Apulilo Valingiwa Lavakuakutanga
Ocili okuti, Yesu wa kundila olondaka viwa vocikanjo cosi co Isareli. Momo lie upostolo Petulu a popela hati, va Yudea kuenda olombiali viavo eci va ponda Yesu va cilingila ‘vonumbi’?—Ovil. 3:17.
Upostolo Petulu poku lombolola catiamẽla kelinga liavo lioku ponda Mesiya, wa popia hati: “Nda ci kũlĩha okuti wa ci lingi [vonumbi] ndeci ca lingavo akulu vene.” (Ovil. 3:14-17) Vamue pokati ka va Yudea citava okuti, ka va kuatele elomboloko liatiamẽla ku Yesu kuenda kelongiso liaye. Vakuavo va ci lingila omo liekambo lionjongole yoku sanjuisa Suku, epela, onya, kuenda esuvu.
Tu konomuisi ndomo ekambo lionjongole yoku sanjuisa Yehova lia nyõla ovisimĩlo viomanu valua viatiamẽla kelongiso lia Yesu. Yesu olonjanja vimue, wa enda oku longisa lolosapo vina a lomboluila omanu vosi va yongola oku lilongisa ovina vialua. Vamue pokati kavo, va liwekapo oku u yevelela kuenje ka va likolisileko oku kuata elomboloko liovina a va longisa. Onjanja yimue, olondonge via Yesu via sumuilevo omo liupopi wocindekaise a tukula. (Yoa. 6:52-66) Ovo ka va limbukile okuti, Yesu wa linga olosapo lovindekaise oco a va kuatise oku pongolola ovisimĩlo kuenda ovilinga viavo. (Isa. 6:9, 10; 44:18; Mat. 13:10-15) Ovo va sepulavo ocitumasuku ci lekisa okuti, Mesiya oka longisa lolosapo.—Osa. 78:2.
Omo liepela, vamue ka va tavele kovina Yesu a longisa. Eci a longisa vosunangonga vimbo liaye lio Nasara, omanu “va komoha” calua. Ovo ka va tavele okuti, Yesu eye Mesiya, pole, va linga apulilo atiamẽla kokuaye hati: “Ovina evi hẽ, u wa vi upa pi? . . . U siti carpinteiro, omõla a Maria, huva a Tiago la [Yosefe] kuenda Yuda la Simono? Vamukãi vaye hẽ, ka va kasi letu kulo?” (Mar. 6:1-3) Umbombe Yesu a lekisa wa kuatisa omanu vo ko Nasara oku kapako ovina a longisa.
Nye ci popiwa catiamẽla kovitunda viatavo? Valua pokati kavo, ka va tavelevo oku yevelela Yesu. (Yoa. 7:47-52) Ovo va likala elongiso liaye omo lionya, momo kua kala omanu valua va enda oku u yevelela lutate. (Mar. 15:10) Omanu valua va kemãla, ka va tavelevo kovina a longisa eci a va sapuila hati, vakuambambe kuenda olohembi. (Mat. 23:13-36) Omo liaco, Yesu wa pisa esino liavo lombambe yavo poku va sapuila hati: “A vakuavisonehua ngongo yene, momo wopi osapi yukũlĩhiso [Wusoma]. Ka wa iñilili ene muẽle, kuenje wa tateki ava va soka oku iñila.”—Luka 11:37-52.
Vokuenda kuanyamo atatu lolosãi epandu Yesu wa kundila olondaka viwa vofeka. Eye wa pindisavo valua oco va linge upange waco. (Luka 9:1, 2; 10:1, 16, 17) Omo okuti Yesu kumue lolondonge viaye va kala oku linga ciwa upange wavo, va Fariseo va popia hati: “Tali . . . Oluali luosi lu u kuãi.” (Yoa. 12:19) Eci ka ci lekisa okuti, valua pokati ka va Yudea ka va kũlĩhĩle ovina Yesu a longisa. Pole, vamamako oku kala ‘vonumbi’ yokuti, Yesu eye Mesiya. Ovo va kuata epuluvi lioku vokiya ukũlĩhĩso wavo watiamẽla ku Mesiya kuenda oku lekisa ocisola kokuaye, pole, ka va ci lingile. Vamue pokati kavo va kuatisa koku ponda Yesu. Omo liaco, upostolo Petulu wa vetiya valua pokati kavo hati: “Likekembeli akandu ene. Pongoloki okuti akandu ene a ecelua, kuenda okuti kuiya oloneke viekavuluko vi tunda ku Suku. Pongoloki okuti o tuma Kristu una wo sokiyiwili okuti Yesu.” (Ovil. 3:19, 20) Noke valua pokati ka va Yudea oku kongelamo “owiñi wa lua wovitunda,” va fetika oku tava kovina va lilongisa. Vokuenda kuotembo, va pongolola ovisimĩlo viavo, kuenje, ka va kale vali oku endela vonumbi. Ovo va likekembela, kuenje, va sanga ohenda ku Yehova.—Ovil. 2:41; 4:4; 5:14; 6:7.