Nye Citava Oku Lingiwa Kesambata?

Kesambata likuavo Yesu enda kosunangonga yimue citava okuti, ko Galilea. Kuenje o sangamo ulume umue okuti okuokuo kuaye kuondio kua siõsia. (Luka 6:6) Vakuavisonehua la va Fariseo va kasi oku lavulula Yesu. Momo lie? Ovo va lekisa esunga liaco eci va pula vati: “Ca sunguluka hẽ oku sakula Kesambata?”—Mateo 12:10.

Asongui vetavo lia va Yudea va tava okuti citava lika oku sakula omunu umue Kesambata nda okuti omuenyo waye u kasi kohele. Kesambata ka ca tavale oku sakula ale oku pengulula ekepa lia tunguka, momo ka ci kapi kohele omuenyo. Vakuavisonehua la va Fariseo ka va kasi oku pula Yesu omo okuti va sakalala lohali yulume waco. Pole, va kasi oku sanda onjila yoku pisa Yesu.

Yesu wa kũlĩha ovisimĩlo viavo ka via sungulukile. Eye wa kũlĩhavo okuti, va likapela ovihandeleko via tĩla haivio ka vi tiamisiwila kovisonehua, vieci ci lomboloka oku pembula ocihandeleko coku linga upange Kesambata. (Etundilo 20:8-10) Yesu wa pisiwa ale olonjanja vialua omo lioku linga ovopange awa. Cilo eye o linga ocina cimue ci pondola oku nena ema. Ema liaco li fetika eci a sapuila ulume ukuakuokuo kua siõsia hati: “Votoka, enju vokati [kosunangonga].”—Marko 3:3.

Yesu o vandekela vakuavisonehua la va Fariseo kuenje o popia lavo hati: “Nda o kuete omeme kuenje omeme yaco ya kupukila vocitunu Kesambata, kuli hẽ umue pokati kene okuti ka yupimo?” (Mateo 12:11) Omeme yi lomboloka ukuasi. Omo liaco, ovo ka va ponduile oku ecelela okuti yi kala vocitunu toke keteke likuavo. Momo nda va ci linga, omeme yaco nda ya fa kuenje nda ca kala epese kokuavo. Handi vali, ovisonehua vi popia hati: “Ondingesunga yi sokolola omuenyo wocinyama cayo.”—Olosapo 12:10.

Yesu poku sokisa ovina viaco wamisako ndoco: “Cimuamue haico, omunu wa velapo, omeme yi sule! Omo liaco, ca sunguluka oku linga eci ciwa Kesambata.” (Mateo 12:12) Yesu poku sakula ulume, ka tombele ocihandeleko Cesambata. Omo liaco, asongui vetavo ka va pondola oku patãla ocisimĩlo eci ca sunguluka haico cohenda. Kuenje ovo ka va tẽla oku popia cimue.

Yesu lonyeño kuenda esumuo omo liovisimĩlo viavo ka via sungulukile, o va tulukila kuenje o sapuila ulume hati: “Olõla okuokuo kuove.” (Mateo 12:13) Eci ulume olõla okukuo kuaye kua siõsia, ku sakuiwa. Omo liaco, ulume wa sakuiwa o kuata esanju lialua. Vana va seteka oku kuata Yesu nye va linga?

Va Fariseo ka va sanjuka poku mola okuti okuokuo kulume kua sakuiwa kuenje va tunda lonjanga yalua va tumbika ongombo ‘la vakuacitundo ca Herode, oco va ipaye Yesu.’ (Marko 3:6) Vocitundo caco, citava okuti mua kongela ocimunga cimue casongui vetavo va tukuiwa okuti va Sadukeo. Pokati ka va Sadukeo la va Fariseo pa kala ukuse, pole, cilo va likuete omunga oco va lambalale Yesu.