Kesongo Umue Kolohoka O Lekisa Ekolelo Liocili

Yesu noke yoku linga Ohundo yaye Komunda, enda volupale luo Kafarinau. Volupale luaco, akulu vamue va va Yudea veya kokuaye. Ovo va tumiwa lulume umue ukualofeka okuti, kesongo kolohoka vio ko Roma.

Upika wa kesongo kaco kolohoka una eye a sole calua, o vela kuenda o panda koku fa. Ndaño okuti kesongo kolohoka ukualofeka, pole, eye o kasi oku sandiliya ekuatiso lia Yesu. Va Yudea va sapuila Yesu okuti upika wa kesongo kolohoka “o kasi konjo wa fa ovolu, wo tala ohali yalua.” Citava okuti o kasi levalo lialua. (Mateo 8:6) Akulu va va Yudea va sapuila Yesu okuti, kesongo kolohoka o sesamẽla ekuatiso liaye. Ovo va popia vati: Eye “o sole ofeka yetu kuenda wa tu tungilako osunangonga.”—Luka 7:4, 5.

Kuenje Yesu enda kumue lakulu vaco konjo ya kesongo kolohoka. Osimbu va kala oku pitĩla ocipepi lonjo yaco, kesongo kolohoka o tuma akamba vaye oku sapuila Yesu hati: “A Ñala, ku ka sakalale, momo si sesamẽla okuti ove iñila vonjo yange. Eli olio esunga lieci si sesamẽlela oku iya kokuove.” (Luka 7:6, 7) Kesongo kolohoka wa lekisa ocituwa ci komõhisa cumbombe, momo eye o kuete ocikele coku tumĩla! Eci ci lekisa ndomo eye a litepa lasualali vo ko Roma, vana va kuete ocituwa coku tata lãvi apika vavo.—Mateo 8:9.

Kesongo kolohoka wa kũlĩha okuti va Yudea ka va lingi ukamba lomanu vakualofeka. (Ovilinga 10:28) Citava okuti poku ci sokolola eye o tuma akamba vaye oco va pinge ku Yesu poku popia hati: “Popia ño ondaka yimue, ukuenje wange o kaya.”—Luka 7:7.

Yesu o komõha poku yeva olondaka evi, kuenje o popia hati: “Ndu sapuili siti, vo Isareli yosi sia la mola ekolelo lialua ndeli.” (Luka 7:9) Kuenje eci va tiukila konjo ya kesongo kolohoka, akamba vaye va limbuka okuti, upika una wa kala oku vela calua, cilo wa kaya.

Yesu noke yoku linga ocikomo eci, o lombolola okuti omanu vana okuti vakualofeka, pole, va lekisa ekolelo va ka sumũlũisiwa. Eye o lombolola hati: “Omanu valua va tunda kutundilo lo kutakelo va ka tumãla komesa la Avirahama la Isake kuenda Yakoba Vusoma wo kilu.” Nye ci popiwa catiamẽla ku va Yudea vana ka va lekisa ekolelo? Yesu o popia okuti, omanu vaco “va ka imbiwa posamua vowelema. Oko ku kala oku lila kuavo loku likeleketa ovayo.”—Mateo 8:11, 12.

Omo liaco, va Yudea vana ka va tava kepuluvi lia eciwa tete kokuavo lioku panga onepa Kusoma kumue la Cristu, ka va ka taviwa. Pole, omanu vakualofeka, va ka tambuiwa ciwa oco va tumale komesa yaye, ci lomboloka okuti, “Vusoma wo kilu.”