Yesu O Situlula Ono Yesanju

Yesu wa mala oku pitulula olonumbi viatiamẽla kohutililo, pole, eyi hayoko lika ondaka eye a pitulula vokuenda kupange waye woku kunda. Eci Yesu a linga ovikomo vo Galilea, vo lundila okuti wa vi linga lunene wa soma yolondele. Cilo vo Yudea o kasi oku lundiliwa vali.

Eci Yesu a tundisa ondele ya kala oku tateka ulume umue oku vangula, owiñi u komõha. Pole, ovanyãli vaye ka va ci sanjukila. Ovo vo lundila vali vati: “Eye o tundisa olondele vonduko ya Belesevulu soma yolondele.” (Luka 11:15) Vakuavo va yongola oku kũlĩha oku Yesu a tunda kuenje vo pinga ondimbukiso yimue yo kilu.

Yesu o limbuka okuti va kasi loku u seteka kuenje o va tambulula lonjila ndeyi a tambulula ovanyãli vaye ko Galilea. Eye o popia okuti, usoma wosi u likatukila owo muẽle u kupuka loku lombolola hati: “Nda Satana o likatukila eye muẽle, oco hẽ usoma waye wamamako ndati?” Noke Yesu o teta onimbu poku popia hati: “Nda ndi tundisa olondele lomuine wa Suku, Usoma wa Suku wa pitĩla osimbu ka wa ci lavokaili.”—Luka 11:18-20.

Yesu poku tukula ‘omuine wa Suku,’ pamue wa ivaluisa olonjeveleli viaye eci ca pita la va Isareli kosimbu. Eci akuenje velombe lia Fareo va mola ovikomo Mose a linga, va kaluka vati: “Eci omuine wa Suku!” ‘Omuine wa Suku’ wa sonehavo Ovihandeleko Ekũi vitale vivali viovawe. (Etundilo 8:19; 31:18) Handi vali ‘omuine wa Suku’ okuti, espiritu sandu ale ongusu yaye ya pama, olio lia kuatisa Yesu oku tundisa olondele loku sakula olombei. Omo liaco, Usoma wa Suku wa pitĩla kovanyãli vaco, momo Yesu Soma wa nõliwa Yusoma wa Suku, eye o kasi oku linga ovikomo viaco.

Unene Yesu a kuete woku tundisa olondele, u lekisa okuti unene waye wa velapo, wa Satana u sule, ndeci ulume umue wa pama o pitĩla kelombe kuenje o yula ondavululi ya limalẽha ciwa. Yesu o pitululavo olusapo luatiamẽla kondele ya tunda kulume umue. Nda ulume ka kapi vutima waye ovisimĩlo viwa, ondele yaco yi tiuka lolondele vikuavo epanduvali kuenje ekalo liulume waco li vĩha okuti, eci a kala tete ci sule. (Mateo 12:22, 25-29, 43-45) Cimuamue haico ci kasi oku pita lepata lia Isareli.

Ukãi umue o kasi oku yevelela Yesu o popia ndoco: “Imo lia ku cita kuenda avele wa nyama via sumũlũha!” Akãi vo ko Yudea va yonguile calua oku kala ina yuprofeto umue, ca piãla enene ya Mesiya. Ukãi waco pamue o sima okuti, Maria o kuete esunga lioku sanjuka omo lioku kala ina yulongisi umue okuti, Yesu. Pole, Yesu u pisa poku u situluila ono yesanju liocili hati: “Sio, va sumũlũha vana va yeva ondaka ya Suku kuenje va yi kapako!” (Luka 11:27, 28) Yesu lalimue eteke a lekisile okuti Maria wa sesamẽlele oku sivayiwa lonjila yimue yilikasi. Pole, omunu lomunu o pondola oku kuata esanju liocili poku kala ufendeli wa Suku ukuekolelo, ka ci sukila oku tiamẽla kepata limue lia kemãla, ale kueci omunu a pondola oku linga.

Ndeci Yesu a linga ko Galilea, eye o pisa vana va pinga ondimbukiso yo kilu. Eye o va sapuila hati, ka ku eciwa ondimbukiso layimue, te lika “ondimbukiso ya Yona.” Yona wa kala ndondimbukiso omo a pita oloneke vitatu vimo liombisi kuenda wa kunda lutõi okuti ca vetiya va Ninivei oku likekembela. Kuenje Yesu o popia hati: “Pole, tala! palo, pali [u wa] velapo okuti Yona o sule.” (Luka 11:29-32) Yesu wa velapovo Salomone una okuti, olondunge viaye via komõhisa nasoma yo ko Seva.

Yesu amisako hati: “Noke yoku mĩha ondiyelo, omunu ka yi tuvika lekualu, ale oku yi kapa [pocitumãlo ca salama], pole o yi kapa kilu liociyekelo.” (Luka 11:33) Pamue eye o yongola oku popia okuti, oku longisa kuenda oku linga ovikomo kovaso yomanu ava, ci kasi ndoku tuvika ocinyi condiyelo. Omo okuti ovaso avo a pata, ka va limbuka ocimãho covikomo via Yesu.

Yesu wa tundisa ondele vomunu umue kuenda wa sakula ocitende. Eci nda ca vetiya omanu oku sivaya Yehova Suku kuenda oku sapuilako vakuavo catiamẽla kovopange a kasi oku linga. Noke Yesu o lungula vana va kasi oku u lundila poku popia hati: ‘Lavululi oco ocinyi ci kasi vokuene ka ci ka tekãve. Nda etimba liene liosi li kasi locinyi okuti layimue onepa yalio ya tekãva, olio li nina ndocinyi condiyelo ci tuila kokuene.’—Luka 11:35, 36.