Anga Hẽ Olondaka Via Yesu Viku Kuatisa Oku Likutilila?
“Eci Yesu a mala olondaka evi, ... owiñi womanu wa komoha okulongisa kuaye.”—MAT. 7:28.
1, 2. Momo lie omanu va komohela oku longisa kua Yesu?
TU SUKILA oku kapako olondaka via Yesu Kristu. Ka kuli omunu ukuavo wa lisoka laye koku longisa. Momo, omanu va komoha ovina eye a longisa Vohundo a lingila Komunda!—Tanga Mateo 7:28, 29.
2 Omõla wa Yehova, ka longisile ndeci vakuambambe va enda oku linga, momo va enda oku longisa olonumbi viomanu ka valipuile. Kristu ‘wa longisa ndomunu o kuete omoko’ yaco, momo ovina a longisa via tunda ku Suku. (Yoa. 12:50) Omo liaco, tu konomuisi ndomo ovina Yesu a longisa Vohundo a lingila Komunda vi pondola oku tu kuatisa oku likutilila.
Tu Yuvuli Oku Likutilila Nda Vakuambambe
3. Lombolola ovina Yesu a popia vohutililo yi sangiwa kelivulu lia Mateo 6:5.
3 Omo okuti ohutililo yatiamẽla kefendelo lietu, tu sukila oku likutilila ku Yehova olonjanja viosi. Pole, tu ci linga poku pokola kolondaka Yesu a popia Vohundo a lingile Komunda. Eye wa popia hati: “Eci vu likutilila, ko ka lingi ndeci vakuambambe va lingainga, momo va sole oku talama volosunangonga lo panyaha [olokololo] oku sanda oku muiwa lomanu. Mopia lene siti, Ocili va sanga ale onima yavo.”—Mat. 6:5.
4-6. (a) Momo lie va Fariseo va endela oku likutilila ‘volosunangonga, kuenda panyaha olokololo’? (b) ‘Onima yipi’ vakuambambe va tambuile?
4 Olondonge via Yesu poku likutilila, ka via kuamẽle ocituwa ca va Fariseo “vakuambambe” va enda oku lipanda hati, vakuetavo. (Mat. 23:13-32) Ovo va enda oku likutilila ‘volosunangonga lo panyaha olokololo.’ Momo lie? Momo va yonguile oku “muiwa lomanu.” Va Yudea kotembo yovapostolo, va enda oku likutilila vekongelo poku eca ovilumba vonembele, (okupisa kowola yecea komẽle, toke yatatu kekumbi). Valua va kala ko Yerusalãi va enda oku likutilila la vakuavo va enda oku fendela kocitali conembele. Pole, va Yudea va kala ocipãla lo Yerusalãi, va enda oku likutilila “volosunangonga” olonjanja vivali veteke.—Sokisa lelivulu lia Luka 18:11, 13.
5 Omo okuti omanu valua ka va kalele ocipepi lonembele ale losunangonga oco va likutilile, va enda oku ci linga volowola vimuamue. Vamue va enda oku likutilila eci va kala ‘panyaha olokololo.’ Momo va yonguile “oku muiwa lomanu” va enda oku pita volokololo viaco. Vakuambambe va enda oku litukula hati vakuetavo, momo va ‘kuatele ocilañela poku likutilila,’ oco va pandiyiwe lomanu. (Luka 20:47) Tu sukila oku yuvula ocituwa caco.
6 Yesu wa popia hati, ‘omanu vaco va tambuile ale onima yavo.’ Ovo va yonguile lika oku pandiyiwa lomanu. Epandiyo liaco, olio lia kala onima yavo, momo Yehova ka tambulula olohutililo via vakuambambe. Pole, wa enda oku tambulula lika olohutililo violondonge, ndomo Yesu Kristu a ci lekisa.
7. Elungulo lia Yesu lioku likutilila “vohondo” lilomboloka nye?
7 “Eci o likutilila, iñila vohondo yove kuenje oku [yika] epito, likutilila ku So o kasi vuyombeki, kuenje So o lete covuyombeki o ku muisa onima.” (Mat. 6:6) Elungulo lia Yesu lioku likutilila vohondo yetu loku yika epito, ka li lomboloka okuti, ka tu pondola oku linga ohutililo vekongelo. Elungulo liaco, liatiamẽla komanu vana va enda oku likutilila volokololo oco va pandiyiwe la vakuavo. Pole, tu sukila oku kapako elungulo liaco eci tu nõliwa oku linga ohutililo. Omo liaco, tu konomuisi ovina vikuavo Yesu a popia viatiamẽla koku likutilila.
8. Ndomo ca lomboluiwa kelivulu lia Mateo 6:7, olohutililo vipi tu sukila oku yuvula?
8 “Eci vu likutilila ko ka pitololi ño-o olondaka vioku patekela ndeci vakualofeka va lingainga, momo va soka vati, Tu yeviwa omo olondaka vietu via lua.” (Mat. 6:7) Yesu wa tukulavo catiamẽla koku pitulula olondaka vimuamue vohutililo. Pole, ka ci lomboloka okuti, ka tu pitulula ovina tu sukila, loku eca olopandu ku Yehova vohutililo. Eci Yesu a kala vocumbo co Gesemane osimbu ka file, wa pitulula ‘olondaka vimuamue’ vohutililo yaye.—Mar. 14:32-39.
9, 10. Momo lie tu sukilila oku yuvula oku pitolola olondaka volohutililo?
9 Tu sukila oku yuvula oku kuama ongangu ya “vakualofeka” va enda oku pitolola olohutililo viavo. Ovo va enda oku patekela olondaka ka vi kuete esilivilo, poku vi ‘pitolola’ volohutililo. Pole, olondaka viaco, ka via kuatisile afendeli va Baale va enda oku likutilila ‘tunde komẽle toke ekumbi vongunji, hati: ‘A Baale tu yevelele!’’ (1 Olos. 18:26) Koloneke vilo, omanu valua va siatavo oku pitolola olohutililo viavo loku sima okuti, ‘va kasi oku yeviwa la Suku.’ Pole, Yesu o tu kuatisa oku limbuka okuti, Yehova ka tambulula olohutililo ‘vi lingiwa lolondaka vialua.’ Omo liaco, Yesu wa popia hati:
10 “Ko ka lisokisi lavo, momo Isiene wa kũlĩha ovina vio sesameli osimbu ka wa vi pingili.” (Mat. 6:8) Asongui valua vetavo lia va Yudea kuenda Vakualofeka, va enda oku tukulavo olondaka vialua volohutililo viavo. Olohutililo vi lingiwa lutima wosi okuti, mua kongela oku eca olopandu ku Suku, vi kuete esilivilo vefendelo liocili. (Va Fil. 4:6) Poku pinga ku Suku ovina tu sukila tu yuvuli oku pitolola olondaka. Omo liaco, poku likutilila, tu sukila oku ivaluka okuti, Yehova ‘wa kũlĩha ovina tu sesamẽla osimbu ka tua vi pingile.’
11. Nye tu sukila oku ivaluka nda tua tambula ocikele coku likutilila kolohongele?
11 Ovina Yesu a popia viatiamẽla kolohutililo vioku pitolola olondaka, vi tu ivaluisa okuti, Suku ka komoha lolondaka vialua tu tukula volohutililo. Tu sukilavo oku ivaluka okuti, olohutililo vi lingiwila volokololo oco tu pandiyiwe lomanu, ka vi taviwa la Suku. Omo liaco, tu yuvuli olohutililo mua kongela oku eca elungulo ku vakuetu, momo ka vilitava lolondaka Yesu a popia Vohundo a lingila Komunda.
Yesu o tu Longisa Ndomo tu Likutilila
12. Olondaka viokuti, “onduko yove yi sumbiwe,” o vi lombolola ndati?
12 Ndaño Yesu wa lungula okuti, tu sukila oku yuvula olohutililo ka vi taviwa la Suku, pole, wa longisa olondonge viaye ndomo va pondola oku likutilila. (Tanga Mateo 6:9-13.) Vohutililo Yesu a linga, ka patekelele olondaka loku vi pitolola. Pole, wa tu sila ongangu yoku likutilila. Omo liaco, vohutililo a linga, tete wa tukula Suku loku popia hati: “A Isietu o kasi kilu. Onduko yove yi sumbiwe.” (Mat. 6:9) Olohutililo tu linga, tu vitiamisila ku “Isietu” Yehova, momo eye Ululiki wetu. (Esin. 32:6; 2 Asa. 6:21; Ovil. 17:24, 28) Ondaka yokuti “Isietu,” yi tu ivaluisa okuti, vamanjetu va kuetevo ukamba la Suku. Pole, olondaka viokuti, “onduko yove yi sumbiwe,” vi lekisa ovina Yehova a siata oku linga oco a yelise onduko yaye omo lietombo lia lingiwa vocumbo Cedene. Kuenje, Yehova oka tambulula ohutililo yaco poku nyõla olondingaĩvi viosi voluali.—Esek. 36:23.
13. (a) Epingilo liokuti, “usoma wove wiye,” lika tẽlisiwa ndati? (b) Voku tẽlisiwa kuocipango ca Suku palo posi mua kongela nye?
13 “Usoma wove wiye. Ocipango cove ci lingiwe posi ndeci ci lingiwa kilu.” (Mat. 6:10) Ndomo ca lomboluiwa vohutililo Yesu a linga, tu sukila oku ivaluka okuti “usoma,” u lomboloka uviali wa Mesiya wokilu u kasi peka lia Kristu, kumue ‘lolosandu’ vika pinduiwa okuti olombuavekua. (Dan. 7:13, 14, 18; Isa. 9:6, 7) Oku likutilila oco usoma waye “wiye,” ci lomboloka okuti, Usoma wa Suku uka nyõla ovoviali osi omanu. Tu lavoka oku tẽlisiwa kuocitumasuku caco voluali luosi muna muka kala esunga, lombembua, kuenda ekalo liwa. (Osa. 72:1-15; Dan. 2:44; 2 Pet. 3:13) Omo okuti ocipango ca Yehova ci kasi oku tẽlisiwa kilu, epingilo liokuti, usoma waye wiye palo posi, lika tambuluiwa eci aka nyõla olondingaĩvi viosi ndeci a linga kosimbu.—Tanga Osamo 83:1, 2, 13-18.
14. Momo lie tu sukilila oku pinga ‘okulia kueteke leteke’?
14 “Tu ihe okulia kuetu kuetaili.” (Mat. 6:11; Luka 11:3) Poku linga epingilo liaco, ci lekisa okuti, tu kasi oku pinga ku Suku oco a tu ĩhe okulia ‘kueteke leteke.’ Nda tua ci linga, ci lekisa okuti, tua kolela Yehova wa siata oku tu ĩha ovina tu sukila. Pole, ka ci lekisa okuti, tu kasi oku pinga okulia kua supapo. Oku pinga okulia tu sukila eteke leteke, ci tu ivaluisa ocihandeleko Suku a ecele ku va Isareli coku nõla lika omana ‘yeteke leteke.’—Etu. 16:4.
15. Tukula elomboloko liolondaka viokuti, “tu ecele okulueya kuetu ndeci tu ecaila ava va tu lueyela.”
15 Epingilo likuavo lia Yesu, liatiamẽla kocina cimue tu sukila oku linga. Yesu wa popia hati: “Tu ecele okulueya kuetu ndeci tu ecaila ava va tu lueyela.” (Mat. 6:12) Nda tua ‘ecela’ vakuetu va tu lueyela, Yehova o tu ecelavo. (Tanga Mateo 6:14, 15.) Omo liaco, tu amamiko oku lekisa ohenda poku ecela vakuetu.—Va Efe. 4:32; Va Kol. 3:13.
16. Tu kuata ndati elomboloko liepingilo lioku yuvula oku tu songuila veyonjo, kuenda oku popeliwa kũvi?
16 “Ku ka tu songuile veyonjo, puãi tu popele kũvi.” (Mat. 6:13) Tu kuata ndati elomboloko liovina vivali Yesu a pinga vohutililo? Yehova ka tu yonji oco tu linge ekandu. (Tanga Tiago 1:13.) Pole, Satana eye wa siata oku tu ‘Yonja lovina vĩvi.’ (Mat. 4:3) Embimbiliya li lekisa okuti, Suku wa siata oku linga ovina a yongola oku tẽlisa. (Ruti 1:20, 21; Uku. 11:5) Epingilo liokuti, “ku ka tu songuile veyonjo,” li lekisa okuti, tu kasi oku pinga ku Yehova oco ka tuka lueye olonumbi viaye eci tu yonjiwa. Pole, epingilo liokuti, “tu popele kũvi,” li lekisa okuti, tu kasi oku pinga ku Yehova oco ka tuka yapuisiwe la Satana. Momo Suku ‘ka ecelela okuti, tu yonjiwa lovina ka tu tẽla.’—Tanga 1 Va Korindo 10:13.
‘Pinga, Sandiliya, Kuenda Totola’
17, 18. Oku ‘amamako oku pinga loku sandiliya kuenda oku totola,’ ci lomboloka nye?
17 Upostolo Paulu wa vetiya Akristão oco va kuate ocituwa coku ‘likutilila olonjanja viosi.’ (Va Rom. 12:12) Yesu wa eca elungulo limuamue poku popia hati: “Pingi, kuenje cu wihiwa, vanji, kuenje vu sanga; totoli, kuenje liu yikuluilua. Momo u o pinga o tambula, u o vanja o sanga, u o totola liu yikuluilua.” (Mat. 7:7, 8) Tu sukila ‘oku pinga’ ovina vi litava locipango ca Suku. Catiamẽla kolondaka via Yesu, upostolo Yoano wa soneha hati: “Ekolelo tu u kuetele lieli, nda tu pinga cimue ca sungulukila ocipango caye eye o tu yeva.”—1 Yoa. 5:14.
18 Elungulo lia Yesu liatiamẽla koku ‘pinga loku sandiliya,’ li lekisa okuti, tu sukila oku amamako loku likutilila olonjanja viosi. Tu sukilavo oku amamako loku ‘totola,’ oco tu tambule asumũlũho a tunda Kusoma wa Suku. Anga hẽ, tua kolela okuti Suku o tambulula olohutililo vietu? Tu tambuluiwa lika nda tua kolela kolondaka via Yesu wa popia hati: “U o pinga o tambula, u o vanja o sanga, u o totola liu yikuluilua.” Ovolandu Olombangi Via Yehova va siata oku lombolola a lekisa okuti, Yehova ‘Ukuakuyeva olohutililo.’—Osa. 65:2.
19, 20. Ndomo Yesu a ci popia kelivulu lia Mateo 7:9-11, Yehova o sokisiwa ndati lonjali ukuacisola?
19 Yesu wa sokisa Suku lonjali ukuacisola wa siata oku eca ovina viwa komãla vaye. Sokolola ndeci okuti wa kala Kohundo Yesu a lingila Komunda kuenda wa yeva eci Yesu a popia hati: “Helie pokati kene nda omõlaye u pinga ombolo eye u wiha ewe? Pamue nda u pinga olusi eye u wiha onyoha? Oco, nda ene vulondingaĩvi wa kũlĩhi oku eca [olombanjaile] viwa komãla vene, Isiene o kasi kilu hẽ, ka velipo oku avela ava vo pinga ovina viwa?”—Mat. 7:9-11.
20 Ndaño onjali yi sokisiwa ‘londingaĩvi’ omo liekambo lioku lipua, pole, yi lekisa ocisola komãla vaye. Eye ka va kembi, pole, o likolisilako oku va ĩha ‘olombanjaile viwa.’ Cimuamue haico Isietu wokilu a siata oku linga poku tu ĩha “ovina viwa” lekuatiso liespiritu sandu liaye. (Luka 11:13) Omo liaco, tu sukila oku amamako oku vumba Yehova momo eye Ukuakueca “ocali cosi ciwa longavelo yosi ya kanguka.”—Tia. 1:17.
Amamako Oku Pokola Kovina Yesu a Longisa
21, 22. Nye Yesu a popia Vohundo a lingila Komunda, kuenda nye o yeva vutima omo liovina viaco?
21 Ovina Yesu a popia Vohundo a lingila Komunda, vi kuete esilivilo lia velapo. Eye wa lombolola ovina vialua viatiamẽla ku Suku. Ndomo ca lomboluiwa vovipama vikuavo, tu tambula lika asumũlũho nda tua kapako ovina vi sangiwa vohundo Yesu a linga. Nda tua ci linga, tu kuata ekalo liwa, kuenda elavoko liomuenyo ko pui.
22 Vovipama tua lilongisa ndeti, tua konomuisa ovina Yesu a tukula Vohundo a lingila Komunda. Vosi va yeva ohundo yaco va “komoha okulongisa kuaye.” (Mat. 7:28) Omo liaco, nda tua kapako olondaka via Yesu Kristu, Ulongisi Wavelapo, tu kuata esanju.
O Tambulula Ndati?
• Nye Yesu a popia catiamẽla kolohutililo via vakuambambe?
• Momo lie tu sukilila oku yuvula oku pitolola olondaka volohutililo?
• Ovina vipi vi sangiwa vohutililo Yesu a linga?
• Tu amamako ndati oku ‘pinga, loku sandiliya kuenda oku totola’?
[Elitalatu kemẽla 15]
Yesu wa pisa vakuambambe va enda oku likutilila oco va muiwe lomanu
[Elitalatu kemẽla 17]
Ove hẽ wa kũlĩha esilivilo lioku pinga okulia kueteke vohutililo?