O Sunagonga Muna Yesu a Kundila Lolondonge Viaye

“Yesu yu wa ñuala ñuala vo Galilea yosi, wa longaisa volosunangonga viavo. Wa kunda kunda ondaka yiwa yusoma.”—MATEO 4:23.

OLONJANJA vialua eci tu tanga Avanjeliu, tu limbuka okuti Yesu wa enda oku kala volosunangonga. Ci kale ko Nasara, olupale a kulila, ci kale ko Kafarinau, olupale luna lueya oku linga ndocitumãlo caye, ale kovaimbo akuavo a nyula anyula vokuenda kuanyamo atatu lomeyu kupange waye woku kunda, olonjanja vialua, Yesu wa nõla o sunangonga ndocitumãlo coku kundila kuenda oku longisa omanu catiamẽla Kusoma wa Suku. Eli olio esunga lieci Yesu a popela hati: “Nda longasaila volosunangonga, kuenda vonembele, omu va Yudea vosi vongolokaila.”—Yoano 18:20.

Ovapostolo va Yesu kuenda Akristão vakuavo vo kocita catete, olonjanja vialua va enda oku longisa va Yudea volosunangonga. Va Yudea veya ndati oku fendelela volosunangonga? Kuenda olonjo viaco viefendelo koloneke via Yesu via kala ndati? Tu konomuisi lutate ulandu waco.

Ya Kala Ocitumãlo ca Velapo ku va Yudea Olonjanja vitatu vunyamo, alume va Yudea, va lingaile ungende toke ko Yerusalãi kovipito vi kola. Pole, ku va Yudea vo ko Palestina kuenda kalupale akuavo, o sunangonga ya kala ocitumãlo cavo cefendelo.

Otembo yipi omanu va fetika oku fendela vo sunangonga? Vamue vati, va fetika oku fendelelamo kotembo va Yudea va kala kumandekua ko Bavulono (kunyamo wo 607-537 O.K.K.) eci Onembele ya Yehova ya nyõliwa. Ale ceci va Yudea va tunda kumandekua, otembo ocitunda Esera a vetiya omanu oku kuata ukũlĩhĩso lelomboloko Liocihandeleko ca Suku.—Esera 7:10; 8:1-8; 10:3.

Kosimbu, Ondaka “O sunangonga,” ya lombolokele “ohongele” ale “ekongelo.” Ondaka yaco ya tukuiwa ndoco vo Septuaginta, okuti ovisonehua vimue vio Helasi viopiwa Kovisonehua vio Heveru. Vokuenda kuotembo, ondaka yaco yeya oku tukuiwa poku lekisa onjo omanu va enda oku liongoluila oco va fendele. Kocita catete, K.K., vovaimbo osi Yesu a kundila mua kala o sunangonga. Valupale anene, ka mua kaile lika o sunangonga yimosi; ndeci vo Yerusalãi mua kala olosunangonga vialua. Olosunangonga viaco, via kala ndati?

Onjo Yimue Yefendelo Va Yudea poku tunga o sunangonga, va enda oku nõla ocitumãlo ci kasi apa pa yeluka ciwa okuti (1) uvelo waco wimba ovaso ko Yerusalãi. Oyo, ka ya kaile onjo yimue yinene calua, momo ka va endele oku liongoluilamo olonjanja viosi.

Pana okuti va mãla oku tunga o sunangonga, vokati kaco va kapamo ovikuata vimue. Ocikuata catete ca kala vo sunangonga, ocikasia (2) ale ocitumãlo kuna va enda oku kapa ociña Covisonehua vi Kola, cina ca kuatele esilivilo lia velapo komanu. Vokuenda kuefendelo, ocikasia caco ca enda oku kapiwa pocitumãlo cimue ciwa, kuenje noke yefendelo ci tiukila vohondo yimue ya koka (3).

Ocipepi locikasia kovaso yowiñi, kua kala olomangu (4) kua enda oku tumãla asongui vo sunangonga kuenda akombe va kemãla. (Mateo 23:5, 6) Vokati lakati ko sunangonga, mua kala embumbua kuenda omangu yohundi (5). Kovaso yembumbua kolonele vitatu, kua kala olomangu kua tumayala owiñi (6).

Ovopange osi o vo sunangonga, a lingaiwa lekuatiso liomanu vatiamẽla vekongelo liaco lio pocitumãlo. Ovilumba viomanu vosi, ci kale olohuasi pamue olosuke, via kuatisa koku tata loku semũlula ovina via nyõleha. Oco hẽ, olohongele vo sunangonga via lingaiwa ndati?

Efendelo vo Sunangonga Vefendelo lia lingaiwa vo sunangonga, mua kongelele oku imba ovisungo viesivayo, oku likutilila, oku tanga Ovisonehua, oku longisa, kuenda oku kunda. Ekongelo lia enda oku fetika efendelo poku pitulula Onõha va Yudea va enda oku situlula layo ekolelo liavo. Onõha yaco yopiwa kondaka yatete yovisonehua yi popia hati: “A Isareli, yevelela. Yehova eye Suku yetu kuenje eye Suku lika waye.”—Esinumuĩlo 6:4.

Noke, va tanga alivulu atete atãlo Embimbiliya a sonehiwa la Mose a tukuiwa hati, Tora kuenda oku a lombolola ciwa. (Ovilinga 15:21) Noke va tangavo ovisonehua viovaprofeto (vi tukuiwa hati, haftarahs) loku eca alomboluilo kuenda olonumbi vi sukiliwa oku kapiwako. Olonjanja vimue olohundi akombe ovo va enda oku tanga ovisonehua viaco ndeci Yesu a linga ndomo ca lekisiwa kelivulu lia Luka 4:16-21.

Ocili okuti, ociña ca eciwile ku Yesu kohongele yaco, ka ca kuatele ovipama ndaño ovinimbu, ndeci ci kasi Ambimbiliya o koloneke vilo. Kaliye tu sokololi ndomo Yesu a linga eci a tambula ociña caco loku ci muñulula toke a sanga olondaka a yonguile oku tanga. Noke yoku tanga, ociña caco ca muñiwa vali.

Olonjanja vimue va enda oku tanga ovisonehua vio Heveru kuenda oku vi lombolola kelimi lio Aramaiko. Akongelo kelimi lio Helasi a enda oku tanga ovisonehua vio Septuaginta.

Ya Kuata Esilivilo Komuenyo O sunangonga, oyo onjo ya velelepo pokati kolonjo via va Yudea, kumosi lolonjo vikuavo viatiamẽlele kosunangonga muna va enda oku lingila ovopange alua. Olonjanja vimue va lingailamo asombiso, olohongele vio vimbo kuenda ovipito vioku lia loku nyua. Handi vali, olongende via enda oku lala vo sunangonga.

Valupale alua, o sunangonga ya kalavo osikola. Sokolola ohondo yimue ye yuka omãla va lilongisa oku tanga ololetala vinene ulongisi a soneha vevaya. Osikola yaco, ya kuata esilivilo lialua momo, va Yudea kosimbu, ndaño muẽle vana va tendiwile okuti omanu vaño, va kũlĩhĩlevo Ovisonehua.

Pole, ocimãho ca velapo co sunangonga ca kala coku eca olonumbi viefendelo. Omo liaco, ka ci tu komõhisa oku kũlĩha okuti, olohongele Viakristão kocita catete via enda oku lingiwa ndolohongele via va Yudea vosunangonga. Olohongele Viakristão via kuatelevo ocimãho coku fendela Yehova lolohutililo, lovisungo, lesivayo, kuenda oku tanga loku lombolola Ondaka ya Suku. Pole, kuli ovina vikuavo via lisetahãla. Volosunangonga, olombanjaile via enda oku eciwa lutima wosi oco vi kuatise koku linga ovopange amue ndeci ca siata oku lingiwavo koloneke vilo. Handi vali, vakuacisoko covitunda havoko lika va kuatele esumũlũho lioku tanga kuenda oku lombolola Ondaka ya Suku. Akulu vekongelo ovo va kuatele ocikele coku sokiya kuenda oku songuila olohongele.

Olombangi via Yehova koloneke vilo, vi likolisilako oku kuama ongangu ya Yesu kuenda yolondonge viaye vio kocita catete. Olohongele viavo Vonjango Yusoma, vi kuete elitokeko lovina via enda oku lingiwa volosunangonga kosimbu. Handi vali, Olombangi via Yehova eci vi liongolola, vi kuetevo ocimãho coku ‘amela ku Suku’ ndeci omanu vakuotima wa sunguluka va kuatele.—Tiago 4:8.

[Elitalatu kemẽla 16]

Oku tumbuluiwa oku, kuopiwa kosunangonga yo Gamla kocita catete

[Elitalatu kemẽla 18]

Osikola yo sunangonga ya enda oku longisa omãla valume okupisa kanyamo 6 toke 13