Yesu O Sakula Kafeko Umue Kuenda Ulume Ocisitatũi

Yesu noke yoku pisa oviholo ka via sungulukile via va Fariseo, o tunda lolondonge viaye. Ovo va linga ungende walua woku enda konano yolupale luo Turo, luo Sidono kuenda luo Foinike.

Yesu o sikĩla konjo yimue, pole, ka yongola okuti omanu va kũlĩha okuti oko a sikĩla. Pole, lopo omanu va yeva apa a sikĩla. Ukãi umue u Helasi okuti, wa citiwa vimbo liaco o sanga Yesu kuenje u pinga hati: “A Ñala, Amõla a Daviti, ñuatele ohenda. Omõlange ukãi o kuetiwe londele [yi kasi oku u talisa ohali yalua].”—Mateo 15:22; Marko 7:26.

Noke yotembo yimue, olondonge vi pinga ku Yesu viti: “U sapuila oco a ende, momo o kasi oku tu sakalaisa.” Yesu o lombolola esunga lieci ka tambuluila ukãi waco poku popia hati: “Sia tumiwile kumue kuiñi, te kolomeme via nyẽlela vionjo ya Isareli.” Pole, ukãi amamako oku u pinga. Eye amẽla ku Yesu kuenda o kekama loku pinga hati: “A Ñala, ñuatise!”—Mateo 15:23-25.

Citava okuti, oco Yesu a seteke ekolelo liaye, o ta olusapo lumue luatiamẽla kocituwa cĩvi ca va Yudea, coku lekisa ocame komanu vakuafeka yikuavo poku popia hati: “Ka ca sungulukile oku upa ombolo yomãla loku yeca kolombua.” (Mateo 15:26) Yesu poku popia hati, “kolombua” o kasi oku lekisa okuti o kuetele ohenda omanu vana ka va pangi onepa kepata lia va Yudea. Citava okuti ocituwa caco wa ci lekisilavo kupolo waye kuenda ndomo a vangula olondaka viaco.

Ukãi waco ka lekisile esumuo, pole, o kuata elomboloko liokuti Yesu wa tiamisila olondaka viaco ku va Yudea vakuacame. Omo liaco, lumbombe walua ukãi o popia hati: “Ocili, a Ñala, pole olombua vi lia olosisi vi [loluka] komesa ya va cime cavo.” Yesu o limbuka ocituwa caye ciwa kuenje u sapuila hati: “Okãi, ekolelo liove linene, ci lingiwe ndeci o yongola.” (Mateo 15:27, 28) Ndaño okuti ufeko waco ka kasi ocipepi la Yesu, pole o sakuiwa. Eci ukãi a tiukila konjo wa sanga okuti omõlaye ufeko wa pekela pula kuenda “ondele yo tunda”!—Marko 7:30.

Yesu kumue lolondonge viaye va tunda vo Foinike, va pita vofeka yaco oku loña Kolui Yordão. Citava okuti, va yoka o Yordão kolonepa vimue konano Yokalunga ko Galilea kuenje va iñila vofeka yo Dekapoli. Eci va pitĩla, va londa komunda yimue pole, owiñi u va sanga. Omanu va nena ovilema, olomeke kuenda ovitende. Noke va kapa olombei kolomãhi via Yesu kuenda eye o va sakula. Omanu va komõha kuenje va sivaya Suku ya Isareli.

Yesu o tiamisila utima kulume ocisitatũi haeye o kuete onjanjo kelimi. O pondola oku limbuka ndomo ulume waco a liyeva pokati kowiñi! Citava okuti, Yesu o limbuka ndomo ulume waco a kasi lohele kuenje o tunda laye pokati kowiñi. Osimbu va kala lika liavo, Yesu o lekisa kokuaye eci a yongola oku linga. Eye o kapa ovimuine viaye vatũi wulume waco kuenda noke yoku siya, o lamba kelimi liulume. Yesu poku vanja kilu o popia ondaka yimue kelimi likuavo yi lomboloka okuti: “Situluka.” Kuenje ovatũi ulume a situluka kuenda o fetika oku vangula ciwa. Yesu ka yongola okuti ovina viaco vi sandekiwa, pole, o yongola okuti omanu va tava kokuaye poku mola loku yeva ovo muẽle ovina viaco.—Marko 7:32-36.

Unene Yesu a kuete woku sakula ovovei aco, u vetiya omanu va mola ovina viaco kuenje “va komõha calua.” Ovo va popia vati: “Ovina viosi a kasi oku linga, viwa. O situlula ovatũi ovisitatũi kuenda vana va kuete onjanjo kelimi, va vangula ciwa.”—Marko 7:37.