Epata Lia Yesu Li Linga Ungende Woku enda Ko Yerusalãi

Vunyamo lunyamo kotembo yonjovo, Yosefe kumue lepata liaye kuenda akamba, va linga ungende woku enda ko Yerusalãi. Ocimãho cungende waco, oku enda kocipito co Paskoa ndomo ca kisikiwile Vocihandeleko. (Esinumuĩlo 16:16) Oku tunda ko Nasara toke ko Yerusalalãi ocinãla caco ci soka 120 kolokilometulu. Vosi va sanjuka kuenda va kasi oku li pongiyila ungende. Cilo Yesu o kuete 12 kanyamo kuenda o lavoka lesanju eteke lioku enda vali konembele kocipito cilikasi.

Yesu kumue lepata liaye, ka va tendele o Paskoa ndeteke limosi lika liocipito. Momo noke lio Paskoa ku lingiwa Ocipito Colombolo ka vi Kuete Etumbisa okuti, ci tumãla oloneke epanduvali. (Marko 14:1) Ocipito caco ci pangavo onepa ko Paskoa. Ungende woku tunda konjo yavo ko Nasara, lotembo va kala ko Yerusalãi, toke eci va tiukila vali konjo, va tẽlisa olosemana vivali. Vunyamo ulo, ungende u tumala vali omo liocitangi cimue ci laika oku pita okuti, mua kongela Yesu. Ocitangi caco ci limbukiwa lika noke vokuenda kungende woku tunda ko Yerusalãi.

Osimbu va linga ungende, Yosefe la Maria va sima okuti, Yesu o kasi pokati kepata likuavo kumue lakamba va kala oku lingila kumosi ungende. Pole, kuteke eci va talama oco va puyukepo, Yosefe la Maria va limbuka okuti Yesu ka kasi pokati kavo. Ovo vo sandiliya pokati kakamba vaye, pole, ka vo sangi. Kovitumãlo viosi vo sandiliya ka vo sangi! Yosefe la Maria va tiukila ko Yerusalãi oco va ko sandiliye.

Yosefe la Maria va sandiliya Yesu vokuenda kueteke liosi kuenje ka vo sangi. Vo sandiliyavo keteke liavali, pole, ka vo sangele. Noke keteke liatatu vo sanga okuti, wa tumãla vonembele pokati kalongisi va Yudea. Eye wa kala oku va yevelela loku va linga apulilo kuenje ovo va komõha omo liolondunge viaye.

Maria wo pula hati: “Amõlange, momo lie wa tu ci lingila? Isiove lame tua sakalala loku ku sandiliya.”—Luka 2:48.

Yesu o komõha, momo olonjali viaye ka via kũlĩhĩle oku va ponduile oku u sanga. Kuenje o va pula ndoco: “Momo lie wa ndi sandiliyili? Ka wa kũlĩhĩli okuti ndi sukila oku kala konjo ya Tate?”—Luka 2:49.

Omo okuti cilo va lisanga, Yesu o tiukila konjo ko Nasara kumue lolonjali viaye kuenje wamamako oku pokola kokuavo. Wamamakovo oku kula kolondunge kuenda ketimba. Ndaño okuti Yesu umalẽhe, pole, o soliwe la Suku kuenda lomanu. Tunde vutila Yesu wa sia ongangu yiwa yoku kapako ocipango ca Suku kuenda yoku lekisa esumbilo kolonjali viaye.