliya Joachim Jeremias, wa popia hati, “Eci olondavululi via pitĩla oco va kuate Yesu, eye wa va pula esunga lieci ka vo kuatelele eci a kala oku longisa Vonembele (Mat. 26:55), Olondavululi viaco nda ka vio pulisile nda ka va pangele onepa kolosipayu Vionembele.” Usonehi waco wa kũlĩhĩle okuti vana va tumiwa oku kuata Yesu konjanja ya pita va kalavo olosipayu vionembele. (Yoa. 7:32, 45, 46) Noke olondavululi kumue lusongui wavo va tumiwa oku ambata olondonge via Yesu kekanga kuenda citavavo okuti, ovo va kokela Paulu kosamua yonembele.—Ovil. 4:1-3; 5:17-27; 21:27-30.