Ovo Va ‘Kuãi Kameme’
“Ovo ... vakuakukuama Kameme kuosi a enda enda.”—ESIT. 14:4.
1. Ovisimĩlo vipi olondonge via kuata catiamẽla koku kuama Yesu?
YESU noke lioku kunda anyamo avali lolosãi epandu, ‘wa longisa ovina vialua komanu va kala ko Kafarinau.’ Vamue pokati kolondonge viaye, noke yoku popia hati, ondaka yaye ya kãla, “va tiukila konyima, kuenje ka va endaile vali laye.” Eci Yesu a pula kueci ci soka 12 kolondonge nda va yongola oku endavo, Simono Petulu wa tambulula hati: “A Ñala, kulie tu enda? Ove, ove o kasi lolondaka viomuenyo ko pui. Etu tua kolela, kuenda tua limbuka okuti ove U o kola wa Suku.” (Yoa. 6:48, 59, 60, 66-69) Olondonge vina via tava oku kuama Yesu, osimbu ka via tambuile espiritu sandu, via pokola kelungulo liaye.—Ovil. 16:7-10.
2. (a) Helie ‘ukuenje wa kolelua haeye wa lunguka’? (b) Ukuenje wa lunguka wa lekisa ndati ongangu yiwa yoku ‘kuama Kameme’?
2 Nye ci popiwa catiamẽla Kakristão olombuavekua koloneke vilo? Vocitumasuku catiamẽla ‘kondimbukiso yokutukuluka kuaye londimbukiso yesulilo lioluali lulo,’ Yesu wa kala oku tukula ocisoko colombuavekua palo posi okuti, ‘ukuenje wa kolelua haeye wa lunguka.’ (Mat. 24:3, 45; Luka 12:42) Ukuenje wa lunguka wa lekisa ongangu yiwa yoku ‘kuama Kameme kuosi a enda.’ (Tanga Esituluilo 14:4, 5.) Ovo va liyelisa kespiritu poku yuvula elongiso lio ‘Bavulono Yinene’ ocisoko catavo esanda voluali luosi. (Esit. 17:5) ‘Vovimela viavo ka mua sangiwile’ alongiso esanda, kuenda “va pua atondelo” oluali lua Satana. (Yoa. 15:19) Kovaso yoloneke, olombuavekua via siala palo posi ‘vika kuama’ Kameme vuviali wokilu.—Yoa. 13:36.
3. Momo lie tu sukilila oku kolela kocisoko cukuenje wa lunguka?
3 Yesu wa kundika “vakuanjo yaye vosi” kukuenje wa kolelua haeye wa lunguka oco a ‘va ihe okulia kuavo kotembo ya tukuiwa.’ Vakuanjo yaco va lomboloka omunu lomunu pokati kocisoko cukuenje waco. Eye wa ecavo kokuaye ocikele coku tata ‘ovina viosi a kuete.’ (Mat. 24:45-47) ‘Vovina’ viaco mua kongela ‘owiñi wakahandangala wolomeme vikuavo.’ (Esit. 7:9; Yoa. 10:16) Anga hẽ olombuavekua ‘lolomeme vikuavo’ ka va sukila oku kolela kukuenje wa lunguka una wa tambula ocikele coku va tata? Tu kuete esunga lialua lioku kolela kukuenje wa lunguka. Asunga amue avali vava: (1) Yehova wa kolela kukuenje wa lunguka. (2) Yesu wa kolelavo kukuenje wa lunguka. Omo liaco, tu konomuisi uvangi u lekisa okuti, Yehova Suku la Yesu Kristu va kolelela kukuenje wa lunguka.
Yehova wa Kolela Kukuenje wa Lunguka
4. Momo lie tua kolelela kokulia kuespiritu kua siata oku eciwa lukuenje wa lunguka?
4 Tu konomuisi esunga lieci ukuenje wa lunguka a siatela oku tu ĩha okulia kuespiritu votembo ya sokiyiwa. Yehova wa popia hati: “Hu longisa, hu imbaimba onumbi yonjila wenda.” Eye wamisako hati: “Hu lungula, hu imba ovaso.” (Osa. 32:8) Omo okuti Yehova eye wa nõla ukuenje wa lunguka, tu sukila oku kolela Kovisonehua oco tu kuate elomboloko liaco. Omo liaco, tu tava kolonumbi tua siata oku tambula kukuenje wa lunguka.
5. Uvangi upi u lekisa okuti, espiritu lia Suku lia siata oku kuatisa ocisoko cukuenje wa lunguka?
5 Yehova wa siata oku sumũlũisa ocisoko cukuenje wa lunguka lespiritu liaye. Ndaño ka tu pondola oku mola espiritu lia Yehova, pole, tu lete ovina vi kasi oku lingiwa lekuatiso liespiritu liaye. Sokolola upange ukuenje wa lunguka a kasi oku linga voluali luosi woku eca uvangi watiamẽla ku Yehova, Komõlaye, kuenda Kusoma. Afendeli va Yehova va li sanduila kueci ci pitahãla 230 kolofeka oku kongelamo ovifuka, oco va ece uvangi wesapulo Liusoma. Upange waco, weca uvangi wokuti, espiritu lia Suku, li kasi oku kuatisa ukuenje wa lunguka. (Tanga Ovilinga 1:8.) Ukuenje wa lunguka wa siata oku nõla onjila ya sunguluka poku pongiya okulia kuespiritu oco ku kuatise omanu va Yehova. Poku linga esokiyo liaco, wa siata oku lekisa ocisola, umbombe, kuenda ovituwa vikuavo viatiamẽla kapako espiritu.—Va Gal. 5:22, 23.
6, 7. Uvangi upi u lekisa okuti Yehova wa kolela ukuenje wa lunguka?
6 Uvangi u lekisa okuti Yehova wa siata oku kolela kukuenje wa lunguka, tu u limbukila kovina a likuminya kokuavo. Upostolo Paulu wa soneha hati: “[Eci] olumbeta lu popia, ... ava va fa va pinduiwa, ka va futi vali kuenje etu tu pongoluiwa. Momo etimba eli li futa li wala eli ka li futi, leli li fa li wala eli ka li fi.” (1 Va Kor. 15:52, 53) Olombuavekua via Kristu vina vi lekisa ekolelo ku Suku, eci vi fa etimba liavo li vola, pole, poku pinduiwa va tambula etimba liespiritu. Noke, va kuata omuenyo ko pui kilu. Elivulu Liesituluilo 4:4 , li lombolola eci catiamẽla ku vana va pinduiwa okuti, va kasi kovaso yocalo, kuenje va wala akolowa ulu kovitue viavo. Ovo va lavoka oku tambula onima yavo kilu. Pole, kuli ovina vikuavo vi lekisa esunga lieci Yehova a kolelela olombuavekua.
7 Elivulu Liesituluilo 19:7, 8 , li popia hati: “Uvala wa Kameme weya. Ndombua yaye wa liangiliya. Kuenje co wihiwa oku wala onanga yovalatanya yi yela tue. Onanga yaco yovalatanya oyo ovilinga via sunguluka violosandu.” Yehova wa nõla Akristão olombuavekua oco va linge ndombua Yomõlaye. Ovo va kuete esumũlũho lioku tambula etimba ka li voli hailio ka li fi, kuenda va linga ‘uvala la Kameme!’ Omo liaco, va limbuka okuti, Suku wa va kolela, momo va siata oku ‘kuama Kameme kuosi a enda.’
Yesu wa Kolela Kukuenje wa Lunguka
8. Yesu wa lekisa ndati okuti wa kolela kolondonge viaye olombuavekua?
8 Uvangi upi u lekisa okuti, Yesu wa kolela Akristão olombuavekua? Yesu kuteke wa sulako womuenyo waye palo posi, wa linga ohuminyo kueci ci soka 11 kovapostolo vaye poku va sapuila hati: “Ene wa pandakaisi lame eci nda nyikaiwa. Oco, ndeci Tate a nukuila usoma haico ndu tukuili usoma okuti, vu lila loku nyuila komesa yange vusoma wange, kuenje vu tumala kovialo oku tetuluila apata ekui la avali a Isareli.” (Luka 22:28-30) Ocisila Yesu a linga leci ci soka 11 kovapostolo vaye, catiamisiwilavo Kakristão olombuavekua va soka 144.000 komanu. (Luka 12:32; Esit. 5:9, 10; 14:1) Citava hẽ okuti, Yesu o linga ocisila coku viala lavo Vusoma waye, osimbu okuti ka kolelele kokuavo?
9. Nye ca kongeliwa ‘vovina viosi via Kristu’?
9 Yesu Kristu wa nõla ukuenje wa lunguka oco a ‘tate ovina’ viatiamẽla Kusoma waye palo posi. (Mat. 24:47) Vovina viaco, mua kongela upange wa siata oku lingiwa kombala Yolombangi Via Yehova, kolofiliale viosi vi sangiwa voluali, Kolonjango Violohongele Vinene, kuenda Kolonjango Viusoma. Mua kongelavo upange woku kunda loku longisa omanu oco va linge olondonge. Ove hẽ, o tava oku eca ovina viove komunu kua kolelele oco a vi tate?
10. Uvangi upi u lekisa okuti Yesu Kristu o kasi oku kuatisa olombuavekua?
10 Osimbu handi Yesu ka endele kilu noke yepinduko, wa moleha kolondonge viaye, kuenda wa va likuminya hati: “Ñasi [kumue lene] oloneke viosi toke kesulilo lioluali.” (Mat. 28:20) Anga hẽ ohuminyo yaco ya tẽlisiwa? Vokuenda kueci ci soka 15 kanyamo voluali luosi mua kala 70.000 kakongelo Olombangi Via Yehova. Cilo voluali muli eci ci pitahãla 100.000 kakongelo. Eci ci lekisa okuti kua vokiya eci ci pitahãla 40 porcentu. Vañami va vokiyiwa Kolombangi Via Yehova? Vokuenda kueci ci soka 15 kanyamo, kua papatisiwa eci ci panda 4.5 kolohuluwa viomanu, ci lekisa okuti, eteke leteke kua papatisiwa eci ci pitahãla 800 komanu. Evokiyo liaco, li eca uvangi wokuti, Kristu o kasi oku songuila olondonge viaye olombuavekua kolohongele viavo viekongelo, kuenda o kasi oku kuatisa upange woku longisa omanu oco va linge olondonge.
Ukuenje wa Kolelua Haeye wa Lunguka
11, 12. Ukuenje wa lunguka wa siata oku lekisa ndati okuti wa koleliwa?
11 Omo okuti, Yehova Suku la Yesu Kristu va kolela ukuenje wa lunguka, tu sukila oku kuama ongangu yavo. Ukuenje wa lunguka wa siata oku tẽlisa ocikele a tambula. Momo kuli uvangi wokuti, tunde eci Utala Wondavululi wa fetika oku sandekiwa, papita ale ci soka 130 kanyamo. Olohongele vimbo, viofeka, kuenda vina vi lingiwila vakongelo, via siata oku pamisa ekolelo lietu.
12 Ukuenje wa lunguka, wa siata oku lekisa epokolo, poku sandeka lika ovina Yehova a situlula. Asongui vatavo esanda, ka va kapeleko olonumbi vioku yuvula epela, kuenda ovituwa via vĩha via siata voluali. Pole, ukuenje wa lunguka wa siata oku eca olonumbi vi tu kuatisa oku yuvula oku litenga voluali lua Satana. Yehova Suku la Yesu Kristu va siata oku sumũlũisa ukuenje wa lunguka oco a tu ĩhe alungulo tu sukila. Omo liaco, tu sukila oku kolela ukuenje wa lunguka. Oco hẽ, tu lekisa ndati okuti, tua kolela kokuaye?
“Tuenda” Lolombuavekua vi Kasi Oku Kuama Kameme
13. Ndomo ocitumasuku ca Sakariya ci lombolola, tu lekisa ndati okuti, tua kolela kukuenje wa lunguka?
13 Elivulu lia Sakariya li tukula ‘alume ekũi’ okuti, vamẽla ‘kulume umue u Yuda,’ loku popia hati: “Tuenda love.” (Tanga Sakariya 8:23.) Omo okuti ‘ulume waco watiamẽla kepata lia va Yudea,’ wa lombolokele ‘omanu valua.’ Koloneke vilo, o lomboloka Akristão olombuavekua va siala palo posi okuti, va ‘Isareli ya Suku.’ (Va Gal. 6:16) “Alume ekũi va tunda kolofeka vialimi osi,” va lomboloka owiñi wakahandangala wolomeme vikuavo. Omo okuti Akristão olombuavekua va siata oku kuama Yesu kuosi a enda, owiñi wakahandangala u kuãivo ongangu yavo. Omo liaco, owiñi wakahandangala ka u sukila oku kuata osõi yoku li situlula okuti, va kasi oku kuatisa akamba vavo olombuavekua va ‘tukuiwa velaleko li kola lia tunda kilu.’ (Va Hev. 3:1) Yesu ka kuetevo osõi yoku tukula olombuavekua hati, “vamanjaye.”—Va Hev. 2:11.
14. Ekuatiso lipi lia siata oku eciwa ku vamanji ya Yesu?
14 Yesu Kristu wa popia hati, nda tua kuatisa vamanjaye, ci lekisa okuti, tu kasi oku eca ekuatiso kokuaye. (Tanga Mateo 25:40.) Vana va lavoka oku kala palo posi, va pondola ndati oku kuatisa olombuavekua? Va ci linga, poku kunda olondaka viwa Viusoma. (Mat. 24:14; Yoa. 14:12) Ndaño etendelo liolombuavekua lia tepuluka palo posi, pole, owiñi wakahandangala u kasi oku livokiya. Vamue pokati ka vana va kuete elavoko lioku kala palo posi, va siata oku litumbika kupange wakundi votembo yosi, oco va kuatise olombuavekua kocikele coku longisa omanu oco va linge olondonge. (Mat. 28:19, 20) Ovo va siata oku eca ovilumba viavo oco vi kuatise kupange waco.
15. Akristão va tenda ndati okulia kuespiritu ku eciwa lukuenje wa kolelua kuenda olonumbi va siata oku eca?
15 Tu tenda ndati okulia kuespiritu kua siata oku sandekiwa lukuenje wa lunguka valivulu a lombolola ovina vi sangiwa Vembimbiliya, kolohongele vimbo kuenda vekongelo? Tua siata hẽ oku eca olopandu kuenda oku kapako ovina tu lilongisa? Tua siata oku tenda ndati olonumbi viukuenje wa lunguka? Nda tua pokola, tu lekisa okuti, tua kolela keliangiliyo Yehova a siata oku linga.—Tia. 3:17.
16. Momo lie Akristão vosi va sukilila oku pokola ku vamanji ya Kristu?
16 Yesu wa popia hati: “Olomeme viange vi yeva ondaka yange. Nda vi kũlĩha, kuenje vi ñuama.” (Yoa. 10:27) Akristão olombuavekua va siata oku pokola kolondaka evi. Nye ci popiwa catiamẽla ku vana va nõlapo oku ‘enda lavo’? Va sukila oku pokola ku Yesu. Va sukilavo oku pokola ku vamanjavo. Momo va tambula ocikele coku songuila afendeli va Suku kuenda oku va tata. Voku pokola kondaka ya vamanji ya Kristu mua kongela nye?
17. Nye ca kongela voku pokola kukuenje wa lunguka?
17 Ukuenje wa lunguka, o lomboloka Osungu Yakulu Yolombangi Via Yehova, va kuete ocikele coku songuila upange woku kunda voluali. Ovo va panga onepa Kakristão olombuavekua va loñoloha kespiritu, kuenda va kuete ocikele coku songuila ovina viosi. (Va Hev. 13:7) Ovo va kasi oku kuatisa kueci ci panda 7.000.000 yakundi Vusoma voluali luosi, va lisanduila kueci ci pitahãla 100.000 kakongelo. Omo liaco, va kuete ocikele coku tẽlisa ‘upange wa Ñala.’ (1 Va Kor. 15:58) Oco tu lekise okuti, tu kasi oku pokola kukuenje wa lunguka, tu sukila oku kuatisa Osungu Yakulu Yolombangi Via Yehova.
Vosi va Pokola Kukuenje wa Lunguka va Sumũlũha
18, 19. (a) Vana va pokola kukuenje wa lunguka vaka tambula onima yipi? (b) Nye tu sukila oku linga?
18 Ukuenje wa lunguka o kuete ocikele coku ‘kokela omanu valua kesunga.’ (Dan. 12:3) Vomanu vaco, mua kongela vana vaka puluka kenyõleho lioluali lulo. Omo liaco, Suku oka va sumũlũisa!
19 Kovaso yoloneke, etendelo lisoka 144.000 kolombuavekua li tukuiwa hati, o ‘Yerusalãi yokaliye, lika ñualehela la Suku kilu ndondombua ya liposuisila veyaye.’ Nye cika pita la vana va pokola kondaka yukuenje wa lunguka? Embimbiliya li popia hati: “Suku eye muẽle, o kala lavo, o linga Suku yavo. Eye o puenya asuelela osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalako vali. Momo ovina viatete via pita.” (Esit. 21:2-4) Omo liaco, tu amamiko loku pokola ku Kristu kuenda kukuenje wa lunguka.
Nye wa Lilongisa?
• Uvangi upi u lekisa okuti, Yehova wa kolela kukuenje wa lunguka?
• Uvangi upi u lekisa okuti, Yesu Kristu wa kolela kukuenje wa lunguka?
• Momo lie tu sukilila oku kolela kukuenje wa lunguka?
• Tu lekisa ndati okuti, tua kolela kukuenje wa lunguka?
[Elitalatu kemẽla 25]
Ove hẽ wa kũlĩha omanu Yehova a nõla oco va linge ndombua Yomõlaye?
[Elitalatu kemẽla 26]
Yesu Kristu wa eca kukuenje wa lunguka ocikele coku tata “cosi a kuete”
[Elitalatu kemẽla 27]
Poku kunda olondaka viwa tu kuatisa vamanji olombuavekua